โฮเชยา 7 - Northern Pwo Karen Thai Bible

¹ พี่ ก ม แม้ก้องแย่ ไท้ อีซลาเอง นอ เอฟาอีง อ ทไพ้ะทแม โพลทาง ล พ๊าฆ่าง ดี๊ ซมาเรีย อ ทอ้าทซ๊าง ล เม้ง แบ ล เม้ง อ ซื๊งเว๊ แม้ ท อางโล๊ไละ โพล้ง อางฌูง เท่อ นึฆ้าง เด้า พ้า ดี๊ โพล้ง ตมละตเช เท่อ นอ, ตมละ เท่อ โอ ลู่ง ค๊องโค๊

² แบเด้าะ อ เว๊ ล นางแบไท้ เท่อ ลู่ง อ ซ้ะ พ้า แบ บี่ อี้ง ก นางแบแย้แบ อ ทอ้าทซ๊าง ซี เลาพะ ค๊องเนงอี้ง อ ทไพ้ะทแม้ พ้องวะ ทะ-อ้ะ เย้า ทแม้ ลแพ นอ โอ ลู่ง ก เมะแซ พ้า

³ อ เว๊ ดึ้ เกม๊า กจุ้แฆว้ เซิงมึซ้ะมึ ดี๊ อ ทอ้าทซ๊าง ดึ้ เกม๊า ท อคูอแน่ แบ อ ซ้ะ ดี๊ อ ท คีงอูงคีงตู๊ง

⁴ อ เว๊ กุ้แฌ้ เก โพล้ง แม้ กแมมืง กแมแคว๊ อ เว๊ เก บี่ซุ้ดี๊ มีอ้า อ ล่าง, ฆู่งเม๊ง ท พี่ อ คู่เล้าคู่ล๊าง พี่ ซแล้ แม้ กู ซี ล แบ แม้เค้ ดูทาง มี แบ ล โค๊ ลู่ง ท แกย้ ฌื๊งไน้ะ, ท้อง ลู่ง ฌื๊งไน้ะ พู๊ลู๊ ทาง

⁵ ลู่ง ก กจุ้แฆว้ อ มื่งนี้ง แม้มึอางอวีง นอ, ท อคูอแน่ ช๊องไก้มี๊งน้าง ดี๊ ไซ้ะ ซไบ้ะแซ ที๊ง อ จืง กจุ้แฆว้ นึซยอง ซกุ้ โละซ้ะ ดี๊ โพล้ง พี่ อ เอ ทไคล้ ไฌ๊ซ้ะ ลแพ นอ

⁶ อ เว๊ เฌ๊ฆ้าง เบ้า ดี๊ ทโกงทแกย, อเซิงอซ้ะ คู่ ด้องซุ้ มีอ้า อ ล่าง ฆู่งเม๊ง เท่อ ซ๊างแน้คล้อง นอ, ท ซ้ะทาง เฌ๊ทาง รื้งๆ ท่อง ทพ้างทาง โฌ้โค๊ นอ, ซยุ้ทาง ด้องซุ้ ดี๊ มีแล เค้

⁷ อ เว๊ กุ้แฌ้ นอ คู่เล้า ด้องซุ้ มีอ้า อ ล่าง ฆู่งเม๊ง เท่อ ดี๊ แม้เฌ๊ฌ้อง อ โพล้ง โพะคอง เท่อ ลแพ นอ อ กจุ้แฆว้ กุ้แฌ้ นอ ล้างเทะเค้า แบเด้าะ โพล้ง ลู่ง อ ซื๊งเว๊ อซุ้อแกล้ นอ ล กุ้ทาง เฆ้อ น่างแฌ้ แบ

⁸ เอฟาอีง พลึ้ อ ซ้ะ, นึ โอซยอง ดี๊ โพล้ง กุ้ชื้อกุ้ชะ ซีง ลแพ เอฟาอีง บี่ซุ้ดี๊ กู อางฆู, พี่ ล นี่ ไบล้ะกแด้ ไท้-อ้ะ แบ

