Misɔ́n mí Ɓáōmɓɛ 10 - Esaa-líat ɛ́ péná

Ŋ̀ɛ́nānɛ́ a Kɔlnéya á Sezaléa

¹ Mut wa á ɓɛ́ɛ́ á Sezaléa nɛ́ Kɔlnéya, ŋ̀kanʼyɛ nlɔŋ á eɓógo ɛ́ sónja á ŋga yáŋlɛ nɛ́ «nlɔŋ á Itália».

² A ŋgí tiŋɓe la Ɔlolómɛ̄ ŋgandag, nyɛ́ la ndáá yɛ́ɛ̄ bíg yéɓe la Ɔlolómɛ̄, bíg kɔn ki nyɛ́ woŋ. Bíg kánɛ nyɛ́ eceg ɛ́sɛ. A ŋgí tíi ki ɓayɛ́ɛ́yɛ́ɛ bí Élōg-Yúda mikaale ŋgandag.

³ Ɔlɔ́ vá, mam mí ŋgɛ́ŋ ɛ́ŋháa ɛ́ ŋgōgó, ɔ ɛ́n binií-bínií áŋgɛl nyí Ɔlolómɛ̄ ɛg níŋgi á ndáá yɛ́ɛ̄, yu yáŋá nyɛ nɛ́: «Á Kɔlnéya».

⁴ Váŋ nɛ̄ a tīŋ yɔ miíh, la nyɛ́ ɔ kɔ̄n woŋ, ɔ pélē yɔ nɛ́: «Ɛtáŋɛ, Yéé ɛ́ ŋgá kɛ ɓé é?» Áŋgɛl yu tímánɛ̄ nyɛ nɛ́: «Ɔlolómɛ̄ a ɔ́ŋɔ míkánɛ mɔ́ɔ, la ŋgandag yɔ́ɔ míkaale wa tí ɓáyɛ̄ɛ̄yɛ́ɛ; la náŋ, āh vólánɛ ɓé wa.

⁵ Jɔ́ hɔ́ nɛ, nyí vɔ́ŋɔ́ɔ, óm ɓot á tísɔn nyí Yópe nɛ́ bí sɔ́la mut wa nɛ́ Símɔn, nyɔ́ a byɛ́ɛ̄ ŋgól nɛ Pétlos.

⁶ Nyɔ́ŋ mut a lɛ̄ ǹcɛn á Símɔn ntám, ǹsál bíkogo bí tít, nyɔ́ a byɛ́ɛ̄ ndáá á ŋgwáāg túwɛ.»

⁷ Ɛnɛ́ áŋgɛl ya mánɛ nyɛ li pɔ́tɛ, yu nyɔ́ŋ. Váŋ nɛ́ Kɔlnéya a yáŋá ɓáɓɔŋle bíɓáa á ɓáɓɔŋle ɓɛ́ɛ́, ɔ yáŋá ki sónja ya nyí ɛ byɛ́ɛ̄ ŋguu ŋyéɓé la Ɔlolómɛ̄, nyí ya ɓēmlé á sí likanʼyɛ jɛ́ɛ́.

⁸ Ɛnɛ́ a máŋlɛ́ ɓɔ mam mísɛ má loo, ɔ óm ɓɔ á tísɔn nyí Yópe.

Ŋ̀ɛ́nānɛ́ a Pétlos á tísɔn nyí Yópe

⁹ Ɛnɛ́ kítí ya yɛ́, nyíŋ sónja la ɓáŋ ɓaɓɔŋle bú nyɔ̄ŋ nzen mikɛ, kasig bí ŋgí siŋgle la tísɔn nyí Yópe, Pétlos ɔ ɓét á líɓɛpɛ́ lí ndáá á míkánɛ, náŋ a ɓɛ́ɛ́ mam mí kɔsi.

¹⁰ Váŋ nɛ̄ nzal ya byée nyɛ, la nyɛ́ ɔ ɓāt lidí. Eceg bí ŋgí ɓoŋhan nyɛ́ lídī, ɔ kū límumé.

¹¹ Váŋ nɛ́ a ɛ́n lóō lú léglan, ɔ mɛ̄mɛ́ jɔ, ɔ ɛ́n yoóm ɛ́ ŋgíla ŋget ɛ́g sɔ́léne wóŋ, yé ɛ́ ɓɛ́ɛ́ kaa ntumbá á líɓato, nɛ́ ɓá byeé á míkāh mínáa, ɛ́g suh á sí.

