อีซยา 37 - Northern Pwo Karen Thai Bible

เฮเซคียา ก้างแก้ เท่อ ดี๊ อีซยา

¹ ท่อง กจุ้แฆว้ เฮเซคียา แน่ฌ๊า เว๊ นอ, อ เว๊ ซย๊างยะ อไช๊อช้าง, ดี๊ แม้ นี่ ตไก้ยะ เต่ กเซ้าะ, คลึไบ้ะ ล้าง อ ซ้ะ, ฌ้อง ลี้ นึฆ้าง ลู่ง เด้ กแช่ยาเวอล่างโอ พ้า

² ดี๊ อ เว๊ เจ่ทาง กดูกแซย่ เอลียาคีง, ทอคูดูแม้เท่อลู่งบลางพ้า, เชนา ทอดูกวิ้ไนเท่อ, ดี๊ โพล้งลื่งเท่ออคู อเม้งอแซย่, คลึไบ้ะ ล้าง อ ซ้ะ ดี๊ ตไก้ยะ เต่ กเซ้าะ, ลี้ฌูง อามอ อ พูแคว๊ อีซยา โมไคล้คิ้กแช่แยว้

³ อ ซื๊งเว๊ ลแพ นอ, โล้ แบ-อ้ะ บี่อี้ง, “เฮเซคียา ไจ้ะเว๊ บี่อี้ง, ‘ล นี้ง แย๊ อี้ง, เก มื่งนี้ง น้ะเซิงน้ะซ้ะ, มื่งนี้ง พี่ แบ ทไจ้ะทไคล้, ดี๊ มื่งนี้ง ล้าง ฌางแช้, พืงแซ แบมื่ง กึทาง, แบเด้าะ ไฌ่แบ้ โฆ๊ง เกม๊า อ กึทาง ล โอ แบ

⁴ แบซีงลู่ง น กแช่ยาเว คุ้ช๊องแน ร้ะชาเค อ ทไคล้, โพล้ง พี่ อะซีเรีย อ กจุ้แฆว้, อ เว๊ อ เซงคู โซ๊งทาง-อ้ะ, เกม๊า อ เฌ๊ แม้ไฌ๊ซ้ะ กแช่แยว้ พี่ อ โอม๊า, ดี๊ กแช่แยว้ ม แม้น้าแม้ฆ่าง ทไคล้, พี่ น กแช่ยาเว คุ้ช๊องแน เว๊ เย้า, อกย้องบี่นอ, เกม๊า น เทว๊ ทชูแพอางท่าง เท่อ, ลู่ง โพล้ง พี่ อ ล้างลื๊อ อ โพล้ง โอ ล้างลื๊อ ก้ะ ลแพ นอ อ ฌ่าง’, ”

⁵ ท่อง กจุ้แฆว้ เฮเซคียา อ กดูกแซย่ เฌ๊ ท้อง อีซยา นอ

⁶ อีซยา โล้ เอะ อ ซื๊งเว๊ ซีง ลแพ บี่อี้ง, “เกม๊า น ซื๊ง โล้ แบ น เซงคู บี่อี้ง, กแช่ยาเว ไจ้ะเว๊ บี่อี้ง, ‘ซ้ะเม เท่อ ลู่ง ทไคล้ พี่ น แน่ฌ๊า แบ-อ้ะ, พี่ อะซีเรีย อ กจุ้แฆว้ อ กดูกแซย่ นี่ ไคล้อ้าไคล้ซ๊าง แบ เฆ้อ นอ ล ฌี้

⁷ อี้งเซ้อ, ก ม ชวี๊งล้าง วีงแล้ ล เม้ง ลู่ง อล้องอย่าง พ้า, บี่ซุ้ อ เว๊ ม แน่ฌ๊า ทโล้โค, ฌ้อง ไท้ไท้ ลู่ง อ ที๊งล่างค่างพ้า, ดี๊ ก ม เกม๊า อ เว๊ ล้างเทะเค้า ดี๊ น้ะ ลู่ง อ กแช่ อ ที๊งล่างค่างพ้า ล้อ’, ”

