Elōg-Kɔlínto 2 11 - Esaa-líat ɛ́ péná

Póol ag étɛ ɓatɛ́ŋgánɛ nyɛ́ nɛ́ nsɔ́n wɛ́ɛ́ á lɛ́ tāŋ

¹ Wɛɛ́ʼɛ̄! Á élōgyāŋ, ki ɓɔ̄ŋ nɛ́ miní ŋga la tɔ li ɔ́hánɛ lí bíjōŋ byáma tɔ pupúhú ná. Ɔɔ é, sóon miní ɔ́hánɛ ma!

² Mag kɔ́ɔ́ ɓɛ́nɛ ŋgandag, nlemlem kaa yé Ɔlolómɛ̄ a ŋga kɔ́ɔ́ ɓɛ́nɛ. Ma víŋléné ɓɛ́nɛ páam yāhya, yɔ nɛ́ ɛ lɛ̄ Nyɔ́-a-Pɔ́hlɛ, mu kɛ́lā ɓɛ́nɛ ɔ́sū vɛ́ɛ́ kaa ŋgɔn-mindígá nyí ɛ ŋgí lɛ kɔɔ kɔ́njí.

³ Ndí, mag kɔn woŋ nɛ́, kaa nyɔ ɛ lɔ́ɔ́ndéé Éva la micaŋg mɛ́ɛ́, miɔ́ŋɔ máná ki mí táág kɔ́tɔ́ la mɔ́ mí nɛ̄ŋɓɛ́ taŋ yaná ekɔ́ɔ́ maná nyɛɛ́ lí ɓɛ́la la Nyɔ́-a-Pɔ́hlɛ.

⁴ Ákaa ɛ́sɛ, mut a ŋga dúgú lí sɔ́ á lí lɛgɛ lí ɓɛ́nɛ Yésus ntám amáh sig nyɔ́ ɓaá lɛgɛ́ ɓɛ́nɛ, tɔ nɛ́ maná lɛ́glé éyī etám yé ɛ́ lɛ́ mveŋghanɛ́ la yé maná kuh, tɔ nɛ́ Pɔ́l M̀ɓɛɛŋ etám, amáh sig nyí maná lɛ́gle, miníg ógle nyɔ́ŋ mut m̀ɓɛɛŋ ŋgandag.

⁵ Ndí mag ɔ́ŋɔ yágá ki nɛ́ yíŋ tāŋ yáná ɓáōmɓɛ ɛ́ ŋgá loo ɓé mā lā tɔ jam.

⁶ Ɔɔ, mag yí nɛ́ mi ŋgá yí ɓé ma ŋkwɛl, ndí ányúū li ɓɛ́la lí taŋ-taŋ eyí, jam litám jéŋ. Á mam mísɛ la á pánd ɛ́sɛ, ɓaá étɛ́ ɓɛ́nɛ nɛ́ bi byɛ́ɛ́ taŋ-taŋ eyí.

⁷ Ɓaá, ma ɓɔ̄ŋ áɓē á lí suhɛ lí mā-mɛn nɛ́ ndí mí ɓétɛ́ ɓɛ́nɛ eceg mi ŋgí lɛgɛ ɓɛ́nɛ Pɔ́l M̀ɓɛɛŋ nyí Ɔlolómɛ̄ yɛmɛ́ é?

⁸ Ma nyɔ̄ŋ míōŋgánɛ mí bíŋí Bíɓasɛ bí ŋgí tíi ma, mu yéɓé nɛ́ bí tí ma yé ɛ́ kɔ́ɔ̄ mā lí niŋɛ ányúū li ɓɔŋle lí ɓɛ́nɛ.

⁹ Eceg mi ɓɛ́ɛ́ á mítīg kí mi lɛ á yóg yāná, māh díéle ɓé ma mut tɔ wa, átɔm nɛ́ elōgétāŋ yé yá sɔ́léné á Masedónia yá sáɓáŋgánɛ́ yé ɛ́sɛ ɛ́ mɓɛ́ ma kóó. La ki nɛ́, á mam mísɛ, ma nyɔ̄ŋ éceg nɛ́ mih ɓɛ́ɛ́g ɓé ma mbɛgɛ ányúū yāná, mi ŋgí nyɔŋɔ́g ki eceg á lí ɓɔŋ náŋ m̀ɓɛɛŋ.

