Pampetudungia 1 - Sura Malelaha

¹ Ihi sura ide iami kana i apa au napatongawa Yesu Kerisitu. Pue Ala motudu Yesu Kerisitu mopatongawa irikita hawiNa apa au barapi mahae ina mewali. Yesu motudu malaekaNa lao mopatongawa ope-ope iti iriko Yohane, hawiNa.

² Mewali hinangka au kuita iti kuuki bona kupahaweakau Ngkorana Pue Ala hai apa au napatongawaamona Yesu Kerisitu.

³ Morasihe tauna au mobasaahe tauna ntanina lolita ide, hai morasi worihe au mampehadingi hai mampeulai apa au teuki i lalu sura ide, lawi barapi mahae ope-ope ide hangangaa mewali.

Tabea

⁴ Sura ide hangko iriko, Yohane, kupakatuahe pitu jumaa au ara i propinsi Asia. Pue Ala mowatikau hai moweikau roa ngkatuwo. Pewati ide nilambi hangko i Pue Ala au ara hangko i nguru-nguruna, ide-ide hai hawe i hae-haena. Pewati ide nilambi wori hangko i Inaona Pue Ala au ara i lindo kadera kadatuaNa hai au mampopolumao pitu pakana bago,

⁵ hai hangko i Yesu Kerisitu, Sabi au manoto. Iami au nguru-nguruna tuwo hule hangko i kapate hai au makuasa moparenta ope-ope datu i dunia. Yesu mampokakaiake, hai Ia mokira wataNa rapapate bona tekabahake hangko i huku dosanta,

⁶ hai Napopewalimoke taunaNa i lalu poparentaNa. Napopewalimoke tadulako mpenomba au mampopolumao bago penomba i Pue Ala, UmaNa. Yesu Kerisitumi au meawa tuwoNa hai au makuasa hawe i hae-haena. Amin!

⁷ Peita! Ora mai i lalu gawu! Ia ina raita ope-ope tauna, tepesua tauna au motambuku lompeNa hangkoia. Hai ope-ope tauna i dunia ina moteriahe. Nodo mpuumi pewalina! Amin!

⁸ Nauli Pue Ala: “Ikomi Alpa hai Omega. Ikomi pepongkana hai au kahopoana. AraNa hangko i nguru-nguruna, ide-ide, hai batena ara liliuNa hawe i hae-haena. KuasaNgku melumbu hangko i hinangkana.”

Pampetudungia au nguru-nguruna ( 1:9–3:22 ) Yesu raita nodo Ana Manusia au molumao i olo pitu mbuana biti hulo

⁹ Iko, Yohane, halalumi i lalu hangana Yesu. Himbela karapopeahi-ahinta anti peulanta i Yesu, hai himbela kamolambita kira i lalu poparentana Pue Ala, hai himbela wori kamantahata mohalea pepopeahi-ahi iti. Ratendena i lewuto au rahanga Patmos lawi mopahawena Ngkorana Pue Ala hai mosabina kana i Yesu au kupenombai.

¹⁰ I Alo Penombaa, tangangku menomba nakuasaina Inao Malelaha, hai mohadina wotu i taleungku. Wotu iti kebuu mpuu nodo pomoni tatamburu,

¹¹ nauli, “Apa au nuita, nuuki i sura hai nupakatuahe jumaa au pitu ide: Epesu, Smirna, Pergamus, Tiatira, Sardis, Filadelfia hai Laodikia.”

¹² Membalilina bona kuita hema au mololita i taleungku, hai kuita pitu mbuana biti hulo au rababehi hangko i bulawa.

¹³ I olo pambolia biti hulo iti, kuita hadua tauna au lenggeNa nodo Ana Manusia. HampiNa mandoe hawe i bitiNa hai pondaNa nawewehi bulawa au nodo pampou.

¹⁴ WeluaNa bula nodo kakawu. MataNa mewangka nodo rore api.

¹⁵ BitiNa mengkila-ngkila nodo suasa au hangko rahowu. WotuNa nodo rumuku au mogumuru.

¹⁶ Taie koanaNa mokingki pitu oguna betue, hai hangko i ngangaNa mesuwu hamata piho momata pontimali au mataru. LindoNa mewangka nodo pewangka alo.

¹⁷ KakuitaNa, liliu tepalumbana i bitiNa, nodomona mate. Hangko inditi, Naonami taie koanaNa i watangku hai Nauliangaana, “Ineeko langa. Ikomi au pepongkana hai au kahopoana.

¹⁸ Ikomi au tuwo. MateNa hangkoia, agaiana tuwo huleNa, hai ina tuwoNa i hae-haena. Iko au mokingki pegili baba ngkapate hai baba paidaa tomate.

¹⁹ Mewali, ukimide apa au nuita inona, apa au mewali i tempo ide, hai apa au ina mewali.

²⁰ Pitu oguna betue au nuita i taie koanaNgku hai biti hulo bulawa au pitu mbuana, ina Kupakanotoako lempona: betue au pitu oguna, lempona pitu tadulako au mokadipura pitu jumaa. Hai biti hulo bulawa au pitu mbuana, lempona pitu jumaa.”