อีซยา 64 - Northern Pwo Karen Thai Bible

¹ โอ้, อวีงซ้ะชู้ เกม๊า กแช่แยว้ เว่พ้ะ ทมุ้คู, ฌ้อง เฌ๊ล้าง บี่ซุ้ ทลู่ง ม ว้ะ เทาทื้ง ลู่ง อ เมะแซ พ้า

² บี่ซุ้ดี๊ มี อาง เซง น๊างโป้ง ดี๊ พี่ มี ดึ้ เกม๊า ที๊ง ละเพา บี่ซุ้ เกม๊า กแช่แยว้ อดีงอแด้, ซีงแฌ๊ กแช่แยว้ อ เม้ง บี่ซุ้ กเย่ โพล้ง กุ้ชื้อกุ้ชะ นอ, ม ว้ะโทะ ลู่ง กแช่แยว้ อ เมะแซ พ้า

³ ท่อง กแช่แยว้ แม้ ท พี่ อ ล้าง ซ้ะเม, พี่ ก ซื๊งเว๊ ก ช๊องมอง ล ท้อง แบ กแช่แยว้ เฌ๊ล้าง, ทลู่ง นอ ว้ะ เทาทื้ง ลู่ง อ เมะแซ พ้า

⁴ โค๊ ลู่ง เอะ อู้ง เละ นอ, โพล้ง แน่ฌ๊า แบ เว๊-อ้า นี่ ซีงแฌ๊ เว๊ ดี๊ อ แน่-อ้า นี่ แด แบ กแช่แยว้ ล แฌ้ ดี๊ อ เมะ, พี่ ล เมะ กแช่แยว้ แบ-อ้า นอ พี่ อ แม้ เท่อ ลู่ง โพล้ง พี่ โอคุ้แท๊ กแช่แยว้ อ ฌ่าง-อ้า นอ, ล โอ น่างแฌ้ แบ

⁵ กแช่แยว้ แด โละซ้ะ ดี๊-อ้ะ, พี่ อ แม้ ทแบกแช่แยว้อซ้ะ, ลู่ง ท เซิงฆวี๊งซ้ะโย้ เมะเว๊ โพล้ง ลแพ นอ, พี่ นางแบทางไท้ กแช่แยว้ ลู่ง กแช่แยว้ อเกล้อพ้า แบเด้าะ กแช่แยว้ อ ซ้ะทาง, เป๊งนี่ ลู่ง ก ซื๊งเว๊ ก แม้ ทเด้บ้ะ อกย้อง ก ซื๊งเว๊ ก โอ ทเด้บ้ะ พ้า ไยะ มะ, ฌ้อง ก ซื๊งเว๊ ก ม พ้องพลิ้ ชี่-อ้า?

⁶ เฆ้อ กุ้แฌ้ ก เกทางก้ะ บี่ซุ้ดี๊ ท พี่ อ แบอ้า ดี๊ ก ซื๊งเว๊ ก ทแบกแช่แยว้อซ้ะ เลาพะ นอ, เก บี่ซุ้ดี๊ ไช๊ช้าง แบอ้าแบซ๊าง ก ซื๊งเว๊ กุ้แฌ้ ล้างไย้ะ บี่ซุ้ดี๊ เซงแล ดี๊ ก ทไพ้ะทแม อูงพลุ้ไฆวะ เฆ้อ บี่ซุ้ดี๊ ลี้ง

⁷ โพล้ง ล โอ ชูแพ โล้ แบ เท่อ ดี๊ กแช่แยว้ อ เม้ง-อ้า เฌา แม้ ชองทาง อ ซ้ะ, เกม๊า โอเฌิ่งโอค๊า ดี๊ กแช่แยว้-อ้า, น่างแฌ้ แบ เมะเว๊ กแช่แยว้ อางกีซูงไฆวะ อ เมะ ดี๊ ก ซื๊งเว๊ ซีง ลแพ ดี๊ ดึ้ เกม๊า ก ซื๊งเว๊ พลี่งไฆวะ ดี๊ ก ทเด้บ้ะ อดู้งอยาง

⁸ จ กแช่ยาเว-เอ้อ, ค๊องเนงอี้ง น เก ก แพ่ ได้ะ ก ซื๊งเว๊ ซีง ลแพ, ก เก ฌางคู ไพะ, ดี๊ กแช่แยว้ เก ซแล้ ไต้ เว๊ ก ซื๊งเว๊ กุ้แฌ้ เก กแช่แยว้ อ จูงล่างคางคู

⁹ จ กแช่ยาเว-เอ้อ, อวีงซ้ะชู้ ซ้ะทาง พ้ะดู ล ฌี้ ดี๊ นางแบท๊าง ทเด้บ้ะ ล้างชู้ล้างแกย ล ฌี้ ค๊องเนงอี้ง, อวีงซ้ะชู้ ช๊องมองแคว่ที๊ง เท่อ ไช้ะ, เฆ้อ กุ้แฌ้ ก เก นพูนลี้ง ล้อ

¹⁰ กแช่แยว้ อ เว่ง พี่ อฌี้อแอว้ ลแพ นอ, เกทางก้ะ แพะคูทเคแกล้ ซีโยง นอ, เกทางก้ะ แพะคูทเคแกล้ เยรูซเลง เกทางก้ะ ทล่าง โอโปล้ ก้ะ

¹¹ ก ซื๊งเว๊ ก เด้กแช่แยว้อล่างโอ พี่ อเช๊งอเกล้ง, ดี๊ อฌี้อแอว้ ทล่าง พี่ กพี๊งชู้พู๊งชู้ ลู่ง แย๊ อู้ง, อางปฆ้า ทาง กแช่แยว้ เกทางก้ะ ทล่าง พี่ แบ ท เช้าไฆวะ เย้า ดี๊ ก ท พี่ อ ลื่งโอฆวี้โอ เลาพะ นอ, เกทางก้ะ ท พี่ อ แบ ท เฌ๊ฌ้องไฆวะ ล้อ

¹² จ กแช่ยาเว-เอ้อ, พี่ ท เกทาง อ ซ้ะ บี่อี้ง เย้า นอ, น ม แม้ โอที่งโอโท๊ ล้าง น ซ้ะ ได้ะ-อ้า? น ม โอกโช้, ดี๊ แคแน ก ซ้ะ ลู่ง อแออโฌ่-อ้า?