ทอางด้อง 13 - Northern Pwo Karen Thai Bible

¹ พูแคว๊ พี่ โอ ดี๊ ทโกงซีมองแบ นอ, คุ้ช๊องแน อ แพ่ อ ทซองทซ๊าง แบเด้าะ โพล้ง พี่ อ เฌา แม้ไฌ๊ซ้ะ เท่อ นอ, ล คุ้ช๊องแน ทโล้ทละ แบ

² โพล้ง อาง ท อ ฌี้ ลู่ง อ นุ้ อซูงอแซ แบเด้าะ โพล้ง กไบล้ะกแบล อ ท แบซ้ะ นอ, เมะเว๊ ทดู้งทลู่

³ โพล้ง พี่ ปโล่ล้าง อ นุ้ นอ, แฌแซกต้าง อ กแช่ อ ทโอม๊า แบเด้าะ โพล้ง พี่ อุ้พ้ะ อ นุ้เฌะ เล่ นอ, เฌ๊ท้อง ทเซงทื่งเฌ๊ฌ้อง ล้อ

⁴ โพล้ง เกิง นอ อ ท แบซ้ะ โอ, แบเด้าะ ม ล นี่ เท่อ น่างเม้ง แบ แบเด้าะ โพล้ง ฆ้ะ อ ท แบซ้ะ นอ, ม นี่แบ แอนี่ ท พี่ แบ อ ซ้ะ นอ ได้ะ

⁵ โพล้งแบกแช่แยว้อซ้ะ นอ, แช๊เมะ ดี๊ ทไคล้ คีงอูง แบเด้าะ โพล้งอ้าโพล้งซ๊าง นอ, แม้ เท่อ ล้างไช้ะล้างย่อง ดี๊ ล้าง ซ้ะลูซ้ะไล้ะ

⁶ ท อ ฌี้ นอ, ยู่ทะแคว่ทะ โพล้ง, พี่ อ เกล้ ล โอ ดี๊ ท อางโกอางควิ้ น่างเม้ง แบ แบเด้าะ ทอ้าทซ๊าง ม แม้เฌ๊ฌ้อง โพล้ง ทเด้บ้ะ

⁷ โพล้ง โอ, พี่ แม้ อ ซ้ะ บี่ซุ้ ทโอทช๊อง, แบเด้าะ อ เท่อ ล โอ น่างเม้ง แบ ดี๊ โพล้ง โอ, พี่ แม้ อ ซ้ะ บี่ซุ้ อซยางอน้ะ, แบเด้าะ อคองอแซย้ โอ แอฌี่งแอฌ้อง

⁸ ท อ ฆวี้ เทะนี่ไท้ กโพล้ง อ ทโอม๊า นอ, เมะเว๊ อ ทโอทช๊อง แบเด้าะ โพล้ง ซยาง ม ล แน่ฌ๊า ทไคล้ เคิ่ง เท่อ, แม้นี่ ท อ ฆวี้ เทะนี่ไท้ เท่อ แบ

⁹ โพล้งแบกแช่แยว้อซ้ะ อ ทโฌ่งทพ้าง นอ, ซ้ะอวีงซ้ะโทะ เท่อ แบเด้าะ โพล้งอ้าโพล้งซ๊าง อ มีโด้ง, ม แบ ทแม้ ล้างไพะ

¹⁰ ท ทื่งดูล้างซ้ะ นอ, โอ เว๊ ที่ ดึ้ เกทาง ท ติ้โละไอโละ แบเด้าะ ทโกงซีมองแบ โอ ดี๊ โพล้ง, พี่ ฮะนี่ ท โล้ฌ้าละฌ้า

¹¹ คองแซย้ พี่ นี่แบ-อ้ะ เพล นอ, ม ล้างแซย้ เลาไฆวะ แบเด้าะ โพล้ง พี่ อางกีซยอง นี่ เท่อ พ๊าปี๊ๆ, นอ, ม โอ แอทาง

¹² ทมื้งแล่ พี่ แบ ท แม้เทะแม้ท้าง นอ, ดึ้ เกม๊า ซ้ะ ล้างเพาล้างแช่ แบเด้าะ ท นี่แบ บี่ซุ้ แบซ้ะ-อ้ะ นอ, เก เซง ทม๊า มื่งเทิง

¹³ โพล้ง พี่ ดึ้เดว กแช่แยว้ อลู่งอแท๊ นอ, แม้เฌ๊ฌ้อง ไท้ อ กแช่ แบเด้าะ โพล้ง พี่ ทื๊งแบนะแบ ทซองทซ๊าง นอ, ม นี่แบ รางวาง

