อีซยา 59 - Northern Pwo Karen Thai Bible

ท แม้เตาแม้แต๊ ท ลเกิ้งลแบ แบ, ดี๊ ท แม้น้ะแม้โน๊ง

¹ อี้งเซ้อ, กแช่ยาเว อ จูง ล พือ น้ะกชุ้ แบ, พี่ ม แม้ช้า เกม๊า พ้องพลิ้-อ้า ดี๊ อ แน่ ล อ้าไทะ ท๊อง ล แน่ฌ๊า เท่อ แบ-อ้า นอ แบ

² แบเด้าะ น ซื๊ง ทเด้บ้ะ ดึ้ เกม๊า ทอางน้าง พ้ะ กึทาง ลู่ง น ซื๊ง ดี๊ น กแช่แยว้ อ ฌ่าง ดี๊ น ซื๊ง ทเด้บ้ะ ล้างกดื้ง ทะ แน้ ดี๊ กแช่แยว้ อ เมะ ดี๊ ท พี่ กแช่แยว้ ม คุ้ช๊องแน เท่อ

³ เป๊งนี่ น ซื๊ง จูง แบอ้า ดี๊ ทซวีง ดี๊ น จูงโน้ง แบอ้า ดี๊ ทเด้บ้ะ ออ้าอซ๊าง น ซื๊ง นุ้เฌะ ไคล้ คีงอูงคีงตู๊ง เท่อ น พลี้ ไคล้พลื่งไคล้มวี๊ง ทอ้าทซ๊าง

⁴ โพล้ง ล โอ ฟ่อง กุ้ทาง เท่อ ลู่ง อเกิ้งอแบ น่างแฌ้ แบ โพล้ง ล โอ ดึ้ บ้าคว่าง ลู่ง อโต้อล้อง น่างแฌ้ แบ อ เว๊ อางกีล้าง อ ซ้ะ ดี๊ ท พี่ อซูงอแซ ล โอ แบ, อ เว๊ ไคล้ คีงอูง เท่อ อ เว๊ ด้าทาง นี่ ทอ้าทซ๊าง, ดี๊ กึทาง ทเด้บ้ะ

⁵ อ ซื๊งเว๊ ดีงล้าง ฌู่ง พ้ะโท๊ท่อง อ ดีง อ เว๊ ท้ะ ปค้างเย้ โพล้ง พี่ อาง อ ซื๊งเว๊ อ ดีง นอ, ซี๊ง เว๊ ล้อ อ ดีง โพลง ฌี้ๆ, แบ ท ท่าง เท้พ้ะ นอ, พ้ะโท๊ท่อง ไจทาง ล้อ

⁶ อ ซื๊งเว๊ อ เย้ นอ, เจ่ แม้ เก ไช๊ช้าง ล ซี แบ อ เว๊ แม้ นี่ อ ทไพ้ะทแม้ อซูงอแซ คลึไบ้ะ ล้าง อ ซ้ะ ล ซี แบ อ ซื๊งเว๊ อ จูงล่างคางคู นอ, เก ทอ้าทซ๊าง ดี๊ ท แม้ชองแม้จุ้ นอ, โอ อ จูง พ้า

⁷ อ ซื๊งเว๊ อ คาง ซยู๊ ลี้ฌูง ทอ้าทซ๊าง ดี๊ อ เว๊ ปชื่ง ลี้ แม้ล้าง โพล้ง พี่ อ ทไพ้ะทแม ล โอ แบ อ ซวีง อ ซื๊งเว๊ อ ท ช๊องมอง เก ท ช๊องมอง ลู่ง ออ้าอซ๊าง ทแม้ ล้างเทา ดี๊ ทแม้ เฌ๊ฌ้อง โอ ลู่ง อ เกล้ อ พ้า

⁸ อ ซื๊งเว๊ ล ซีงแฌ๊ เกล้ ทฆู๊งทพุ้ แบ ท อเกิ้งอแบ ล โอ ลู่ง อ เกล้ อ พ้า แบ อ ซื๊งเว๊ แม้ ไกกอง อเกล้อพ้า โพล้ง กุ้แฌ้ พี่ อ โพะ เกล้ ล บ้อง นอ, ม ล ซีงแฌ๊ ทฆู๊งทพุ้ แบ

