Elōg-Kɔlínto 1 11 - Esaa-líat ɛ́ péná

¹ Miní yégé ma, káa yé mág mi ŋga yége Nyɔ́-a-Pɔ́hlɛ.

Páam la mindígá ɔ́sū ví Nyɔ́ŋ-Ɛsáŋɛ́

² Mag séme ɓɛ́nɛ ányúū nɛ miníg ɔ́ŋɔ ma eceg ɛ́sɛ, la ki nɛ́ maná náŋɛ mam mísɛ ákaa ma yéglɛ́ ɓɛ́nɛ mɔ́.

³ Nyí vɔ́ŋɔ́ɔ, mi byɛ́ɛ́ kóó lí yíhɛ lí ɓɛ́nɛ nɛ́, Nyɔ́-a-Pɔ́hlɛ nɛ́ a lɛ ŋ̀kanʼyɛ a jóō nɛ̄ páam. Páam yu ɓɛ́ ŋ̀kanʼyɛ a mindígá, Ɔlolómɛ̄ ɔ ɓɛ́ ŋ̀kanʼyɛ a Nyɔ́-a-Pɔ́hlɛ.

⁴ Joó nɛ̄ páam ɛ ŋga kánɛ tɔ nɛ́ ɛ ŋga pɔ́t kaa m̀pɔ́tle-a-Ɔlolómɛ̄ la tambá á m̀mú, ɛg tɛ́ŋgánɛ ŋ̀kanʼyɛ wɛɛ́.

⁵ Joó nɛ́ mindígá ki a ŋga kánɛ tɔ nɛ́ a ŋga pɔ́t kaa m̀pɔ́tle-a-Ɔlolómɛ̄ la m̀mú épōló ag ɓétle ŋ̀kanʼyɛ wɛ́ɛ̄, átɔm nɛ́ a lɛ ɔ́ŋgɛn a ɔ́mbɔ́ m̀mú.

⁶ Kíyáɓɛ́nɛ mindígá a ŋgá jál ɓé áŋgíhi, a sɛ́nd m̀mú! Ndí náŋ ákaa ɛ́ lɛ́ ɔ́sɔ̄n ányúū mindígá lí sɛ́nd lí m̀mú tɔ li ɔ́mbɔ lí wɔ, a jál áŋgíhi.

⁷ Páam, yɔ ɛ ŋgá nyɛɛ ɓé li bútyɛ lí m̀mú, átɔm nɛ́ ɛ lɛ á épunan yé Ɔ́lolómɛ̄ la lipém jɛ́ɛ́. Ndí mindígá a lɛ lípēm lí páam.

⁸ Átɔm nɛ́ ah la ejo míndīgá ɓé nɛ ɓá veég páam, ndí la ejo páam nɛ́ ɓá veég míndīgá.

⁹ Páam yāh vegɓɛ ɓé ki ányúū mindígá. Mindígá nɛ a vēgɓɛ́ ányúū páam.

¹⁰ La náŋ, ányúū áŋgɛl nɛ́ mindígá a nyɛ́ɛ lí bútyɛ lí m̀mú wɛ́ɛ́ ákaa ndembye nyí ɛ ŋga étɛ nɛ́ a lɛ á sí likanʼyɛ.

¹¹ Á mbálɛ, bí ŋgá nyɛ́ɛ ɓé lí ɓága lí míndīgá la páam, tɔ li ɓága lí páam la mindígá ɔ́sū ví Nyɔ́ŋ-Ɛsáŋɛ́.

¹² Ányúū nɛ nlemlem kaa la ejo páam nɛ́ bí végēē míndīgá, náŋ ki nɛ́ páam ɛ ŋga pámléne á líbum lí míndīgá. Bíŋ bísɛ bíg sɔ́le la Ɔlolómɛ̄.

¹³ Ɓɛ́nɛ-mɛ̄n léɓyán sig. Ɓaá, náŋ a kɔ́ɔ́ nɛ́ mindígá a kánɛ Ɔlolómɛ̄ m̀mú épōló é?

¹⁴ Kí ɓaá légɓé m̀ɓɛɛŋ, ɓaá, pɛ́ɛ́ yɔ-mɛn ɛ́h sɔ́ɔ ɓé nɛ ɛ́ lɛ̄ mbɔɔla ányúū páam nɛ́ ɛ ɓɛ́la mitaandá mí voŋ é?

¹⁵ Ndí ányúū míndīgá, náŋ a lɛ lípēm átɔm nɛ́ a kūh mítaandá mí voŋ kaa áŋgíhi.

¹⁶ Ndí, kíyáɓɛ́nɛ mut ɔ́ŋɔ li pendan náŋ, a yí nɛ́ ɓɛ́hɛ ɓāh mwaan ɓé ɓɛ́hɛ la yíŋ nyaa míɓɔŋɔg, ndí tɔ Bíɓasɛ bí Ɔ́lolómɛ̄ ki.

Lidí lí Nyɔ́ŋ-Ɛsáŋɛ́

¹⁷ Yé mi ŋga sɔ́ lí laga vá ɛ́ sē ɓé ányúū li séme lí ɓɛ́nɛ, ányúū nɛ mikɔtán máná míg sɔ́la ɓɛ́nɛ aɓé li loo lí m̀ɓɛɛŋ.

¹⁸ Ɔ́sū la ɔsú, bíg lága ma nɛ́, eceg maná tɔɔ á míkɔtán máná mí Éɓasɛ, mbáglán ɛ lɛ á póla yaná, mag ɔ́ŋɔ ki nɛ́ náŋ a lɛ mbálɛ á épah yá.

