อีซยา 10 - Northern Pwo Karen Thai Bible

¹ ท เซงทื่งเฌ๊ฌ้อง แบ โพล้ง ลแพ นอ, พี่ คลุ้ล้าง ทอางกีล้าง ลู่ง ออ้าอซ๊าง ดี๊ ท เซงทื่งเฌ๊ฌ้อง แบ โพล้ง ลแพ นอ, พี่ อ กวิ้ทาง ท อเค้อะอต้าง แคแนแคแก้ เท่อ

² บี่ซุ้ โฌ๊ไจไฆวะ โพล้ง ลกู้งลล๊า แบ, ไจแดไฆวะ ท อเกิ้งอแบ ดี๊ ตมละ นี่ โพล้ง เฆ้อ ก ชื้อ คูซยางแน่ยะ อฌ้องอเก บี่ซุ้ เกม๊า โพล้ง มืงเม๊ เกทาง ก้ะ อ ซื๊งเว๊ อ ท ลู่นี่ ก้ะ ดี๊ ดึ้ เกม๊า พูฆวี แพ่ เกทาง ก้ะ อ ฆ่อง

³ น ซื๊ง ม แม้ บี่จะเล้ ลู่ง ท แม้เตาแม้แต๊ อ มื่งนี้ง พ้า? ดี๊ ลู่ง ท แม้เฌ๊ฌ้องไฆวะ อ มื่งนี้ง พ้า พี่ เฌ๊นี่ ลู่ง อ ไย้ นอ? น ซื๊งเว๊ ซีง ลแพ ม ไจคุ้ซูงไฆวะ ลี้ เปิ่ง โพล้ง เล้? ดี๊ น ซื๊ง ม อางกี น คอง น แซย้ พี่จองเล้?

⁴ ท ล โอ ล้างลื๊อ น่างเม้ง ล้า แบ, โอ เว๊ ที่ ม ซย๊องล้างซ้ะ โอ ดี๊ โค้งเตา ลแพ นอ-อ้า ล้างเทะเค้า ลู่ง โพล้ง พี่ แบ ท แม้ซี๊ง ลแพ นอ อ โป้ง พ้า-อ้า ล้อ ทึเมะ บี่นอ ฌี้ นอ, กแช่แยว้ อ ท ซ้ะทาง พ้ะดู ลแกย ไท้ อ ซ้ะ ได้ะแบ ดี๊ กแช่แยว้ อ จูง เยาฆ้าง อ ซ้ะ ได้ะ

อะซีเรีย พี่ ทื่งดู ล้าง ซ้ะ นอ แบ ท ต้ะเซ๊ง ปะ

⁵ ท เซงทื่งเฌ๊ฌ้อง แบ โพล้ง อะซีเรีย พี่ เก ก นางมื่งคืง ลู่ง ก ท ซ้ะทาง ดี๊ นางทุ้ ลู่ง อ ซื๊งเว๊ อ จูง พ้า เก ก ท ซ้ะทาง พ้ะดู

⁶ ก เจ่ อ เว๊ ลี้ ดึ้ โพล้ง ล ค่าง พี่ ไจแดไฆวะ กแช่แยว้ ก อางแบเลา อ เว๊ เกม๊า อ ลี้ ดึ้ โพล้ง อ ชื้อ, พี่ ก ซ้ะทาง ดี๊-อ้ะ เกม๊า อ ลี้ แม้นี่ ท ลู่นี่ ดี๊ ซไบล้ะนี่ ท ตมละ นี่ ดี๊ เกม๊า อ ไย่เท่งไย่แพล้ ล้าง บี่ซุ้ดี๊ ไย่ กไพะ ลู่ง เกล้

⁷ แบเด้าะ อ เว๊ ล โอ ทาง อ ซ้ะ บี่นอ แบ ดี๊ อเซิงอซ้ะ นอ, ล ช๊องมอง เท่อ บี่นอ แบ เมะเว๊ อ ซ้ะ พ้า นอ ช๊องมอง ที่ ม แม้เฌ๊ฌ้อง เท่อ ดี๊ แม้เฌ๊ฌ้องไฆวะ โพล้ง กุ้ชื้อกุ้ชะ ล เมะ ท แซย้ แบ

⁸ เมะเว๊ อ เว๊ ไคล้ บี่อี้ง “จ โพล้ง ทอคูดู ลแพ นอ, เก กจุ้แฆว้ เลาพะ ล เมะแบ-อ้า?

