โยเอง 2 - Northern Pwo Karen Thai Bible

¹ เกม๊า อูงเซ๊ ทโน้ง ลู่ง ซีโยง พ้า เกม๊า แม้เซ๊ ลู่ง, โล้ ซีงแฌ๊ ทอ้าทซ๊าง, ลู่ง ก ทลู่ง เช๊งเกล้ง คู เกม๊า กุ้แฌ้ พี่ เปิ่งโอเปิ่งช๊อง ที๊งล่างค่างพ้า นอ, ว้ะโทะ น๊างแฌ้ เมะเว๊ กแช่ยาเว อ มื่งนี้ง เฌ๊ เบ้าทาง เย้า

² เก มื่งนี้ง พี่ ไค้ะซ๊า ดี๊ ไค้ะเซยา เก มื่งนี้ง พี่ โอ ดี๊ ทเอิง, ดี๊ ทไค้ะซ๊า บี่ซุ้ดี๊ ลู่ง โฌ้ ล คึ, พี่ จแล่ คลึไบ้ะ ทลู่ง คู เมะเว๊ ซึ้พูมู๊ง พี่ อดูอโท๊, ดี๊ อ ไฌ่ชองแบ้ชอง ดูมะ ลู่ง อไยะอเช้ เละ นอ, ล โอ บี่อี้ง น่างชุ้ ได้ะ แบ ดี๊ ท๊อง อี้ง ลู่ง ไค๊ นอ, ม ล โอ ล้า แบ เพลา โพล้ง อ ชู้ กุ้ชู้ นอ ล้อ

³ มี อาง เฌ๊ฌ้อง เท่อ, โอ ลู่ง อ เมะแซ พ้า ดี๊ มีแล อาง เท่อ โอ ลู่ง ล่างไค๊ ที๊งล่างค่างพ้า นอ, บี่ซุ้ดี๊ โซ๊ง เอเดง ลู่ง อ เมะแย๊ อู้ง แบเด้าะ ลู่ง อ ล่างไค๊ นอ, เก บี่ซุ้ดี๊ แพะคูทเคแกล้ พี่ โอโปล้ ก้ะ ท ล โอ พ้องพลิ้ไฆวะ ดี๊-อ้ะ น่างเม้ง แบ

⁴ อมยู๊อฮ๊าง โอ บี่ซุ้ดี๊ กซี อมยู๊อฮ๊าง อ ซื๊งเว๊ ซีง ลแพ ซยู๊ บี่ซุ้ดี๊ กซี ดึ้ซึ้

⁵ บี่ซุ้ดี๊ เลาะ ดึ้ซึ้ ลแพ นอ ล้อ อ ซื๊งเว๊ พื๊งซยุ้ โอ ลู่ง ทลู่ง อ จ้องคู บี่ซุ้ดี๊ มีแล อ ลู่ง เท้พ้ะ เซ๊ พี่ อ อาง โล่ทุ้ บี่ซุ้ดี๊ ซึ้พูมู๊ง พี่ อดูอโท๊ พี่ ฆ่าง ฆ้าง อ ซ้ะ น๊างมู๊ง นึ ดึ้ซึ้

⁶ ท่อง โพล้ง ล ชื้อๆ, ซีง ลแพ, แด-อ้ะ นอ, ซ้ะเมซ้ะไพล้ เว๊ ล้อ กุ้แฌ้ นอ อ เมะ ล้างโมยล้างบ้าง

⁷ อ ซื๊งเว๊ ซยู๊ บี่ซุ้ดี๊ โพล้ง ดึ้ซึ้ เท่อ พู ดี๊ ทาง กางแป ล้อง บี่ซุ้ดี๊ ซึ้พู ล แฌ้ๆ, นอ, ไจ โพะ อ กแช่ อ เกล้ อ ซื๊งเว๊ ล ไจ ฆีงแฆ อ เทว แบ

⁸ อ ซื๊งเว๊ ล จึ้ไท้ะ โละ อ ซ้ะ แบ เฆาะ ล แฌ้ๆ, นอ, ไจ ลู่ง อ กแช่ อ เกล้ อ เว๊ จลู้ง ฆ้าง นางดึ้นางชาง ดี๊ ท แม้ โอโท๊-อ้ะ ล ซี น่างเม้ง แบ

⁹ อ ซื๊งเว๊ พื๊งซยุ้ ฆ้าง ลู่ง เว่ง พ้า อ ซยู๊ โอ ลู่ง กางแป คู อ ซื๊งเว๊ ทาง นึฆ้าง เด้า พ้า อ ลี้ฆ้าง เกล้ ลู่ง ป้อง พ้า, ด้องซุ้ โพล้ง อางฌูงอางแบล เท่อ

