โรมา 7 - Northern Pwo Karen Thai Bibleทอางด้องล้าง แบฆ้ะ ดี๊ โพล้ง ทาง แซย่ 1 ด๊างพื่งวี่ ซีง-เอ้อ, น ซื๊ง ซีงแฌ๊ ทอางแม้เลา เมาน่าง เย้า, ดี๊ น ซื๊ง ซีงแฌ๊-อ้ะ ทอางแม้เลา นอ, ยู่แคว่ โพล้ง พี่ อ โอ ม๊า ได้ะ อ แค๊ นอ ล้อ 2 ทอางแม้เลา เว๊ กมืง พี่ อ ทาง แซย่ เย้า แบ โอ ฆึ ดี๊ อ แว้, พี่ อ แว้ โอ ได้ะ นอ, แบเด้าะ อ แว้ เมะ ซี๊ง นอ, อ เว๊ พ้อง ไฆวะ ดี๊ ทอางแม้เลา พี่ อ เกม๊า โอ ฆึ โละ ซ้ะ 3 ท บี่ นอ กมืง พี่ อ แว้ โอ ได้ะ, เมะ โอ ฆึ ดี๊ โพล้ง แคว๊ อ แฌ้แพ นอ, อ เว๊ เอโบ้ง อ แว้, แบเด้าะ อ แว้ เมะ ซี๊ง เย้า นอ อ เว๊ พ้อง ไฆวะ ดี๊ ทอางแม้เลา ดี๊ ล เอโบ้ง เท่อ ล้า แบ, ทึ เมะ ทาง แซย่ ดี๊ โพล้ง อ แฌ้แพ ฌี้ๆ 4 จ ด๊างพื่งวี่ ซีง-เอ้อ, น ซื๊ง เว๊ ซีง ปะ, พี่ กแช่ เยซู คริ้ ซี๊ง ลู่ง เซง ป้างกิ้อล้องนอ, น ซื๊ง ซี๊ง ฆึ ดี๊-อ้ะ ฌ้อง พ้อง ไฆวะ ดี๊ ทอางแม้เลา, อ ไฌ่ บี่ อี้ง น ซื๊ง เก กแช่ เยซู คริ้ อ ล้อง อ ย่าง ล เม้ง แบ ล เม้ง, ค๊องเนง อี้ง น ซื๊ง เก โพล้ง พี่ กแช่ แยว้ แม้ ม๊า ทาง ไท้-อ้ะ ล แฌ้ นอ อ เท่อ, บี่ ซุ้ ก ม ล้างเปิ่ง พี่ ก แม้ เอะ กแช่ แยว้ อ เท่อ 5 พี่ ก แม้ โพะ กโพล้ง อ ท ยื้งแย่ อ ไค๊ ได้ะ นอ, ท ซ้ะกวี้ง ล๊องก้อง ท ล ฌี้ ล แอว้ แบ, พี่ ทอางแม้เลา แม้ ชอง ทาง-อ้ะ นอ, แม้ เท่อ ลู่ง ก ล้อง ก ย่าง, อ นอ อ แซ เก ทาง ท ซี๊ง นอ ล้อ 6 แบเด้าะ ค๊องเนง อี้ง ก พ้อง ไฆวะ ดี๊ ทอางแม้เลา, เมะ เว๊ ก ซี๊ง แด ไฆวะ อ ดู้ง อ ยาง พี่ อ จ้าทะ เฆ้อ นอ เย้า, ท บี่ นอ ก ล แม้ กแช่ แยว้ อ เท่อ บี่ อ ล่าง ล้า แบ, เมะ เว๊ ก ล แม้ โพะ ไละเมะ พี่ อ กวิ้ เว๊ ลู่ง ทอางแม้เลา อ ไค๊ ล้า แบ, แบเด้าะ ก แม้ ก้ะ เท่อ ลู่ง อ ซ๊าง บี่ ซุ้ วีง