เอเซเคียง 10 - Northern Pwo Karen Thai Bible

กแช่แยว้ อโฌ่งอพ้าง ล้างแซยล้างพ้ะแดไฆวะ เว่ง เยรูซเลง

¹ ฌ้อง นอ จ แคว่ เท่อ, อี้งเซ้อ, ลู่ง ทมุ้คู พี่ โอ เครุ้ ลแพ นอ อ คูด้าง, โอ ดี๊ เท่อ พี่ อมยู๊อฮ๊าง แบด้อง กแช่แยว้ อ ล่าง ชี๊น้าง พี่ เก บี่ซุ้ดี๊ ไพลีง โพลทาง ลู่ง เครุ้ ลแพ นอ อ คูด้าง

² ดี๊ กแช่แยว้ ไคล้ ดี๊ กแคว๊ ซุ้ ไช๊ ตไก้ยะ ลูง ไว้ะไก้ ไจ้ะเว๊, “เกม๊า ลี้ นึฆ้าง ลู่ง ท อ คางไร้ะ เบ้าช้า, พี่ โอ เครุ้ เช๊ละ นอ, เกม๊า น ช้องนี่ แซวท่อง อ้า, ลู่ง เครุ้ ลแพ นอ อ เบ้าช้า, ฆวี้ น จูง คี๊งโค๊, ฌ้อง นอ ลี้ ฆวีง-อ้ะ ลู่ง เว่ง อ คูด้าง นอ>>, ดี๊ กแคว๊ ล แฌ้ นอ, ลี้ฆ้าง ลู่ง จ เมะแซ พ้า

³ เมะ เครุ้ ลแพ นอ, ชี๊เทิง โอ ลู่ง เด้กแช่แยว้อล่างโอ อ มื่งแพ้ ล โค๊, พี่ กแคว๊ ล แฌ้ นอ ลี้ นึฆ้าง อ แค๊ นอ, ดี๊ อ ล่าง พ้ะเล่ พ้าแย๊โค๊ นอ โอ ฆวี๊ ดี๊ ทเอิง

⁴ ฌ้อง นอ กแช่ยาเว อโฌ่งอพ้าง นอ, ทางนี่ ลู่ง เครุ้ ลี้ ลู่ง เด้ กแช่แยว้อล่างโอ อ ป้ะตู๊ง เคิง, ดี๊ เด้กแช่แยว้อล่างโอ นอ, โอ ฆวี้ ดี๊ ทเอิง, ดี๊ อ ล่าง พ้ะเล่ นอ, โอ ฆวี้ ดี๊ กแช่ยาเว อโฌ่งอพ้าง อ โฌ่งค้ะ

⁵ เมะ เครุ้ ลแพ นอ, อ ได้ะ เซ๊ แน่ฌ๊า ท้อง อ ล่าง พ้ะเล่ ค๊องโค๊ ล ท๊า นอ, บี่ซุ้ดี๊ กแช่แยว้ พี่ โอ ดี๊ อดู้งอยาง อซยื๊งอซย้อง แอทึ อ ลู่ง เซ๊ พี่ อ ไคล้ แค๊ นอ

⁶ ดี๊ ท่อง กแช่แยว้ อางแบเลา กแคว๊, พี่ ซุ้ ไช๊ช้าง ตไก้ยะ ลูงไว้ะไก้ ไจ้ะเว๊, “เกม๊า ลี้ แม้นี่ มี ลู่ง ท อ คางไร้ะ อ เบ้าช้า, เมะเว๊ ลู่ง เครุ้ ลแพ นอ อ เบ้าช้า”, กแคว๊ ล แฌ้ นอ, ลี้ นึฆ้าง, ดี๊ ชี๊เทิง โอ ท อ คางไร้ะ ล วอง อ ฌ๊างไท้ะ

⁷ เครุ้ ล ดื้ง, เยาทาง นี่ อ จูง ลู่ง เครุ้ ลแพ นอ อ เบ้าช้า, ลี้ ลู่ง มี พี่ โอ เครุ้ อ เบ้าช้า นอ, ฌ้อง นอ พองทาง มี ล น้าง, ดี๊ ชวี๊งล้าง เว๊ กแคว๊ พี่ ซุ้ ไช๊ช้าง ตไก้ยะ ลูงไว้ะไก้ นอ อ จูง ย๊างซ้ะ พ้า, กแคว๊ นอ พองนี่ เว๊ ดี๊ ไจทาง โชะ เว๊

⁸ ดี๊ ลู่ง เครุ้ ซีง ลแพ อ โป้ง พ้า นอ, โอ ดี๊ ท พี่ อ โพลทาง, บี่ซุ้ดี๊ กโพล้ง อ จูง โอ ลู่ง อ ได้ะ เช๊ละ

⁹ ฌ้อง นอ จ แคว่ เท่อ, แคว่-เซ้อ, ท อ คางไร้ะ โอ ลี่ง วอง, ลู่ง เครุ้ ลแพ นอ อ ฌ๊างไท้ะ, ท อ คางไร้ะ โอ เครุ้ อ ฌ๊างไท้ะ ล ดื้ง ล วองๆ, ท อ คางไร้ะ นอ, อมยู๊อฮ๊าง บี่ซุ้ดี๊ เบรีง อ พ้าง

¹⁰ ท อ คางไร้ะ ลี่ง วอง นอ, อเค่งอฌ้าง โอ บี่ซุ้ โละอซ้ะ, เมะเว๊ เก บี่ซุ้ดี๊ คางไร้ะ โดปท๊า อ ซ้ะ คางไร้ะ พ้า

