Elōg-Kɔlínto 1 10 - Esaa-líat ɛ́ péná

Póol ag nyɔŋ ɔvega ví lílōm lí Íslāɛl á éyāŋ

¹ Á élōgyāŋ, mih byɛ́ɛ́ ɓé mā kóó nɛ miní vólánɛ̄ nɛ́ ɓatáŋɛ bí kwaŋ ɓɔ́ bísɛ bí ɓɛ́ɛ́ á sí bitátlé bí mbaga, ɓɔ́ bísɛ ki bú lóoléné á túwɛ,

² la ki nɛ́ á ŋ̀atanɛ́ wāɓá la Móse, ɓɔ́ bísɛ bú kūh nzóɓan átē a mbaga la átē a túwɛ.

³ Ɓɔ́ bísɛ ɓá dí nlemlem á lídī Ɔ́lolómɛ̄ a tíéé ɓɔ́,

⁴ ɓɔ́ bísɛ bú nyú ki nlemlem á ényūnyú Ɔ́lolómɛ̄ a tíéé ɓɔ́, kasig bí ŋgí nyú míndīm mí ŋgí pámle á líāā lí ŋgɔg lí m̀búl jé lí ŋgí oŋ ɓɔ́. Nyɔ́-a-Pɔ́hlɛ nɛ́ a ɓɛ́ɛ́ jéŋ liáá lí ŋgɔg.

⁵ Ndí tɔ la náŋ, míɓɔŋɔg mí ŋgándag ɛ́ ɓot á póla yáɓá míh nyɛɛle ɓé Ɔ́lolómɛ̄, ányúū náŋ nɛ́ mímbim máɓá mí ɓɛ́ɛ́ mí náŋɛ pɛ́ɛ́ ɛsɛ̄ á éyāŋ.

⁶ Míŋ mam má ɓɔŋɓɛ ányúū li ɓɛ́ lí ɓɛ́hɛ ndembye, nɛ́ ndí kóó li ɓɔŋ lí áɓē kaa ɓɔ́ ɛh byelég ɓé ɓɛ́hɛ.

⁷ Miníh yaankágán ɓé ɓáɓégɛ-bisát ákaa jogo lí ɓot á póla yaɓá, kasig yá ciiɓɛ́ nɛ: «Lilómɛ a tɔɔ́ á lí dí la á lí nyú, ámbúh náŋ ɔ tɛ́lɛ́ li kɛ á ŋ̀yomɛ́.»

⁸ Bih váág ɓé tɔ eniŋ yáhá á mpuŋgú á ndeŋg ákaa jogo lí ɓot á póla yaɓá bí ɓɔ̄ŋɔ́ɔ́. Náŋ ɔ yíglé nɛ, á pɔ̄m ɔlɔ́, muúmɓáa mí ákōō la áŋháa mú wú.

⁹ Bih ceglɛ́gɛ́ ɓé tɔ ki Nyɔ́-a-Pɔ́hlɛ ákaa jogo á póla yaɓá lí ɓɔ̄ŋɔ́ɔ́, la nyɔ yú kɔ́ɔ́ ɓɔ, bú wú.

¹⁰ Kaa jam lá tiile, miníh dumlágán ɓé ákaa jogo á póla yaɓá lí ɓɔŋɔ́ɔ́. Ɓá bí dumláán áŋgɛl ecɛ́hɛ yú ól ɓɔ.

¹¹ Míŋ mam mí pámléé ɓɔ́ á lí ɓɔŋ nɛ́ mí ɓɛ́ ndembye, la mɔ́ mú cíiɓɛ́ ányúū li yéglɛ lí ɓɛ́hɛ, ɓɛ́hɛ ɓá bi lɛ lí kɛ á mísūg mí bíceg.

¹² Jɔ́ hɔ́ nɛ, nyɔ́ la nyɔ́ a ŋga ɔ́ŋɔ nɛ́ a tɛ́ɛ́ á nyaa ɛ kɔɔ́, a nyɔ́ŋ litát nɛ ah kuág ɓé.

¹³ Miceglan miní kūhúú mí ɓɛ́ɛ́ á ɔ́vega ví mut-a-binam, Ɔlolómɛ̄ ag yáhɛ biɓaŋgá byɛ́ɛ́, a ŋgá kɛ ɓé lí yéɓe nɛ́ miní kūh miceglan mí ŋga lóo ɓɛ́nɛ ŋguu. Eceg miceglan mí ŋga sɔ́, ag kɛ ɓɛ́nɛ li ɓɔŋ nɛ́ miní pámɓán, ag kɛ ki ɓɛ́nɛ li tíi lí ŋguu á lí ɔ́hánɛ lí mɔ̄.

Ŋ̀atanɛ́ āh nyɛɛ ɓé lí ɓɛ́ la mimbúl míɓē

¹⁴ Á élōgyāŋ yé édiŋ, jɔ́ nɛ́, náŋglán eɓégɛ-bisát m̀bíí.

¹⁵ Mag kwɛlɛ ja ɓɛ́nɛ kaa ɓot bí ŋga sɔ́ŋtánɛ, ɓɛ́nɛ-mɛ̄n miní dúutɛ́ sig míɔ̄ŋɔ á yé mi ŋga lága ɓɛ́nɛ.

¹⁶ Ɓaá, liɓondó lí ndómbo jé bi ŋga tíéle Ɔlolómɛ̄ mítamlan lí sē ɓé jā ŋ̀atanɛ́ wāhá la micii mí Nyɔ́-a-Pɔ́hlɛ é? Ekɔgá yé bi ŋga búg ɛ́ sē ɓé jā ŋ̀atanɛ́ wāhá la nyuú nyí Nyɔ́-a-Pɔ́hlɛ é?

