อีซยา 63 - Northern Pwo Karen Thai Bible

ท แม้แกไท้ เอโดง

¹ อ อี้ง นอ, โพล้งเล้ พี่ เฌ๊นี่ ลู่ง เอโดง ซุ้ ไช๊ช้าง ย้อง ซี่งโฌ้ โอนี่ ลู่ง เว่ง โบรา? อ อี้ง นอ, โพล้งเล้ ซุ้ นฆ้านโฆ่ ลู่ง อฆี๊งอแล้ ดี๊ เฌ๊ ดี๊ น ไฌ่ดูแบ้ดู “เมะเว๊ เฆ้อ อี้ง ล้อ, พี่ กุ้ซย้ะ โล้ล้าง ทแบกแช่แยว้อซ้ะ ดี๊ โอ ดี๊ อดู้งอยาง อชองอไคล๊ พี่ ม แม้ช้า เกม๊า พ้องพลิ้”

² แบ ทเล้ กแช่แยว้ อ ไช๊ โอ ดี๊ อ ซี่งโฌ้ ดี๊ กแช่แยว้ อไช๊อช้าง บี่ซุ้ดี๊ โพล้ง ไย่ ซไบ้ะแซ ลู่ง อ โบ้ ไย่ พ้า?

³ “ก ไย่ ซไบ้ะแซ อ โบ้ ยื่งเย้ง ล แฌ้ เฆาะ ดี๊ โพล้ง เฌ๊นี่ ลู่ง ชื้อ โพล้ง กุ้ชื้อ ซีง ลแพ นอ, ล โอ ดี๊ เฆ้อ น่างแฌ้ แบ เฆาะ ก ท๊าเท่ง-อ้ะ ดี๊ ก ท ซ้ะทาง พ้ะดู ก ไย่-อ้ะ ดี๊ ก ท เอ้งไน๊ อ เว๊ อ ซวีง บึ้ ลู่ง กไช๊กช้าง อ ล้อง ดี๊ ก ดึ้ เกม๊า กฆ้ากโฆ่ แบอ้า เลาพะ

⁴ เมะเว๊ มื่งนี้ง ลู่ง ท แม้แกไท้ เท่อ นอ, โอ ก ซ้ะ พ้า ดี๊ เนง ลู่ง ก ท เทะนี่ไท้ เฌ๊ท้อง เย้า

⁵ ก แคว่ เท่อ, แบเด้าะ โพล้ง ล โอ แม้ช้า น่างแฌ้ แบ ท ล้ะ แบ ก ซ้ะ, แบเด้าะ โพล้ง ล โอ โชะทาง แบ เฆ้อ ก จูง แด เว๊ ล้อ, เฌ๊โชะ เอะ เฆ้อ ท แม้พ้องพลิ้ ดี๊ ก ท ซ้ะทาง นอ, โชะทาง เฆ้อ

⁶ ก ไย่ล้าง โพล้ง กุ้ชื้อกุ้ชะ ลแพ นอ, ดี๊ ก ท ซ้ะทาง ก ดึ้ เกม๊า อ เว๊ ม้า เท่อ ดี๊ ก ท ซ้ะทาง พ้ะดู ดี๊ ก ลู๊งล้าง อ ซื๊งเว๊ อ ซวีง ลู่ง ฌางคูโคล๊งคู”

ท นางแบ กแช่แยว้ อ ท ย๊างเซิงย๊างซ้ะ

⁷ จ ม โล้ เท่อ, เกม๊า ช๊องมอง แบ กแช่ยาเว อ ทเอทกวี้ง พี่ อเฌิ่งอค๊า ดี๊ กแช่ยาเว อ ทไพ้ะทแม้ พี่ ล้าง อางปฆ้า ทาง บี่ซุ้ดี๊ ท กุ้เม้ง พี่ กแช่ยาเว เกล๊าง เอะ ก ซื๊งเว๊ ดี๊ บี่ซุ้ดี๊ ท อ ฌี้ ดูทึโท๊ทึ, พี่ โอ ดี๊ อีซลาเอง อชื้ออชะ พี่ กแช่แยว้ เกล๊าง เว๊, บี่ซุ้ดี๊ อ ท ย๊างเซิงย๊างซ้ะ ดี๊ บี่ซุ้ดี๊ กแช่แยว้ อ ทเอทกวี้ง พี่ อล๊าอฆวี้

⁸ เมะเว๊ กแช่แยว้ ไจ้ะเว๊ บี่อี้ง, “เต้ๆ, นอ, โพล้ง ลแพ อี้ง เก กพูกลี้ง เก พู พี่ ล แม้ กไบล้ะกแบล แบ เฆ้อ แบ” กแช่แยว้ เก อ ซื๊งเว๊ อ โพล้ง แม้พ้องพลิ้ เท่อ

⁹ ทน้ะ แบ กแช่แยว้ อ ซ้ะ, ลู่ง อ เว๊ อ ทน้ะทโน๊ง พ้า เลาพะ ฌ้อง ทมุ้คู พู พี่ โอ กแช่แยว้ อ เมะแซ พ้า นอ, แม้ช้า อ ซื๊งเว๊ เกม๊า อ พ้องพลิ้ กแช่แยว้ เทะนี่ไท้-อ้ะ ดี๊ อ ทเอทกวี้ง, ดี๊ อ ท ย๊างเซิงย๊างซ้ะ ล้อ กแช่แยว้ โชะทาง อ ซื๊งเว๊, ดี๊ ลี้ โชะ เว๊ ครึๆ, ลู่ง อไยะอเช้

