Ibarani 1 - Sura Malelaha

Ngkorana Pue Ala au napahaweake AnaNa

¹ Hangkoia, bosa belana Pue Ala mongkora i toiorunta. LolitaNa rapahawe nabi-nabi, hai ngkaia pakana rara Napake mopaturohe toiorunta.

² Agaiana i alo-alo au ina hawe hangko damani alo pebotusi i kahopoa dunia, lolitana Pue Ala napahaweake AnaNa. Hai AnaNa itimi au Napopatoa mampopewali dunia hai hinangka ihina. Iami au Napakanoto Pue Ala mampoampu hinangkana au ara.

³ Hangko Iria tongawa peawana tuwona Pue Ala. Hangko i Yesu moitake poantina hai kuasana Pue Ala. Ia au mokadipura hinangkana au ara hai lolitaNa au makuasa. Ia au mohuhu wataNa rapapate bona mobahoi manusia hangko i dosanda. Hai roo indo, mengkaoremi lao i suruga mohuda ntanda i koanana Pue Ala i lalu poparentaNa.

⁴ Ia molambi kuasa hai pebila au meliu hangko i ope-ope malaeka, lawi hangaNa au nawei Pue Ala meliu katebilana pane hanga au raweihe malaeka.

Yesu meliu kamahilena tuwoNa hangko i malaeka

⁵ I malaeka, Pue Ala bara hambela mopahawe lolita ide: “Oiomi AnaNgku, Alo ide KupoanamoKo.” Hai Pue Ala bara wori mololita i hadua malaeka node: “Iko ina NapoumaNa, hai Ia ina Kupoana.”

⁶ I tempona Pue Ala motudu AnaNa au haduduana mai i dunia, node lolitaNa: “Ope-ope malaekaNgku hangangaa menombahe Iria.”

⁷ Hai idemi au napahawe Pue Ala kana i malaeka: “Pue Ala mopakanoto bagona malaekaNa. Malaeka iti topekadipuraNa au rapandiri nodo himburu hai rore api.”

⁸ Agaiana Pue Ala mampololita kana i AnaNa, nauli node: “Oio Pue Ala, kadatuamu bara mokahopoa; Oio moparenta i lalu kahintimba.

⁹ MoundeKo kanoto hai mokahihiKo dake. Idomi hai natawiKo Pue Ala au Nupenombai, hai lana tanda kaNapileiMu, au melumbu hangko i himadaMuhe.”

¹⁰ Nauli wori node: “O Pue, hangkoia Nuhuami arii dunia, langi Nubabehimi hai taieMu.

¹¹ Ope-ope iti ina tuna, agaiana batenaKo ara liliu; ope-ope iti ina maluso nodo hampi.

¹² Hambela tempo ina Nuromo hai Nutende. Ina Nupahuru hai dunia au wou. Agaiana Oio mia-mia peaKo, katuwoMu bara ina mokahopoa.”

¹³ Bara hambela Pue Ala mololita i malaeka nodo au Napahawe i AnaNa, node: “MohudamoKo ntanda i koanaNgku, duuna Kupopengkoruhe ope-ope iwaliMu Irio”

¹⁴ Bara hambela, lawi malaeka iti topobagoNa peahe Pue Ala au Natudu motulungi hai mokadipura tauna au ina molambi katehorema.