Elōg-Kɔlínto 2 9 - Esaa-líat ɛ́ péná

Ŋkomanɛ́ a mikaale nyɔ́ a ɓot bí Kɔlínto

¹ Á élōgyāŋ, nsɛ́ŋ á sē ɓé pɛ nɛ́ mi cíílé ɓɛ́nɛ likɔlɓan la ŋkomanɛ́ a mikaale máná ányúū ndog-Ɔlolómɛ̄ nyí ɛ lɛ̄ á Yélūsalɛm.

² Mag yí míɔ̄ŋɔ mí m̀ɓɛɛŋ miní byɛ́ɛ̄. Miní lɛ́ mā éwāhlé-ŋgáŋ á yóg ɓot bí Masedónia. Mi ŋgí laga ɓɔ́ nɛ́: «Li ɓotle lí m̀bú wá loo, ndog-Ɔlolómɛ̄ nyí epah ékombo yé Ákāyi ɛ lɛ́ m̀ɓoŋhágan á yé ɛ́ ŋga légɓe mikaale máɓá,» la ki nɛ́ akwáá wáná ɓɛ́nɛ ɓá bí Kɔlínto wá pógɛ́ jógo licɛ́ŋ lí Bíɓasɛ.

³ Mag óm élōgétāŋ a yóg yāná á lí ɓɔŋ nɛ́ eyát mi byɛ́ɛ́ ányúū yāná ɛ́h ɓɛ́ɛ́g ɓé yɛmɛ́ jām likɔlɓan la nyúŋ ŋkwɛl á míōŋgánɛ, la ki nɛ́ ákaa mi ŋgí laga, miní ɓɛ́ kɔɔ m̀ɓoŋhágan á yé ɛ́ ŋga légɓe mikaale máná.

⁴ Ákaa ɛ́sɛ, woŋ wáma a lɛ́ nɛ́, kí ɓot bí Masedónia ɓá sɔ́ élɔŋ la ma, ndí ɓá kɔ́p nɛ Miní sē ɓé m̀ɓoŋhágan, yéŋ elɔ́ŋgɔ lípitá bi byɛɛ́ la ɓɛ́nɛ ɛ́h timkágán ɓé lí ɓɛ́ lí ɔ́sɔ̄n ányúū yāhá ndí miíh síi ɓé ma ɓɛ́nɛ.

⁵ Ányúū náŋ hɔ́ nɛ́ ma ɛ́n nsɛ́ŋ nɛ mi dúgɛ́ elōgétāŋ a yóg yāná, nɛ́ miní ɓōŋhán mikaale maná mí miní kakáánɛ la elɔ́ŋgɔ m̀mím. Váŋ, bíg kɛ li ɛ́n nɛ́ miníg tíi la elɔ́ŋgɔ m̀mím ɛ́h ɓɛ́ ɓé lí tám lí tɔ̄ jam.

⁶ Yíán hɔ́ nɛ: nyɔ́ la nyɔ́ a ŋga sál puh, ag kɛ li pumu lí puh, nyɔ́ la nyɔ́ ki a ŋga sál ŋgándag, nyɛ́g ag kɛ li pumu lí ŋgandag!

⁷ Mut sig a tí hɔ́ yé a súgɛ́ á m̀mím wɛ́ɛ́, ɛ́h ɓɛ́ ɓé lí tám tɔ ŋkágyɛ́ɛ, átɔm nɛ́ Ɔlolómɛ̄ ag diŋ mut a ŋga tíi la mivag.

⁸ Ɔlolómɛ̄ a byɛ́ɛ́ ŋguu li kúúle lí ɓɛ́nɛ patí míkaale ɛ́sɛ nɛ́ ndí miní kondyé lí ɓɛ́la lí yé ɛ lɛ́ nsɛ́ŋ éceg ɛ́sɛ, la ki nɛ́ miní kondyé sīg-pɛ yɔ́ lí ɓɛ́la nlohanɛ́ ányúū misɔ́n mí m̀ɓɛɛŋ mísɛ.

⁹ Átɔm nɛ́ yá ciiɓɛ́ nɛ: «Ag kúúle ɓot bí ŋgɔ́ɔ́ míkaale, etɛ́l-sim yɛ́ɛ́ ɛ́h byɛ́ɛ́ ɓé lísūg.»

¹⁰ Ɔlolómɛ̄ nɛ a ŋga tíi m̀ɓɛl-mbóó, mbóó nsɔ́n la ekɔgá yé lí dí, nyɛ́ ki nɛ́ a ŋga kɛ́ ɓɛ́nɛ li tíi lí mbóó, a búlɛ̄ yɔ, nɛ́ ndí mitám ɛ ŋga tíi mí étɛ́ etɛ́l-sim yáná.

¹¹ Á pánd ɛ́sɛ, ag kɛ ɓɛ́nɛ li byaŋɓɛ a mam mísɛ, nɛ́ ndí á tɔ yɔɔ́yɔ́ɔ eceg miní étɛ́ elɔ́ŋgɔ m̀mím yáná. La náŋ, ŋgandag ɓot ɛ́g kɛ li tíi lí Ɔ́lolómɛ̄ mítamlan ányúū mikaale bi ŋga kɛ́ ɓɔ́ li tíi á jóō jáná.

¹² Ákaa ɛ́sɛ, nsɔ́n a nyɔ́ŋ ŋkomanɛ́ a mikaale wáh nyɛɛ ɓé já lí ɓɛ́ ányúū li sɔ́la lí ndog-Ɔlolómɛ̄ yé ɛ byɛɛ́ kóó, ndí wá nyɛ́ɛ ki li ɓɔŋ nɛ́ ɓot bí loohan lí tíi lí Ɔ́lolómɛ̄ mítamlan.

¹³ Kasig ɓot bí ŋga kɛ́ li séme lí nyúŋ nsɔ́n á nyaa wá ɓɔŋɓɛ, bíg kɛ li tíi lí Ɔ́lolómɛ̄ lípēm ányúū eógle miní ŋga étɛ likɔlɓan la Pɔ́l M̀ɓɛɛŋ nyí Nyɔ́-a-Pɔ́hlɛ la ányúū elɔ́ŋgɔ m̀mím yáná yé lí kaan lí míɓɛɛŋ elɔŋ la ɓɔ́ ndí elɔŋ la ɓáŋá bísɛ ki.

¹⁴ Ányúū nlohanɛ́ a ediŋ Ɔlolómɛ̄ a étɛ ányúū yāná, bíg kɛ ɓɛ́nɛ li étɛ lí ékɔ̄ɔ̄ yáɓá la mikánɛ máɓá ányúū yāná.

¹⁵ Mitamlan la Ɔlolómɛ̄ ányúū likaale jɛ́ɛ́ lí ŋgíla ŋget!