¹⁰ แบเด้าะ อ ซื๊งเว๊ ลแพ นอ, นี่ กไบล้ะกแบล ดี๊ ดึ้ เกม๊า กแช่แยว้ อ วีงฌี้แล้แอว้ อ ซ้ะ เฌ๊ฌ้อง ทบี่นอ, กแช่แยว้ แกยไฆวะ อ ซ้ะ, เก อ ซื๊งเว๊ ซีง ลแพ อดีงอแด้ ดี๊ กแช่แยว้ ดึ้ โละซ้ะ ดี๊ อ ซื๊งเว๊ ลแพ นอ ล้อ

¹¹ ฌ้อง นอ โพล้ง เฌงพูฆ๊างพู, นางแบทางไท้ เท่อ ลู่ง อไยะอเช้ ล ว๊าง อู้ง นางแบทางไท้ โมเซ กแช่แยว้ โอ พี่จองเล้?, เมะเว๊ โพล้ง พี่ ไจทางฌ้า อ ซื๊งเว๊ ลู่ง ปางเล พ้า ล พ๊าฆ่าง ดี๊ โพล้ง ลื่ง กแช่แยว้ อ แมะ อ แกะ น๊างมู๊ง กแช่แยว้ โอ พี่จองเล้?, เมะเว๊ โพล้ง พี่ ชวี๊งล้าง อ วีงฌี้แล้แอว้ ลู่ง อ ซื๊งเว๊ ลแพ นอ อซุ้อแกล้ พ้า

¹² โพล้ง พี่ เกม๊า กแช่แยว้ อ จูง เกทางเกโท๊ ลี้ ดี๊ โมเซ อ จูงฆุ้ โพล้ง พี่ อางน้างพ้ะ ที๊ง ลู่ง อ ซื๊งเว๊ อ เมะแซ พ้า บี่ซุ้ แม้ เม้งลื้อแซท้อง เอะ กแช่แยว้ ล้างชู้ล้างแกย ล้อ

¹³ โพล้ง พี่ ลี้ฌ้า อ ซื๊งเว๊ พะไฆวะ ทล่าง โยะคิ้ บี่ซุ้ดี๊ กซี ลู่ง แพะคูทเคแกล้ อ ซื๊งเว๊ ซีง ลแพ ล นี่ แบท้า แบ

¹⁴ บี่ซุ้ดี๊ ทพูแฆ่ โด้ง ลี้ล้าง ลู่ง ทลู่ง คางไท้ะ บี่จะเล้ นอ กแช่ยาเว อ วีงฌี้แล้แอว้, ดึ้ เกม๊า อ เว๊ โอไปว้ะ บี่นอ ล้อ บี่ซุ้ดี๊ นอ ล้อ, กแช่แยว้ ลี้ฌ้า อพูอลี้ง บี่ซุ้ ม แม้ เม้งลื้อแซท้อง ลู่ง อดูอโท๊ เอะ กแช่แยว้ ล้อ

ท ชูแพอางท่าง พี่ เนโพลทาง ท เปลงไท้ ซ้ะ

¹⁵ อวีงซ้ะชู้ แคว่ล้าง เท่อ ลู่ง ทมุ้คู, ดี๊ แคว่ท๊าง เท่อ โอนี่ ลู่ง น ล่าง ชี๊น้าง อฌี้อแอว้ ดี๊ อ ดู อ โท๊ กแช่แยว้ อ ท เฌาโละ แม้ เท่อ, ดี๊ อดู้งอยาง อชองอไคล๊ โอ พี่จองเล้? กแช่แยว้ อ ซ้ะ ย๊างซ้ะ เท่อ ดี๊ อ ท ย๊างซ้ะ แบ ท เท้าไฆวะ ดี๊ แย้

¹⁶ เมะเว๊ กแช่แยว้ เก เฆ้อ ซีง ลแพ ก แพ่ ทึเมะ อาบราฮาง นอ, ล ซีงแฌ๊ ก ซื๊งเว๊ แบ ดี๊ อีซลาเอง ล นางแบ ก ซื๊งเว๊ แบ จ กแช่ยาเว-เอ้อ, น เก เฆ้อ ซีง ลแพ ก แพ่ น เม้ง นอ, เมะเว๊ กแช่เยว้ พี่ เทะนี่ไท้ แย้ โค๊ ลู่ง เอะอู้

¹⁷ จ กแช่ยาเว-เอ้อ, แบทเล้ น เกม๊า ก ซื๊งเว๊ เฌ๊พลุ้ไฆวะ ดี๊ น เกล้? ดี๊ เกม๊า ก ซื๊งเว๊ ก ซ้ะ ชองโฆะ, ท้อง ลู่ง ล ดู้งแบยางแบ กแช่แยว้ แบ อวีงซ้ะชู้ กแช่แยว้ เฌ๊ไท้, ลู่ง น เพล่ ซีง ลแพ อ ฌ่าง เมะเว๊ โพล้ง อ ชื้อ ลแพ นอ, พี่ เก นคองนแซย้

¹⁸ กแช่แยว้ อพูอลี้ง พี่ อฌี้อแอว้ ยู่แคว่ เท่อ ลชู่ลล่าง แบเด้าะ ก ซื๊งเว๊ กดีงกแด้, ไย่เละค๊างพะ กแช่แยว้ อ ทแบ้แยว้ล่างลู่งอฌี้

¹⁹ เก อช๊าอโท่ ไยะ เย้า, พี่ ก ซื๊งเว๊ ซีง ลแพ, ก เก บี่ซุ้ดี๊ โพล้ง พี่ กแช่แยว้ ล โพะคอง แบ เว๊ แบ บี่ซุ้ดี๊ โพล้ง พี่ อ เว๊ ล นี่ กุ้ เว๊ ดี๊ กแช่แยว้ อ เม้ง แบ