¹² Jéŋ liɓato lí ɓɛ́ɛ́la patí tít míkoo mínáa ɛ́sɛ, tít ɛ́ ŋga ɔ́ŋgɔ mibum á sí, la anɔn á ŋga pūple á lóō.

¹³ Váŋ nɛ̄ cíŋ ya lága nyɛ nɛ́: «Tɛ́lɛ́ á Pétlos, ól ɔ dī.»

¹⁴ Ndí Pétlos ɔ pélē nɛ́: «M̀ɓá, á Ɛ́tāŋɛ, átɔm nɛ́ káán má byáa mi ɓáág ŋgí lí dí lí yoóm yé écila tɔ yé líbūá tɔ yá!»

¹⁵ Nlemlem á cíŋ wú lāgá sīg-pɛ Pétlos ŋgele ya yáhɛ́ ɛ́ɓáa nɛ́: «Jam Ɔlolómɛ̄ a púɛ, wá ɔ ŋgɔ́ la ɓé jɔ li yaanɛ lí yoóm yé écila.»

¹⁶ Ɛnɛ́ náŋ a ɓɔ̄ŋɓɛ́ ŋgele ɛ́ŋháa, á ékūyá-kúyá jéŋ liɓato lú nyɔŋɓɛ́ á lóō.

¹⁷ Pétlos ɔ cége nɛ a sɔ́ŋtánɛ yé jé jam a sɔ́lé lí ɛ́n lí ŋga mínɛ, ndí āh la ɓé. Múŋ á nyúŋ nlemlem á eceg nɛ́, ɓot Kɔlnéya a ómóó, ɓá bí ŋgí somo ndáá Símɔn voóm asɛ̄, bí ɓɛ́ɛ́ bí tɛ́ɛ́ á ɔ́sū ví líkooká lí kɔ́tá.

¹⁸ Váŋ nɛ̄ ɓá lón joó lí Símɔn la ŋguu, nyɔ́ a byɛ́ɛ̄ ŋgól nɛ Pétlos, á lí yí kíyáɓɛ́nɛ a tɔ́ɔ̄ váŋ á nyúŋ nlɛ́ɛ́.

¹⁹ Kasig Pétlos a ɓɛ́ɛ́ a ŋgí somlág lí sɔ́ŋtánɛ lí yé a ɛ́n, M̀búl Mpúán ɔ lāgá nyɛ nɛ́: «Ɓot bíŋháa bíg somo wa.

²⁰ Suúh hɔ́ vɔ́ŋɔ́ɔ, ɔ nyɔ̄ŋ nzen elɔŋ la ɓɔ́ ɛ́h ɓɛ́ ɓé lí titɓe, átɔm nɛ́ ma nɛ́ ma óm ɓɔ.»

²¹ La Pétlos ɔ sūh ɓɔ li kɔ́p, aá la ɓɔ́ nɛ́: «Ma nyɔ́, ma nɛ́ miní ŋga sómo. Yéé yá sɔ́la ɓɛ́nɛ é?»

²² Bú pélē nyɛ nɛ́: «Kɔlnéya, ŋ̀kanʼyɛ nlɔŋ á eɓógo ɛ́ sónja, mut a tɛ́ɛ́ sim, a ŋga kɔ̄n Ɔlolómɛ̄ woŋ, nyɔ́ lilóm lí Élōg-Yúda lísɛ lí ŋga tíi mbóŋ élāām, nyɛ́ nɛ́ á óm ɓɛ́hɛ. Áŋgɛl Ɔlolómɛ̄ ya yɛ́ɛ́léné nyɛ nɛ́, ɔg nyɛɛ li kɛ á ndáá yɛ́ɛ̄, ɔ máŋlɛ́ nyɛ́ yé ɛ́sɛ ɔ byɛ́ɛ̄ á lí laga lí nyɛ.»

²³ Váŋ hɔ́ nɛ Pétlos a níŋgɛ́ ɓɔ á ndáá la nyɛ́ ɔ lɛ́glé ɓɔ, ɔ nāntɛ́ ɓɔ. Ɛnɛ́ kítí ya yɛ́, Pétlos la apuh á ɓáyēɓe bí Yópe bú kɛ elɔŋ la ɓɔ́.

²⁴ Á ɔ́lɔ̄ ví ŋgí oŋ víŋ, Pétlos ɔ pám á tísɔn nyí Sezaléa, ápah Kɔlnéya, nyɔ́ a yáŋléé m̀biya wɛ́ɛ́ la taŋ yɛ́ɛ́ míwāndá a ŋgí laaŋke ɓɔ́.