¹⁷ Kasig ekɔgá ɛ́ lɛ́ jā yáhyá, ɓɛ́hɛ bísɛ ki bi lɛ̄ jā pɔ̄m nyúū, átɔm nɛ́ ɓɛ́hɛ bísɛ biíg kaan ja nyúŋ nlemlem á ékɔgá.

¹⁸ Léɓyán sig ɓɔ́ɔ̄n bí Íslāɛl, ɓá bí ŋga dí tít yá tíéɓɛ́ á nsúlé, ɓaá bí sē ɓé á ŋ̀atanɛ́ la etága-nsúlé é?

¹⁹ Yéé mi ŋga sómo li laga é? Ɓaá mi lɛ́ lí laga nɛ́ tít ɓá súlé bísāt tɔ bisát byɔ́-mɛ̄n, bí byɛ́ɛ́ tɔ puh adit é?

²⁰ Kɛ́m! Kaa bí ŋga tíi mímbūl míɓē misúlé máɓá ndí ah Ɔlolómɛ̄ ɓé, ma, kóó ɛ sē ɓé mā nɛ́ ɓɛ́nɛ miní at la mimbúl míɓē.

²¹ Á nlemlem á éceg, miní ŋgá la ɓé lí nyú lí líɓondó lí Nyɔ́ŋ-Ɛsáŋɛ́, ndí maná nyú ki jé lí mímbūl míɓē. Miní ŋgá la ɓé lí nyɔŋ lí ŋgáɓo á téɓeli nyí Nyɔ́ŋ-Ɛsáŋɛ́, miní nyɔ̄ŋ ki ŋgaɓo á nyí mimbúl míɓē.

²² Tɔ nɛ́, nzoŋ nyí Nyɔ́ŋ-Ɛsáŋɛ́ nɛ bi byɛ́ɛ́ kóó lí vɛɛɓɛ é? Ɓaá, biíg loo nyɛ́ ŋguu é?

Li ɓɔŋ lí mam mísɛ ányúū lipém lí Ɔ́lolómɛ̄

²³ «Mam mísɛ mí lɛ́ kúndɛ», ndí mɔ́ mísɛ míh byɛ́ɛ́ ɓé nsɛ́ŋ. «Mam mísɛ mí lɛ́ kúndɛ», ndí mɔ́ mísɛ mí ŋgá óŋ ɓé.

²⁴ Mut tɔ wa ah somlág ɓé jā m̀ɓɛɛŋ ányúū yɛ́ɛ̄, ndí a sómó wɔ́ ányúū nyɔ́ŋɔ́ ntám.

²⁵ Díán yé ɛ́sɛ ɛ́ ŋga nūŋlɛ á éɓom ɛ́h ɓɛ́ ɓé li ɓat lí mbihi tɔ ya, nyí ɛ ŋga téeŋgɛ́ miɔ́ŋɔ máná,

²⁶ átɔm nɛ́ sí la yé ɛ́sɛ ɛ́ lɛ́ átē bí lɛ́ bí bí Nyɔ́ŋ-Ɛsáŋɛ́.

²⁷ Kíyáɓɛ́nɛ mut nyɔ́ a ŋgá yéɓe ɓé la Ɔlolómɛ̄ a yáŋá ɓɛ́nɛ á yóg yɛ́ɛ̄, ndí maná yéɓé lí kɛ, díán yé ɛ́sɛ a ŋga tíi ɓɛ́nɛ, ɛ́h ɓɛ́ ɓé li ɓat lí mbihi tɔ ya nyí ɛ ŋga téeŋgɛ́ miɔ́ŋɔ máná.

²⁸ Ndí, kíyáɓɛ́nɛ mut a lágá ɓɛ́nɛ nɛ́: «Tít nsúlé nyí!», Miníh díág ɓé yɔ, ányúū nyɔ́ŋ mut a yíhɛ́ ɓɛ́nɛ náŋ la ki nɛ́ náŋ a táág téeŋgɛ́ miɔ́ŋɔ.

²⁹ Ah miɔ́ŋɔ máná ɓé nɛ mi ŋga pɔ́tléne vá, ndí miɔ́ŋɔ mɛ́ɛ́. Ɓaá, ányúū yéé míɔ̄ŋɔ mí mut ntám nɛ mí ŋga kááhɛ likundɛ jáma é?

³⁰ Kíyáɓɛ́nɛ mag tíi mitamlan eceg mi ŋga dí, ɛnɛ ányúū yéé hɔ́ bí ŋga kímɛ ma ányúū jam mi ŋga tíéle Ɔlolómɛ̄ mítamlan é?

³¹ Ɛ́ ɓɛ́ nɛ́ miníg dí, ɛ́ ɓɛ́ hɔ́ nɛ miníg nyú, tɔ yé miní byɛ́ɛ̄ á lí ɓɔŋ, ɓɔŋán yɔ́ ányúū lipém lí Ɔ́lolómɛ̄!

³² Miníh ɓɛ́ɛ́g ɓé ɔ́ɓag ányúū mut tɔ wa, ɛ́ ɓɛ́ ɓɔɔ́n bí Élōg-Yúda, ɛ́ ɓɛ́ ɓá bí Élōg-Gelékia, ndí tɔ á Eɓasɛ yé Ɔ́lolómɛ̄.

³³ Náŋ nɛ́ mā-mɛn mi ŋga lɔ́gɓan nɛ́ mi nyɛ́ɛ́lé ɓot bísɛ á jóō nɛ́ jam, ah á lí somo lí m̀ɓɛɛŋ wáma mā-mɛ̄n ɓé ja, ndí á lí somo lí nyú á ɔ́bul ví ɓot, nɛ́ ndí bí sūŋɓɛ̄.