⁹ เว่ง คางโน นอ, บี่ซุ้ดี๊ เว่ง คาราเคมิ้ ล เมะแบ-อ้า? เว่ง ฮามา นอ, บี่ซุ้ดี๊ เว่ง อาราปะ ล เมะแบ-อ้า? เว่ง ซมาเรีย นอ, บี่ซุ้ดี๊ เว่ง ดามากา ล เมะแบ-อ้า?

¹⁰ บี่ซุ้ดี๊ จ จูง เย้าฆ้าง ลี้ท้อง ทเค่งทฌ้าง อมื่งอบ้าง ลแพ นอ พี่ โอ ดี๊ ทเค่งทฌ้าง แพล้กีงแพล้ไว้, ดูเละ เยรูซเลง ดี๊ ซมาเรีย อ เท่อ

¹¹ ฌ้อง จ ล แม้ เอะ เยรูซเลง ดี๊ อ ทเค่งทฌ้าง ด้องซุ้ พี่ จ นี่ แม้ เอะ ซมาเรีย ดี๊ อ ทเค่งทฌ้าง นอ แบ-อ้า?”

¹² ท่อง ทอดูทึโท๊ทึ กแช่ แม้ อ ทไพ้ะทแม้ เลาพะ, ลู่ง ทลู่ง ซีโยง ดี๊ ลู่ง เยรูซเลง ฌ้องทางเกทาง เย้า นอ, กแช่แยว้ ม แม้เตา แม้แต๊ ท อางปฆ้า, เฌ๊นี่ ลู่ง อะซีเรีย อ กจุ้แฆว้ อ เซิงพ้าซ้ะพ้า ทื่งดูล้าง ซ้ะ, ดี๊ ท ชีอูพู๊ ล้าง ซ้ะ ลู่ง อ เมะคลี้ง แคว่แช้แคว่เด เท่อ

¹³ เป๊งนี่ อ ไจ้ะเว๊ บี่อี้ง “จ แม้ เท่อ อี้ง ดี๊ จ จูง อไฌ่อแบ้ ดี๊ จ ทโกงซีมองแบ, เมะเว๊ จ โอ ดี๊ ท แนซีโน้งซี จ นี่ กูงไฆวะ โพล้ง กุ้ชื้อกุ้ชะ ลแพ นอ อ ค่างช๊า ดี๊ ตมละ นี่ อคองอแซย้ จ เก บี่ซุ้ดี๊ โพล้ง พี่ อ ไฌ่ชองแบ้ชอง พี่ นี่ ทึ้ล้าง กจุ้แฆว้ ลแพ นอ

¹⁴ จ จูง ซไบล้ะ นี่ โพล้ง กุ้ชื้อกุ้ชะ ลแพ นอ อคองอแซย้ บี่ซุ้ดี๊ ซไบล้ะ นี่ ทูซวี๊ง ดี๊ ด้องซุ้ โพล้ง ฆี๊ นี่ ทู อ ดีง พี่ แบ ท ญ๊องไฆวะ บี่จะเล้ นอ จ อางกีซยอง ฌางคูโคล๊งคู เลาพะ บี่นอ ล้อ โพล้ง ล โอ แม้ว้ะ ทาง อ ได้ะ เฌ๊ ด้างทะ เว๊-อ้า อ้างทาง นุ้-อ้า, กุ้ซย้ะ อ ลู่ง เจ้าะแจ้ะ-อ้า น่างแฌ้ แบ”

¹⁵ แกว้ ม ไคล้ เคิ่ง โพล้ง พี่ เจ่ เว๊ กล้าง เท่อ นอ-อ้า? ท้ะลว้ะ ม ทื่งล้าง อ ซ้ะ โท๊เละโพล้ง พี่ เจ่ เว๊ ลว้ะ เท่อ นอ-อ้า? บี่ซุ้ดี๊ นางมื่งคืง ม โชะทาง โพล้ง พี่ โชะ-อ้ะ นอ ซี-อ้า? นางทุ้ ม โชะทาง โพล้ง พี่ ล เมะ เซงกึ้ แบ ซี ชี่-อ้า?

