Elōg-Kɔlínto 2 3 - Esaa-líat ɛ́ péná

Ɓaɓɔŋle bí Ésaa-líat ɛ́ péná

¹ Á élōgyāŋ, ɓaá, biíg timan sīg-pɛ li tɛ́lɛ ɓɛ́hɛ-mɛ̄n ɔ́sū váná á lí tíi lí mbóŋ yāhá é? Tɔ nɛ́ ákaa ɓot ɓatám, ɓā nyɛɛ́ ɓɛ́nɛ li étɛ lí káati ɛ ŋga tíi mbóŋ yāhá, tɔ nɛ́ ɓɛ́nɛ li tíi lí ɓɛ́hɛ yɔ é?

² Ɓɛ́nɛ nɛ́ miní lɛ́ káati ɛ́ ŋga tíi mbóŋ yāhá, nyí ya cíiɓɛ́ á mímīm máhá, nyí ɛ ŋga yílɛ, la nyí ya sɔ́ŋglɛ́ la ɓot bísɛ.

³ Á mbálɛ, miní lɛ́ káati nyí Nyɔ́-a-pɔ́hlɛ a cíi, nyí ya tíéɓɛ́ ɓɛ́hɛ ányúū nsɔ́n wáhá. Nyíŋ káati yāh ciiɓɛ ɓé la tíŋtɛ, ndí ya cíiɓɛ́ la M̀búl nyú Ɔ́lolómɛ̄ Loó lí éniŋ. Nyíŋ káati yāh ciiɓɛ ɓé á tááfɛl ɛ́ ŋgɔg, ndí ya cíiɓɛ́ á míson máná mí nyúū náŋ ɛnɛ á mímīm máná.

⁴ Náŋ nɛ́ a lɛ lípitá bi byɛɛ́ ɔ́sū ví Ɔ́lolómɛ̄ li loole la Nyɔ́-a-Pɔ́hlɛ.

⁵ Bi ŋgá la ɓé ɓɛ́hɛ li sɛgɓan nɛ́ biíg ɓɔŋ náŋ la ŋguu yahá ɓɛ́hɛ-mɛ̄n, ndí la ŋguu Ɔlolómɛ̄ nɛ bi ŋga ɓɔ̄ŋ yé bi ŋga ɓɔ̄ŋ.

⁶ Nyɛ́ nɛ́ a yáanɛ́ ɓɛ́hɛ ɓá bí kɔ́ɔ̄ lí ɓɛ́ lí ɓáɓɔŋle bí Ésaa-líat ɛ́ péná, ah jé ɓé lí ŋga ōŋle mbéndá nyí ya cíiɓɛ, ndí jé lí M̀búl Mpúán, átɔm nɛ́ mbéndá ya cíiɓɛ ɛg óm á nyɛmb, ndí M̀búl Mpúán ag tíi eniŋ.

⁷ Ndí, kíyáɓɛ́nɛ mbéndá, nyí ɛ ŋgí óm á nyɛmb, nyí ɛ ciiɓɛ́ɛ á tááfɛl ɛ́ ŋgɔg ɛ ɓɛ́ɛ́la lipém, jé lí ŋgí la ɓé lí yígle lí ɓɔ́ɔ̄n bí Íslāɛl, nɛ́ bí légɓé Móse á ɔ́tat-ví-mbɔm ányúū yéŋ epaa yɛ́ɛ́, tɔ náŋ ákaa ɛ́ ŋgí ɓem ɓé,

⁸ ɛbuu-la-ŋgele yáŋvéé la nsɔ́n nyú á M̀búl Mpúán á ŋga ɓɛ́la lípēm é?

⁹ Ákaa ɛ́sɛ, kíyáɓɛ́ ki kɔɔ nɛ́ nsɔ́n á ŋga óm á ékɔ́ghɛ á ɓɛ́ɛ́la lipém, ɛbuu-la-ŋgele yáŋvéé la nyú á ŋga óm á étɛ̄l-sim ɔ́sū ví Ɔ́lolómɛ̄ é?

¹⁰ Jɔ́ nɛ́, yé ɛ́sɛ ki ɛ́ kūhúú lípēm, lipém jɛ́ɛ́ líg sááɓan ɔ́sū ví jé lipém lí ŋgíla ŋget.

¹¹ Ákaa ɛ́sɛ, kíyáɓɛ́nɛ byoóm bí ŋga lóo byá kūh lípēm, ɛbuu-la-ŋgele yáŋvéé la bí bí lɛ́ á ɓog-la-m̀ɓá é?

¹² Kasig bi byɛɛ́ nyíŋ nyaa lipitá, ányúū náŋ nɛ́ bi ŋgá kɔn ɓé woŋ tɔ wá.

¹³ Bi ŋgá ɓɔŋ ɓé ɓɛ́hɛ kaa Móse, nyɔ́ a ŋgí bútyɛ asú la liɓato á lí pún nɛ́ ɓɔɔ́n bí Íslāɛl bíh ɛ́nɛ́g ɓé mísūg mí épaa yé ɛ́ ŋga lóo.

¹⁴ Ndí eyí yáɓá ɛ́ tūŋɓéé. Tɛɛla nyí lɛn, nyúŋ nlemlem á líɓato á ŋgí bútyɛ́gɛ́ ɓɔ́ míōgá eceg bí ŋga sɔ́ŋgɔ kálati yí Esaa-líat ɛ́ Kwaŋ. Kɛ́m, jéŋ liɓato líh mɓógyág ɓé, átɔm nɛ́ la Nyɔ́-a-Pɔ́hlɛ nɛ́ lí ŋga ɓógo ányúū ɓá bí ŋga kɛ́ li at la nyɛ́.

¹⁵ Ɔɔ, tɛɛla nyí lɛn, eceg sig ɓɔɔ́n bí Íslāɛl bí ŋga sɔ́ŋgɔ kálati yí Móse, liɓato já líg bútyɛ mimím máɓá.

¹⁶ Ndí, li yaan á yóg Nyɔ́ŋ-Ɛsáŋɛ́ nɛ lí ŋga kɔ́hɔ jéŋ liɓato.

¹⁷ Kasig Nyɔ́ŋ-Ɛsáŋɛ́ a lɛ M̀búl, ányúū náŋ nɛ́, ápah M̀búl á Nyɔ́ŋ-Ɛsáŋɛ́ a lɛ, váŋ ki nɛ́ kundɛ ɛ lɛ.

¹⁸ Ɓɛ́hɛ bísɛ hɔ́ ɓá misú mí áhɛ́, epaa yé Nyɔ́ŋ-Ɛsáŋɛ́ ɛ́g ɛ́nyéné á nyuú yáhá kaa á élembán. Jɔ́ hɔ́ nɛ, kaa Nyɔ́ŋ-Ɛsáŋɛ́ a lɛ M̀búl, a yaanɛ́ ɓɛ́hɛ nlemlem ákaa nyɛ́, átē a lipém jé lí ɓáág já lícɛ̄ŋɛ́ la licɛ́ŋɛ́.