¹⁰ Li kele la mbálɛ nyí Nyɔ́-a-Pɔ́hlɛ ɛ lɛ átē wama, mag téétɛ ɓɛ́nɛ li laga nɛ́, mut tɔ wa a ŋgá kɛ ɓé ma lí ɓógtɛ lí yéŋ eyát á míkɔŋ mí Akáyi.

¹¹ Ɓaá, ányúū yéé é? Ányúū nɛ mi ŋgá diŋ ɓé ma ɓɛ́nɛ é? Ɔlolómɛ̄ ag yí nɛ́ mag diŋ ɓɛ́nɛ!

¹² Yé mi ŋga ɓɔ̄ŋ, mi ŋgí ɓɔŋɔ́g yɔ́ nɛ́ ndí mi ɓógtɛ́ miɔ́ŋɔ mísɛ mí ɓá bí ŋga yáta nɛ́ bí lɛ́ nlemlem kaa ɓɛ́hɛ.

¹³ Ɓáŋ ɓot bí lɛ́ ɓáōmɓɛ bí mínaa, ɓaɓɔŋle ɓaɓé, ɓá ɓá sɔlɓéné á líɓɛ́ɛg lí ɓáōmɓɛ bí Nyɔ́-a-Pɔ́hlɛ.

¹⁴ Náŋ a ŋgá nyágɛ́ ɓé tɔ mut átɔm nɛ́ Sátan nyɛ́-mɛ̄n a sɔ̄lɓéné á líɓɛ́ɛg lí áŋgɛl nyí mipúú.

¹⁵ Náŋ a lɛ ki jā puh jam, ányúū ɓaɓɔŋle ɓɛ́ɛ́ nɛ bí sɔ̄lɓéné á líɓɛ́ɛg lí ɓáɓɔŋle bí ŋga sál ányúū etɛ́l-sim. Lisúg jáɓá líg kɛ li punan la misɔ́n máɓá.

Bisɔghe Póol a ɔ́hánɛ́ kaa ŋ̀ómɓɛ

¹⁶ Mag laga sīg-pɛ nɛ́, mut tɔ wa ah ɔ́ŋlág ɓé nɛ mag kɔn nzeg, ndí kíyáɓɛ́nɛ miníg nyɔŋ mā kaa ŋ̀kɔn-nzeg, yéɓyán nɛ́ mág mi lā li yáta puh.

¹⁷ Yé mi ŋga kɛ́ li pɔ́t, mi ŋgá pɔ́t ɓé ma yɔ́ li oŋle la nsom á Nyɔ́ŋ-Ɛsáŋɛ́, ndí mag pɔ́t yɔ́ kaa ŋ̀kɔn-nzeg ǹcɛ́ŋ, la lipitá nɛ mí ɓɛ́ mag yátɓéne múŋ.

¹⁸ Kasig ŋgandag ɓōt ɛ́ ŋga yáta ányúū eɓɛ́lé yáɓá yé ɓot-bí-bínam, mág mag yátɓéne á yéŋ eɓɛ́lé.

¹⁹ Ɓɛ́nɛ ɓá miní byɛ́ɛ̄ éyī, la mivag mísɛ, miníg yéɓe ɓá ɓá jáŋɛ́ éyī.

²⁰ Miníg yéɓe nɛ́ bí yáanɛ́ ɓɛ́nɛ miyɔ́ŋ, nɛ́ bí tɔ́l ɓɛ́nɛ, nɛ́ bí ɔ́lɔ́ yé ɛ́sɛ miní byɛ́ɛ̄, nɛ́ bí yɔ́l ɓɛ́nɛ, nɛ́ bí lɔ́g ɓɛ́nɛ á ásū.

²¹ Mag kɔn ɔsɔ́n lí pɔ́t náŋ, ɔ́ŋgɛn ɓaá loohán lí ɓɛ́ lí mítɔt. Yé mut a ŋga ɓáá m̀mím lí pɔ́t, mág mag ɓáá m̀mím lí pɔ́t lí yɔ̄, mag pɔ́t yɔ́ ákaa ŋ̀kɔn-nzeg.