¹⁰ ฌางคูโคล๊งคู ว้ะโทะ ลู่ง อ เมะแซ พ้า ทมุ้คู นอ ว้ะโทะ เทาทื้ง มื่ง ดี๊ แล้ นอ ไค้ะซ๊าไฆวะ แซย ลแพ นอ, ลโฌ่งลพ้าง ล้า แบ

¹¹ กแช่ยาเว แม้ เซ๊ อ ลู่ง ลู่ง อ ซึ้พูมู๊ง อ เมะแซ พ้า กแช่แยว้ อ ซึ้พูมู๊ง นอ ดู มะ โพล้ง พี่ แม้โพะ กแช่แยว้ อ ทอางแบเลา อ ไค๊ นอ, โอ อ แฌ้ แอฌี่งแอฌ้อง อไฌ่บี่อี้ง, กแช่ยาเว อ มื่งนี้ง นอ, ดู เต้ๆ ดี๊ ล้าง ซ้ะเม น้ะ มะ, โพล้งเล้ ม โท่ง โอ เว๊ ซี?

¹² กแช่ยาเว ไจ้ะเว๊ บี่อี้ง, “ทึเมะ บี่นอ ฌี้ นอ ค๊องเนงอี้ง, เกม๊า น ซื๊ง เฌ๊ไท้ฌูงไท้ เฆ้อ เลาเซิงเลาซ้ะ ดี๊ ท ดืงอาง ทอาง, ทฌางทย้า, ดี๊ ท ฌางอีงฌางเอ้า

¹³ เกม๊า น ซย๊างยะ น ซื๊ง ซ้ะ, ล เมะ ซย๊างยะ น ไช๊แค่ แบ” เกม๊า เฌ๊ไท้ฌูงไท้ กแช่ยาเว, น ซื๊ง อ กแช่แยว้ เมะเว๊ กแช่แยว้ โอ ฆวี้ ดี๊ อบลึ้อบลาง, ดี๊ ท ย๊างเซิงย๊างซ้ะ กแช่แยว้ ซ้ะทาง โกย้, ดี๊ โอล๊าโอฆวี้ ดี๊ ทเอทกวี้ง ลู่ง อเฌิ่งอค๊า ดี๊ เปลงไท้ ซ้ะ ล แม้เตาแม้แต๊ เท่อ แบ

¹⁴ โพล้งเล้ ม ซีงแฌ๊ เว๊ ซี, แบซีงลู่ง กแช่แยว้ เฌ๊ไท้, ดี๊ เปลงไท้ อ ซ้ะ เลา ดี๊ อางกี ล้างลื๊อ ทชูฌี้ ลู่ง ล่างไค๊ เมะเว๊ เกม๊า โอ ดี๊ ทเทว๊ทซูงทแซลื่งทางเท่อ, ดี๊ ทโอ้ลื่งทางเท่อ เทว๊ เอะ กแช่ยาเว น กแช่แยว้ ล้อ

¹⁵ เกม๊า อูง ทโน้ง ลู่ง ซีโยง พ้า เกม๊า แม้ ทไฌ่ ดืงอาง ทอาง เกม๊า กุ้ซยอง โละซ้ะ แม้ ทไฌ่

¹⁶ เกม๊า อางกีซยอง โพล้งเฌงพูฆ๊างพู เกม๊า อางกี ฌี้ โพล้ง น๊างมู๊ง เกม๊า อ เช๊งเกล้ง เกม๊า แพโซง โพล้งเม้งโพล้งแซย่ ลแพ นอ เกม๊า อางกีซยอง พืงดี้งพืงแซ ทึเมะ พืงแซ พี่ อางนู่ง ได้ะ เมะ ฌี้ เกม๊า เม้ากแช่ แคว๊ ไจทางไฆวะ อ เด้า พ้า ดี๊ เกม๊า เม้ากแช่ มืง ไจทางไฆวะ อ ล่างมี๊ง พ้า

