Elōg-Kɔlínto 1 12 - Esaa-líat ɛ́ péná

Mikaale mí M̀búl Mpúán

¹ Á élōgyāŋ, likɔlɓan la mikaale mí M̀búl Mpúán, mi ŋgá somo ɓé ma nɛ́ miní yég jam múŋ.

² Miníg yí nɛ́ eceg miní ŋgí yéɓe ɓé la Ɔlolómɛ̄, miní mwahɛ́ɛ́ nɛ́ bí yōmɛ́ ɓɛ́nɛ li pám tɛɛla á ɔ́vega ví lɛ́ nɛ́, munú ɓōtlé li ɓégɛ lí bisát bí bí ŋgá pɔ́t ɓé.

³ Ányúū náŋ nɛ́ mi ŋga yíhɛ ɓɛ́nɛ nɛ́, mut la mut a ŋga pɔ́t la ŋguu nyí M̀búl á Ɔ́lolómɛ̄ a ŋgá yó ɓé nɛ: «Eɓómá la Yésus!» Mut tɔ wa ki a ŋgá la ɓé lí laga nɛ́: «Yésus a lɛ Nyɔ́ŋ-Ɛsáŋɛ́» kíyáɓɛ́nɛ M̀búl Mpúán a sē ɓé la nyɛ́.

⁴ Mikaale mí Ɔ́lolómɛ̄ mí lɛ́ ɔ́bul, ndí nlemlem á M̀búl nɛ a ŋga tíi mɔ́.

⁵ Misɔ́n mí lɛ́ nyaa ndí nyaa, ndí mɔ́mísɛ mí lɛ́ ja ányúū lí ɓɔŋle lí nlemlem á Ɛ́tāŋɛ.

⁶ Miɓɔŋɔg mí lɛ́ nyaa ndí nyaa, ndí nlemlem á Ɔ́lolómɛ̄ nɛ a ŋga ɓɔ̄ŋ mam mísɛ átē a ɓot bísɛ.

⁷ Mut sig a kūh líkaale á lí étɛ lí ŋguu nyí M̀búl Mpúán ányúū nsɛ́ŋ á ɓot bísɛ.

⁸ Nyɔ́ wa, M̀búl Mpúán ag yígle nyɛ́ lí ɓɛ́la lí bíɓaŋgá bí peg, nyɔ́ŋɔ́ nlemlem á M̀búl ag yígle nyɛ́ li kwɛl la eyí,

⁹ nyɔ́ŋɔ́ ntám, ɔ tí nyɛ ŋyéɓé á tóɓó-tóɓó, ntám sīg-pɛ, nyɔ́ŋ pɔ̄m M̀búl ɔ tí nyɛ likaale jé lí lí tɔɔyɛ lí ɓot mbólí,

¹⁰ nyɔ́ŋɔ́ ntám, ɔ tí nyɛ li ɓɔŋ lí mínɛ̄ŋ, ntám sīg-pɛ ɔ tí nyɛ li pɔ́t á jóō lí Ɔ́lolómɛ̄, ntám sīg-pɛ, ɔ tí nyɛ likaale jé lí yí lí lí lem lí mímbūl, nyɔ́ŋɔ́ ntám sīg-pɛ ki, ɔ tí nyɛ li pɔ́t lí álēmb ákaa M̀búl a ŋgí yígle nyɛ́, ndí ɔ tí ki ntám eyí lí kɔpɔ lí wɔ.

¹¹ Ndí míŋ misɔ́n mísɛ, pɔ̄m la nlemlem á M̀búl nɛ a ŋga byée mɔ́, ag tíi mut sig ɛmɛ́ɛ́ míkaale ákaa nyɛ́ M̀búl a ŋga sómo.

Nyuú ɛ lɛ̄ yā, bijo ŋgandag

¹² Ákaa ɛ́sɛ, bi nyɔ̄ŋ ví ɔvega nɛ́, nyuú ɛ lɛ̄ jā ya, ndí ɛ byɛ́ɛ́ bíjo ŋgandag, bíŋ bijo, tɔ náŋ ákaa bí lɛ́ ɔ́bul bíg oŋgɛ jā nyúū ya. Náŋ ki nɛ́ Nyɔ́-a-Pɔ́hlɛ a lɛ.

¹³ Á mbálɛ, ɓɛ́hɛ bísɛ ɓaá kūh nzoɓan átē a pɔ̄m M̀búl á lí ɓɛ́ lí pɔ̄m nyúū, ɛ́ ɓɛ́ ɓɔɔ́n bí Élōg-Yúda, tɔ nɛ́ ɓá bí Élōg-Gelékia, ɛ́ ɓɛ́ miyɔ́ŋ tɔ kundɛ-ɓōt, ɓɛ́hɛ bísɛ, nyíŋ pɔ̄m la nlemlem á M̀búl nɛ ya manɛ́ evéhé yáhá.

¹⁴ Ákaa ɛ́sɛ, nyuú ɛh byɛ́ɛ́ ɓé ja éjo yá, ndí bijo ŋgandag.

¹⁵ Ki ɓɔ̄ŋ nɛ́ akoo á laglag nɛ́: «Ákaa mi sē ɓé mā wɔ, mi sē ɓé ma éjo ɛ́ nyúū», ɓaá kí ág yál lí ɓɛ́ lí éjo ɛ́ nyúū ányúū náŋ é?