¹¹ ท่อง อ ลี้ นอ, เครุ้ ลแพ นอ, ม ลี้ ลู่ง อ เมะ ลี่งแพ้ แพ้ ฌี้ๆ, นอ ซี เลาพะ, อ ซื๊งเว๊ ลี้ พี่ ล แบ แกย อ ซ้ะ แบ เฆาะ, เมะเว๊ อ ซื๊งเว๊ ม ลี้โพะ ล แพ้ แย๊ พี่ อ คู ลี้ นอ ล้อ, ลี้ เว๊ พี่ ล แบ แกย อ ซ้ะ แบ เฆาะ

¹² ดี๊ เฆ้ง อ ซื๊งเว๊ อล้องอย่าง, เลา ดี๊ อ จูงแย๊คู, อ ได้ะ, ดี๊ ท อ คางไร้ะ, เมะเว๊ ลี่งดื้ง อ คางไร้ะ นอ, โอ ฆวี้ ดี๊ เมะคลี๊ง วะชวะ

¹³ จ แน่ฌ๊า ดี๊ แน่ บี่อี้ง, คางไร้ะ ลแพ นอ, กุ้ เว๊ คางไร้ะ ว้างไร้ะ

¹⁴ เครุ้ ล ดื้งๆ, นอ, อ เมะ โอ ลี่ง เบง, เมะ อ ต้องคู ล เบง นอ, เก เครุ้ อ เมะ, เมะ คี๊งเบง ล เบง นอ, เก กโพล้ง อ เมะ, เมะ ซ๊าเบง ล เบง นอ, เก คี๊ยื่ง อ เมะ, ดี๊ เมะ ลี่งเบง ล เบง นอ, เก ไละ พ้ะดู อ เมะ

¹⁵ ฌ้อง เครุ้ ลแพ นอ ยู้งทาง, เก ท อ ซ้ะม๊า พี่ จ แด แบ-อ้ะ ลู่ง ที๊งเคบา อ กล้อง พ้าไท้ะ

¹⁶ ท่อง เครุ้ ลี้ นอ, ท อ คางไร้ะ ลี้โพะ อ ซื๊งเว๊ อ ไค๊ ลู่ง อ ฌ๊างไท้ะ ปะ, ดี๊ ท่อง เครุ้ ย้างแย่ ทาง อ ได้ะ, บี่ซุ้ ยู้งทางนี่ ลู่ง ฌางคูคู นอ, คางไร้ะ ลแพ นอ, ล แกยไฆวะ อ ซ้ะ ดี๊ เครุ้ ลแพ นอ อ ฌ๊างไท้ะ แบ เฆาะ

¹⁷ ท่อง เครุ้ ซีง ลแพ, โอโท๊ เฌิ่งเพิ่ง นอ, คางไร้ะ ลแพ นอ โอโท๊ เฌิ่งเพิ่ง ปะ, ท่อง เครุ้ ยู้งทาง นอ, คางไร้ะ นอ, ยู้งทาง ดี๊ อ ซื๊งเว๊ ปะ, เมะเว๊ ท พี่ โอ ดี๊ อ ทม๊า นอ, อวีงอแล้ โอ ท อ คางไร้ะ พ้า

¹⁸ ฌ้อง นอ กแช่ยาเว อโฌ่งอพ้าง, ไจแดไฆวะ เด้กแช่แยว้อล่างโอ อ ป้ะตู๊ง เคิง, โอ ลู่ง เครุ้ ลแพ นอ อ คูด้าง

¹⁹ ท่อง เครุ้ ซีง ลแพ ย้างแย่ อ ได้ะ ยู้งทาง นอ, อ ซื๊งเว๊ ยู้ง แดไฆวะ ฌางคูคู ลู่ง จ เมะแซ พ้า, (พี่ อ ซื๊งเว๊ ไจทาง นอ, ท อ คางไร้ะ ลี้โพะ อ ไค๊ ลู่ง อ ฌ๊างไท้ะ ปะ), ดี๊ ลี้ ชี๊เทิง โอ ลู่ง เกล้ นึฆ้าง ลู่ง เด้กแช่ยาเวอล่างโอ อ ป้ะตู๊ง, ลู่ง มื่งทาง ล โค๊ นอ, ดี๊ อีซลาเอง อ กแช่แยว้ อโฌ่งอพ้าง นอ, โอ ลู่ง เครุ้ ลแพ นอ อ คูด้าง

²⁰ อ อี้ง นอ, เมะเว๊ ท พี่ โอ ดี๊ อ ทม๊า, พี่ จ แด-อ้ะ อ โอ กแช่แยว้ ลู่ง อีซลาเอง อ เช๊ละ, ลู่ง ที๊ง เคบา อ กล้อง พ้าไท้ะ, ฌ้อง นอ จ ซีงแฌ๊-อ้ะ, อ เก เครุ้ ล้อ

²¹ เครุ้ กุ้ แฌ้ นอ, อ เมะ โอ ลี่ง เบง, ดี๊ อ ได้ะ โอ ลี่งแพ้, ดี๊ กโพล้ง อ จูง อเค่งอฌ้าง โอ อ ได้ะ เช๊ละ

²² แบเด้าะ เมะ ลแพ อี้ง อเค่งอฌ้าง, เก เมะ พี่ จ แด แบ-อ้ะ ลู่ง ที๊ง เคบา อ กล้อง พ้าไท้ะ, เลา ดี๊ อมยู๊อฮ๊าง ดี๊ อล้องอย่าง, ล แฌ้ๆ, นอ, ลี้ ล้องท้อง ลู่ง อ เมะแซ พ้า