เอเซเคียง 37 - Northern Pwo Karen Thai Bible

ทลู่ง คางไท้ะ ทฆีง ไฆ๊

¹ กแช่ยาเว อ จูง เฌ๊ โอ ลู่ง จ คูด้าง, ฌ้อง กแช่แยว้ ไจทางฌ้า แย้ ดี๊ กแช่ยาเว อ วีงฌี้แล้แอว้, ฌ้อง อางกีล้าง แย้ ลู่ง ทลู่ง คางไท้ อ ซ้ะแกล้ พ้า, พี่ โอ ฆวี้ทะ ดี๊ ทฆีงทแกว้

² กแช่แยว้ ลี้ฌ้า แย้ วะชวะ ทฆีง ลแพ นอ, แคว่เซ้อ, โอ ดี๊ ทฆีง แอฌี่งแอฌ้อง ลู่ง ทลู่ง คางไท้ะ คู, ดี๊ อี้งเซ้อ, เก ทฆีง ไฆ๊ท้ะ น้ะ มะ

³ ฌ้อง กแช่แยว้ ไคล้ ดี๊ แย้ ไจ้ะเว๊, “กโพล้ง อ พู-เอ้อ, ทฆีง ลแพ อี้ง ม โอ ดี๊ ทม๊า ซี ชี่-อ้า?,”, ดี๊ จ ไคล้ช๊า บี่อี้ง, “ทอดูทึโท๊ทึกแช่ยาเว, น ซีงแฌ๊ เย้า”

⁴ กแช่แยว้ ไคล้ ดี๊ แย้ ได้ะ ไจ้ะเว๊, “เกม๊า โล้ล้าง ท อลู่งอแท๊ เอะ ทฆีง ลแพ อี้ง, ดี๊ โล้ เอะ อ ซื๊งเว๊ บี่อี้ง, ทฆีง ไฆ๊-เอ้อ, เกม๊า คุ้ช๊องแน กแช่ยาเว อลู่งอแท๊”

⁵ ทอดูทึโท๊ทึกแช่ยาเว โล้ เอะ ทฆีง ลแพ นอ ไจ้ะเว๊ บี่อี้ง, “แคว่เซ้อ, ก ม ดึ้ เกม๊า ลี้ง แซทางแซล้าง นึฆ้าง ลู่ง น ซื๊ง อล้องอย่าง พ้า, ดี๊ น ม โอ ดี๊ ทม๊า ล้อ

⁶ ก ม ชวี๊งล้าง ท อทองอแพล่ ลู่ง นล้องนย่าง, ดี๊ ม ดึ้ เกม๊า โอ ดี๊ ทแย เฌ๊ทาง ลู่ง น ล้อง, ดี๊ แม้นี่ ไพ้ะ คลึไบ้ะ แน้, ดี๊ ชวี๊งล้าง ลี้ง แซทางแซล้าง ลู่ง นเค่งนฌ้าง พ้า, ฌ้อง น ม โอ ดี๊ ทม๊า, ฌ้อง น ซื๊ง ม ซีงแฌ๊-อ้ะ บี่อี้ง, เฆ้อ เมะเว๊ ยาเว ล้อ”

⁷ ยี๊แด จ โล้ล้าง ท อลู่งอแท๊, บี่ซุ้ดี๊ พี่ จ นี่แบ ทอางแบเลา นอ, ดี๊ พี่ จ โล้ล้าง ท อลู่งอแท๊ นอ, โอ ดี๊ ท อ ลู่ง, ดี๊ แคว่เซ้อ, เก ท อ ลู่ง ว้ะโทะ ตดิ้, ทฆีง ลแพ นอ, เฌ๊ฆ้างฌูง โละซ้ะ, ทฆีง ดี๊ ทฆีง

⁸ ดี๊ ท่อง จ แคว่ เท่อ นอ, จ แด ท อทองอแพล่ โอ ลู่ง อ ซื๊งเว๊ อ ล้อง, ทแย นอ เฌ๊ทาง ทฆีง ล้อง, ดี๊ ท อ ไพ้ะ นอ เฌ๊ บองบีงทะ-อ้ะ, แบเด้าะ ลี้ง แซทางแซล้าง ล โอ พี่ นอ แบ

