Elōg-Kɔlínto 1 2 - Esaa-líat ɛ́ péná

Tíntín Póol ag lɛgɛ pɔ́l Yésus nyɔ́ a tōmlɛ́ á mbásá

¹ Á élōgyāŋ, mā-mɛ̄n, eceg mi sɔ́ɔ́ á yóg yāná, ah la ɔlaló ví lí yí lí ŋkwɛl tɔ la nlohanɛ́ a eyí ɓé nɛ mi sɔ́ɔ́ ɓɛ́nɛ li lɛgɛ lí mbaŋ likɔlɓan la Ɔlolómɛ̄.

² Ákaa ɛ́sɛ, ma súgɛ́ nɛ mi ŋgá somo ɓé ma lí yí lí jam litám tɔ já á póla yaná, amáh sig Yésus Kilístus, Nyɔ́ Yésus Kilístus a tōmlɛ́ á mbásá.

³ La má mu étɛ́ áɓɔt wáma, mu étɛ́ woŋ wáma, la nsɛ́glānɛ́ wáma ɔ́sū váná.

⁴ Ndí, ŋkwɛl wáma la likálo jáma bíh ɓɛ́ɛ́ ɓé lɛ̄ɛ́-lɛ̄ɛ́ ŋkwɛl nyú á peg nyí ɓot-bí-bínam, ndí ŋguu nyí M̀búl Mpúán nɛ ɛ ŋgí étɛ nɛ́ yé mi ŋga pɔ́t ɛ́ lɛ́ mbálɛ,

⁵ á lí ɓɔŋ nɛ́ ŋyéɓé wáná āh ɛ́gɓégé ɓé á peg nyí ɓot-bí-bínam, ndí á ɛ́gɓéné á ŋguu nyí Ɔlolómɛ̄.

Peg nyí Ɔlolómɛ̄

⁶ Á mbálɛ, peg nɛ́ bi ŋga cámanɛ ɔ́sū ví ndog-Kilístus nyí yá óló á ŋyéɓé. Nyíŋ peg ɛ sē ɓé peg nyí nyú ŋkɔŋ-á-sí, tɔ nyí ɓakanʼyɛ bí nyú ŋkɔŋ-á-sí, ɓá ɓá tɛ́ɛ́ɓɛ́ nɛ̄ bíg kɛ li cɛ́ɓɛ.

⁷ Biíg camanɛ jā peg nyí Ɔlolómɛ̄, nyí ɛ lɛ̄ mbaŋ, nyí ya tíg á lísɔl, nyí ɛ lɛ̄ nɛ́ Ɔlolómɛ̄ a ɓoŋháán mimbú ndí mímbú ɔ́sū ví eceg ányúū lipém jáhá.

⁸ Ŋ̀kanʼyɛ tɔ wa á ɓákanʼyɛ bí nyí sí āh yí ɓé nyíŋ peg, átɔm nɛ́, kí ɓɔŋ nɛ́ bí yíig yɔ, kí ɓáh tomo ɓé Nyɔ́ŋ-Ɛsáŋɛ́ a lipém á mbásá.

⁹ Ndí, ányúū náŋ nɛ́ yá ciiɓɛ́ nɛ: «Yé diíh lí ɓáág ŋgí lí ɛ́n, yé aɔ́ɔ́ a ɓáág ŋgí lí ámble, yé ɛ́ ɓáág ŋgí lí loole lí mut tɔ wa á míɔ̄ŋɔ, Ɔlolómɛ̄ a manáá yɔ́ lí ɓoŋhan ányúū ɓadiŋɛ nyɛ́.»

¹⁰ Ákaa ɛ́sɛ, ɓɛ́hɛ nɛ́ Ɔ́lolómɛ̄ a yɛ́ɛ́léné nyíŋ mbaŋ li loole la M̀búl Mpúán. Kasig M̀búl Mpúán a ŋga pígi joó nɛ̄ jam, li pám tɛɛla á peg ɛ sɔ́lɛ̄ yí Ɔlolómɛ̄ a vúl.

¹¹ Ɓaá, nzáá hɔ́ á póla ɓot-bí-bínam a ŋga yí yé ɛ́ lɛ́ átē a mut-a-binam é? Amáh sig m̀búl á mut nɛ́ á ŋga yí yé ɛ lɛ́ nyɛ́ átē wɛ́ɛ̄. Nlemlem á jam ki, mut tɔ wa a ŋgá yí ɓé yé ɛ́ lɛ́ átē a Ɔlolómɛ̄, amáh sig M̀búl á Ɔ́lolómɛ̄.

¹² Ɓɛ́hɛ, ɓāh kuh ɓé m̀búl nyú á ŋkɔŋ-á-sí, ndí ɓa kūh M̀búl nyú á ŋga sɔ́le la Ɔlolómɛ̄, nɛ́ ndí bi lēm mikaale mí ŋga sɔ́le la ékɔnan-ŋgɔ́ɔ́ yɛ́ɛ́.

¹³ La náŋ, bi ŋgá pɔ́tléne ɓé ɓɛ́hɛ míŋ mikaale la biɓaŋgá bí mut-a-binam a ŋga yéglɛ li oŋle la peg yɛɛ́, ndí biíg pɔ́tléne mɔ́ li oŋle la biɓaŋgá bí M̀búl á Ɔ́lolómɛ̄ a ŋga yéglɛ ɓɛ́hɛ, á lí pɔ́t lí mam mí M̀búl la biɓaŋgá bí M̀búl.

¹⁴ Mut nyɔ́ a tɔɓéné jā á líɓɛ́ɛg jɛ́ɛ́ lí mut-a-binam jɔ́-ntámɛ́, a ŋgá yéɓe ɓé yé ɛ́ ŋga sɔ́léne la M̀búl á Ɔ́lolómɛ̄. Bíŋ bísɛ bí lɛ́ jā nzeg ányúū yɛ́ɛ̄, a ŋgá la ɓé lí yí lí tɔ jam átē, átɔm nɛ́ M̀búl Mpúán nɛ a ŋga yíhɛ mut yé ɛ́ lɛ́ m̀ɓɛɛŋ la yé ɛ́ lɛ́ áɓē á míŋ mam.

¹⁵ Á mveŋghanɛ́, mut a yáhɛ́ la M̀búl Mpúán, nyɛ́ ag yí yé ɛ́ lɛ́ m̀ɓɛɛŋ la yé ɛ́ lɛ́ áɓē á míŋ mam mísɛ, ndí nyɛ́-mɛ̄n, mut tɔ wa a ŋgá la ɓé nyɛ li sɔ́ŋtánɛ á lí kááhɛ lí nyɛ.

¹⁶ Átɔm nɛ́, yá ciiɓɛ́ nɛ: «Nzáá a yí éɔ̄ŋɔ yé Nyɔ́ŋ-Ɛsáŋɛ́, á lí tíi lí nyɛ ŋgéélé é?» Ndí ɓɛ́hɛ, bi byɛ́ɛ́ eɔ́ŋɔ yá la Nyɔ́-a-Pɔ́hlɛ.