อีซยา 50 - Northern Pwo Karen Thai Bible

¹ กแช่ยาเว ไจ้ะเว๊ บี่อี้ง “ไละทไจแดโละซ้ะ ดี๊ น ซื๊ง มู่ พี่ ก เจ่ โฌ๊ไจไฆวะ-อ้ะ นอ, โอ พี่จองเล้? ดี๊ โพล้ง พี่ ก ทางดีงทางแม่ ดี๊-อ้ะ พี่ ล แฌ้ เล้ พี่ ก อางแช๊ น ซื๊ง เกม๊า เอะ-อ้ะ? อี้งเซ้อ, น แบ ท อางแช๊ ลู่ง น ทเด้บ้ะ อกย้อง ดี๊ น มู่ แบ ท โฌ๊ไจไฆวะ ลู่ง น ท กไบล้ะกแบล อกย้อง

² แบ ทเม้งเล้, ท่อง ก เฌ๊ นอ, ล แด โพล้ง น่างแฌ้ แบ เฆาะ? พี่ ก กุ้ซย้ะ เท่อ นอ, โพล้ง ล โอ เซ๊ช๊า เท่อ น่างแฌ้ แบ? ก จูง พือ น้ะกชุ้, ท๊อง เทะนี่ไท้ เท่อ ล ซี แบ-อ้า? ดี๊ กไฌ่กแบ้ ม แม้พ้องพลิ้ เท่อ นอ, ล โอ แบ-อ้า? แคว่เซ้อ, ก ดึ้ เกม๊า ที๊ง ปางเล ซู๊งทาง ดี๊ ก ท แม้น้าแม้ฆ่าง ล้อ ก ดึ้ เกม๊า ที๊งกล้อง ลแพ นอ, เก แพะคูทเคแกล้ แยพู ลู่ง ที๊งกล้อง พ้า ล กล้องๆ, นอ, ล้างอืง น๊าอืง, เป๊งนี่ ที๊ง ล โอ แบ ดี๊ อ ซี๊งไฆวะ, เป๊งนี่ ซู๊โอ้ซ้ะที๊ง

³ ก คลึไบ้ะ ทมุ้คู ดี๊ ทไค้ะ ซ๊าโญ๊ง ดี๊ เจ่ ตไก้ยะ เต่กเซ้าะ เก อ ตไก้ยะ คลึไบ้ะ-อ้ะ”

กแช่แยว้ อ เพล่, แบ ทแม้ ล้างไช้ะล้างย่อง, แบเด้าะ นี่แบ ทไคล้ แก้ คิ้-อ้ะ

⁴ ทอดูทึโท๊ทึ กแช่ยาเว เกล๊าง เอะ แย้ เกม๊า จ โอ ดี๊ โพล้ง พี่ นี่แบ ทซองทซ๊าง อ พลี้ บี่ซุ้ จ ม ซีงแฌ๊ ทดุ้เฌิ่ง ทะ เมะเว๊ ดุ้เฌิ่ง ทะ โพล้ง พี่ ล้างเพาล้างแช่ ดี๊ ทไคล้ กุ้ มื่ง โฌ้ นอ, กแช่แยว้ กุ้ เฌ้เทิง-อ้ะ กแช่แยว้ กุ้ เฌ้เทิง จ แน่ บี่ซุ้ เกม๊า คุ้ช๊องแน เท่อ, บี่ซุ้ดี๊ โพล้ง นี่แบ ทซองทซ๊าง

⁵ ทอดูทึโท๊ทึ กแช่ยาเว, เว่พ้ะ จ แน่ ดี๊ แย้ จ ล ลือค๊างพะ เท่อ แบ แย้ จ ล วีงโด้งโคล๊ง ไท้ จ ซ้ะ แบ

⁶ จ ไบล้ะทาง จ โคล๊ง เกม๊า โพล้ง พี่ พลีแย้ท่างแย้ ดี๊ แกยฆ้าง จ บุ้แพ้ เอะ โพล้ง พี่ อ ทิ้ไฆวะ จ แคชอง จ ล นี่ อางกีซูงไฆวะ จ เมะ ดี๊ ทแม้ ไฌ๊ซ้ะ, ดี๊ ท ทูพลี้ทูพ๊า แบ

⁷ แบเด้าะ ทอดูทึโท๊ทึ กแช่ยาเว แม้ช้า แย้ อกย้อง บี่อี้ง นอ, จ ล แบ ทแม้ เกม๊า ล้างไช้ะล้างย่อง แบ อกย้อง บี่อี้ง นอ, จ แม้ จ เมะ เกม๊า อ บี่ซุ้ดี๊ โล่งมีท้ะแช๊ ดี๊ จ ซีงแฌ๊ -อ้ะ บี่อี้ง, จ ล ฌางแช้ฌางเด แบ

⁸ กแช่แยว้ พี่ ไคล้ แก้ คิ้ แย้ นอ, โอเบ้าโอเท่ง โพล้งเล้ ม ดึ้ คว่าง ดี๊ แย้ นอ เกม๊า ก ชี๊เทิงทาง เฌ๊ ซกุ้ ดี๊ โพล้งเล้ ม ไคล้ ซี๊งเค แย้ นอ เกม๊า อ เว๊ เฌ๊ฆ๊าง โอ เบ้า แย้

⁹ อี้งเซ้อ, ทอดูทึโท๊ทึ กแช่ยาเว แม้ช้า แย้ โพล้งเล้ ม ไคล้ ไจ้ะเว๊ จ โอ ดี๊ ทไพ้ะทแม? แคว่เซ้อ, อ ซื๊งเว๊ กุ้แฌ้ ม เฌ๊กูงเฌ๊ซยื๊งไฆวะ บี่ซุ้ดี๊ ไช๊ช้าง ท พูโฆ้งพูแฆ่ ม ไอ อางไฆวะ อ ซื๊งเว๊ ล้อ

¹⁰ โพล้ง พี่ แฌ้ เล้ ลู่ง น ซื๊ง แกล้, พี่ อ ยางแบซ้ะเม กแช่ยาเว ดี๊ คุ้ช๊องแน กแช่แยว้ อ เพล่ อ ลู่ง? โพล้ง พี่ อ โอม๊า ลู่ง ทไค้ะ แกล้ ดี๊ ทโฌ่งทพ้าง ล โอ แบ แบเด้าะ อางกีล้าง อ ซ้ะ ดี๊ กแช่ยาเว อเม้งอแซ ดี๊ เปิ่ง อ กแช่แยว้

¹¹ อี้งเซ้อ, น ซื๊ง กุ้แฌ้ พี่ อูงเค้ทาง มี โพล้ง พี่ อ แม้ นี่ มีอ้าไค๊ เราทะ นล้องนย่าง เกม๊า น ไจ ดี๊ น ซื๊ง มี อ พ้าง ดี๊ มีอ้าไค๊ พี่ น อูงเค้ทาง-อ้ะ นอ น ซื๊ง ซีง ลแพ, ม นี่แบ ท ล เม้ง อี้ง, ลู่ง ก จูง พ้า เมะเว๊ น ม แบ มี๊งน้าง ล้าง ลู่ง ทน้ะทโน๊ง อ ล่าง พ้า