¹⁹ Ɛ́g somlɛ yágá ki nɛ́ mbáglán ɛ ɓɛ́ á póla yaná á li ɓɔŋ nɛ́ bi ɛ́n ɓanzáá átē wāná Ɔ́lolómɛ̄ a ŋga yéɓe.

²⁰ Ndí, eceg miní ŋga kɔ́tan, ah lidí lí Nyɔ́ŋ-Ɛsáŋɛ́ ɓé nɛ́ miní ŋga dí.

²¹ Átɔm nɛ́, á éceg lídī, mut sig ag digɓan li nyɔŋ lí ɛ́jɛ̄ɛ̄ jóga, nyaa nyí ɛ lɛ nɛ́, wa ag ɓɛ́ a ŋgí lɛ̄ nzal, kí nyɔ́ŋɔ́ ntám ɔ péé.

²² Ɓaá, miní byɛ́ɛ́ ɓé mílɛ̄ɛ̄ ápah miní ŋga dí la li nyú é? Tɔ nɛ́ Eɓasɛ yé Ɔlolómɛ̄ nɛ́ miní ŋga yáŋa é? Tɔ nɛ́ miníg somo li kɔnɛ lí ɓot bíh byɛ́ɛ́ ɓé tɔ jam ɔsɔ́n é? Yéé mi laga pɛ é? Ɓaá, mi sémé ɓɛ́nɛ é? Kɛ́m mi ŋgá séme ɓé ma ɓɛ́nɛ.

²³ Ákaa ɛ́sɛ, yé ma kūh la Nyɔ́ŋ-Ɛsáŋɛ́ la yé mi yéglɛ́ɛ́ ɓɛ́nɛ yɔ́ yé nɛ́: Nyɔ́ŋ-Ɛsáŋɛ́ Yésus, á díɓe bí nuŋléé nyɛ́, ɔ nyɔ̄ŋ ékɔgá,

²⁴ ámbúh, ɛnɛ́ a tí Ɔ́lolómɛ̄ mítamlan, ɔ búg yɔ, a byɛ́ nɛ́: «Nyuú yáma nyí, nyí ya tíéɓɛ́ ányúū yāná, ɓɔŋán náŋ á lí ɔ́ŋɔ lí ma.»

²⁵ Ámbúh li dí, ɔ ɓɔ̄ŋ nlemlem á jam la liɓondó a byɛ́ nɛ́: «Jé liɓondó nɛ li lɛ́ Esaa-líat ɛ́ péná jé lí mícii máma, ɓɔŋán náŋ á li ɔ́ŋɔ li ma eceg sig miní ŋga kɛ́ jɔ́ lí nyú.»

²⁶ Jɔ́ nɛ́, eceg sig miní ŋga kɛ̄ li dí lí yé ekɔgá la li nyú li jé liɓondó, miníg lɛgɛ nyɛmb nyí Nyɔ́ŋ-Ɛsáŋɛ́ li pám nɛ́-tɛ́ɛla á mítiman mɛ́ɛ́.

²⁷ Ányúū náŋ nɛ́, nyɔ́ la nyɔ́ a ŋga kɛ́ li dí lí ékɔgá tɔ li nyú lí líɓondó lí Nyɔ́ŋ-Ɛsáŋɛ́ á nyaa ɛh kɔ́ɔ́ ɓé a ɓɔŋ aɓé likɔlɓan la nyuú ndí la micii mí Nyɔ́ŋ-Ɛsáŋɛ́.

²⁸ La náŋ, mut sig a légɓé éɓɛ̄lé yɛ́ɛ́ nyɛ́-mɛ̄n sɔ́kágánɛ́ ag dí yé ekɔgá tɔ li nyú lí jé liɓondó,

²⁹ átɔm nɛ́, nyɔ́ la nyɔ́ a ŋga dí ndí á nyú ki ɛ́h ɓɛ́ ɓé nyɛ li nyɔŋ lí lítāt nɛ́ nyúū nyí Nyɔ́ŋ-Ɛsáŋɛ́ nɛ a ŋga dí, ag dí la li nyú lí ékɔ́ghɛ yɛ́ɛ́ nyɛ́-mɛ̄n.

³⁰ Ányúū náŋ nɛ́ ɓakɔɔ́kɔ̄n la biɓóg-bí-ɓōt bí yáhɛ́ á póla yáná ányúū náŋ ki nɛ́ jogo lí ɓot lá wú.

³¹ Kíyáɓɛ́nɛ ɓa légɓé éɓɛ̄lé yáhá m̀ɓɛɛŋ, Nyɔ́ŋ-Ɛsáŋɛ́ a ŋgá kɛ ɓé ɓɛ́hɛ lí kááhɛ.

³² Ndí ag kááhɛ ɓɛ́hɛ á lí tɛ́ɛ́yɛ lí ɓɛ́hɛ á nzen, á lí ɓɔŋ nɛ́ bih kuhúg ɓé ɓɛ́hɛ ekɔ́ghɛ elɔŋ la ɓot bí ŋkɔŋ-á-sí.

³³ Jɔ́ nɛ́ á élōgyāŋ, eceg miní ŋga kɔ́tan á lí dí, miní laaŋkán ɓɛ́nɛ la ɓɛ́nɛ.

³⁴ Kíyáɓɛ́nɛ nzal ɛ byɛ́ɛ́ mut, a dí á yóg yɛ́ɛ̄ á lí pún nɛ́ miníh kɔtágán ɓé ányúū ekɔ́ghɛ yáná. Á míŋí mam mitám, mag kɛ mɔ́ lí súgɛ́ eceg mi ŋga kɛ́ li sɔ́.