อีซยา 29 - Northern Pwo Karen Thai Bible

เว่ง เยรูซเลง แบ ท พ้องวะ

¹ ทเซงทื่งเฌ๊ฌ้อง แบ อารีเอง อารีเอง-เอ้อ เว่ง พี่ ดาเว พ้องวะ แบ เว๊ เกม๊า แม้ แอทาง เนง นึซยอง ดี๊ เนง เกม๊า โอ ดี๊ ทไฌ่ ล ว๊างๆ

² แบเด้าะ ก ม เกม๊า อารีเอง น้ะเซิงน้ะซ้ะ ได้ะ ม โอ ดี๊ ท ฌางล้างย้าล้าง ดี๊ โล้ล้าง ทน้ะทโน๊ง ดี๊ เว่ง อี้ง ม เก เอะ เฆ้อ บี่ซุ้ดี๊ อารีเอง

³ ดี๊ ก ม ช๊างล้าง ล่างโอซยอง บี่ซุ้ดี๊ ท กว้างคล้าง พ้องวะ แน้ ก ม พ้องวะ แน้ ดี๊ ทล่างคุ้แคว่เท่อ ดึ้ซึ้ ดี๊ ก ม ช๊างล้าง ทล่างคุ้แคว่เท่อ ดึ้ แน้

⁴ ฌ้อง น ม ล้างไช้ะล้างย่อง, ดี๊ ไคล้ ทาง นี่ ลู่ง ฌางคูโคล๊งคู น ทไคล้ พี่ เฌ๊นี่ ลู่ง ฌางคูมูง นอ, ม เก บี่ซุ้ดี๊ ท อ ลู่ง เซ๊ ปรื้งๆ น ลู่ง ม เฌ๊นี่ ลู่ง ฌางคูคู, ม บี่ซุ้ดี๊ ทแจ อ ลู่ง ดี๊ น ทไคล้ ม เก ท อ ลู่ง ไคล้ กโช้

⁵ แบเด้าะ กเย่ นดีงนแด้ ลแพ นอ, ม บี่ซุ้ดี๊ ฌางคูมูง บลิ้ กมูงคลูง ดี๊ กเย่ โพล้ง พี่ อ ล้าง ซ้ะเม นอ, ม บี่ซุ้ดี๊ พี๊ซวิ้ เชงทางเชงล้าง ลชู่ลล่าง เฆาะ ดี๊ ล ทีงฆ่าง ล้อ

⁶ กแช่ยาเว ซึ้คู ดูทึชองทึ ม ลี้ไจ โอ แน้ ดี๊ ล๊างเซ๊, ดี๊ ฌางคู ว้ะ, ดี๊ ท อ ลู่ง เซ๊ พ้ะดู เลา ดี๊ ลี้ง ว้างไร้ะ, ลี้งเฌ๊ พ้ะดู, ดี๊ มีอ้า เค้ทาง พี่ อาง เฌ๊ฌ้อง เท่อ

⁷ ดี๊ กเย่ โพล้ง กุ้ชื้อกุ้ชะ เลาพะ พี่ ดึ้ โละซ้ะ ดี๊ อารีเอง เลาพะ พี่ ดึ้ โละซ้ะ ดี๊-อ้ะ, ดี๊ อ ทล่าง ทุ้กดื้งซ้ะ พี่ อเฌิ่งอค๊า, เลา ดี๊ แม้ น้ะเซิงน้ะซ้ะ เว๊ นอ ม เก บี่ซุ้ดี๊ ทอางมี๊งม่าง-อ้า, ท แด เว้ ลู่ง มแน้แค๊-อ้า นอ ล้อ

⁸ บี่ซุ้ดี๊ โพล้ง ซู๊อางซ้ะ เท่อ มี๊งม่าง เว๊ อ อาง เท่อ ดี๊ ท่อง นางทาง อ ซ้ะ นอ, อ เว๊ ซู๊อางซ้ะ เท่อ ได้ะ บี่ซุ้ดี๊ โพล้ง ซู๊โอ้ซ้ะ เท่อ มี๊งม่าง เว๊ อ โอ้ เท่อ ฌ้อง ท่อง นางทาง อ ซ้ะ นอ, ล้างเพาล้างเบ้ ดี๊ อ โคะ ซู๊งไฆ๊ ได้ะ ดี๊ ม แม้ อ ซ้ะ บี่นอ ดี๊ กเย่ โพล้ง กุ้ชื้อกุ้ชะ เลาพะ พี่ เฌ๊ ดึ้ โละซ้ะ ดี๊ ทลู่ง ซีโยง นอ