⁹ อกย้องบี่นอ, ท อเกิ้งอแบ โอ ไย้ ไฆวะ ดี๊ ก เว๊ ซีง ลแพ ดี๊ ทแบกแช่แยว้อซ้ะ ช่อง เฆ้อ ล คลึ้ แบ ก ซื๊งเว๊ ซีง ลแพ มื้งแล่ ทโฌ่งทพ้าง อางฆื๊ง แคว่ ทโฌ่ง ทพ้าง ดี๊ แคว่ แดเทา ทไค้ะ มื้งแล่ ท โฌ่ง ท พ้างฆีง, แบเด้าะ ก ไจ ลู่ง ทไค้ะซ๊า พ้า

¹⁰ ก อางฆื๊ง กเลิ่ง กางแป, บี่ซุ้ดี๊ โพล้ง อ เมะโบล ก อางฆื๊ง กเลิ่ง เท่อ, บี่ซุ้ดี๊ โพล้ง อ เมะคลี๊ง ล โอ แบ ก แบท้า ลู่ง มแช๊แค๊ นอ, ก คาง แบท้า, บี่ซุ้ดี๊ ลู่ง ทไค้ะเยาะยะล้าง อ แค๊ ลู่ง โพล้ง พี่ โอ ดี๊ อไฌ่อแบ้ อซุ้อแกล้ นอ, ก บี่ซุ้ดี๊ โพล้ง ซี๊ง เย้า

¹¹ ก ซื๊งเว๊ กุ้แฌ้ ฌางล้างย้าล้าง บี่ซุ้ดี๊ ทซู๊ง ก ฌางอื้งฌางโทะ บี่ซุ้ดี๊ ทูลี่ง แอว้ ก มื้งแล่ ท อเกิ้งอแบ, แบเด้าะ ล โอ แบ เฆาะ มื้งแล่ ทพ้องทพลิ้, แบเด้าะ นอ, อ โอ ช้างชื้ง ไย้ ดี๊ เฆ้อ ล้อ

¹² เป๊งนี่ ก ซื๊งเว๊ ซีง ลแพ, ก ท กไบล้ะกแบล ดี๊ กแช่แยว้ แอทางโฌ่ทาง ดี๊ ก ทเด้บ้ะ นอ, ไคล้ ชางบ้า เฆ้อ ล้อ อไฌ่บี่อี้ง, ก ท กไบล้ะกแบล โอ ดี๊ ก ซื๊งเว๊ ดี๊ ก ซื๊งเว๊ ก ช๊องมอง แบ ก ทเด้บ้ะ ออ้าอซ๊าง

¹³ เมะเว๊ ท กไบล้ะกแบล, ดี๊ ท ซม๊า กแช่ยาเว ท แกยไฆวะซ้ะ ดี๊ ท โพะ ก กแช่แยว้ อ ไค๊ ทไคล้ ด้องซุ้ แม้น้ะแม้โน๊ง เท่อ, ดี๊ ท กไบล้ะกแบล ทไคล้ คีงอูง เท่อ พี่ อ เฌ๊ทาง นี่ ลู่ง ซ้ะ พ้า

¹⁴ ท อเกิ้งอแบ นอ, แกยไท้ อ ซ้ะ ดี๊ ทแบกแช่แยว้อซ้ะ นอ, ชี๊เทิง โอ ไย้โยะ เมะเว๊ ทเมะทโต้ ล้างเทะเค้า ลู่ง เว่ง คว้าง พ้า ดี๊ ทโต้ทล้อง ลี้ นึฆ้าง ล ซี แบ

