1 Korintu 8 - Sura Malelaha

Paulu mampololita kana i paande au rapopenomba i anitu

¹ Kaliliuana, ina mololitana kana i paande au rapopenomba i anitu. Niuli, “Ikita to Sarani, mapandeke, taisami paturo au tou.” Tou mpuu agaiana kuuliangaakau: anti kamapandemi iti, arakau au mampemahile. Aginami maahike i ranganta hai tapakaroho lalunda hangka ranganta.

² Ane hadua tauna manguli, “Mapandena, kuisa paturo au tou,” agaiana bara ara ahina, makura mani kamapandena.

³ Agaiana tauna au tou-tou mampokaahi Pue Ala, naisa Pue Ala lalunda.

⁴ Mewali, kana i paande au rapopenomba i anitu, niuli peisa raande, lawi taisa kadana ara pue ntanina, batena pea Pue Ala. Hai taisa ope-ope lengge anitu au rapenombai, bara ara au tou.

⁵ Ara ngkaia pakana au napenombai manusia, au rauli pue ba anitu, maroa i langi ba i wongko tampo.

⁶ Agaiana irikita, hadua pea Pue Ala, iami Umanta au mampopewali hinangkana au ara; Ia pea pongkana katuwonta. Hai hadua wori Amputa, Yesu Kerisitu, Iami au napopatoa Pue Ala mampopewali hinangkana au ara. Iami au moweike katuwo.

⁷ Agaiana nauri nodo, bara ope-ope to Sarani moisa iti. Arahe au menomba i anitu hangko damanihe mewali to Sarani, hai duuna ide-ide ane moitahe paande au rapopenomba i anitu, nauli lalunda, “Iti popenomba i anitu!” Mewali, ane maandehe paande iti, nauli lalunda, “Madosake,” lawi bata-bata mani lalunda ba peisa raande ba bara.

⁸ Katouana, bara paande iti au moantike hungku i Pue Ala hai bara worike naanti karao hangko i Pue Ala. Ane taande, barake morasi. Ane bara taande, bara worike marugi.

⁹ Agaiana hangangaa maroa-roakau halalu. Peisa mpuuke moande paande iti hangko i kabulana lalunta, agaiana inee tapakanawo ranganta au bara mani woia maroho pepoinalaina.

¹⁰ Tunggaiaku node: ane rapana tauli, “Mapandeke. Taisami paturo au tou; bara moapa ane maandeke paande au rapopenomba i anitu.” Agaiana ane rapana lao mpuuke i sou penombaanda topoanitu hai raitake ranganta tanganta maande manoto raande wori, nauri bata-bata mani lalunda ba peisa mpuu raande ba bara.

¹¹ Kahopoana, hangko i kamapandeta iti, mopakanawomoke halalunta au bata-bata mani laluna. Hai au tapakanawo iti, iami halalunta hampepepoinalai au napahurumi Kerisitu hangko i huku dosana.

¹² Mewali, ane tababehi nodo, masala mpuumoke, lawi tapakanawomi pepoinalainda halalunta au bata-bata mani lalunda. Hai meliu hangko inditi, madosake i Kerisitu.

¹³ Ido hai kuuliangaakau, ane rapana kupakanawo halalungku hampepepoinalai i kakuandena bau ba paande ntanina, barapi ina kuande paande iti bona datihe ara halalungku au rapakanawo anti babehiangku.