⁸ ร้ะชาเค ไท้ไท้ ไวะ, เป๊งนี่ อ แน่ฌ๊า เว๊ อะซีเรีย อ กจุ้แฆว้ ไจทางไฆวะ ลาคิ้ พ้า เย้า, ดี๊ แด เว๊ อะซีเรีย อ กจุ้แฆว้ ดึ้ซึ้ ลู่ง เว่ง ลิ้นา

⁹ กจุ้แฆว้ แน่ฌ๊า ทโล้ แบฆ้ะ ดี๊ คุ้ อ กจุ้แฆว้ ทีฮะคา บี่อี้ง, “อ เว๊ ไจทาง เฌ๊ ดึ้ โละซ้ะ ดี๊-อ้ะ เย้า”, ดี๊ ท่อง กจุ้แฆว้ คุ้ช๊องแน เว๊ เย้า นอ, อ โซ๊งทาง โพล้งไคล้เดิงเท่อ ลี้ฌูง เฮเซคียา ดี๊ ไจ้ะเว๊ บี่อี้ง

¹⁰ “เกม๊า น ซื๊ง ไคล้ ดี๊ ยูดา อ กจุ้แฆว้ บี่อี้ง, ‘เกม๊า น กแช่แยว้ พี่ น นะ-อ้ะ เฌิ่งเพิ่ง นอ, อางโล๊ ไละ แน้ ไจ้ะเว๊, “เยรูซเลง ม ล แบ ทอางกีล้าง ลู่ง อะซีเรีย อ กจุ้แฆว้ อ จูง พ้า แบ นอ ล ฌี้”

¹¹ แคว่เซ้อ, น แน่ฌ๊า เย้า บี่อี้ง, กเย่ อะซีเรีย อ กจุ้แฆว้ นอ, นี่ แม้ แบ ทเม้งเล้ ดี๊ ค่าง กุ้จอง, เมะเว๊ นี่ แม้เฌ๊ฌ้องไฆวะ เว๊ เลา เกล้งเน้ง, ฌ้อง แน้ น ม นี่แบ ทแม้ พ้องพลิ้-อ้า?

¹² กเย่ โพล้งกุ้ชื้อกุ้ชะ ซีง ลแพ อ ท กโช้งกแช่, พี่ กพี๊งชู้พู๊งชู้ ลู่ง แย๊ อู้ง, นี่ แม้เฌ๊ฌ้อง เว๊ นอ, แม้พ้องพลิ้ อ ซื๊งเว๊ ซี ชี่-อ้า?, เมะเว๊ โกซาง, ฮาราง, เรเซ, ดี๊ โพล้ง เอโดง พี่ โอ เทงอาซา พ้า

¹³ ฮามา อ กจุ้แฆว้, อาราปะ อ กจุ้แฆว้, เว่ง เซฟาวาเอง อ กจุ้แฆว้, เฮนา ดี๊ อีวา โอ พี่จองเล้?’, ”

เฮเซคียา อ ท ชูแพอางท่าง

¹⁴ เฮเซคียา พองนี่ ไละกวิ้ยื่ง, ลู่ง โพล้งไคล้เดิงเท่อ อ จูง พ้า, ดี๊ พ้ะ เว๊, ฌ้อง เฮเซคียา ลี้ทาง ลู่ง เด้กแช่ยาเวอล่างโอ, ดี๊ อุ้ทาง ไละกวิ้ยื่ง นอ, ลู่ง กแช่ยาเว อ เมะแซ พ้า

¹⁵ ดี๊ เฮเซคียา ชูแพอางท่าง เท่อ ดี๊ กแช่ยาเว บี่อี้ง

¹⁶ “จ กแช่ยาเว ซึ้คู ดูทึชองทึ, อีซลาเอง อ กแช่แยว้, พี่ ชี๊น้าง โอ ลู่ง เครุ้ ซีง ลแพ อ เช๊คู-เอ้อ น เก กเย่ บ้างมื่ง ลู่ง ฌางคูโคล๊งคู อ กแช่แยว้, เมะเว๊ แน้ ล แฌ้ เฆาะ ล้อ, น ไต้ล้าง มุ้คู ดี๊ ฌางคูโคล๊งคู