²⁵ Eceg Pétlos a ŋgí níŋgi, Kɔlnéya ɔ sɔ́ nyɛ lí kale, la nyɛ́ ɔ kū nyɛ á sí míkoo á lí tama lí nyɛ la adit.

²⁶ Ndí, Pétlos ɔ lágā nyɛ nɛ́: «Byeé ma á wɔ, tɛ́lɛ́, mág mi lɛ já mut-a-binam kaa wa.»

²⁷ Kasig bí ŋgí níŋgi á ndáá bíg kwɛl, Pétlos ɔ kɔ́p éti ecɛ́ŋ ɛ́ tɔ́ɔ̄,

²⁸ ɔ lāgá nɛ: «Ányúū ɓɔɔ́n bí Élōg-Yúda, miníg yí nɛ́, miólan mitám mí ŋgá loo ɓé míŋ nɛ́, li ɓɛ́ liwándá lí ǹcɛn-a-mut ndí tɔ li níŋgi á ndáá yɛ́ɛ̄. Ndí ma, Ɔlolómɛ̄ ag sɔ́le ma lí yíhɛ nɛ́, mah nyɛɛ ɓé ma lí píti tɔ li tɔ́tɔ lí mut tɔ wa.

²⁹ Náŋ nɛ́ a sɔ́la ma á ŋyáŋlán wɔ́ɔ ɛ́h ɓɛ́ ɓé lí titɓe. Nyí vɔ́ŋɔ́ɔ hɔ́, mag somo li yí ányúū yéé wa yáŋlé ma.»

³⁰ La Kɔlnéya ɔ pélē nɛ: «Náŋ a lɛ álɔ̄ áŋháa lɛn, eceg mi ŋgí kánɛ á ŋgɛ́ŋ ɛ́ŋháa ɛ́ ŋgōgó á ndáá yáma, á ékūyá-kúyá, mu ɛ́n mut wa nyɔ́ a jáhɛ́ mbɔ́tí ɛ́ ŋga páa, a tɛ́ɛ́ á ɔ́sū vama,

³¹ a byɛ́la ma nɛ́: ‹Á Kɔlnéya, Ɔlolómɛ̄ a lɛ́glé míkánɛ mɔ́ɔ, āh vólánɛ ɓé ki ŋgandag yɔ́ɔ míkaale wa tí ɓáyɛ̄ɛ̄yɛ́ɛ.

³² Óm hɔ́ mut á tísɔn nyí Yópe á lí yáŋa lí mut wa nɛ́ Símɔn, nyɔ́ a byɛ́ɛ̄ ŋgól nɛ Pétlos nɛ́ a sɔ́ vá. A tɔ́ɔ̄ á ndáá Símɔn ntám, ǹsál bíkogo bí tít, nyɔ́ a byɛ́ɛ̄ ndáá á ŋgwáāg túwɛ.›

³³ Á nlemlem á ŋgɛ́ŋ nɛ ma óm wa lí yáŋa, la wa wu étɛ́ míyaó, á li sɔ́ nɛ ɔ kɔ́p ɓɛ́hɛ. Nyí vɔ́ŋɔ́ɔ, ɓɛ́hɛ ɓá bi tɛ́ɛ́ ɔ́sū vɔ́ɔ, á lí ámble lí yé ɛ́sɛ Nyɔ́ŋ-Ɛsáŋɛ́ a lága wa nɛ́ ɔ lɛ́gɛ́ ɓɛ́hɛ.»

Ŋkwɛl á Pétlos á yóg Kɔlnéya

³⁴ Pétlos ɔ nyɔ̄ŋ mpɔ́t, ɔ lāgá nɛ: «Ma ɛ́n kɔɔ la mbálɛ nɛ́ Ɔlolómɛ̄ ah byɛ́ɛ́ ɓé ndɔ́tlán tɔ ya.

³⁵ Á mílōm mísɛ, tɔ nzáá a ŋga kɔ̄n nyɛ́ woŋ ndí ag ɓɔŋ ki yé ɛ́ tɛ́ɛ́ sim, ag kuh etɔ á ŋgwáāg yɛ́ɛ̄.

³⁶ A ómlé ɓɔ́ɔ̄n bí Íslāɛl njɛn wɛ́ɛ́, wɔ́ nɛ́ á lɛ́ Pɔ́l M̀ɓɛɛŋ nyí nsaŋ li kele la Yésus Kilístus, Nyɔ́ŋ-Ɛsáŋɛ́ a ɓot bísɛ.

