โฮเชยา 1 - Northern Pwo Karen Thai Bible

¹ กแช่ยาเว อลู่งอแท๊, พี่ เฌ๊ท้อง เบเออรี อ พูแคว๊ โฮเชยา, ลู่ง ยูดา อ กจุ้แฆว้ อูซียา โยทาง อาฮ้ะ ดี๊ เฮเซคียา อ ชู้ พ้า, ดี๊ เยโฮอะ อ พูแคว๊ เยโรโบอาง กจุ้แฆว้ ลู่ง อีซลาเอง อ ชู้ พ้า

โฮเชยา อ เด้าคูล่างพ้า

² พี่ กแช่ยาเว ไคล้ เฌ๊ เว๊ ดี๊ โฮเชยา อ ต้องคู ล พ๊า นอ, กแช่ยาเว ไคล้ ดี๊ โฮเชยา ไจ้ะเว๊, “ลี้-เซ้อ, ลี้ ฮะนี่ กมืง มะแคว๊, เฌ๊ เก น แม๊, ดี๊ ทางพู เอโบ้ง ดี๊ อ เว๊, เมะเว๊ ที๊งล่างค่างพ้า อี้ง เอโบ้ง เท่อ น้ะ มะ, ลู่ง ท ญ๊องไฆวะ กแช่ยาเว อ กย้อง”

³ ทบี่นอ, อ เว๊ ลี้ ฮะนี่ ดีลาอีง อ พูมืง น่าง โกเมอ เฌ๊ เก อ แม๊, ดี๊ อ แม๊ ด้าทาง ดี๊ อ พู กึทาง อ แคว๊ ล แฌ้

⁴ ดี๊ กแช่ยาเว ไคล้ ดี๊-อ้ะ ไจ้ะเว๊, “เกม๊า น กุ้ อ เม้ง บี่อี้ง ยีซเรเอง, อไฌ่บี่อี้ง, ล ไยะ ล้า แบ ก ม แม้เตาแม้แต๊ เยฮู อชื้ออชะ เป๊งนี่ ทซวีง แยว้ล้าง ลู่ง ยีซเรเอง อกย้อง, ดี๊ ก ม เกม๊า อีซลาเอง อชื้ออชะ อมื่งอบ้าง ทึไฆวะ เว๊ ล้อ

⁵ ล นี้ง แย๊ นอ, ก ม บุ้แค่ อีซลาเอง อ คลีง ลู่ง ทลู่ง คางไท้ะ ยีซเรเอง”

⁶ โอก้ะ ลู่ง ไค๊ น่าง โกเมอ ด้าทาง ได้ะ, ดี๊ อ พู กึทาง อ มืง ล แฌ้, ดี๊ กแช่แยว้ ไคล้ ดี๊ โฮเชยา ไจ้ะเว๊, “พูมืง นอ, เกม๊า น ยื่ง อ เม้ง บี่อี้ง, โลรุ้ฮะมา เมะเว๊ ก ล ย๊างซ้ะ แบ อีซลาเอง อชื้ออชะ ล้า แบ, ก ล แพล่ไฆวะ อ ทไพ้ะทแม ล้า แบ เฆาะ

⁷ แบเด้าะ ก ม ย๊างซ้ะ แบ ยูดา อชื้ออชะ, ดี๊ ก ม แม้พ้องพลิ้-อ้ะ ดี๊ อ กแช่ยาเว กแช่แยว้, ก ล แม้พ้องพลิ้-อ้ะ ดี๊ คลีง บ้อง-อ้า, ดี๊ น้ะ-อ้า, ดี๊ ทดึ้ทชาง-อ้า, ดี๊ กซี ดึ้ซึ้-อ้า, ดี๊ ซึ้พู กซี-อ้า นอ แบ”

⁸ พี่ น่าง โกเมอ เกม๊า โลรุ้ฮะมา แพล่นู่ง เย้า นอ, อ เว๊ ด้าทาง ไท้, ดี๊ กึทาง อ พูแคว๊ ล แฌ้

⁹ ดี๊ กแช่แยว้ ไจ้ะเว๊, “พู นอ เกม๊า กุ้ อ เม้ง โลอางมี เมะเว๊ น ซื๊ง ซีง ลแพ ล เมะ กพูกลี้ง แบ, ดี๊ เฆ้อ อี้ง นอ ล เมะ น กแช่แยว้ แบ>>

ท แม้ฌี้ทางไท้ อีซลาเอง

¹⁰ แบเด้าะ อีซลาเอง เฌงพูฆ๊างพู อ แฌ้ ม แอฌี่งแอฌ้อง, บี่ซุ้ ดี๊ มิ้ ลู่ง ปางเล พ้า, พี่ ม โตง-อ้ะ ฌี้, ดว้ะ-อ้ะ ฌี้ นอ ลน้าลเพ้ แบ, ดี๊ ทล่าง พ้า พี่ กแช่แยว้ ไคล้ ดี๊ อ ซื๊งเว๊ ไจ้ะเว๊, “น ล เมะ กพูกลี้ง แบ”, นอ, ม โล้ เอะ อ ซื๊งเว๊ ไจ้ะเว๊, “น เก กแช่แยว้ พี่ อ โอม๊า อ พู”

¹¹ ยูดา ดี๊ อีซลาเอง อ เฌงพูฆ๊างพู นอ, ม นึ โอซยอง โละซ้ะ, ดี๊ อ ซื๊งเว๊ ซีง ลแพ ม ต๊างทาง โพล้ง ล แฌ้ เก อคูดู, ดี๊ ม อางจ้ะ โละซ้ะ โอนี่ ค่าง นอ ลี้ทาง, เมะเว๊ มื่งนี้ง ลู่ง ยีซเรเอง ม ล้างเปิ่ง ดู มะ