ฌี้ แล้ แอว้ ลี้ ฌ้า เฆ้อ เซ๊งพ้า ท้างพ้า ดี๊ ท เด้บ้ะ 7 เมะ บี่ นอ ก ม ไจ้ะ บี่ จะ เล้, ไจ้ะ ทอางแม้เลา เก ท เด้บ้ะ โบ่, ล เมะ แบ เฆาะ, แบเด้าะ ทอางแม้เลา เกม๊า จ ซีงแฌ๊ ท เด้บ้ะ เก ท เม้ง เล้, ทอางแม้เลา เมะ ล โล้ เว๊ แบ “ซ้ะกวี้ง ล๊องก้อง โพล้ง อ เท่อ ล ฌี้”, จ ล ซีงแฌ๊ แบ ท ซ้ะกวี้ง ล๊องก้อง นอ เก ท เม้ง เล้ 8 แบเด้าะ ท เด้บ้ะ เจ่ ทอางแม้เลา แม้ ชอง ทาง ท ซ้ะกวี้ง ล๊องก้อง กุ้ อ เม้ง ลู่ง จ ซ้ะ พ้า, อ ไฌ่ บี่ อี้ง ทอางแม้เลา เมะ ล โอ แบ นอ ท เด้บ้ะ แม้ เท่อ ล ซี แบ ล้อ 9 อ ต้องคู พี่ จ ล ซีงแฌ๊ ทอางแม้เลา แบ นอ จ โอ ม๊า เว๊ ล้อ, แบเด้าะ ท่อง จ ซีงแฌ๊ เซ๊งพ้า ท้างพ้า นอ ท เด้บ้ะ อ ดู้ง อ ยาง โอ ทาง 10 ฌ้อง จ ซี๊ง เว๊ ล้อ, เซ๊งพ้า ท้างพ้า พี่ อ เกิ้ง เฌ๊ โชะ ท ม๊า นอ เฌ๊ โชะ ท ซี๊ง ลู่ง จ ฌ่าง ล้อ 11 อ ไฌ่ บี่ อี้ง ท เด้บ้ะ เจ่ เซ๊งพ้า ท้างพ้า อางโล๊ แย้ ดี๊ แม้ ซี๊ง แย้ 12 ทอางแม้เลา เฌ๊ เว๊ ลู่ง กแช่ แยว้ อ โอ, ดี๊ อ ทอางแม้เลา กุ้ อ ทีง เฌ๊ เว๊ ลู่ง กแช่ แยว้ อ โอ, เก เท่อ ลู่ง อ เกิ้ง อ แบ อ ฌี้ อ แอว้ 13 เมะ บี่ นอ ท อ ฌี้ แม้ ซี๊ง แย้ โบ่, ล เมะ แบ เฆาะ, ท เด้บ้ะ ล้อ แม้ ซี๊ง แย้, ท เด้บ้ะ เจ่ ท อ ฌี้ แม้ ซี๊ง แย้ บี่ ซุ้ ม โพล ทาง อ ซ้ะ ล้างที๊ง, ท บี่ นอ ท อางแม้เลา ปล้ะ ล้าง ท เด้บ้ะ อ มยู๊ อ จะ เต้ๆ ทอดู้งอยาง คี๊ง แพ้ โอ ลู่ง ก ซ้ะ พ้า 14 ก ซีงแฌ๊ ทอางแม้เลา นอ เฌ๊ เว๊ ลู่ง กแช่ แยว้, เมะ ยี๊ แด นอ จ เก โพล้ง ฌางคู โคล๊ง คู, จ เก ท เด้บ้ะ อ ฆ่อง 15 จ แน ล้าง จ ซ้ะ ล ซี แบ จ แม้ ท เม้ง เล้, อ ไฌ่ บี่ อี้ง จ ล แม้ เท่อ พี่ จ แบ ซ้ะ แม้-อ้ะ นอ แบ, แบเด้าะ จ แม้ เท่อ พี่ จ แคว่-อ้ะ ล มึ แบ 16 จ เมะ แม้ เท่อ พี่ จ ล แบ ซ้ะ แม้-อ้ะ แบ นอ, จ ญ่อง-อ้ะ เย้า ทอางแม้เลา เก ท อ ฌี้ 17 ท บี่ นอ ล เมะ จ กแช่ แม้ แบ, แบเด้าะ ท เด้บ้ะ พี่ อ โอ ลู่ง จ ซ้ะ พ้า นอ ล้อ แม้ เว๊ 18 จ ซีงแฌ๊ เว๊ ท ฌี้ ท แอว้ ล โอ น่าง เม้ง แบ ลู่ง จ ซ้ะ พ้า, เมะ เว๊ จ เก ที่ โพล้ง ฌางคู โคล๊ง คู, อ ไฌ่ บี่ อี้ง จ แบ ซ้ะ แม้ ท อ ฌี้, แบเด้าะ จ แม้ ล ซี แบ 19 จ ล แม้ ท อ ฌี้ พี่ จ แบ ซ้ะ แม้-อ้ะ นอ แบ, แบเด้าะ จ แม้ ท อ้า พี่ จ ล แบ ซ้ะ แม้-อ้ะ แบ 20 จ เมะ แม้ เท่อ พี่ จ ล แบ ซ้ะ แม้-อ้ะ แบ นอ, อ นอ ล เมะ จ กแช่ แม้ แบ, แบเด้าะ เมะ ท เด้บ้ะ พี่ อ โอ ลู่ง จ ซ้ะ พ้า นอ ล้อ แม้ เว๊ 21 ท บี่ นอ จ แด-อ้ะ เก ท อ เค้อะ ล เม้ง พี่ อ แม้ เท่อ ลู่ง จ ซ้ะ พ้า, เมะ เว๊ พี่ จ แบ ซ้ะ แม้ ท อ ฌี้ นอ ท อ้า ท ซ๊าง โอ ฆวี้ ทะ พี่ นอ ล้อ 22 ลู่ง จ ซ้ะ พ้า เต้ๆ, นอ, จ ซ้ะอวีง ซ้ะโทะ กแช่ แยว้ อ ทอางแม้เลา 23 แบเด้าะ ลู่ง จ ท ไพ้ะ ท แม้ นอ, จ แด ท อ เค้อะ ล้างช๊าง โพล ทาง ล เม้ง, พี่ อ ดึ้ โละ ซ้ะ ดี๊ ท อ เค้อะ พี่ จ เซิง จ ซ้ะ ฮะ นี่ เว๊, ท บี่ นอ จ เก ท เด้บ้ะ อ เค้อะ อ ฆ่อง พี่ อ แม้ เท่อ ลู่ง จ ล้อง จ ย่าง 24 เอ๊ จ เก โพล้ง ลู่ง ล โอ ดี๊ ท มึ ท พ้า แบ, โพล้ง เล้ ม แม้ช้า แย้ พ้อง พลิ้ ดี๊ จ ซ้ะ ล่างลี้ง อี้ง พี่ อ เกม๊า จ แบ ซี๊ง 25 กแช่ แยว้ ล้อ ม แม้ช้า แย้, จ ไจ้ะ บลึ้-อ้ะ ลู่ง ก กแช่ เยซู คริ้ อ กย้อง ท บี่ นอ ลู่ง จ กแช่ แด เว๊ จ แม้ โพะ กแช่ แยว้ อ ทอางแม้เลา อ ไค๊ ซี ดี๊ จ ท โกง ท มอง ล เม้ง ล้อ, แบเด้าะ ลู่ง จ ท ยื้งแย่ ล โค๊ นอ, จ แม้ โพะ ท เด้บ้ะ อ ทอางแม้เลา อ ไค๊ |
Pwo Karen Bible (Thailand) © Thailand Bible Society, 2016.
Thailand Bible Society