Elōg-Kɔlínto 1 4 - Esaa-líat ɛ́ péná

Etɛ́l yé ɓáōmɓɛ á nsɔ́n nyú Ɔ́lolómɛ̄

¹ Á élōgyāŋ, miní nyɔ́ŋɔg hɔ́ ɓɛ́hɛ ákaa ɓaɓɔŋle bí Nyɔ́-a-Pɔ́hlɛ, ɓá bí lɛ́ ɓálégɓe-miɓɛɛŋ mí mbaŋ nyí Ɔlolómɛ̄.

² Ndí yé bí ŋga ɓāt ɓalégɓe-miɓɛɛŋ ɛ́ lɛ́ ja lí étɛ tóɓó-tóɓó nɛ́ bí kɔ́ɔ nɛ́ ɓot bí nāŋʼyéné ɓɔ́ lípitá.

³ Á ɛ́yáma epah, maná kááhɛ mā tɔ maná kɛ́la ma á bíkāāhɛ́nɛ́ bí ɓot-bí-bínam, náŋ a ŋgá vééle ɓé mā tɔ jam. Tɔ mág, mi ŋgá kááhɛ ɓé ma mā-mɛ̄n.

⁴ Á mbálɛ, cíŋ-m̀mím yáma ɛ ŋgá kááhɛ ɓé ma, ndí náŋ ɓé nɛ a ŋga étɛ nɛ́ mi tɛ́ɛ́ sim, ŋ̀kááhɛ ma a lɛ Nyɔ́ŋ-Ɛsáŋɛ́.

⁵ Ányúū náŋ, miníh kááhɛ́gɛ́ ɓé eceg ŋgí lí kɔ́lan, sɔ́kágánɛ́ Nyɔ́ŋ-Ɛsáŋɛ́ ag sɔ́. Nyɛ́ nɛ́ a ŋga kɛ́ li pámɛ á mípūū yé ɛ́sɛ ɛ́ sɔ́lɛ̄ á lívito, ag kɛ ki li yɛ́lɛ lí míɔ̄ŋɔ mí mímīm. La váŋ, Ɔlolómɛ̄ ag kɛ li ségɛ lí mut sig á nyaa ɛ kɔ́ɔ̄ la nyɛ́.

⁶ Á élōgyāŋ, ányúū yāná nɛ ma kwɛ̄l náŋ á patí étām, la ma mu nyɔ̄ŋlé ɔvega á nyúū yáma la á nyúū nyí Apólos, nɛ́ ndí kaa ɓɛ́hɛ, miní yégé ja lí tɔɓene á yé yá ciiɓɛ́ á Lícii-Lipúán, miníh yálág ɓé la kúmba, la ɓɛ́nɛ maná kām nyɔ́ wa, maná yíg nyɔ́ŋɔ́.

⁷ Ákaa ɛ́sɛ, ɔg loo ɓáŋá la yéé é? Ɓaá, yé ɔ byɛ́ɛ̄ yáh sɔ́le ɓé ja la Ɔlolómɛ̄ é? Kíyáɓɛ́nɛ yá tíéɓɛ́ wa, ányúū yéé hɔ́ ɔ ŋgɔ yáta nyaa nɛ́ wa kūh jā yɔ́ é?

⁸ Maná man lí kuh lí yé ɛ́sɛ miní mɓɛ́la kóó, maná man lí byaŋa! Ɛ́ lɛ́ mbálɛ nɛ́ maná yaán káísa ɓɛ́hɛ ŋgilí ɓɛ́ lí yɔ! Wɛɛ́kɛ́ɛ́! Ndí kóó yāhá ɛ lɛ nɛ́ miní ɓɛ́ kɔɔ káísa, nɛ́ ndí ɓɛ́hɛ ki bi lá li kanʼyɛ elɔŋ la ɓɛ́nɛ.

⁹ Ákaa ɛ́sɛ, mag ɔ́ŋɔ nɛ́ Ɔlolómɛ̄ a vá ɓɛ́hɛ á ntélélé á étɔ yé mbúh, ɓɛ́hɛ ɓaómɓɛ, ɔ́ŋgɛn ɓot ɓá kūh ékɔ́ghɛ yé nyɛmb. Ányúū náŋ nɛ́ ɓā timán lí ɓɛ́ kaa ɓacaa á líŋgīndá, á lí kɔnhanɛ lí sí la loó mivag, áŋgɛl la ɓot-bí-bínam.

¹⁰ Ɓɛ́hɛ, bi lɛ̄ ɓot-bí-nzēg ányúū nsɔ́n á Nyɔ́-a-Pɔ́hlɛ, ndí ɓɛ́nɛ, miníg yí jam á ŋ̀atanɛ́ wāná la Nyɔ́-a-Pɔ́hlɛ. Ɓɛ́hɛ bi lɛ̄ mítɔt, ndí ɓɛ́nɛ miní byɛ́ɛ́ ŋguu. Ɓɛ́nɛ miní byɛ́ɛ́ adit, ndí ɓɛ́hɛ, bíg yaŋa ɓɛ́hɛ.

