ทอางปฆ้า 112 - Northern Pwo Karen Thai Bible

ทชูฌี้ โอ ดี๊ โพล้ง พี่ แบ กแช่แยว้ อ ซ้ะ

¹ อางปฆ้า ทาง กแช่ยาเว โพล้ง พี่ ดู้งแบยางแบ กแช่ยาเว นอ โอมึโอพ้า อเว๊ เซิงมึซ้ะมึ เท่อ เต้ๆ, ลู่ง กแช่แยว้ อ ทซองทซ๊าง พ้า

² อเว๊ อชื้ออชะ ม โอ ดี๊ อดู้งอยาง, ลู่ง ที๊งล่างค่างพ้า โพล้ง พี่ อโต้อล้อง ลแพ นอ, ม ฮะนี่ ทชูฌี้

³ ทคองทแซย้ ดี๊ ทกู้งทล๊า, โอ ลู่ง อเว๊ อ เด้า พ้า ดี๊ อ ทแบกแช่แยว้อซ้ะ, โอเฌิ่งโอค๊า ล้างชู้ล้างแกย

⁴ ทพ้าง เฌ๊ทาง ลู่ง ทไค้ะซ๊า พ้า, เกม๊า เอะ โพล้งโต้โพล้งล้อง อเว๊ เก โพล้ง พี่ โอ ดี๊ อบลึ้อบลาง, ท ย๊างเซิงย๊างซ้ะ, ดี๊ ทแบกแช่แยว้อซ้ะ

⁵ โพล้ง พี่ ย๊างซ้ะ แบ โพล้ง อ แฌ้แพ, ดี๊ เกม๊า อางล่อง นี่ เท่อ นอ, โอซยืงโอบ้ะ เมะเว๊ โพล้ง พี่ แม้ อ ทไพ้ะทแม้ ดี๊ ทอเกิ้งอแบ

⁶ เมะเว๊ อเว๊ ล เละโละว้ะแซย๊ แบ โพล้ง พี่ แบกแช่แยว้อซ้ะ นอ, ม โอ ดี๊ โพล้ง นางแบทางไท้-อ้ะ ล้างชู้ล้างแกย

⁷ อเว๊ ม ล ซ้ะเม ทอ้า อ ไฌ่ แบ อเว๊ อ ซ้ะ เฌิ่งเพิ่ง, อางกีล้าง ซ้ะ ดี๊ กแช่ยาเว

⁸ อเว๊ อ ซ้ะ โอ ดี๊ ทล่างทุ้กดื้งซ้ะ, อเว๊ ม ล ซ้ะเม เท่อ แบ ท้อง ลู่ง ม แด โพล้ง โอเว้งโอก๊าง ดี๊-อ้ะ นอ, ลน้าลฆ่าง เท่อ แบ ล้อ

⁹ อเว๊ เจ่ เอะ โพล้ง อ เท่อ, อเว๊ เกล๊าง เอะ โพล้งซยางโพล้งน้ะ อ เท่อ อ ทแบกแช่แยว้อซ้ะ โอเฌิ่งโอค๊า ล้างชู้ล้างแกย อเว๊ ม โอ ดี๊ อดู้งอยาง ดี๊ อฆี๊งอแล้

¹⁰ โพล้งอ้าโพล้งซ๊าง แด เว๊ บี่ นอ, อ ซ้ะ เฌ๊ทาง อ เว๊ ไอตไก้ะ อ แซว๊, ฌ้อง นอ พลี่งไฆวะ โพล้งอ้าโพล้งซ๊าง อ ทแบซ้ะ นอ, ล้างแม่ไฆวะ เว๊ ล้อ