²² Kíyáɓɛ́nɛ bí lɛ́ ɓɔ́ɔ̄n bí Élōg-Hébɛl, mág mi lɛ nyɛ́! Kíyáɓɛ́nɛ bí lɛ́ ɓɔ́ɔ̄n bí Íslāɛl, mág mi lɛ nyɛ́! Kíyáɓɛ́nɛ bí lɛ́ mbóta nyí Áblaháam, mág mi lɛ́ yɔ̄!

²³ Ɓaá, ɓáŋ ɓot bí lɛ́ ɓáɓɔŋle bí Nyɔ́-a-Pɔ́hlɛ é? Má mi lɛ̄ m̀ɓɔŋle wɛɛ́ li loo lí ɓɔ̄, mág pɔ́t ákaa ŋ̀kɔn-nzeg! Ma sál mísɔ̄n mí ŋguu li loo lí ɓɔ̄, ma ɓɔ̄ŋ miɓog li loo lí ɓɔ̄, ma ɓōmɓɛ́ nlohanɛ́ lí loo lí ɓɔ̄, ma véé nyɛ̄mb ŋgele ŋgandag li loo lí ɓɔ̄!

²⁴ Ŋgele ɛ́táan, ɓɔɔ́n bí Élōg-Yúda ɓá lɔ́g mā muúmíŋháa mí áso la ɛbuu,

²⁵ Ŋgele ɛ́ŋháa bú wáh mā nyúū la aso, bú úm mā ŋgɔg ŋgele ya, mu yín ŋgele ɛ́ŋháa, mu lóɛ̄ nzámuh ya la díɓe já á míndīm.

²⁶ Biceg byá, mu wɛ́ɛ la mikoo li kɛ á múwɛ, mu véé nyɛmb á ásōō, mitɔnɓa mú pámlé ma, elōgétāŋ yáma, yé Élōg-Yúda yú sōmlé mā áɓē, ɓá bí sē ɓé ɓɔ́ɔ̄n bí Élōg-Yúda ɓɔ́g bú sōmlé mā áɓē, aɓé wú pámlé mā á tísɔn, wú pámlé mā á éyāŋ wú pámlé mā á túwɛ, wú pámlé mā la ɓá bí ŋga yɛ́ɛ nɛ́ bi lɛ̄ línyaŋ!

²⁷ Ma sál mísɔ̄n mí ŋga tɔ̄mbhan la mí mí ndútu, biceg byá ma tɔ́ɔ́ pɛ́ɛ, ma tɔ́ɔ̄ nzal la evéhé, biceg bitám mu ɓɔ̄ŋ étɔɔ-nzal á ŋkágán, ma ógtán ávɔ̄l, mbɔ́tí yú yɛ́ɛ́lé mā,

²⁸ ɛ́h ɓɛ́ ɓé lí sɔ́ŋgɔ lí bíŋí bísɛ byá pámlé ma. Jam mi byɛɛ́ á míɔ̄ŋɔ ɔ́lɔ̄ sig lí lɛ́ nɛ́, tín-tín mi nyɔ̄ŋ eceg la biɓasɛ bísɛ.

²⁹ Nzáá a ɓɔ̄t ndí māh ɓɔt ɓé élɔŋ la nyɛ́ é? Nzáá a ku á míceglan ndí náŋ āh téeŋgɛ́ ɓé mā é?

³⁰ Kí yá pám nɛ mi yátá, mag vále eyát yáma á áɓɔt wáma.

³¹ Ɔlolómɛ̄, Ɛsáŋɛ́ a Nyɔ́ŋ-Ɛsáŋɛ́ Yésus, nyɔ́ a lipém lí ŋgíla lisúg nyɛ́-mɛ̄n ag yí nɛ́ mi ŋgá yɛ́ɛ ɓé ma.

³² Eceg mi ɓɛ́ɛ́ á tísɔn nyí Dámas, gɔ́mna licɛ́ŋ jé lí káísa Alétas a tɛ́ɛ́yɛ́ɛ ɓátāt á tísɔn nɛ́ bí byée ma.

³³ Ndí, ɓot bú pámhɛ́nɛ́ mā á wínda, bú suhɛ́nɛ́ ma á ésɛɛ á yéŋé épah yé kɔ́tá nyí tísɔn, la mā mu túú pɛ́ɛ́.