⁹ เกม๊า โอ ท ล้างตุ้ท๊า พ้า ดี๊ เซิงไพ่ซ้ะว้ะ เกม๊า แม้ไค้ะแม้โบล ล้าง น กแช่, ดี๊ เก โพล้ง เมะโบล อ ซื๊งเว๊ ซีง ลแพ ม้า เท่อ, แบเด้าะ ล เมะ ดี๊ ไซ้ะ ซไบ้ะแซ ที๊ง แบ อ เว๊ ไร้ะมื่งไร้ะไฆวะ, แบเด้าะ ล เมะ ดี๊ ไซ้ะที๊งมี่จ้าง แบ

¹⁰ เมะเว๊ กแช่ยาเว ลู๊งล้าง เซิงซ้ะ ลู่ง ทมี๊งทวี่ ล้าง ลู่ง น ซื๊ง เช๊คู ดี๊ กาไบ้ะ น เมะคลี๊ง เมะเว๊ กเย่ โมไคล้คิ้ แยว้ นอ ดี๊ คลึไบ้ะ น คู, เมะเว๊ น โพล้ง พี่ อ พ้ะเว้ เท่อ นอ

¹¹ ดี๊ ท แด เว้ เลาพะ อี้ง, เกทาง ก้ะ บี่ซุ้ดี๊ ทไคล้ ลู่ง ไละทื๊ง พ้า, พี่ แบ ทแม้ไน เอะ น ซื๊ง ซีง ลแพ, พี่ อ เว๊ เกม๊า เอะ โพล้ง พี่ พ้ะ เว๊ ซี ดี๊ ไจ้ะเว๊ บี่อี้ง, “อวีงซ้ะชู้ พ้ะ ไละ ล ปะ อี้ง”, อ เว๊ ไจ้ะ บี่อี้ง, “จ พ้ะ ล ซี แบ, เป๊งนี่ โอ ดี๊ ทแม้ไน กาไบ้ะ ทะ เว๊”

¹² ดี๊ ท่อง อ เว๊ เกล๊าง เอะ โพล้ง ไละ พี่ พ้ะ เว๊ ล ซี แบ, ดี๊ ไจ้ะเว๊ บี่อี้ง, “อวีงซ้ะชู้ พ้ะ ไละ ล ปะ อี้ง”, อ เว๊ ไจ้ะ บี่อี้ง, “จ ล ซีงแฌ๊ ไละ แบ”

¹³ ดี๊ ทอดูทึโท๊ทึ กแช่ ไจ้ะเว๊ บี่อี้ง “เป๊งนี่ โพล้ง ล ชื้อ อี้ง เฌ๊ฆ้าง เบ้า ดี๊ อ นุ้ เฆาะ ดี๊ อางกีเมะอางกีแน๊ เฆ้อ ดี๊ อ นุ้เฌะ แบเด้าะ อ ซ้ะ โอ ช้างชื้ง ไย้ ดี๊ เฆ้อ ล้อ อ เว๊ โบงทางแบ้ทาง เฆ้อ บี่ซุ้ดี๊ เก กโพล้ง อ ทอางกีล้าง อเค้อะอต้าง พี่ นางแบ เว๊ ล ชู้ๆ, นอ ล้อ

¹⁴ อกย้องบี่นอ, แคว่เซ้อ, ก ม แม้ ทล้ะทเล่ ดี๊ โพล้ง ล ชื้อ อี้ง ได้ะ เมะเว๊ ล้างลู่ล้างล้ะ ดี๊ อล้ะอเล่ อ โพล้ง โอ ดี๊ ทโกงซีมองแบ นอ, อ ทโกงซีมองแบ ม เซงทื่งเฌ๊ฌ้องไฆวะ ดี๊ โพล้ง แน เท่อ ซี อ ท แนซีโน้งซี ม แบ ท กาไบ้ะ ทะ”

¹⁵ ท เซงทื่งเฌ๊ฌ้อง แบ โพล้ง พี่ อางกีซูงไฆวะ อ ท ช๊องมองเว้ทแม้ โยะคิ้ ดี๊ กแช่ยาเว พี่ อ ทไพ้ะทแม้ โอ ทไค้ะ พ้า อ ซื๊งเว๊ ไจ้ะเว๊ บี่อี้ง, “โพล้งเล้ ม แด เฆ้อ?, โพล้งเล้ ม ซีงแฌ๊ กไฌะกไฌ่? ”

¹⁶ น แม้ ไบล้ะกแด้ไฆวะ เท่อ ม ทื่ง-อ้ะ ซแล้ ไต้ เท่อ ที๊ซุ้ดี๊ ฌางคู ไพะไนะ-อ้า? ดี๊ เท่อ พี่ อ แบ ท ไต้ทาง ม ไคล้ แบฆ้ะ ดี๊ โพล้ง ไต้-อ้ะ ไจ้ะเว๊ “อ เว๊ ล นี่ ไต้ แย้ แบ” เท่อ พี่ อ แบ ท ไต้ทาง ม ไคล้ แบฆ้ะ ดี๊ โพล้ง ไต้-อ้ะ ไจ้ะเว๊ “อ เว๊ ล โอ ดี๊ ท แนซีโน้งซี แบ”, บี่อี้ง-อ้า?