⁹ โพล้ง ลชื้อแด อาง อไฌ่อแบ้ แบเด้าะ อ เว๊ ล ซีงแฌ๊ ล้าง อ ซ้ะ แบ อ เว๊ อ คูซู๊ง แอว้ ล น้าง เย้า แบเด้าะ อ เว๊ ล ซีงแฌ๊ ล้าง อ ซ้ะ แบ

¹⁰ อีซลาเอง อ ท ทื่งดูล้างซ้ะ นอ, เก พีงญาง ไคล้ ชางบ้า-อ้ะ อ เว๊ ล ไท้ฌูงไท้ อ กแช่ยาเว กแช่แยว้ ได้ะ แบ ทึเมะ โอ ดี๊ ท อไฌ่อกย้อง เลาพะ อี้ง ฌี้ นอ, อ เว๊ ล อางฆื๊ง กแช่แยว้ แบ

ทเปิ่งทเอ้ง กเย่ โพล้ง กุ้ชื้อกุ้ชะ พี่ อซูงอแซ ล โอ แบ

¹¹ เอฟาอีง เก บี่ซุ้ดี๊ ทูลี่ง แอว้ เซ๊กูเฌ๊ฌ้อง ดี๊ ท ช๊องมอง ล โอ แบ อ เว๊ กุ้นี่ อีไย้ะ, ลี้ฌูง อะซีเรีย

¹² พี่ อ เว๊ ลี้ นอ, ก ม ย้างแย่ทาง ทฆี คลึไบ้ะ-อ้ะ ก ม ทึ้ล้าง-อ้ะ บี่ซุ้ดี๊ พอง ทู ลู่ง ทพุ้พ๊าง ก ม แม้เตาแม้แต๊-อ้ะ, บี่ซุ้ดี๊ ทโล้ล้าง ลู่ง ทโอซยอง น๊างมู๊ง พ้า

¹³ ท เซงทื่งเฌ๊ฌ้อง แบ-อ้ะ, เป๊งนี่ อ เว๊ เฌ๊พลุ้ ไจแดไฆวะ เฆ้อ ท เซงทื่งเฌ๊ฌ้อง โอ ดี๊-อ้ะ, เป๊งนี่ อ เว๊ กไบล้ะกแบล ดี๊ เฆ้อ ก ม เทะนี่ไท้-อ้ะ แบเด้าะ อ เว๊ ไคล้ คีงอูง แบฆ้ะ ดี๊ กไฌะกไฌ่

¹⁴ อ เว๊ ล นี่ กุ้ทาง เฆ้อ แบฆ้ะ ดี๊ ทน้ะทโน๊ง ลู่ง ท เซิงเท่งซ้ะโต้ แบ แบเด้าะ อ เว๊ ฌางล้างย้าล้าง โอ ลู่ง ล่างมี๊งคู อ เว๊ เก้าเฌะล้าง อล้องอย่าง, บี่ซุ้ อางท่าง นี่ บืง ดี๊ ไซ้ะ ซไบ้ะแซ ที๊ง อ ซ๊าง อ เว๊ กไบล้ะกแบล ดี๊ เฆ้อ

¹⁵ ทึเมะ ก นี่ แม้ลูแม้ด้อง ฌ้า-อ้ะ, ดี๊ แม้ ชองทาง เอะ อ จูง อไฌ่อแบ้ ฌี้ นอ อ เว๊ ช๊องมอง อ้า เฆ้อ ได้ะ

¹⁶ อ เว๊ ล ไท้ฌูงไท้ กแช่แยว้ พี่ อ ดูทึโท๊ทึ นอ แบ อ เว๊ เก คลีงบ้อง พี่ อางกีล้าง ซ้ะ ล ซี แบ อคูอแน่ นอ ม ล้างเทะเค้า ดี๊ น้ะ อ ไอ ลู่ง อ พลี้ พี่ ไคล้ชองไคล้จุ้ เท่อ อกย้อง ท ล ไฌ่ อี้ง, ม เก ท อ ไฌ่, พี่ ดึ้ เกม๊า อ เว๊ เชิ่งเชะ โละซ้ะ ลู่ง ค่าง อีไย้ะ พ้า