โยบา 3 - Northern Pwo Karen Thai Bible

โยบา ชูล้างไท้ อ มื่ง กึทาง นี้ง

¹ ลู่ง ไค๊ โยบา อ้างทาง อ นุ้ ชูล้างไท้ อ มื่ง กึทาง นี้ง นอ

² ดี๊ โยบา ไจ้ะเว๊ บี่อี้ง

³ “เกม๊า มื่งนี้ง พี่ จ กึทาง นอ เซงทื่งเฌ๊ฌ้อง เลา ดี๊ มื่ง แน้ พี่ ไจ้ะเว๊ ‘ด้าทาง พืงแซ อ แคว๊ ล แฌ้ เย้า’, นอ ปะ

⁴ เกม๊า มื่ง ล นี้ง แย๊ นอ เก ทไค้ะ เกม๊า กแช่แยว้ พี่ โอนี่ ลู่ง ท้ะ อู้ง นอ, ควี๊งคูแกยแน่ ดี๊ มื่ง ล นี้ง แย๊ นอ ล ฌี้ เกม๊า ทโฌ่งทพ้าง, พ้าง แบ มื่ง ล นี้ง แย๊ นอ ล ฌี้

⁵ เกม๊า ทไค้ะซ๊า ดี๊ ทซี๊ง กแช่ อ กดื้งแล้, แม้นี่ก้ะ มื่ง ล นี้ง แย๊ นอ เกม๊า ทเอิง คลึไบ้ะ ทะ-อ้ะ เกม๊า มแช๊ แค๊ อ ทไค้ะซ๊า แม้ ซ้ะเมซ้ะไพล้-อ้ะ

⁶ ล แน้ แย๊ นอ ล้อ, เกม๊า ทไค้ะ ซ๊าโญ๊ง ไพล่นี่-อ้ะ เกม๊า อ นึฆึ ลู่ง เนง อ มื่ง นี้ง ลแพ นอ อ พ้า ล ฌี้ ดว้ะ นึฆึ-อ้ะ เก แล้ อ เท่อ ล น้าง ล ฌี้

⁷ เอ้อ, เกม๊า ล แน้ แย๊ นอ เก ทเทาพู เกม๊า แน่ฌ๊า ท อ ลู่ง กุ้ซย้ะ เท่อ, ดี๊ ทเซิงฆวี๊งซ้ะโย้, ลู่ง ล แน้ แย๊ นอ ล ฌี้

⁸ เกม๊า กเย่ โพล้ง พี่ อ ชูอ้า มื่ง นี้ง นอ, ชูอ้า ล แน้ แย๊ นอ ปะ เมะเว๊ โพล้ง อ จูง ซี, พี่ ม แม้ เฌ้เทิง เลวีอาทาง เฌ๊ทาง

⁹ เกม๊า แซย ลู่ง อ แค๊ แบ พ้าง นอ ไค้ะซ๊า เกม๊า อ โอคุ้แท๊ ทพ้าง, แบเด้าะ ล ต้องนอง เว๊ แบ เกม๊า อ แด ทโฌ่งทพ้าง ลู่ง โฌ้โค๊ ล ฌี้

¹⁰ เมะเว๊ อ เว๊ ล นี่ แม้ไบ้ะ จ มู่ อ อ้อง พ้า อ ป้ะตู๊ง แบ ล นี่ อางกีซูงไฆวะ ทแกทเฌ้, ม๊า พ้องไฆวะ ดี๊ จ เมะคลี๊ง แบ

¹¹ “แบทเล้ จ ล ซี๊งไฆวะ ล โค๊ ลู่ง จ ไจทางนี่ อ้อง พ้า อู้ง แบ? แบทเล้?, จ ไจทางนี่ จ มู่ อ อ้อง พ้า ฌ้อง จ ซ้ะ ล เทะ แบ

¹² แบทเล้?, คางโม้งโล่ง โอ ฮะนี่ แย้ แบทเล้?, นู่ง คี๊ง โอ เกม๊า จ อางเช้า

¹³ เมะ ล เมะ บี่ นอ แบ นอ, จ ม มี๊งน้าง ตเทะเด้ะ จ ม มี๊งไซวะ, ฌ้อง ม นี่ โอไปว้ะ