¹⁶ Ki ɓɔ̄ŋ nɛ́ aɔ́ɔ́ á laglag nɛ́: «Ákaa mi sē ɓé mā díīh, mi sē ɓé ma éjo ɛ́ nyúū», ɓaá kí ág yál lí ɓɛ́ lí éjo ɛ́ nyúū ányúū náŋ é?

¹⁷ Ki ɓɔ̄ŋ nɛ́ nyúū ɛsɛ̄ ɛ ɓɛ́ɛ́g miíh la miíh, kí mut ag ámble la yéé é? Ki ɓɔ̄ŋ nɛ́ nyúū ɛsɛ̄ ɛ ɓɛ́ɛ́g miɔ́ɔ́ la miɔ́ɔ́, kí mut ag ámble nziŋ la yéé é?

¹⁸ Ndí Ɔlolómɛ̄ a vá éjo sig á nyúū li oŋle la nsom wɛ́ɛ́.

¹⁹ Ki ɓɔ̄ŋ nɛ́ nyúū ɛ́sɛ ɛ ɓɛ́ɛ́g ja éjo yá, ɓaá kí nyúū ɛ lɛ láá é?

²⁰ Jɔ́ nɛ́, bijo bí lɛ́ ŋgándag, ndí nyúū ɛ lɛ́ jā ya.

²¹ Diíh lí ŋgá la ɓé lí laga lí wɔ nɛ́: «Mīh byɛ́ɛ́ ɓé mā kóó yɔ́ɔ», tɔ m̀mú ki á ŋgá la ɓé lí laga lí míkoo nɛ́: «Mīh byɛ́ɛ́ ɓé ma kóó yāná.»

²² Li loo náŋ, tɔ bijo bí ŋga ɛ́ni li ɓɔt bí lɛ́ nsɛ́ŋ ŋgándag,

²³ bijo ɓɛ́hɛ bi ŋga ɔ́ŋɔ nɛ́ bíh byɛ́ɛ́ ɓé ádit ŋgandag, byɔ́ nɛ́ bi ŋga dítɛ ŋgandag. La náŋ, kaa bi ŋga kóndye byɔ́ lí ɛ́n nɛ́ bíh byɛ́ɛ́ ɓé ádit, náŋ ki nɛ́ bií ŋga lóohan byɔ́ lí kóóhánɛ.

²⁴ Bijo bi ŋga ɛ́n nsɛ́ŋ bíh byɛ́ɛ́ ɓé kóó nɛ bí kóóhánɛ byɔ́. Ndí Ɔlolómɛ̄ a ōŋgɛ́ nyúū nyaa nyí ɛ lɛ nɛ́, ɔ dítɛ̄ bíjo bí byáh loohan ɓé lí ɓɛ́la lí ádit,

²⁵ nɛ́ ndí nyúū ɛh kaaɓágán ɓé, ndí bijo bísɛ bí kóóhán byɔ́ la byɔ́.

²⁶ Kíyáɓɛ́nɛ ejo yá ɛ́g sɔghe, bijo bísɛ bíg kaan yéŋ esɔghe. Kíyáɓɛ́ ki nɛ́ ejo ya yá kūh lípēm, bijo bísɛ bíg kaan míŋ mivag.

²⁷ Ɓɛ́nɛ hɔ́, miní lɛ́ nyúū nyí Nyɔ́-a-Pɔ́hlɛ, munú ɓɛ́ ki bijo bí nyúū yɛ́ɛ̄, mut sig á ɛ́yɛ̄ɛ̄ étɛ̄l.

²⁸ Ɓot Ɔlolómɛ̄ a tɛ́ɛ́yɛ́ á Éɓasɛ bí lɛ́: ɓaómɓɛ kaa ɓot bí ɔ́sū, ɓapɔ́tle-bí-Ɔ́lolómɛ̄ kaa ɓot ɓá yáhɛ́ bíɓáa, ɓayéglɛ á Éɓasɛ kaa ɓá yáhɛ́ bíŋháa, ámbúh náŋ ɓot ɓá kuh líkaale á lí ɓɔŋ lí mínɛ̄ŋ, likaale lí lí tɔɔyɛ lí ɓot mbólí, likaale lí lí nit lí ɓot, likaale jé lí lí yí lí lí wɛɛla lí ɓot, likaale jé lí lí pɔ́t lí álēmb.

²⁹ Ɓaá, ɓáŋ ɓot bísɛ bí lɛ́ ɓáōmɓɛ é? Kɛ́m! Bí lɛ́ ɓapɔ́tle-bí-Ɔ́lolómɛ̄ é? Kɛ́m! Bí lɛ́ ɓayéglɛ á Éɓasɛ é? Kɛ́m! Ɓɔ́ bísɛ ɓá kūh líkaale lí lí ɓɔŋ lí mínɛ̄ŋ é? Kɛ́m!

³⁰ Ɓɔ́ bísɛ ɓá kūh líkaale lí lí tɔɔyɛ lí ɓot mbólí é? Kɛ́m! Ɓaá, ɓɔ́ bísɛ bíg pɔ́t álēmb é? Kɛ́m! Ɓɔ́ bísɛ bíg kɔpɔ wɔ́ é? Kɛ́m!

³¹ Ɔ́sū la ɔsú, la akwáá ásɛ, somlán hɔ́ lí kuh lí tāŋ míkaale. Li loo náŋ, mag kɛ ɓɛ́nɛ li étɛ lí nzen ya lóohán lí ɓɛ́ lí tāŋ.