โยบา 2 - Northern Pwo Karen Thai Bible

ม้างโค๊ไล่ แม้น้ะ โยบา อไพ้ะอแย อล้องอย่าง

¹ ดี๊ โอ ล นี้ง, ท้อง อ แค๊ พี่ ทมุ้คูพู ซีงลแพ เฌ๊ โล้ล้าง อ ซ้ะ ดี๊ กแช่ยาเว นอ, ม้างโค๊ไล่ เฌ๊ ลู่ง อ ซื๊ง แกล้ พ้า, บี่ซุ้ โล้ล้าง อ ซ้ะ ดี๊ กแช่ยาเว ปะ

² ดี๊ กแช่ยาเว อางจ้ะ ม้างโค๊ไล่ ไจ้ะเว๊, “น เฌ๊นี่ พี่จองเล้?”, ม้างโค๊ไล่ ไคล้ช๊า กแช่ยาเว ไจ้ะเว๊, “เฌ๊นี่ ลู่ง ลี้ๆ, ไท้ๆ, ฌางคูโคล๊งคู, ดี๊ เฌ๊นี่ ลู่ง ไจ ลี้ ครึๆ, นอ อ คู”

³ ดี๊ กแช่ยาเว ไคล้ ดี๊ ม้างโค๊ไล่ ไจ้ะเว๊, “น นี่ ช๊องมองแคว่ที๊ง จ เพล่ โยบา นอ ชี่-อ้า?, ลู่ง ฌางคูโคล๊งคู อี้ง โพล้ง บี่ซุ้ดี๊-อ้ะ ล โอ น่าง แฌ้ แบ, อ เว๊ เก โพล้ง ฌี้ กุ้เม้ง, ดี๊ แม้ ทอโต้อล้อง, เก โพล้ง ดู้งแบยางแบ กแช่แยว้, ดี๊ วีงแซยไฆวะ อ ซ้ะ ดี๊ ทอ้าทซ๊าง, อ เว๊ โอเฌิ่งโอค๊า ดี๊ อ ทโต้ทล้อง ได้ะ, ทึเมะ น อางโก้ไละ แย้ เกม๊า ดึ้ โละซ้ะ ดี๊-อ้ะ, บี่ซุ้ แม้ เฌ๊ฌ้อง-อ้ะ พี่ อไฌ่อกย้อง ล โอ แบ”

⁴ ฌ้อง ม้างโค๊ไล่ ไคล้ช๊า กแช่ยาเว ไจ้ะเว๊, “ไพ้ะ เท่งก้ะ ไพ้ะ, โพล้ง เกม๊า ท กุ้ อ เม้ง พี่ อ เท่อ โอ นอ, เท่งก้ะ อ ท โอม๊า ซี

⁵ แบเด้าะ ค๊องเนงอี้ง เกม๊า น เยาฆ้าง จูง พอง ต้องแบ อ ฆีง ดี๊ อ แย, ฌ้อง อ เว๊ ม ชูอ้า แน้ ลู่ง น เมะแซ พ้า”

⁶ ดี๊ กแช่ยาเว ไคล้ ดี๊ ม้างโค๊ไล่ ไจ้ะเว๊, “แคว่เซ้อ, อ เว๊ โอ น จูง พ้า, เกม๊า น อางกี ม๊า-อ้ะ ฆวี๊ นอ ล้อ”

⁷ ม้างโค๊ไล่ ไจทางแดไฆวะ กแช่ยาเว อ เมะแซ พ้า, ดี๊ ดึ้เกม๊า โยบา แบ ทเว๊ง อ้า, ล โค๊ ลู่ง อ คาง ย๊างซ้ะ พ้า ทาง ท้อง ลู่ง อ คูฆีง

⁸ ดี๊ อ เว๊ แม้นี่ พ้า เท้พ้ะ อ ไก้ วะล้าง อ ล้อง, ดี๊ ชี๊น้าง โอ พี๊แคล คู

⁹ ฌ้อง อ แม๊ ไคล้ ดี๊-อ้ะ ไจ้ะเว๊, “น ม โอเฌิ่งโอค๊า ลู่ง ทโต้ทล้อง พ้า ได้ะ โบ่?, เกม๊า น ชูอ้า กแช่แยว้ ดี๊ ซี๊งไฆวะ-อ้ะ เฆาะ”

¹⁰ แบเด้าะ อ เว๊ ไคล้ช๊า อ แม๊ ไจ้ะเว๊, “น ไคล้ เท่อ ด้องซุ้ กมืง เซ๊กูเฌ๊ฌ้อง ม เกิ้ง ไคล้ เว๊, จ ม ฮะนี่ ทอฌี้ ดี๊ กแช่แยว้, ดี๊ จ ล ฮะนี่ ท ล ฌี้ แบ ล น้าง แบ-อ้า?”, ลู่ง ทกึทาง อ ซ้ะ เลาพะ อี้ง อ พ้า นอ, โยบา ล นี่ แม้ ทเด้บ้ะ ดี๊ อ กแช่ อ นุ้เฌะ แบ

โยบา อ ฌุ้พาง ซ๊าแฌ้

¹¹ ท่อง โยบา อ ฌุ้พาง ซ๊าแฌ้, แน่ฌ๊า แบฆ้ะ ดี๊ ทอ้าทน้ะ เลาพะ อี้ง พี่ กึทาง ดี๊-อ้ะ นอ, อ ซื๊งเว๊ ล แฌ้ๆ, เฌ๊นี่ ลู่ง อ กแช่ อ ทล่าง พ้า, เมะเว๊ เอลีฟะ โพล้ง เทมาง, บีงดะ โพล้ง ชูอา, ดี๊ โซฟา โพล้ง นาอาเม, อ ซื๊งเว๊ นี่ พ้ะ โละ อ ซ้ะ เฌ๊ ล พ๊าฆ่าง บี่ซุ้ ม น้ะเซิงน้ะซ้ะ ฆึ ดี๊ โยบา ดี๊ ไคล้ มึ ทาง เว๊ อ ซ้ะ

¹² พี่ อ ซื๊งเว๊ซีงลแพ แด โยบา ไย้โยะ นอ ล นาง แบ เว๊ ล้าแบ, ดี๊ ฌางซย้ะทาง เท่อ, ล แฌ้ๆ, ซย๊างยะ ล้าง อ ไช๊แค่ พ้ะโท๊, ดี๊ พ๊าทาง ฌางคู มูง ลู่ง อ คูด้าง

¹³ อ ซื๊งเว๊ ชี๊น้าง ฌางคู คู ดี๊ โยบา เนว๊นี้ง เนว๊ซ๊าง, โพล้ง ล โอ ไคล้ ดี๊-อ้ะ น่าง แฌ้ น่าง ทีง แบ, เป๊งนี่ อ แด เว๊ โยบา อ ทน้ะทโน๊ง นอ ดู น้ะมะ