ทมื้งแล่ ลู่ง มื่งนี้ง ชู่งแย๊โค๊

¹⁷ ล ปนะ เด้าะ เฆาะ ล้อ ล เมะ แบ-อ้า? พี่ เลบาโนง ม เกทาง ก้ะ โซ๊ง ทซูงทแซ ดี๊ โซ๊ง ทซูงทแซ ม ทื่ง-อ้ะ เก ทแคแกล้

¹⁸ ล นี้ง แย๊ นอ, โพล้ง แน่อ้า ม แน่ฌ๊า ไละทื๊ง อ ทไคล้ ดี๊ โพล้ง โบลเมะ อ เมะ ม แด ทาง นี่ เท่อ ลู่ง ท ล ล้างที๊งล้างช้ะ แบ ดี๊ ทไค้ะซ๊า พ้า

¹⁹ โพล้ง ชางล้างซ้ะ ม แม้ แอทาง ท เซิงฆวี๊งซ้ะโย้ ดี๊ กแช่ยาเว ดี๊ โพล้งซยางโพล้งน้ะ ลู่ง กโพล้ง อซุ้อแกล้, ม เซิงมึซ้ะมึ ดี๊ อีซลาเอง อ กแช่แยว้ พี่ อฌี้อแอว้

²⁰ เมะเว๊ โพล้งดู้งโพล้งลู่ ม เลาเทาไฆวะ ดี๊ โพล้ง แม้ไฌ๊ซ้ะ เท่อ มึ ม เลาไฆวะ ดี๊ โพล้ง กุ้แฌ้ พี่ อางฆื๊ง อช๊าอโท่ แม้อ้าแม้ซ๊าง เท่อ นอ, ม แบ ทแม้ไฆวะ ล้อ

²¹ เมะเว๊ โพล้ง พี่ ซี๊งเคพ้ะเพิ่ง โพล้ง อ แฌ้แพ ดี๊ อ ทไคล้ ดี๊ อางกีล้าง ทดุ้ทเช ดุ้ โพล้ง พี่ อ ต้ะเซ๊ง เท่อ ลู่ง เว่ง อ ป้ะตู๊ง เลา ดี๊ ล เกม๊า ท อเกิ้งอแบ เอะ โพล้ง พี่ อ แบ ล แพ้ นอ, ดี๊ ทไคล้ พี่ อซูงอแซ ล โอ แบ

²² อกย้องบี่นอ, กแช่ยาเว พี่ เทะนี่ไท้ อาบราฮาง, ไคล้ แบฆ้ะ ดี๊ ยาคุ้ อชื้ออชะ บี่อี้ง “ยาคุ้ ม ล แบ ฌางแช้ ล้า แบ ดี๊ อ เว๊ อ เมะ ม ล ล้างบ้าง ล้า แบ

²³ อไฌ่บี่อี้ง, ท่อง อ เว๊ แด อ พู อ ลี้ง พี่ เก ก จูงล่างคางคู ลู่ง อ ซื๊งเว๊ อซุ้อแกล้ นอ อ ซื๊งเว๊ ซีง ลแพ, ม ทื๊ง เว๊ กเม้งกแซ ซยื๊งซย้อง อ ซื๊งเว๊ ลแพ นอ, ม ทื๊ง เว๊ ยาคุ้ อ กแช่แยว้ พี่ อฌี้อแอว้ นอ ซยื๊งซย้อง ดี๊ ม ยางแบซ้ะเม อีซลาเอง อ กแช่แยว้

²⁴ ดี๊ กเย่ โพล้ง พี่ อไพ้ะอแม ลู่ง อ ทช๊องมอง ล โค๊ นอ, ม เฌ๊ท้อง ท แนซีโน้งซี ดี๊ โพล้ง พี่ เอ้งไฌ้ เท่อ มึ ลแพ นอ, ม ญ่อง ฮะนี่ ทซองทซ๊าง ล้อ”