¹⁶ ทบี่นอ, ทอดูทึโท๊ทึ กแช่, กแช่ยาเว ซึ้คู ดูทึชองทึ ม ดึ้ เกม๊า ทแช๊ ฆวี่กิ้ เฌ๊ ลู่ง อ โพล้ง เค่งดูฌ้างโท๊ ลแพ นอ อ โป้ง พ้า ดี๊ ม โอ ดี๊ ท เช้า เค้ทาง ลู่ง อฆี๊งอแล้ เช๊ละ บี่ซุ้ดี๊ มีอาง เท่อ

¹⁷ ทโฌ่งทพ้าง ลู่ง อีซลาเอง ม เก มี ดี๊ อ กแช่แยว้ ลู่ง อฌี้อแอว้ ม เก มีเค้ ฌ้อง มี ม อาง ดี๊ แม้เฌ๊ฌ้อง อ ทชูง พ้ะดู ดี๊ อ ทชูง พูปรี้ง ล นี้ง ฆ่าง ล้อ

¹⁸ กแช่แยว้ ม แม้เฌ๊ฌ้อง อ ทเคแกล้, ดี๊ อ โซ๊ง ทซูงทแซ อฆี๊งอแล้ เลา ดี๊ อเซิงอซ้ะ ดี๊ อล้องอย่าง ดี๊ ม เก บี่ซุ้ดี๊ โพล้ง ช๊องไก้ พี่ อ ล้างฆวี่ ซี๊ง

¹⁹ เซงมื่งเทิง ลู่ง อ ทเคแกล้ ม ล้างลื๊อ แซย้ มะ ท๊อง พืงแซ ม ดว้ะ เว๊ อแออแซย้ ซี

โพล้ง อีซลาเอง พี่ โอ ล้างลื๊อ ก้ะ นอ, เปลงไท้ อ ซ้ะ

²⁰ ล นี้ง แย๊ นอ, โพล้ง อีซลาเอง พี่ โอ ล้างลื๊อ ก้ะ, ดี๊ โพล้ง พ้องพลิ้ ซี๊ง ลู่ง ยาคุ้ อชื้ออชะ นอ, ม ล ทุ้ อ ซ้ะ เปิ่ง โพล้ง พี่ ท่าง-อ้ะ นอ ล้า แบ, แบเด้าะ ม ทุ้ อ ซ้ะ เปิ่ง กแช่ยาเว, อีซลาเอง อ กแช่แยว้ พี่ อฌี้อแอว้ นอ ดี๊ ท เซิงเท่งซ้ะโต้

²¹ โพล้ง พี่ โอ ล้างลื๊อ ก้ะ นอ, ม เฌ๊ไท้ ฌูง กแช่แยว้ พี่ อ ดูทึ ชองทึ, เมะเว๊ ยาคุ้ อ โพล้ง พี่ โอ ล้างลื๊อ ก้ะ นอ ล้อ

²² อีซลาเอง-เอ้อ, อไฌ่บี่อี้ง ทึเมะ โพล้ง ล ชื้อ ฆ่าง ดี๊ แน้ ม เก ด้องซุ้ มิ้ ลู่ง ปางเล พ้า ฌี้ นอ, โพล้ง พี่ โอ ล้างลื๊อ ก้ะ นอ ล้อ ม เฌ๊ไท้, ทแม้ เฌ๊ฌ้อง นอ, แบ ท อางกีล้าง ดี๊ ทแบกแช่แยว้อซ้ะ ลู่ง อล๊าอฆวี้ เย้า

²³ เมะเว๊ ทอดูทึโท๊ทึ กแช่ยาเว พี่ เก ซึ้คู ดูทึชองทึ นอ, ม ดึ้ เกม๊า ทแม้ เฌ๊ฌ้อง ลู่ง อเลาอเช๊ง กึทาง ลู่ง ฌางคูโคล๊งคู อซุ้อแกล้ เลาพะ บี่ซุ้ดี๊ ท อางกีล้าง เว้ เว๊ นอ ล้อ

