Elōg-Kɔlínto 2 6 - Esaa-líat ɛ́ péná

¹ Á élōgyāŋ, kasig bi ŋga sál élɔŋ la Ɔlolómɛ̄, biíg sɔ́hye ɓɛ́nɛ nɛ́ miníh yaanɛ́gɛ́ ɓé likaale lí Ɔlolómɛ̄ maná kuh ákaa yɛmɛ́ jām.

² Ányúū nɛ ag laga nɛ́: «Mi ámbléé nzag yɔɔ á éceg m̀ɓɛɛŋ, á ɔ́lɔ̄ ví lísuŋga, mi sɔ́ɔ́ wā lí tɔ́hɔ.» Nyí vɔ́ŋɔ́ɔ, eceg m̀ɓɛɛŋ yé. Nyí vɔ́ŋɔ́ɔ, ɔlɔ́ ví lísuŋga ví.

³ Ákaa ɛ́sɛ, bi ŋgá somo ɓé ɓɛ́hɛ nɛ́ jam tɔ já lí ɓɛ́ ɔɓag ányúū mut tɔ wa, á lí ɓɔŋ nɛ́ nsɔ́n wáhá á ɓɛ́ ŋgíla ɔnɛ́g.

⁴ Á mveŋghanɛ́, biíg tɛ́lɛ ɓɛ́hɛ-mɛ̄n kaa ɓáɓɔŋle bí Ɔ́lolómɛ̄ á mam mísɛ, ɓá bí ŋga ɔ́hánɛ átē a ŋgandag kɔkɔ, ɓá bí ŋga ɔ́hánɛ ndutu, mivíhá, woŋ ǹcɛ́ŋ,

⁵ eɓom, miɓog, mpuŋgú ǹcɛ́ŋ, etɔmb, etɔɔ-pɛɛ, la etɔɔ-nzal.

⁶ Biíg étɛ nɛ́ bi lɛ ɓáɓɔŋle bí Ɔ́lolómɛ̄ á lí ɓɛ́ ŋgíla ɔnɛ́g, á lí ɓɛ́la lí taŋ-taŋ eyí, ányúū eɔ́hánɛ yáhá, ányúū elɔ́ŋgɔ m̀mím li loole la M̀búl Mpúán nyɔ́ a ŋga sál átē wāhá, ányúū taŋ yahá ediŋ,

⁷ ányúū mbálɛ bi ŋga lɛ́gɛ li oŋle la ŋguu Ɔlolómɛ̄, li oŋle la yé ɛ́sɛ ɛ́ tɛ́ɛ́ sim ɔ́sū vɛ́ɛ́, á lí óŋgánɛ lí ɓɛ́hɛ li du la li suŋ lí ɓɛ́hɛ-mɛ̄n.

⁸ Biíg étɛ nɛ́ bi lɛ ɓáɓɔŋle bí Ɔ́lolómɛ̄ ɛ́ ɓɛ́ átē a lipém tɔ átē a ŋyaŋ, á jóō lílāām tɔ á jóō líɓē. Tɔ náŋ ákaa bí ŋga nyɔ̄ŋ ɓɛ́hɛ káa ɓot bí mínaa ndí kí biíg laga mbálɛ,

⁹ tɔ náŋ ákaa bí ŋga nyɔ̄ŋ ɓɛ́hɛ kaa ɓot bí ŋgá yílɛ ɓé ndí kí biíg yílɛ m̀ɓɛɛŋ, bíg nyɔŋ ɓɛ́hɛ kaa miwúág mí ɓot ndí kí bi lɛ á eniŋ, bíg nyɔŋ ɓɛ́hɛ kaa ɓot ɓá kɔ́ghɛ ndí ɓɛ́hɛ, biíh wúág ɓé ɓɛ́hɛ

¹⁰ bíg nyɔŋ ɓɛ́hɛ kaa miályāg mí ɓot ndí kí bi ɓáág jā mívag la mivag, bíg nyɔŋ ɓɛ́hɛ kaa ɓayɛ́ɛ́yɛ́ɛ ndí kí ɓɛ́hɛ nɛ́ bi lɛ ɓábyaŋɓɛ ɓot, bíg nyɔŋ ɓɛ́hɛ kaa ɓot bí ŋga yɛ́ɛ́ jóō nɛ́ jam ndí kí ɓɛ́hɛ nɛ́ bi byɛɛ́ mam mísɛ!

¹¹ Á élōgyāŋ, ɓaá kwɛlɛ́ ɓɛ́nɛ ɛ́h ɓɛ́ ɓé lí sɔ́ɔ lí ɓɛ́nɛ jam tɔ já. Á ɓot bí Kɔlínto, ɓaá áhyéné ɓɛ́nɛ mimím máhá ŋgandag.

¹² Ɓɛ́hɛ, ɓaá étɛ́ ɓɛ́nɛ ediŋ yáhá, ndí ɓɛ́nɛ nɛ́ maná leg mímīm máná á lí lɛ́gle lí yɔ̄.

¹³ Mag kwɛlɛ ɓɛ́nɛ kaa ɓɔɔ́n ɓáma, ɓɔŋán kaa ɓɛ́hɛ, ɓɛ́nɛ ki leglán mímīm máná.

Li ɓáglan la byoóm bí líbūá

¹⁴ Miníh byáŋág ɓé élɔŋ la ɓot bí ŋgíla ŋyéɓé. Ɓaá wɔɔ́wɔ́ɔ ŋ̀atanɛ́ a lɛ á póla etɛ́l-sim la aɓé é? Á póla mipúú la livito é?

¹⁵ Ɓaá wɔɔ́wɔ́ɔ ŋ̀ámblānɛ́ a ŋga lā li ɓɛ́ á póla Nyɔ́-a-Pɔ́hlɛ la Sátan é? Ɓaá mut a yéɓe la Ɔlolómɛ̄ la nyɔ́ āh yéɓe ɓé bíg la li byáŋ lí élɔŋ é?

¹⁶ Ɓaá yéé ndáá-ēcɛ́ŋ-Ɔlolómɛ̄ la bisát bí byɛ́ɛ̄ élɔŋ é? Á mbálɛ, ɓɛ́hɛ bi lɛ ndáá-ēcɛ́ŋ-Ɔlolómɛ̄, Loó lí éniŋ ákaa nyɛ́-mɛ̄n a ŋga pɔ́t nɛ́: «Mag kɛ li tɔɔ á póla yaɓá, mi wɛ́ɛ́ ki la ɓɔ́, mag kɛ li ɓɛ́ lí Lōó jáɓá, ɓɔ́g bí ɓɛ́ lilóm jáma.»

¹⁷ Nyɔ́ŋ-Ɛsáŋɛ́ Ɔlolómɛ̄ ag lága ki nɛ́: «Ɓógyán hɔ́ á élɔŋ ɛ́ ɓáŋ ɓot, miní nɛ́ŋɛ̄ la ɓɔ́, miníh siiɓágán ɓé yoóm lívīn tɔ yá yé ɛ́ byɛ́ɛ̄ libúá. Váŋ, mag kɛ ɓɛ́nɛ li lɛ́gle.

¹⁸ Mag kɛ li ɓɛ́ lí ɛ́sɔ̄ŋɛ́ wāná, ɓɛ́nɛ ki miní ɓɛ́ ɓɔɔ́n ɓáma bí páam la ɓá bí ŋgɔn. Ma, Nyɔ́ŋ-Ɛsáŋɛ́ a ŋguu mísɛ nɛ́ mi ŋga pɔ́t.»