¹⁷ เกม๊า กเย่ โพล้งลื่งเท่ออคู, เมะเว๊ โพล้ง พี่ แม้ เอะ กแช่ยาเว อ เท่อ นอ ฌางซย้ะ ลู่ง เติ๊งเละ ดี๊ ทลื่งล่าง อ เบ้าช้า ดี๊ เกม๊า โล้ แบ เท่อ บี่อี้ง, “จ กแช่ยาเว-เอ้อ, อวีงซ้ะชู้ ย๊างซ้ะ แบ นพูนลี้ง อวีงซ้ะชู้ เกม๊า นคองนแซย้ เก ทไคล้ ไฌ๊ซ้ะ-อ้า เก ทอางเพ๊งอางด้อง เชิ่งเชะ เท่อ, ลู่ง โพล้งกุ้ชื้อกุ้ชะ อซุ้อแกล้ พ้า-อ้า ล ฌี้ เกิ้ง ชี่-อ้า, พี่ อ เว๊ ม ไคล้ ลู่ง โพล้งกุ้ชื้อกุ้ชะ ซีง ลแพ อ โป้ง พ้า บี่อี้ง ‘อ ซื๊งเว๊ อ กแช่แยว้ โอ พี่จองเล้? ’, ”

กแช่แยว้ ไคล้ช๊า เท่อ, ดี๊ เอิ้งล้าง เท่อ

¹⁸ ฌ้อง กแช่ยาเว ล๊องก้องไท้ อ ที๊งล่างค่างพ้า ดี๊ ย๊างซ้ะ แบ อพูอลี้ง

¹⁹ กแช่ยาเว ไคล้ช๊า อพูอลี้ง ไจ้ะเว๊ “อี้งเซ้อ, ก ม โซ๊งทาง เอะ แน้ บืง, ไซ้ะ ซไบ้ะแซ ที๊ง ดี๊ ทซู น ซื๊ง ซีง ลแพ ม อางกึ้โอ้ฆวี้ ก ม เกม๊า น ซื๊ง ล แบ ทแม้ ไฌ๊ซ้ะ ลู่ง โพล้งกุ้ชื้อกุ้ชะ อซุ้อแกล้ พ้า ล้า แบ

²⁰ “ก ม แม้ไฆวะ ดีงแด้ ลู่ง มื่งเค๊ง, เกม๊า อ ช้างชื้งไย้ไฆวะ ดี๊ น ซื๊ง ดี๊ โฌ๊ไจไฆวะ-อ้ะ ลู่ง ที๊งค่าง ซู๊งไฆ๊ พ้า, ดี๊ โอโปล้ ก้ะ อ มู๊ง ลู่ง อ เมะแซ พ้า นอ, ม นึฆ้าง ลู่ง ปางเล พ้า, ลู่ง มื่งทาง ล โค๊ นอ ดี๊ อ มู๊ง ลู่ง อ ล่างไค๊ นอ, นึฆ้าง ลู่ง ปางเล พ้า, ลู่ง มื่งนึ ล โค๊ อ กลื่ง น๊าอืง ล้างลื่ง, ดี๊ อ กลื่ง น้าอืงน๊าอ้อง ม เฌ๊ทาง เมะเว๊ อ แม้เท่อไพ้ะเท่อ ดู มะ ล้อ

²¹ “ซ้ะเม ล ฌี้, โอ้, ที๊งค่าง-เอ้อ เกม๊า เซิงมึซ้ะมึ, ดี๊ เซิงฆวี๊งซ้ะโย้ แดเทา เมะเว๊ กแช่ยาเว แม้เท่อไพ้ะเท่อ ดู มะ

²² ซ้ะเม ล ฌี้ เฆาะ, ทพูแฆ่ เม้ง ลแพ ซีง-เอ้อ อไฌ่บี่อี้ง, นางญ้าง ลู่ง แพะคูทเคแกล้ นอ, แล๊แค๊ เซ๊งไจ้ะ ดี๊ เซง มื่งเทิง นอ, ซูงทางแซทาง เว๊ กูงเย้ มื่งเทิง, ดี๊ ซไบ้ะ มื่ง นอ, แซทาง แอ มะ ล้อ

²³ “โอ้, ซีโยง อ พู ลแพ ซีง-เอ้อ, เกม๊า เซิงมึซ้ะมึ แดเทา เกม๊า เซิงฆวี๊งซ้ะโย้ ดี๊ กแช่ยาเว น ซื๊ง อ กแช่แยว้ อไฌ่บี่อี้ง, กแช่แยว้ เกล๊าง เอะ แน้ ทเฌ๊ช้า, ลู่ง ทช้าล้าง ซ๊าง อ แค๊, บี่ซุ้ เนโพลทาง ทฌี้ทแอว้ ดี๊ ลู๊งล้าง เอะ น ซื๊ง ทเฌ๊ช้า เมะเว๊ ทเฌ๊ช้า ลู่ง ทช้าล้าง ซ๊าง อ แค๊, ดี๊ ทเฌ๊ช้า แอ ลู่ง อ แค๊ ทช้า เบ้า ม เลา, ด้องซุ้ ลู่ง อ พ้องไฆวะ นอ ล้อ