¹⁵ ทเมะทโต้ ล้างแม่ไฆวะ ดี๊ โพล้ง พี่ ล้างแซยล้างพ้ะ ดี๊ ทอ้าทซ๊าง นอ, ดึ้ เกม๊า อ กแช่ แบ ท ตมละตเช กแช่ยาเว แด เว๊ นอ, ล แบ ทมอง ลู่ง อ เมะแซ พ้า แบ พี่ ล โอ ดี๊ ท อเกิ้งอแบ แบ

¹⁶ กแช่แยว้ แด เว๊ ล โอ น่างแฌ้ แบ ดี๊ ล้ะ แบ อ ซ้ะ, พี่ โพล้ง ล โอ อางโฆอางแย๊ เท่อ คิ้ อ ฌ่าง น่างแฌ้ แบ ฌ้อง กแช่แยว้ อ จูง แด เว๊ นอ, เฌ๊โชะ ทน้าทฆ่าง เอะ กแช่แยว้ ดี๊ ทแบกแช่แยว้อซ้ะ นอ, อางกีดูอางกีโท๊ ทาง กแช่แยว้

¹⁷ กแช่แยว้ ซุ้ทาง ทแบอซ้ะ เก ทด้างทะ ซ้ะแน๊ ดี๊ คลึทาง คูเพิง ลู่ง ทพ้องทพลิ้, โอ กแช่แยว้ อ คูล้อง กแช่แยว้ ซุ้ทาง ไช๊ช้าง ลู่ง ทแม้ แกไท้ เก ท ไต้ฆี๊ง ดี๊ แม้นี่ ท เฌาโละ แม้ เท่อ, พุ้ไบ้ะ ล้าง อ ซ้ะ

¹⁸ กแช่แยว้ ม แม้ช๊าไท้-อ้ะ, บี่ซุ้ดี๊ อ ทไพ้ะทแม้ นอ เมะเว๊ ซ้ะทาง พ้ะดู ดี๊ โพล้ง พี่ โอเว้งโอก๊าง ดี๊-อ้ะ, ดี๊ แม้แกไท้ อดีงอแด้ กแช่แยว้ ม แม้แกแม้ช๊าไท้ ที๊งล่างค่างพ้า ลู่ง ปางเล พ้าไท้ะ

¹⁹ ฌ้อง อ ซื๊งเว๊ ม ดู้งแบยางแบ กแช่ยาเว อเม้งอแซ ลู่ง มื่งนึ ล โค๊ ดี๊ ดู้งแบยางแบ กแช่แยว้ อโฌ่งอพ้าง ลู่ง มื่งทาง ล โค๊ เมะเว๊ กแช่แยว้ ม เฌ๊ บี่ซุ้ดี๊ ที๊งกล้อง แยว้ล้าง ชอง พี่ กแช่ยาเว อ ลี้ง ชองโฆะ อูงเทว๊ เว๊

²⁰ ดี๊ กแช่แยว้ พี่ เทะนี่ไท้ เท่อ นอ, ม เฌ๊ ลู่ง ซีโยง เฌ๊ฌูง โพล้ง ลแพ นอ, พี่ โอ ดี๊ ยาคุ้, พี่ แกยไฆวะ อ ซ้ะ ดี๊ ท กไบล้ะกแบล” กแช่ยาเว ไคล้ บี่อี้ง ล้อ

²¹ กแช่ยาเว ไจ้ะเว๊ บี่อี้ง, “แบเด้าะ ก เว๊ นอ, อ อี้ง เก ก ทเอิ้งล้าง ดี๊ อ ซื๊งเว๊ ลแพ นอ, เมะเว๊ กวีงกแล้ พี่ โอ ดี๊ แน้, ดี๊ ก ทไคล้ พี่ ก ชวี๊งล้าง ลู่ง น นุ้ พ้า นอ, ม ล ล้างแซยล้างพ้ะไฆวะ ดี๊ น นุ้ -อ้า, น พู น ลี้ง อ นุ้-อ้า, น พู น ลี้ง อ พู อ ลี้ง-อ้า แบ, ท๊อง อี้ง ท้อง ชู่งแย๊โค๊ ล้างชู้ล้างแกย”, กแช่ยาเว โล้ เว๊ บี่อี้ง ล้อ