โยบา 41 - Northern Pwo Karen Thai Bible

¹ “น ม ทวี่ง ไจทางนี่ เลวีอาทาง ดี๊ ควี๊ ซี ชี่-อ้า? ม แม้นี่ พลี้ง ชางเท่งล้าง อ พลี้ ซี ชี่-อ้า?

² น แม้นี่ แน๊พลี้ง ไช๊ พ้ะชวี๊-อ้ะ ซี ชี่-อ้า? แม้นี่ นางไค้ ทู่ง อ แค ซี ชี่-อ้า?

³ อ ม อางโฆอางแย๊ เท่อ ดี๊ แน้ พะ แอ ชี่-อ้า? อ ม ไคล้ ดี๊ แน้, ดี๊ ทไคล้ ลู่ง อ เพา อ เบ้ ชี่-อ้า?

⁴ อ ม แม้ ทเอิ้งล้าง ดี๊ แน้ บี่ซุ้ น ม ฮะ นี่-อ้ะ เก น ฆ่อง ครึๆ, ชี่-อ้า?

⁵ น ม โละกวี้ ดี๊-อ้ะ, บี่ซุ้ โละกวี้ ดี๊ ทู ชี่-อ้า? น ม จ้าทะ-อ้ะ, เกม๊า น โพล้ง มืงน้าง โละกวี้ เว๊ ชี่-อ้า?

⁶ โพล้ง แม้แค้ เท่อ, ม เฌ๊ อางท่าง ญ่องล้าง เว๊ อ ฆวี้, ม ฆวี้ นี่ เว๊ ชี่-อ้า? อ ซื๊งเว๊ ลแพ นอ, ม แม้นี่ เว๊ อางน้าง โละซ้ะ, ลู่ง โพล้ง แม้แค้ เท่อ ลแพ นอ อ แกล้ ชี่-อ้า?

⁷ น แม้นี่ ท้ะชิ้, ทู่ง อ ไพ้ะ ดี๊ แม้นี่ นางชิ้ชู๊ง, ชิ้ อ คู ซี ชี่-อ้า?

⁸ พอง แคว่ดุ้แฆว่-อ้ะ ท่อง ช๊องมอง ท้อง ลู่ง ทดึ้ โละซ้ะ ดี๊-อ้ะ เย้า นอ, น ล ช๊อง มอง ม แม้-อ้ะ เด้าะ ล้าแบ

⁹ แคว่เซ้อ, โพล้ง พี่ ม พอง เว๊ นอ, อ ทมื้งแล่ ล้างแม่ไฆวะ โปล้ ล้อ ท่อง อ แด เว๊ ฆวี๊ นอ เฆาะ, ม ล ล้างเทะเค้า แบ-อ้า?

¹⁰ โพล้ง ล โอ น่าง แฌ้ แบ, ดู้ง ท้อง ลู่ง ม ลี้ ไล๊ดุ้ เว๊ เบิง นอ ฌ้อง โพล้งเล้, ม ชี๊เทิง เฌิ่งเพิ่ง ลู่ง จ เมะแซ พ้า ซี?’

¹¹ โพล้งเล้, เด้าะ พี่ เกล๊าง เอะ เท่อ, ลู่ง จ ม แบ เกล๊าง แก ไท้-อ้ะ นอ? ทกุ้เม้ง พี่ โอ มุ้คู เช๊ละ เลาพะ นอ, เก จ เท่อ

¹² “จ ล โอโท๊ไฆวะ ดี๊ ทไคล้, แบฆ้ะ ดี๊ อ จูง อ คาง-อ้า อไฌ่อแบ้ พี่ อชองอไคล๊-อ้า, อเค่งอฌ้าง พี่ อ ฌี้-อ้า นอ แบ

¹³ โพล้งเล้, ม กูงไฆวะ เว๊ อ ไช๊ ค๊องโค๊ ล ท๊า นอ ซี โพล้งเล้, ม ชิ้ฆ้าง เว๊ อ ไช๊แค่ ปด้างทะ เท่อ อ พ้า คี๊ง ท๊า นอ ซี

¹⁴ โพล้งเล้, อไฌ่อแบ้ ม โอ บุ้อ้างทาง เว๊ อ แคฆีง ซี? อ แซว๊ นอ เละ อ ซ้ะ ล ฆ๊างๆ, วะชวะ, ล้าง ไพ้ะฆิ้โค๊ฆิ้

¹⁵ ลู่ง อ โคล๊งคู นอ, แม้ เว๊ ดี๊ นางปด้าง ล เทวๆ บึ้เบง ดี๊ อ กแช่, บี่ซุ้ดี๊ แม้ไน ทอแท๊