²⁴ ม โอ ดี๊ บืง ฆวี้ ทล่าง เพา ล้าง บืง ม โอ ดี๊ ไซ้ะ ซไบ้ะแซ ที๊ง, ดี๊ ทซู ล้างพะ อ โด้ง ล่าง

²⁵ “ก ม เกม๊า ไท้ เอะ น ซื๊ง เนง แล้ พี่ ทวี่ ยู้ง ซี เย้า นี่ อางไฆวะ เว๊ ดี๊ พี่ ทวี่ พื๊งซยุ้ ซี เย้า, ทวี่ บางไพละ, ดี๊ ทวี่ ไจ ซี เย้า อาง เว๊ นอ เมะเว๊ ก ซึ้พูมู๊ง พ้ะดู พี่ ก โซ๊งทาง-อ้ะ เฌ๊ ดึ้ซึ้ น ซื๊ง นอ ล้อ

²⁶ “น ซื๊งเว๊ ซีง ลแพ, ม อาง ม โอ้ เท่อ ลู่ง อกู้งอล๊า, ดี๊ บลิ้อางบลิ้โอ้ ดี๊ อางปฆ้า ทาง กแช่ยาเว น กแช่แยว้ อ เม้ง โพล้ง พี่ อ แม้ เอะ น ซื๊ง ลู่ง อล้ะอเล่ กพูกลี้ง ม ล ฌางแช้ฌางเด ล้า แบ

²⁷ น ซื๊ง ม ซีงแฌ๊-เว๊, เฆ้อ อี้ง ล้อ, โอ อีซลาเอง อซุ้อแกล้ พ้า ดี๊ เฆ้อ อี้ง ล้อ, เมะเว๊ กแช่ยาเว, เก น กแช่แยว้, ท กแช่ อ แฌ้แพ ล โอ ล้า แบ กพูกลี้ง ม ล แบ ฌางแช้ฌางเด ล้า แบ

ท ลู๊งล้าง กแช่แยว้ อ วีงฌี้แล้แอว้

²⁸ “โอ ก้ะ ลู่ง ไค๊ ท ม แม้ อ ซ้ะ บี่อี้ง เมะเว๊ ก ม ลู๊งล้าง ก วีงฌี้แล้แอว้, เฌ๊ล้าง แบ กโพล้ง กุ้แฌ้ น พูแคว๊ พูมืง ม โล้ล้าง ท อลู่งอแท๊ น โพล้ง อ ซ้ะดี้งซ้ะแซย่ ลแพ นอ, ม อางมี๊งม่าง เท่อ ดี๊ น โพล้ง น่างบางซ้ะบาง นอ, ม แดเว้ เท่อ

²⁹ อช๊าอโท่ แค๊ นอ, ก ม ลู๊งล้าง กวีงกแล้ เฌ๊ล้าง แบ โพล้ง, ทึเมะ เพล่ แคว๊ ฌี้, เพล่ มืง ฌี้

³⁰ “ก ม เนโพลทาง ทล้ะทเล่ ลู่ง มุ้คู, ดี๊ ลู่ง ฌางคูโคล๊งคู, เก ทซวีง, เก มี, ดี๊ ทอคูง ล้างลื่ง

³¹ มื่ง ม เกทางก้ะ ทไค้ะ, ดี๊ แล้ เกทางก้ะ ทซวีง พี่ กแช่ยาเว อ มื่งนี้ง ล คลึ้ เฌ๊ท้อง ได้ะ แบ, เมะเว๊ มื่งนี้ง พี่ อดูอโท๊, ดี๊ ล้าง ไพ้ะฆิ้โค๊ฆิ้

³² ฌ้อง ท ม แม้ อ ซ้ะ บี่อี้ง, เมะเว๊ กุ้แฌ้ พี่ กุ้ทาง กแช่ยาเว อ เม้ง นอ, ม พ้องพลิ้ เมะเว๊ โพล้ง ม โอ พ้องพลิ้ ลู่ง ทลู่ง ซีโยง คู, ดี๊ เว่ง เยรูซเลง พ้า, บี่ซุ้ดี๊ พี่ กแช่ยาเว โล้ เว้ เว๊, ดี๊ กเย่ โพล้ง พี่ โอ ล้างลื๊อ ก้ะ นอ, ม โอ ดี๊ โพล้ง พี่ กแช่ยาเว กุ้ นี่-อ้ะ