¹¹ Li pám nɛ́-tɛ́ɛla á nyí ŋgɛ́ŋ, nzal ɛ ŋgí byɛ́ɛ́ ɓɛ́hɛ, evéhé ɛ́ byɛ́ɛ́ ɓɛ́hɛ, bi ŋgí lɛ̄ nsɔ́, bí ŋgí teeŋgɛ́gɛ́ ɓɛ́hɛ, bi ŋgí lɛ̄ ɓáwɛɛwɛɛ.

¹² Biíg sɔghe ki ányúū nɛ biíg sál la mɔ máhá. Bíg óŋo ɓɛ́hɛ, ndí ɓɛ́hɛ biíg tíi bisaa. Bíg váŋgɛ ɓɛ́hɛ la ndeeŋgɛ, ndí ɓɛ́hɛ biíg ɔ́hánɛ.

¹³ Bíg pɔ́t ɓɛ́hɛ aɓé, ndí ɓɛ́hɛ biíg pɔ́t á lí tíi lí míkūndá. Tɛɛla nyí vɔ́ŋɔ́ɔ bí ŋgí nyɔŋɔ́g ɓɛ́hɛ kaa bináán bí ŋkɔŋ-á-sí, kaa nyɛgá nyí sí la lōó.

Póol ag kwɛlɛ Elōg-Kɔ́línto kaa bididíŋɛ byɛ́ɛ́ bí ɓɔ́ɔ̄n

¹⁴ Á élōgyāŋ, mí ŋgá ciile ɓé ma ɓɛ́nɛ míŋ mam á lí kɔnhanɛ lí ɓɛ́nɛ mbɔɔla, ndí mag ciile ɓɛ́nɛ mɔ́ kaa bididíŋɛ byáma bí ɓɔ́ɔ̄n á lí ɓɔŋ nɛ́ miní nyɔŋ litát.

¹⁵ Ákaa ɛ́sɛ, tɔ maná ɓɛ́la jā jóom lí ákōō á ɓot bí ŋga yéglɛ ɓɛ́nɛ li niŋ la Nyɔ́-a-Pɔ́hlɛ, miníh byɛ́ɛ́ ɓé ɓasáŋɛ́ ŋgándag. Jɔ́ nɛ́, kaa ma nɛ́ ma sɔ́la ɓɛ́nɛ Pɔ́l M̀ɓɛɛŋ, ma nɛ́ ma yáan ɛ́sɔ̄ŋɛ́ wāná á ŋ̀atanɛ́ wāná la Yésus Kilístus.

¹⁶ Mag sɔ́hye hɔ́ ɓɛ́nɛ nɛ́ miní nīŋ kaa mi ŋga nīŋ.

¹⁷ Ányúū náŋ nɛ́ ma ómlé ɓɛ́nɛ Timotéo, edidíŋɛ yáma mɔ́ɔ̄n nyɔ́ a tīŋɓé á nsɔ́n á Nyɔ́ŋ-Ɛsáŋɛ́. Nyɛ́, ag kɛ ɓɛ́nɛ li ɔ́ŋlánɛ lí mítiŋ mí éniŋ yáma á ŋ̀atanɛ́ la Nyɔ́-a-Pɔ́hlɛ, ákaa mi ŋga yéglɛ mɔ́ pɛ́ɛ́ ɛsɛ̄ la á Bíɓasɛ bísɛ.

¹⁸ Jogo lí ɓot á póla yaná lá vumbú nyúū la miɔ́ŋɔ nɛ́ mi ŋgá kɛ ɓé mā lí timan lí lí sɔ́ á yóg yāná.

¹⁹ Ndí, kíyáɓɛ́nɛ Nyɔ́ŋ-Ɛsáŋɛ́ a kɔ̄n ŋgɔ́ɔ́, puh eceg mag kɛ li sɔ́ á mbóg yaná. Váŋ hɔ́, mag kɛ li somo lí lí yí lí ŋguu nyí mísɔ̄n mí ɓáŋ ɓavumbu-nyuú, ndí ah mpɔ́t á ányu la anyu ɓé.

²⁰ Ányúū nɛ, Likanʼyɛ lí Ɔ́lolómɛ̄ lí sē ɓé jam lí mpɔ́t á ányu la anyu, ndí lí lɛ́léné á ŋguu nyí mísɔ̄n.

²¹ Ɓaá, miníg pɔhɔ yéé é? Mi sɔ́la aso á yóg yāná tɔ nɛ́ mi sɔ́la ediŋ la ewú-m̀mím é?