³⁷ Miníg yí nɛ́, nyíŋ pɔ́l ya cáman á Yúdēa yɔ ɛsɛ̄, ya ɓōtléné á Galiléa, ámbúh nzoɓan Yohánɛs a ŋgí lɛgɛ.

³⁸ Miníg yí nɛ́, nyɔ́ Yésus a Názalɛt, Ɔlolómɛ̄ a kúúlé nyɛ ŋguu la M̀búl Mpúán. A ŋgí ɓɔ̄ŋ m̀ɓɛɛŋ á ɓávoóm bísɛ a ŋgí loole, ag tɔɔyɛ ɓot bísɛ mbólí, ɓá ǹsɔhɔ a vá á sí likanʼyɛ jɛ́ɛ́, ányúū nɛ Ɔlolómɛ̄ a ɓɛ́ɛ́ la nyɛ́.

³⁹ Ɓɛ́hɛ ɓatám, bi lɛ mbóŋ nsɔ́n wɛ́ɛ́ á míkɔŋ mí Élōg-Yúda nlemlem la á Yélūsalɛm. Nyɔ́ Yésus ɓá ól eceg bí panhɛ́ɛ́ nyɛ́ á mbásá,

⁴⁰ Ɔlolómɛ̄ a pāhyɛ́ nyɛ á ɔlɔ́ vá yáhɛ́ áŋháa, ɔ ɓɔ̄ŋ ki nyɛ́ nɛ a étɛ́ nyɛ́-mɛ̄n

⁴¹ ah ɔ́sū ví ɓot bísɛ ɓé, ndí ɔ́sū ví ɓɛ́hɛ ɓá Ɔlolómɛ̄ a dúgú lí pɔhɔ kaa mbóŋ, ɓɛ́hɛ ɓá ɓaá dí, bu nyú élɔŋ la nyɛ́ ámbúh lipahye jɛ́ɛ́ á póla ɓá ɓā wú.

⁴² Á lísūg, ɔ tí ɓɛ́hɛ ndag nyí li camanɛ lí pɔ́l á lílōm lísɛ la li tíi lí nyí mbóŋ nɛ, nyɛ́ nɛ́ Ɔlolómɛ̄ a tɛ́ɛ́yɛ́ kaa ŋ̀kááhɛ a ɓot bí lɛ́ á éniŋ elɔŋ la ɓá ɓā wú.

⁴³ Nyɛ́ nɛ́ ɓapɔ́tle-bí-Ɔ́lolómɛ̄ bísɛ bí ŋga tíi nyí mbóŋ nɛ: ‹Tɔ nzáá a byɛ́ɛ̄ ŋyéɓé la Nyɛ́, ag kɛ li kuh lí élaakɛ-miɓé á jóō jɛ́ɛ́›.»

M̀búl Mpúán ag suhle ɓot bí sē ɓé ɓɔ́ɔ̄n bí Élōg-Yúda

⁴⁴ Kasig Pétlos a ɓɛ́ɛ́ a ŋgí máŋlag nyíŋ pɔ́l, M̀búl Mpúán ɔ sūhlé ɓot bísɛ bí ámbléé yéŋ Eɓaŋgá.

⁴⁵ Ɓayéɓe bí Élōg-Yúda ɓá bí ɓɛ́ɛ́ élɔŋ la Pétlos bú nyág nɛ, milóm mí sē ɓé mí mí Élōg-Yúda má kuh M̀búl Mpúán kaa líkaale.

⁴⁶ Náŋ nɛ̄ a yíglé ɓɔ li ámble lí ɓáŋ ɓot bíg pɔ́t ɓacɛn bí mípɔ̄t mí mí ŋgá yílɛ ɓé á lí ɓégɛ lí Ɔlolómɛ̄. La Pétlos ɔ nyɔ̄ŋ sīg-pɛ mpɔ́t, a byɛ́ nɛ́:

⁴⁷ «Ɓaá, mut ag la li suŋɛ lí ɓá ɓot ɓá kūh M̀búl Mpúán kaa ɓɛ́hɛ nɛ́ bíh kuhúg ɓé nzóɓan mindím é?»

⁴⁸ Váŋ hɔ́ nɛ Pétlos a tí kundɛ nɛ́ bí tí ɓɔ́ nzóɓan á jóō lí Yésus Kilístus. Ɓáŋ ɓot bú sɔ́hyé nyɛ nɛ́ a kóndyé sīg-pɛ lí tɔɔ la ɓɔ́ puh álɔ̄.