⁹ ฌ้อง กแช่แยว้ ไคล้ ดี๊ แย้ ไจ้ะเว๊, “เกม๊า โล้ล้าง ท อลู่งอแท๊ เอะ ลี้ง แซทางแซล้าง, กโพล้ง อ พู-เอ้อ, เกม๊า โล้ล้าง ท อลู่งอแท๊ แดเทา, เกม๊า โล้ เอะ ลี้ง แซทางแซล้าง บี่อี้ง, ทอดูทึโท๊ทึกแช่ยาเว ไจ้ะเว๊ บี่อี้ง, ลี้ง แซทางแซล้าง-เอ้อ, เกม๊า เฌ๊นี่ ลู่ง ลี้ง ลี่งแพ้, เฌ๊ แซทางแซล้าง นึฆ้าง ลู่ง โพล้ง พี่ อ แบ ท แม้ซี๊ง ลแพ อี้ง อล้องอย่าง พ้า, บี่ซุ้ เกม๊า อ เว๊ โอ ดี๊ ทม๊า”

¹⁰ ฌ้อง จ โล้ล้าง ท อลู่งอแท๊ บี่ซุ้ดี๊ กแช่แยว้ อางแบเลา แย้, ดี๊ ลี้ง แซทางแซล้าง นอ, เฌ๊ นึฆ้าง ลู่ง เค่งฌ้าง ลแพ นอ อ พ้า, อ ซื๊งเว๊ โอ ดี๊ ทม๊า, ฌ้อง นอ ชี๊เทิงทาง ดี๊ คาง เก ซึ้พูมู๊ง พ้ะดู เต้ๆ

¹¹ ฌ้อง กแช่แยว้ ไคล้ ดี๊ แย้ ไจ้ะเว๊, “กโพล้ง อ พู-เอ้อ, ทฆีง ลแพ อี้ง นอ, เมะเว๊ อีซลาเอง อชื้ออชะ เลาพะ, แคว่เซ้อ, อ ซื๊งเว๊ ซีง ลแพ ไจ้ะเว๊, ‘กฆีงกแกว้ ซู๊งไฆ๊, ดี๊ ก ทมื้งแล่ นอ. เลาเทาเช๊งเทา, ก แบ ทแม้ เฌ๊ฌ้องไฆวะ เลาพะ’

¹² อกย้องบี่นอ, เกม๊า โล้ล้าง ท อลู่งอแท๊, ดี๊ โล้ เอะ อ ซื๊งเว๊ บี่อี้ง, ทอดูทึโท๊ทึกแช่ยาเว ไจ้ะเว๊ บี่อี้ง, อี้งเซ้อ, กพูกลี้ง-เอ้อ, ก ม เว่พ้ะ น ซื๊ง แซวคู พ้า, ดี๊ แม้นี่ แน้ ไจทางนี่ ลู่ง น แซวคู พ้า, ดี๊ ม เฌ๊ไท้ ฌ้าไท้ แน้ ลู่ง ค่าง อีซลาเอง

¹³ โอ้, กพูกลี้ง-เอ้อ, น ซื๊ง ซีง ลแพ ม ซีงแฌ๊-อ้ะ บี่อี้ง, เฆ้อ เมะเว๊ ยาเว, พี่ ก เว่พ้ะ น แซวคู พ้า, ดี๊ แม้นี่ แน้ ไจทางนี่ ลู่ง น แซวคู พ้า

¹⁴ ดี๊ ก ม ชวี๊งล้าง กวีงกแล้ ลู่ง นล้องนย่าง พ้า, ฌ้อง น ซื๊ง ซีง ลแพ ม โอ ดี๊ ทม๊า, ดี๊ ก ม อางกีล้าง แน้ ลู่ง น ที๊งล่างค่างพ้า, ฌ้อง น ซีงแฌ๊-อ้ะ บี่อี้ง, เฆ้อ เมะเว๊ ยาเว, นี่ ไคล้ล้าง เย้า, ดี๊ ก ม แม้ เท่อ ล้อ”, กแช่ยาเว โล้ เว๊ บี่อี้ง ล้อ