¹⁶ อ โอ เบ้าตไก้ะ โละซ้ะ น้ะมะ ลี้ง นึฆ้าง ลซีแบ

¹⁷ อ ซบี้ง ลแพ นอ, ท๊องทู โละ อ ซ้ะ อ เชาเช๊ง บึ้เบง โละซ้ะ ไชะไนะ, ดี๊ โอพ้ะ โละซ้ะ ลซีแบ

¹⁸ อ ทกชี นอ, ทูแพล่ทาง ทโฌ่งทพ้าง อ เมะคลี๊ง นอ, บี่ซุ้ดี๊ ทพ้างทาง ลู่ง โฌ้โค๊

¹⁹ โซย๊ เค้ ไจทางนี่ ลู่ง อ นุ้ พ้า มี ไพ่ค้ะ ซยุ้ทาง

²⁰ ทคูง ไจทางนี่ ลู่ง อ แน๊เด้ง พ้า ด้องซุ้ ดี๊ เฌ๊นี่ ลู่ง พ้า พี่ อ คู่ ละ, ดี๊ พ่อง พูปี๊ พี่ มี อาง เว๊

²¹ อ ลี้ง แซทางแซล้าง นอ, เช้า เค้ทาง แซว ซี มี เค้ ไจทางนี่ ลู่ง อ นุ้ พ้า

²² ไฌ่แบ้ โอ ลู่ง อ โคะบ้อง พ้า ดี๊ ทไพ้ะฆิ้โค๊ฆิ้ เฌ้เทิงลี่ง, โอ ลู่ง อ เมะแซ พ้า

²³ อ แย อทองอแพล่, เชาเช๊ง บึ้เบง โละซ้ะ บึ้เบง โละซ้ะ ไชะไนะ, ลว้ะลไว๊ แบ

²⁴ อ ซ้ะ นอ, ล้างเล๊เก้ ด้องซุ้ ดี๊ โล่ง เอ้อ, ล้างเล๊ บี่ซุ้ดี๊ เชิงไฌะโล่ง

²⁵ ท่อง เฌ้เทิงทาง นอ, โพล้ง พี่ โอ ดี๊ อดู้งอยาง นอ ซ้ะเม-อ้ะ อ ซื๊งเว๊ ลแพ นอ, อ ซ้ะ ล้างท่อง, เป๊งนี่ ลู่ง อ ลู่ง จึ้ไท้ะ อกย้อง

²⁶ ทึเมะ โพล้ง แฌ้ ฌี้ๆ, แม้นี่ น้ะ ชิ้ดุ้ เว๊ ฌี้ นอ, ด้างทะ เว๊ ลซีแบ ม เก พ้าง เมะ ฌี้, ท้ะจู้ง เมะ ฌี้, พ้างพู เมะ ฌี้ นอ

²⁷ ท้ะ นอ, อ ไคะ เว๊ เก โล่ ดี๊ ท่องบ้าง นอ, ไคะ เว๊ เก เซง อู

²⁸ คลีงแช ดึ้เกม๊า อ ไจไฆวะ ลซีแบ โล่งโก๊งแช นอ, เกทางก้ะ โล่ทุ้

²⁹ นางคืงนางท่าง นอ, ทื่ง เว๊ เก โล่ทุ้ ปะ อ นี่งแบพะแล้ พ้างพู อ ลู่ง

³⁰ อ ซบี้ง ลู่ง อ ฌื๊งละ นอ, ไอบึ้ชึ แบด้องซุ้ พ้าไก้ อ จองเละทาง อ ซ้ะ กไพะ คู, บี่ซุ้ดี๊ นางไฌะล้าง บืง

³¹ อ ดึ้เกม๊า ทโยะคิ้ พ้า, ละทาง บี่ซุ้ดี๊ พ้า อ ดึ้เกม๊า ปางเล, แบด้องซุ้ พ้า ทซู

³² อ อางกีโท่ไฆวะ เกล้ โฌ่งค้ะ ลู่ง ล่างไค๊ ดึ้เกม๊า โพล้ง แฌ้ ฌี้ๆ, ช๊องมอง เว๊ ทโยะคิ้ พ้า นอ, โอ ดี๊ คูซู๊ง แอว้

³³ ลู่ง ฌางคูโคล๊งคู อี้ง, ท ล โอ น่าง เม้ง แบ บี่ซุ้ดี๊-อ้ะ เก เท่อ พี่ อ แบ ทไต้ทาง-อ้ะ, พี่ ล เกม๊า ซีงแฌ๊ ทซ้ะเม แบ

³⁴ อ แด เท่อ กุ้ อ เม้ง, พี่ อ โอ พ้ะโท๊ อ เก กจุ้แฆว้ ดูเละโท๊เละ กเย่ ทพูแฆ่ พี่ อฆี๊งอแล้”