¹⁷ จ กแช่ยาเว-เอ้อ, อวีงซ้ะชู้ ดุ้แน่ คุ้ช๊องแน เท่อ, จ กแช่ยาเว-เอ้อ, อวีงซ้ะชู้ จางทาง เมะ, ดี๊ แคว่ เท่อ, ดี๊ อวีงซ้ะชู้ คุ้ช๊องแน กเย่ เซงนาเคอรี อ ทไคล้, พี่ อ เว๊ โซ๊งทาง โพล้ง เฌ๊ แม้ไฌ๊ซ้ะ กแช่แยว้ พี่ อ โอม๊า

¹⁸ จ กแช่ยาเว-เอ้อ, เก ทเมะทโต้ พี่ กเย่ อะซีเรีย อ กจุ้แฆว้ นอ, นี่ แม้ เกม๊า กเย่ ค่าง เลาพะ, ดี๊ อ ซื๊งเว๊ อ ที๊งล่างค่างพ้า นอ โอโปล้ ก้ะ

¹⁹ ดี๊ นี่ เว่งว๊าง ล้าง อ ท กโช้งกแช่ ลแพ นอ ลู่ง มีอ้า พ้า, เป๊งนี่ ท ลแพ นอ, ล เมะ กแช่แยว้ แบ, เก ที่ กโพล้ง อ จูงล่างคางคู พี่ เก เซง, ดี๊ โล่ง, ทบี่นอ, ท ลแพ นอ, แบ ทแม้เฌ๊ฌ้องไฆวะ ล้อ

²⁰ ค๊องเนงอี้ง, จ กแช่ยาเว, ก ซื๊งเว๊ ซีง ลแพ ก กแช่แยว้-เอ้อ, อวีงซ้ะชู้ แม้ช้า เฆ้อ, เกม๊า พ้องไฆวะ ดี๊ อ จูง, บี่ซุ้ ฌางคูโคล๊งคู อ บ้างมื่ง เลาพะ ม ซีงแฌ๊ เว๊ บี่อี้ง, กแช่แยว้ ล แฌ้ เฆาะ ล้อ, เก กแช่ยาเว”

²¹ ฌ้อง อามอ อ พูแคว๊ อีซยา, โซ๊ง ทโล้โค ท้อง เฮเซคียา ไจ้ะเว๊, “กแช่ยาเว อีซลาเอง อ กแช่แยว้ ไจ้ะเว๊ บี่อี้ง, ‘เมะเว๊ น นี่ ชูแพอางท่าง เท่อ ดี๊ เฆ้อ, แบฆ้ะ ดี๊ อะซีเรีย อ กจุ้แฆว้ เซงนาเคอรี’

²² อ อี้ง นอ, เก กแช่ยาเว อลู่งอแท๊, พี่ กแช่ยาเว ไคล้ ดึ้-อ้ะ ไจ้ะเว๊ ‘พู มืงน้าง เช๊งเกล้ง ลู่ง ซีโยง ดึ้เดว แน้, ดี๊ เชิ่งเชะ แน้ เยรูซเลง อ พูมืง ฌี้งฌื่ง อ คู ดี๊ แน้ โพะ น ไค๊

²³ ‘น แม้ไฌ๊ซ้ะ เท่อ, ดี๊ ไคล้อ้าไคล้ซ๊าง แบ โพล้ง เล้? น เฆ๊บุ้เฆ๊บ้าง แบ โพล้ง เล้? ดี๊ น แคว่ เท่อ ทื่งดู ล้างซ้ะ ดี๊ อีซลาเอง อ กแช่แยว้ พี่ อฌี้อแอว้