¹⁴ โพล้ง โอ ดี๊ ทโกงซีมองแบ อ ทซองทซ๊าง นอ, เก ที๊งทางชุ้ ลู่ง ทโอม๊า บี่ซุ้ เกม๊า โพล้ง เฌ๊ฆิ้ไฆวะ ทซี๊ง อ พลี้งคว้าง ซี

¹⁵ ทไพ่ทแซย๊ นอ, ดึ้ เกม๊า นี่แบ ทแบเมะล้างซ้ะ แบเด้าะ โพล้ง กไบล้ะกแบล อ เกล้ นอ, ลแด้ลพุ้ แบ

¹⁶ โพล้ง กุ้แฌ้ พี่ อรู้งอแซย๊ นอ, แม้เท่อไพ้ะเท่อ ดี๊ ทซีงแฌ๊ แบเด้าะ โพล้งเซ๊กูเฌ๊ฌ้อง นอ, แม้โพลทาง อ ท เฌ๊ฌ้อง

¹⁷ โพล้ง ไคล้เดิง เท่อ พี่ ออ้าอซ๊าง นอ, ลี้ฌ้า เท่อ ลู่ง ทน้ะทโน๊ง พ้า แบเด้าะ โพล้ง ไคล้คิ้ เท่อ พี่ อโต้อล้อง นอ, เฌ๊โชะ ทแฌแซกต้าง

¹⁸ ทซยางทน้ะ ดี๊ ท ล้างไช้ะล้างย่อง นอ, เฌ๊ท้อง โพล้ง พี่ ล ดุ้แน่ ดี๊ ทซองทซ๊าง แบ แบเด้าะ โพล้ง พี่ ควี๊งคูแกยแน่ ดี๊ ท โล้ซีงแฌ๊ นอ, ม นี่แบ ท ฆี๊งเมะฆี๊งแน้

¹⁹ ท แบซ้ะ พี่ อ เกทางก้ะ เท่อ เต้ๆ, นอ, อวีงแบช๊าแบ วีงแล้ แบเด้าะ ท แกยไฆวะ ซ้ะ ดี๊ ทอ้าทซ๊าง นอ, เก เท่อ ล้าง แช๊เมะไฌ๊ซ้ะ ลู่ง โพล้งเซ๊กูเฌ๊ฌ้อง อ ฌ่าง

²⁰ โพล้ง พี่ โพะโละไค๊ ดี๊ โพล้ง โอ ดี๊ ทโกงซีมองแบ นอ, ม เกทางก้ะ โพล้ง โอ ดี๊ ทโกงซีมองแบ แบเด้าะ โพล้งเซ๊กูเฌ๊ฌ้อง อ ฌุ้พาง นอ, ม แบ ทแม้เฌ๊ฌ้อง ล้อ

²¹ เท่อ พี่ ออ้าอซ๊าง โพะตไก้ะ โพล้ง ทเด้บ้ะ อ ไค๊ แบเด้าะ ท อ ฌี้ นอ, เก โพล้งแบกแช่แยว้อซ้ะ อ รางวาง

²² โพล้ง ฌี้ นอ, เกล๊างแซ๊ เอะ อพูอลี้ง อ คองอแซย้ แบเด้าะ โพล้ง ทเด้บ้ะ อคองอแซย้ นอ, แบ ท อางกีนี่ เอะ โพล้งแบกแช่แยว้อซ้ะ ล้อ

²³ ทึเมะ ทอาง แอฌี่งแอฌ้อง, โอ ลู่ง โพล้งซยาง อ ฌางคูล่าง พ้า ฌี้ นอ แบเด้าะ อ แบ ท แม้นี่ก้ะ ลู่ง ท ลเกิ้งลแบ แบ อกย้อง

²⁴ โพล้ง พี่ อางกีทะ นางพลี นอ, แช๊เมะ ดี๊ อ กแช่ อ พู แคว๊ แบเด้าะ โพล้ง พี่ เอ เว๊ นอ, พลี ซองแบซ๊างแบ เว๊ ล้อ

²⁵ โพล้งแบกแช่แยว้อซ้ะ อาง เท่อ บลิ้อาง แบเด้าะ โพล้งอ้าโพล้งซ๊าง อ ฌู่โพ๊ง นอ, ทอาง ลโอแบ