เอเซเคียง 19 - Northern Pwo Karen Thai Bible

อีซลาเอง ล้างไช้ะล้างย่อง

¹ “นี๊แด นอ, เกม๊า น แม้เซ๊ น ลู่ง ซ้ะอวีงแท๊ ฌางล้างย้าล้าง, แบฆ้ะ ดี๊ อีซลาเอง อคูอแน่ ซีง ลแพ นอ

² ไจ้ะ บี่อี้ง น มู่ นอ ล้างโฌ่ คี๊ยื่ง มู่ พี่ โอ ลู่ง คี๊ยื่ง ซีง ลแพ อซุ้อแกล้ เต้ๆ อ เว๊ มี๊งน้าง โอ ลู่ง คี๊ยื่ง แพ๊ อซุ้อแกล้ ดี๊ ลื่ง แคว่ อ พู

³ อ เว๊ ลื่ง คี๊ยื่ง อ พู ล ดื้ง, เกม๊า เว๊ อ ดูทางโท๊ทาง อ เกทางก้ะ คี๊ยื่ง แพ๊ อ พองลูซย่างลู ดุ้ อ แชอาง ดี๊ อ ไอ อาง โพล้ง

⁴ กเย่ โพล้ง กุ้ชื้อกุ้ชะ แน่ฌ๊า แบ เว๊ อไฌ่อกย้อง อ แบ ท พองนี่ ลู่ง อ ซื๊งเว๊ ซีง ลแพ อ ซลา พ้า อ ซื๊งเว๊ แม้นี่ นางไค้ บล้ะ-อ้ะ เฌ๊ไท้ฌ้า เว๊ ลู่ง ค่าง อีไย้ะ

⁵ ท่อง อ แคว่ เว๊ โอคุ้ เท่อ ไยะ เย้า ดี๊ อ ท มื้งแล่ ล โอ ล้า แบ นอ อ เว๊ แม้นี่ อ พู ล ดื้ง เด้าะ ลื่ง เว๊ เกม๊า อ เก คี๊ยื่ง แพ๊

⁶ อ ลี้ๆ, ไท้ๆ, ลู่ง คี๊ยื่ง ซีง ลแพ อซุ้อแกล้ ดี๊ เกทางก้ะ คี๊ยื่ง แพ๊ ดี๊ อ พองลูซย่างลู ดุ้ อ แชอาง อ ไออาง โพล้ง

⁷ อ เว๊ มี๊งฆึ นี่ชอง อ โพล้ง มืงเม๊ ลแพ นอ ดี๊ ดึ้ เกม๊า อ ซื๊งเว๊ อ เว่ง ลแพ นอ, โอโปล้ก้ะ ที๊งล่างค่างพ้า ดี๊ โพล้ง พี่ โอ เว๊ อ พ้า นอ, ซ้ะเมซ้ะไพล้ เท่อ พี่ แน่ฌ๊า เว๊ อ ลู่ง กุ้ซย้ะ อ โคะ นอ

⁸ ฌ้อง กเย่ โพล้ง กุ้ชื้อกุ้ชะ วะๆ, ว๊างๆ, นอ ดึ้ซึ้-อ้ะ โอ นี่ ลู่ง เฌง กุ้จองกุ้ไจ้ อ ซื๊งเว๊ ซีง ลแพ ย้างแย่ทาง ทฆี คลึล้าง เว๊ อ เว๊ แบ ท พองนี่ โอ ลู่ง อ ซื๊งเว๊ อ ซลา พ้า

⁹ อ ซื๊งเว๊ แม้นี่ นางไค้ บล้ะ-อ้ะ, ลี้ เด้าทะ เว๊ ลู่ง นางเด้าทะ อ พ้า ดี๊ เฌ๊ฌ้า เว๊ ลู่ง กจุ้แฆว้ บาบีโลง อ โอ ลี้ อางกี เว๊ ลู่ง ทล่างโอกดื้ง เฌิ่งเพิ่ง พ้า บี่ซุ้ ล เกม๊า แน่ฌ๊า อ ลู่ง เซ๊ ลู่ง อีซลาเอง อ ทลู่ง คู ล้า แบ

¹⁰ น มู่ นอ, บี่ซุ้ดี๊ ซไบ้ะ มื่ง โอ ลู่ง โซ๊ง ซไบ้ะ พ้า แม้นี่ เฌ๊ เซิงล้าง ลู่ง ที๊ง พ้าไท้ะ อ แซ โอ แอ, ดี๊ อ ได้ โอ แอฌ้อง เมะเว๊ ที๊ง โอกู้งโอล๊า

¹¹ อ ได้ พี่ อชองอไคล๊ ดู มะ นอ เกทางก้ะ โพล้ง โพะคอง เท่อ อ นางทุ้บ้อง โชะทาง อ ซ้ะ ทางทือ พ้ะโท๊ ลู่ง อ ได้ ตางมรึ ไบ้ะไทะ อซุ้อแกล้ พ้า โพล้ง แฌ้ฌี้ๆ, นอ, แด เว๊ อ ท พ้ะโท๊ เติ้งต้าง เลา ดี๊ อ ได้แท่ แอฌี่งแอฌ้อง ล้อ

¹² แบเด้าะ อ แบ ท ทิ้ทาง ดี๊ ทซ้ะทาง แบ ท จึ้ล้าง ลู่ง ฌางคูคู ลี้ง ลู่ง มื่งทาง ล โค๊ แม้ ล้างไย้ะไฆวะ-อ้ะ อ แซ นอ แบ ท ดิ้ไฆวะ เลาพะ อ ได้ พี่ อชองอไคล๊ นอ ล้างไย้ะไฆวะ มี อางไฆวะ-อ้ะ เฆาะ

¹³ ค๊องเนงอี้ง อ แบ ท ทิ้ทาง ลี้ เซิงล้าง ลู่ง แพะคูทเคแกล้ ลู่ง ที๊งล่างค่างพ้า พี่ อ ซู๊งไฆ๊ ดี๊ ซ้ะวี่ง ที๊ง

¹⁴ มี ไจทางนี่ ลู่ง อ ได้ นอ อาง เฌ๊ฌ้องไฆวะ อ ได้แท่ อ แฌ้แพ, ดี๊ อซูงอแซ ท้อง อ เลา อ ได้ พี่ อชองอไคล๊ นอ, ล โอ ล้างลื๊อ ลู่ง อ มื่งเทิง ล้อง ล้า แบ นางทุ้บ้อง ลู่ง โพล้ง โพะคอง เท่อ อ ฌ่าง ล โอ แบ” อ อี้ง เก แท๊ซ้ะอวีง ฌางล้างย้าล้าง, พี่ เจ่ ลู่ง ท ฌางล้างย้าล้าง อ ฌ่าง ล้อ