²⁴ น แม้ไฌ๊ซ้ะ ทอดูทึโท๊ทึ กแช่ ดี๊ น เพล่ ลแพ นอ ดี๊ น ไคล้ บี่อี้ง, “ดี๊ จ เลาะ ดึ้ซึ้ แอฌี่งแอฌ้อง จ นี่ ลี้ทาง ลู่ง ทลู่ง ลแพ นอ อ ทล่าง พ้ะโท๊ ลี้ท้อง เลบาโนง อ ทล่าง ไย้ ทึ จ เคาล้าง อ ซย๊องซีดา มื่งเทิง พี่ อ โท๊ทึ เลา ดี๊ อ ซย๊องซ๊า พี่ อ ฌี้ ทึ จ ลี้ นึฆ้าง ลู่ง อ คี๊งจุ้ โท๊ ทึ ลี้ ลู่ง อ ทแซย่ มื่งกน๊าง พ้า

²⁵ จ เคิง ที๊งโบ้ ดี๊ โอ้ที๊ง ดี๊ จ คางย๊างซ้ะ พ้า ม ดึ้ เกม๊า อีไย้ะ อ ที๊งกล้อง เกม๊า ซู๊งทางไฆวะ”

²⁶ ‘น ล แน่ฌ๊า แบ-อ้า ก เก้อะเร้อะ เว้ เท่อ ไยะเย้า? ก ช๊องมองเว๊ทแม้ โค๊ลู่ง เอะ อู้ง เย้า ดี๊ ค๊องเนงอี้ง ก ดึ้ เกม๊า อ เกทาง อ ซ้ะ เย้า เมะเว๊ น ม แม้ เกม๊า เว่ง พี่ อ โอ ดี๊ ทล่างคุ้แคว่เท่อ ล้างฆ่อง เกทางก้ะ ท ล้างฆ่อง แค่เทาแค่ไช้ะ อ โป้ง

²⁷ โพล้ง เว่ง พ้า อ จูง นอ, อไฌ่อแบ้ เลาไฆวะ อ ซื๊งเว๊ อ ซ้ะ ล้างท่อง, ดี๊ ฌางแช้ฌางเด ดี๊ เกทางก้ะ บี่ซุ้ดี๊ ทดุ้ทแล ลู่ง ไชะคูแน้พ้า บี่ซุ้ดี๊ นาง บางไพละ บี่ซุ้ดี๊ นาง ลู่ง เด้า อ จองคู แบ ท เช้าไฆ๊ พี่ ล คลึ้ ดูทาง ได้ะแบ

²⁸ ‘แบเด้าะ ก ซีงแฌ๊ ท พี่ น ชี๊น้าง ดี๊ ซีงแฌ๊ ท พี่ น ไจทาง ดี๊ เฌ๊ นึฆ้าง ดี๊ ท พี่ น ซ้ะทาง พ้ะดู ดี๊ เฆ้อ

²⁹ เป๊งนี่ น ซ้ะทาง พ้ะดู ดี๊ เฆ้อ ดี๊ น ท ชีอูงพู๊ ล้างซ้ะ เฌ๊ นึฆ้าง ก แน่ ทบี่นอ, ก ม แม้นี่ ก นางไค้ บล้ะ น แน๊พู๊ง ดี๊ แม้นี่ กื่อ พลางทะ น นุ้ ดี๊ ก ม แกย แน้ ไท้ไท้ ลู่ง เกล้ พี่ น เฌ๊ นึฆ้าง นอ’

³⁰ “ดี๊ อ อี้ง ม เก ทแม้ไน เอะ แน้, เมะเว๊ ล เนง แย๊ อี้ง นอ, น ม อาง ท พี่ อ เมทาง แด กแช่ เว๊, ดี๊ คี๊งเนง ล เนง พ้า ท พี่ อ เมทาง นี่ ลู่ง อ ล่าง ล่างลี้ง, ฌ้อง ซ๊าเนง ล เนง พ้า, เกม๊า ฆวีงล้าง เท่อ, ฌ้อง เก้า นี่ ไท้, ดี๊ เกม๊า แม้ โซ๊ง ซไบ้ะแซ ดี๊ อาง อ แซ นอ

