Mattiu 1 - Nongan Hiyan

Ngala tumbu Yesu hu

¹ Aro, ara ndromwoya ndraye Yesu Kristus. Yiy, ara iyau ndraye Tepit, pe Tepit, ara iyau ndraye Apraham.

² Apraham, ara tama Yisak, pe Yisak, ara tama Yakop, pe Yakop, ara tama Yutah, pe nalin hu.

³ Pe Yutah, ara tama Peres hilu Serah, pe tina hilu, ara Tamar. Pe Peres, ara tama Hesron, pe Hesron ara tama Ram.

⁴ Pe Ram, ara tama Amminatap, pe Amminatap, ara tama Nahson, pe Nahson, ara tama Salmon,

⁵ pe Salmon, ara tama Powas, mepo tinan, ara Rahap. Pe Powas, ara tama Opet, mepo tinan ara Rut. Pe Opet, ara tama Yessi,

⁶ pe Yessi, ara tama King Tepit. Pe Tepit, ara tama Solomon, pe tina Solomon, ara yiy mepo nambuyu Uriyah mamu.

⁷ Solomon, ara tama Rehopowam, pe Rehopowam, ara tama Apiyah, pe Apiyah, ara tama Asa.

⁸ Pe Asa, ara tama Yehosapat, pe Yehosapat, ara tama Yehoram, pe Yehoram, ara tama Ussayah,

⁹ pe Ussayah, ara tama Yotam, pe Yotam, ara tama Ahas, pe Ahas ara tama Hesekayah,

¹⁰ pe Hesekayah, ara tama Manasseh, pe Manasseh, ara tama Amon, pe Amon, ara tama Yosayah.

¹¹ Pe Yosayah, ara tama Yekoniyah iyapolo nalin hu. Pe tandrohongan ara, yihu para Papilon, ara huwiri hu Yisrayel huya mawen kolo hu pe huya huro pahandra hu Papilon.

¹² Pe iyamulan para huya huro pahandra hu para Papilon: Yekoniyah, ara tama Seyaltiyel, pe Seyaltiyel, ara tama Seruppapel,

¹³ pe Seruppapel, ara tama Apiyut, pe Apiyut, ara tama Eliyakim, pe Eliyakim, ara tama Asor,

¹⁴ pe Asor, ara tama Satok, pe Satok, ara tama Akim, pe Akim, ara tama Eliyut,

¹⁵ pe Eliyut, ara tama Eleyasar, pe Eleyasar, ara tama Mattan, pe Mattan, ara tama Yakop,

¹⁶ pe Yakop, ara tama Yosep. Pe Yosep, ara nambuyu Mariya mepo imwalahiy ta Yesu, mepo hupohowe yiy Kristus.

¹⁷ Pwen pe ndromwoya ndraye Apraham hu iya matne King Tepit, ara songui pe haamou. Pe ndromwoya ndraye Tepit hu iro kili yiy pe iya matne yihu Yisrayel huya huro pahandra hu para Papilon, ara songui pe haamou. Pe ndromwoya ndraye hu mepo huya huro pahandra hu para Papilon isa matne Kristus, ara songui pe haamou i.

Mariya imwalahiy ta Yesu Kristus.

¹⁸ Iye ara titiye ta Mariya imwalahiy ta Yesu Kristus. Pe irayah toro: tina Yesu, Mariya, ara hu kansokomburani yiy pwen para kiwiri Yosep. Hapeko hilu kanna wule mapu, pe hu ndramat husa yirowei tehe Mariya mapundriyan pwen imin. Pe Mariya mapundriyan, ara iyau pwoke ta Mwoiwan Haiyan.

¹⁹ Pe Yosep, ara ndramat hamou imwonen, pe mbuwalin para kipwaingani nambuyun, pe Mariya kiwiri masirai kiya aliy kiro mbulmara hu ndramat. Pwen ilohonganiy para kitali Mariya nokule ko.

²⁰ Pwen Yosep iro lohonge ndron iya aliy, pe angelou hamou ata Yapan isarayah isa kili yiy iho nondriya nihinih, pe ipa, “Yosep, noru Tepit, wou mbuna ahandrundru para awiri Mariya kiya wum tehe nambuyum. Ahalingiy, mbunah ita ndriyan, ara Mwoiwan Haiyan iykiy.

²¹ Pe yiy andre kimwalahiy ta mbunah kamai hamou, pe andre apohowe ngalan kiya Yesu, paratesah, yiy andre kisopwat ndramiran hu para hu kasa mawen hu pakut mwomwan tahu.”

²² Melit masih aro irayah mannan tehe Yapan kinpwai pwen iyau kili poropet toro:

²³ “Ahalingiy, pihindrahin hamou mepo kinna sura kamai mapu, ara andre kimwalahiy ta mbunah kamai hamou, pe andre kapohowe ngalan kiya Immanuwel.” Ndroiyi ngalan Immanuwel, ara ipa toro: “Ngindrai ara iripo sura tou.”

²⁴ Pwen Yosep isapoyoi, pe imbusi tesah mepo angelou ta Yapan kinpwandrandrahaniy kinna kili yiy. Pe iwiri Mariya iya seu iya nambuyun.

²⁵ Hapeko Yosep, ara kinmatin kinna sura yiy pwi, ipoo imwalahiy ta norun kamai. Pe Yosep ipohowe ngalan, ara Yesu.