¹⁴ ดี๊ กเย่ กจุ้แฆว้, ดี๊ ฌางคูโคล๊งคู อ โพล้งเนฌ้าโล้ฌ้า เท่อ พี่ อ ไต้ ซ๊างทางไท้ ทล่าง, ลู่ง อ ล้างฆ่อง แค่เทาแค่ไช้ะ นอ, ลู่ง อ กแช่ อ ฌ่าง

¹⁵ ดี๊ เซงคู พี่ อ ท๊อง โอ เมะเว๊ โพล้ง พี่ อางกี จี้ ฆวี้ อ เด้า พ้า

¹⁶ แบทเล้?, จ ล เก ด้องซุ้ พู พี่ อ ล้างเทะไฆวะ, พี่ แบ ทอางกีซูงไฆวะ-อ้ะ นอ แบ ด้องซุ้ พืงแซ พี่ ล แด แบ ทโฌ่งทพ้าง น่าง พ๊า ได้ะ แบ นอ

¹⁷ พี่ นอ โพล้งอ้าโพล้งซ๊าง ล โค่งทางโค่งล้าง อ ซ้ะ ล้าแบ ดี๊ พี่ นอ โพล้ง พี่ อ ล้างแช่ล้างเบ้ นี่ โอไปว้ะโอแซ

¹⁸ พี่ นอ โพล้ง พี่ แบ ทซุ้ทะ-อ้ะ นอ, โอ ซกุ้ มึๆ อ ซื๊งเว๊ซีงลแพ นอ, ล แน่ฌ๊า โพล้งแม้เท่ออคู อ ลู่ง แบ

¹⁹ โพล้ง ปี๊ ดี๊ โพล้ง ดู โอ พี่ นอ ดี๊ ทอฆ่อง นี่ แบ ททูแพล่-อ้ะ, พ้องไฆวะ ดี๊ อ เซงคู

²⁰ “แบทเล้?, เกล๊าง ทโฌ่งทพ้าง เอะ โพล้ง พี่ อ โท่ง ทน้ะทโน๊ง ดี๊ เกล๊าง ทโอม๊า เอะ โพล้ง พี่ โอ ดี๊ ทน้ะเซิงน้ะซ้ะ

²¹ โพล้ง พี่ โอแคว่แล่ ทซี๊ง, แบเด้าะ อ ล เฌ๊ แบ ดี๊ อางฆื๊ง เคิง แคว่ เว๊ แอเละ อางฆื๊ง คองแซย้ พี่ อ โอคุ้ซูง นอ ได้ะ

²² โพล้ง พี่ อ ซ้ะอวีงซ้ะโทะ เว๊ ดู มะ ดี๊ อ เซิงมึซ้ะมึ, ท่อง อ เว๊ แด ทแซวคู พ้า

²³ แบทเล้, เกล๊าง ทโฌ่งทพ้าง เอะ โพล้ง พี่ อ เกล้ โอคุ้ซูง ได้ะ? โพล้ง พี่ กแช่แยว้ ร้องวะทะ เว๊

²⁴ เมะเว๊ จ ทแซวี๊งแซซยู เฌ๊ เท่งก้ะ ทอางทโอ้ ดี๊ จ ทฌางอื้งฌางโทะ แบ ทลู๊งล้างไฆวะ-อ้ะ, บี่ซุ้ดี๊ ที๊ง

²⁵ เมะเว๊ เท่อ พี่ จ ซ้ะเม-อ้ะ นอ เฌ๊ แบ แย้ ดี๊ เท่อ พี่ จ ซ้ะเมซ้ะไพล้-อ้ะ นอ ล้างเทะ แบ แย้

²⁶ จ ซ้ะ ล มึ แบ เฆาะ, ดี๊ จ ล โอซยืงโอบ้ะ แบ จ ล นี่ โอไปว้ะโอแซ แบ, แบเด้าะ ท เติ้งทางเติ้งล้าง นี่ เฌ๊ฌูง แย้”