³¹ แบเด้าะ ยูดา อชื้ออชะ พี่ อ โอ ล้างลื๊อ ก้ะ อ โพล้ง พี่ อ พ้องไฆวะ ดี๊ ท ซี๊ง ลแพ นอ, ม เช้ล้าง อ ฌี่ง ละโค๊, ดี๊ ซูงทางแซทาง ท้ะโค๊

³² เมะเว๊ โพล้ง พี่ อ โอ ล้างลื๊อ ก้ะ นอ, ม ไจทางไฆวะ เยรูซเลง พ้า, ดี๊ โพล้ง พี่ อ ไจคุ้ซูง พ้องไฆวะ นอ, ม ไจทางนี่ ลู่ง ทลู่ง ซีโยง, กแช่ยาเว ซึ้คู ดูทึชองทึ อ ท ฆวี๊งน่างฆวี๊งซ้ะ ม แม้ ท อ อี้ง

³³ “อกย้องบี่นอ, กแช่ยาเว ไคล้ แบฆ้ะ ดี๊ อะซีเรีย อ กจุ้แฆว้ บี่อี้ง ‘อ เว๊ ม ล เฌ๊ฆ้าง เว่ง พ้า อี้ง-อ้า, ล ค้ะ คลีงแช ลี้ ลู่ง นอ-อ้า, ล โชะ นางปด้าง เฌ๊ฆ้าง เว่ง อ เมะแซ พ้า-อ้า, ไต้ นี่ ทล่างทุ้กดื้งซ้ะ ดึ้ซึ้-เว๊-อ้า แบ

³⁴ อ เว๊ เฌ๊ เกล้ พี่ ล บ้อง เล้ นอ, อ แบ ไท้ เกล้ ไท้ ล บ้อง แย๊ นอ ล้อ, อ เว๊ ม ล เฌ๊ นึฆ้าง เว่ง พ้า อี้ง แบ’, กแช่ยาเว โล้ เว๊ บี่อี้ง ล้อ

³⁵ ‘ดี๊ ก ม ปโล่ปด้างทะ เว่ง อี้ง, บี่ซุ้ เกม๊า อ พ้องพลิ้, บี่ซุ้ ลู่ง ก กแช่ อ ฌ่าง แด เว๊, ดี๊ ลู่ง ก เพล่ ดาเว อ ฌ่าง ล้อ’, ”

เซงนาเคอรี ล น้า เท่อ แบ, ดี๊ ซี๊ง เว๊ ล้อ

³⁶ กแช่ยาเว อ เพล่ มุ้คู พู ไจทาง, ดี๊ แม้ซี๊ง โพล้ง ลู่ง อะซีเรีย อ ล่าง โอซยอง พ้า, ล ล้าง โฆะไซ เย่ม๊า แฌ้, ดี๊ ท้อง อช๊าอโท่ ลู่ง โฌ้ ล้างคึ, ท่อง โพล้ง นางทาง อ ซ้ะ นอ, แคว่เซ้อ, อ ซื๊งเว๊ ลแพ นอ, เกทางก้ะ ทจู เลาพะ

³⁷ ฌ้อง อะซีเรีย อ กจุ้แฆว้ เซงนาเคอรี นอ, แญ่ไฆวะ อ ล่าง, ดี๊ ไท้ไท้ ลู่ง เด้า, ฌ้อง เปิ่งโอเปิ่งช๊อง ลู่ง เว่ง นีนะเว พ้า

³⁸ โอ ก้ะ ลู่ง ไค๊, พี่ อ เว๊ โบงทางแบ้ทาง เท่อ, ลู่ง อ ท กโช้ง กแช่ นิ้โระ อ ล่าง พ้า นอ, อ พูแคว๊ อารางเมเละ ดี๊ ชาเรเซอ, แม้ซี๊ง ไฆวะ-อ้ะ ดี๊ น้ะ, ฌ้อง ไจคุ้ซูง ลี้ ลู่ง ค่าง อาราร้ะ, ดี๊ อ พูแคว๊ เอซางฮะโดง ทาง โพะคอง เท่อ เท่ง ก้ะ อ ล่าง ล้อ