เซง คี๊ง กึ้

¹⁵ กแช่ยาเว อลู่งอแท๊ เฌ๊ ท้อง แย้ ไจ้ะเว๊

¹⁶ “แน้, กโพล้ง อ พู-เอ้อ, เกม๊า แม้นี่ เซง คี๊ง กึ้, กวิ้ล้าง เท่อ บี่อี้ง, ‘ลู่ง ยูดา อ ฌ่าง, ดี๊ อีซลาเอง อ ฌ่าง, พี่ โอเบ้าโอเท่ง ดี๊ ยูดา’, เกม๊า แม้นี่ เซง ล กึ้ เด้าะ, กวิ้ล้าง เท่อ บี่อี้ง, ‘ลู่ง โยซิ้ อ ฌ่าง, (เอฟาอีง อ เซง), ดี๊ อีซลาเอง อชื้ออชะ เลาพะ อ ฌ่าง, พี่ โอเบ้าโอเท่ง ดี๊ โยซิ้’

¹⁷ ฌ้อง แม้นี่ เซง คี๊ง กึ้ อางกีซยอง-อ้ะ เก ล กึ้ ฆ่าง, บี่ซุ้ เก เซง ล กึ้ ฆ่าง ลู่ง น จูง พ้า

¹⁸ ดี๊ ท่อง โพล้ง ลู่ง น ชื้อ พ้า ไคล้ ดี๊ แน้ ไจ้ะเว๊, ‘น ล โล้ เอะ เฆ้อ เกม๊า ก ซีงแฌ๊ แบ-อ้า, ท ล เม้ง อี้ง อ โค๊ บี่จะเล้?,’

¹⁹ เกม๊า โล้ เอะ อ ซื๊งเว๊ บี่อี้ง, ทอดูทึโท๊ทึกแช่ยาเว ไจ้ะเว๊ บี่อี้ง, แคว่เซ้อ, ก ม แม้นี่ โยซิ้ อ เซง, (พี่ โอ เอฟาอีง อ จูง พ้า), ดี๊ อีซลาเอง อ ชื้อ ล ชื้อ แบ ล ชื้อ, พี่ โอเบ้าโอเท่ง ดี๊-อ้ะ นอ อ เซง, ดี๊ ก ม แม้นี่ ยูดา อ เซง, ฌ้อง แม้ เก เซง ล กึ้ ฆ่าง, ดี๊ ม เก เซง ล กึ้ ฆ่าง ลู่ง ก จูง พ้า

²⁰ พี่ เซง คี๊ง กึ้ พี่ น กวิ้-อ้ะ นอ, โอ น จูง พ้า ลู่ง อ ซื๊งเว๊ ซีง ลแพ อ เมะแซ พ้า นอ

²¹ เกม๊า โล้ เอะ-อ้ะ บี่อี้ง, ทอดูทึโท๊ทึกแช่ยาเว ไจ้ะเว๊ บี่อี้ง, แคว่เซ้อ, ก ม เฌ๊ฌ้า อีซลาเอง เฌ๊นี่ ลู่ง โพล้ง กุ้ชื้อกุ้ชะ อซุ้อแกล้ พ้า, พี่ อ ซื๊งเว๊ นี่ นึฆ้าง ลี้ โอ ซกุ้ เว๊ นอ, ดี๊ ม อางกีซยอง นี่ อ ซื๊งเว๊, เฌ๊ นี่ ลู่ง กุ้แพ้กุ้โค๊ วะชวะ, ฌ้อง เฌ๊ฌ้า-อ้ะ ลู่ง อ ที๊งล่างค่างพ้า