²⁴ ทบี่นอ, ทอดูทึโท๊ทึ กแช่ยาเว พี่ เก ซึ้คู ดูทึชองทึ ไจ้ะเว๊ บี่อี้ง “โพล้ง เฆ้อ ก ชื้อ พี่ โอ ซีโยง พ้า-เอ้อ, ซ้ะเม โพล้ง อะซีเรีย พี่ อ ท่าง น ซื๊ง ดี๊ นางมื่งคืง, ดี๊ โชะทาง อ นางทุ้ ดึ้ แน้ บี่ซุ้ดี๊ โอ ลู่ง อีไย้ะ พ้า อู้ง นอ ล ฌี้

²⁵ เมะเว๊ ล ไยะ ล้า แบ นอ, ก ท ซ้ะทาง ม ทึไฆวะ, ดี๊ ก ท ซ้ะทาง ม ลี้ ลู่ง ทแม้ เฌ๊ฌ้อง อ ซื๊งเว๊ ล้อ”

²⁶ ดี๊ กแช่ยาเว ซึ้คู ดูทึชองทึ ม เว่งว๊าง นางพลี เฌ๊ ดึ้-อ้ะ, บี่ซุ้ดี๊ พี่ กแช่แยว้ ดึ้ซึ้ โพล้ง มีเดียง ลู่ง ไล๊ โอเระ, ดี๊ อ นางทุ้ พี่ โอ แบ ลู่ง ปางเล คูด้าง นอ, กแช่แยว้ ม โชะทาง เว๊ ด้องซุ้ พี่ อ แม้ เว๊ ลู่ง อีไย้ะ พ้า

²⁷ ดี๊ ล นี้ง แย๊ นอ, อ ทอวีงทยุ้ ม ล้างเบ้าะไฆวะ ลู่ง น จื๊งแป คู,ดี๊ อ แอะ ม ล้างเบ้าะไฆวะ ลู่ง น โคะบ้อง ล้อง, ดี๊ แอะ นอ แบ ทแม้ เฌ๊ฌ้องไฆวะ ลู่ง ทบองทซู อกย้อง

²⁸ อ เว๊ เฌ๊ท้อง ไอย้ะ เย้า อ เว๊ ลี้ พะไฆวะ มีโกรง เย้า อ เว๊ อางกี อ ทฆ้าทโฆ่ ลู่ง มีมา

²⁹ อ ซื๊งเว๊ ลแพ นอ, เฌ๊แพ๊ ทลู่ง อ เช้า พ้า เย้า เกบา เก ก ทล่าง โอไปว้ะ มี๊งโท่ รามา ตทูงตพล้าง ซาอู อ กีเบอา ไจคุ้ซูง เย้า

³⁰ กางลีง อ พูมืง-เอ้อ, เกม๊า แม้ เซ๊ น ลู่ง กุ้ซย้ะ เท่อ-เซ้อ ไลชา-เอ้อ, คุ้ช๊องแน-เซ้อ อานาโทะ นอ, ล้าง ย๊างซ้ะ เต้ๆ

³¹ ม้ะเมนา ซยู๊คุ้ซูง โพล้ง เว่ง เกบีง ปชื่ง โอคุ้ซูงไฆวะ ทอ้าทซ๊าง

³² แบเด้าะ ล นี้ง แย๊ อี้ง ล้อ, อ เว๊ ม โอโท๊ ลู่ง เว่ง โน้ะ อ เว๊ ม ทูว้ะ อ จูง ช่องดูง ลี้ฆ้าง แบ ซีโยง อ พูมืง อ ทลู่ง ลี้ฆ้าง แบ ทลู่งทจ้อง ลู่ง เยรูซเลง

³³ แคว่เซ้อ, ทอดูทึโท๊ทึ กแช่, เมะเว๊ กแช่ยาเว ซึ้คู ดูทึชองทึ ม กล้างเทะ เซงได้ ดี๊ อไฌ่อแบ้ พี่ ล้าง ซ้ะเมซ้ะไพล้ อ มื่งเทิง พี่ โท๊ทึ ม แบ ท เคาล้าง ดี๊ อ มื่งเทิง พี่ อ โท๊ ม แบ ทแม้ เฌ๊ฌ้อง ล้าง-อ้ะ

³⁴ กแช่แยว้ ม เจ่ แกว้ เคาไฆวะ ทแซย่ พ้ะดู พ้า ดี๊ เลบาโนง พี่ โอ ดี๊ เซง มื่งเทิง พ้ะโท๊ ซเละเด้ะ นอ ม แค่ล้าง