²² ดี๊ ก ม ดึ้ เกม๊า อ ซื๊งเว๊ เก โพล้ง ล ชื้อ ลู่ง ที๊งล่างค่างพ้า นอ, ลู่ง อีซลาเอง อ ทลู่ง คู ลแพ นอ, ดี๊ กจุ้แฆว้ ม โอ ล แฌ้, เก กจุ้แฆว้ โพะคอง อ ซื๊งเว๊, อ ซื๊งเว๊ ล เก โพล้ง คี๊ง ชื้อ ล้า แบ, ดี๊ ม ล อางน้างพ้ะ เก บ้างมื่ง คี๊ง จอง ล้า แบ

²³ ดี๊ อ ซื๊งเว๊ ม ล แม้ แบอ้า ล้าง อ ซ้ะ ดี๊ ทเค่งทฌ้าง-อ้า, ดี๊ อ ท ล้าง ซ้ะลูซ้ะไล้ะ-อ้า, ดี๊ อ ท ลือค๊างพะ เท่อ กุ้เม้ง นอ-อ้า ล้า แบ, แบเด้าะ ก ม แม้ช้า-อ้ะ เกม๊า พ้องไฆวะ ดี๊ ทเด้บ้ะ, ลู่ง อ ซื๊งเว๊ อ ล่าง เปิ่งโอเปิ่งช๊อง พ้า นอ, ดี๊ ก ม แม้เช๊งแม้เกล้ง-อ้ะ, ฌ้อง อ ซื๊งเว๊ ม เก กพูกลี้ง, ดี๊ ก ม เก อ กแช่แยว้

²⁴ “ก เพล่ ดาเว ม เก กจุ้แฆว้ โพะคอง อ ซื๊งเว๊ ลแพ นอ ดี๊ อ เว๊ กุ้แฌ้ ม โอ ดี๊ โพล้ง ลื่ง เท่อ ล แฌ้ ฆ่าง, อ เว๊ ม แม้โพะ ก ท อางกีล้าง อ ไค๊, ดี๊ แฌแซกต้าง ก ท อเค้อะอต้าง, ดี๊ แม้โพะ เว๊ อ ไค๊

²⁵ อ ซื๊งเว๊ ลแพ นอ, ม เปิ่งโอเปิ่งช๊อง ลู่ง ที๊งล่างค่างพ้า, พี่ ก นี่ เกล๊าง เอะ ก เพล่ ยาคุ้, พี่ น ซื๊ง พี๊งชู้พู๊งชู้ ลู่ง แย๊ อู้ง ลแพ นอ เปิ่งโอเปิ่งช๊อง เว๊, อ ซื๊งเว๊ ดี๊ อ พู, เลา ดี๊ อ ลี้ง นอ, ม เปิ่งโอเปิ่งช๊อง พี่ นอ ล้างชู้ล้างแกย, ดี๊ ก เพล่ ดาเว ม เก เว๊ อคูอแน่ ล้างชู้ล้างแกย ล้อ

²⁶ ก ม แม้ ทเอิ้งล้าง ทฆู๊งทพุ้ ดี๊-อ้ะ, ม เก ทเอิ้งล้าง ล้างชู้ล้างแกย เอะ-อ้ะ, ดี๊ ก ม ต๊างทาง อ ซื๊งเว๊, ดี๊ เกม๊า อ เว๊ แอทางโฌ่ทาง, ดี๊ ก ม ช๊างล้าง ก ทแบ้แยว้ล่างลู่งอฌี้ ลู่ง อซุ้อแกล้ พ้า ล้างชู้ล้างแกย

²⁷ ก ล่าง เปิ่งโอเปิ่งช๊อง ม โอ ดี๊ อ ซื๊งเว๊ ลแพ นอ, ก ม เก อ กแช่แยว้, ดี๊ อ เว๊ ม เก กพูกลี้ง

²⁸ ฌ้อง โพล้ง กุ้ชื้อกุ้ชะ ลแพ นอ, ม ซีงแฌ๊ เว๊ บี่อี้ง, เฆ้อ ยาเว นี่ ดึ้ เกม๊า อีซลาเอง เช๊งเกล้ง, พี่ ก ท แบ้แยว้ล่างลู่งอฌี้ โอ อซุ้อแกล้ พ้า ล้างชู้ล้างแกย นอ ล้อ”