ทไจทางไฆวะ 27 - Northern Pwo Karen Thai Bible

ทลื่งล่าง

¹ “เกม๊า น ไต้ทางนี่ ทลื่งล่าง ดี๊ เซง น๊าเซ๊ง, โท๊ แดฆ้าง เย่ แพล่, เล่ เย่ แพล่, โท๊ ชี๊เทิง ซ๊า แพล่, ม๊า อ เก ลี่งคองลี่งแพ้

² แม้นี่ อ โน้ง ไต้ะทาง-อ้ะ ลู่ง อ โนง ล้อง ลี่ง โนง เลา, เกม๊า อ บึ้เบง โละซ้ะ ดี๊ ทล่าง นอ, ดี๊ เกม๊า กล้ะไบ้ะ-อ้ะ ดี๊ ท่องบ้าง

³ เกม๊า น ไต้นี่ พ้า อางกี ชวี๊งล้าง พี๊แคล, ดี๊ ไต้ทางนี่ ลูงไควะ, อ้าง, นาง ชิ้ ซ๊าแท่, มีอ้า ล่าง อ ไค๊กล้ะ, เมะเว๊ กเย่ เท่อ พี่ แบ เจ่-อ้ะ ลแพ นอ แม้-อ้ะ ดี๊ ท่องบ้าง กุ้เม้ง ซวะ

⁴ ฌ้อง แม้นี่ ท่องบ้าง ไต้ทาง ทฆี นอ ลู่ง ทลื่งทาง ล่าง นอ อ ฌ่าง, ดี๊ ไต้นี่ อ แน่โวง ดี๊ ท่องบ้าง, ไต้ะทาง-อ้ะ ลู่ง ทฆี อ โนง ล้อง ลี่ง โนง นอ

⁵ ทฆี นอ เกม๊า อ โอ ลู่ง ทลื่งล่าง นอ อ กีง เช๊ละ วะ ทลื่งล่าง นอ, ดี๊ เกม๊า อ ล้างเช้ ท้อง อ คี่ง พ้า ล้าง ลู่ง ละโค๊ แพ้

⁶ มี่ก้าง ยุ้ ทลื่งล่าง นอ แม้-อ้ะ ดี๊ เซง น๊าเซ๊ง, ดี๊ กล้ะไบ้ะ-อ้ะ ดี๊ ท่องบ้าง

⁷ มี่ก้าง นอ ลอง ฆ้าง-อ้ะ ลู่ง อ แน่โวง พ้า, เมะ ยุ้-อ้ะ นอ, มี่ก้าง ม โอ เว๊ แด ลู่ง ทลื่งล่าง อ แพ้ล้อง นอ แพ้ บ้องๆ

⁸ ทลื่งล่าง นอ ไต้-อ้ะ ดี๊ เซง ปางเป, แบเด้าะ ลู่ง แย๊ โค๊ นอ, แบ โอ ดี๊ อ พ้า, บี่ซุ้ดี๊ จ ดึ้ เน เอะ แน้ ลู่ง ทลู่ง คู เย้า นอ, เกม๊า โพล้ง แม้ เว๊ บี่นอ ล้อ

เด้กแช่แยว้อล่างโอ อ คว้าง พ้า

⁹ “เกม๊า น พ้อง ทะ เด้กแช่แยว้อล่างโอ, พ้อง ลู่ง ละ โค๊ ล แพ้ นอ, เกม๊า ไต้-อ้ะ ดี๊ ตไก้ยะ กางทะ เด้ อ พ้อง, แม้-อ้ะ ดี๊ ตไก้ยะ ลูง ไว้ะไก้ อ แย ฌี้, โท๊ อ แพล่ ล แย้

¹⁰ ไต้นี่ อ เฌเทิง คี๊ง ชี๊ง เทิง, ดี๊ แม้ อ คางไท้ะ ดี๊ ท่องบ้าง กุ้ เทิง ซวะ, อ บล้ะ บึ้เบง ดี๊ เฌเทิง, ดี๊ อ บ้อง แม้ เฌิ่ง อ เทิง นอ ไต้-อ้ะ ดี๊ จี้

¹¹ ล เม้ง ฆ่าง นอ ลู่ง ละ โค๊ แพ้ นอ, ม๊า โอ ดี๊ ตไก้ยะ กางทะ เด้ อ พ้อง, โท๊ อ แพล่ ล แย้ บี่ซุ้ ปะ, ดี๊ ไต้ เฌเทิง คี๊ง ชี๊ง เทิง, แม้ อ คาง ดี๊ ท่องบ้าง กุ้ เทิง ซวะ, อ บล้ะ บึ้เบง ดี๊ อ เฌเทิง, ดี๊ อ บ้อง แม้ เฌิ่งทะ อ เทิง นอ ไต้-อ้ะ ดี๊ จี้

¹² พ้อง อ เล่ ลู่ง มื่ง นึ ล โค๊ นอ, เกม๊า โอ ดี๊ ตไก้ยะ กางทะ เด้ อ พ้อง, แบ โท๊ แพล่ เย่ ชี๊ง, ดี๊ เฌเทิง อ เทิง ล ชี๊ง ดี๊ อ คาง อ กึ้ ล ชี๊ง

¹³ พ้อง อ เล่ ลู่ง มื่ง ทาง ล โค๊ นอ, ม๊า อ โท๊ แพล่ เย่ ชี๊ง

¹⁴ ตไก้ยะ กางทะ เด้ อ พ้อง ลู่ง ป้ะตู๊งไท้ะ ล แพ้ นอ, แบ โท๊ ชี๊ง เย่ แพล่, แม้ เฌเทิง ซ๊า เทิง, โอ ดี๊ อ คาง ซ๊า เทิง เลา

¹⁵ อ เว๊ แพ้ นอ ม๊า ตไก้ยะ กางทะ เด้ อ พ้อง นอ, โท๊ ชี๊ง เย่ แพล่, แม้ เฌเทิง ซ๊า เทิง โอ ดี๊ อ คาง ซ๊า เทิง เลา

¹⁶ ตไก้ยะ แม้ กดื้งทะ เด้ อ พ้อง ลู่ง เกล้ ป้ะตู๊ง นอ, ม๊า อ โท๊ แพล่ คี๊ง ชี๊ง, แม้-อ้ะ ดี๊ ลูง เปย้า, ลูง ลึ้, ลูง โฌ้จีลี, ดี๊ ตไก้ยะ ลูง ไว้ะไก้ อ แย ฌี้, พี่ โพล้ง อ จูง ซี ช้ะ กีง นี่ เว๊, ดี๊ แม้ เฌเทิง ลี่ง เทิง, โอ ดี๊ อ คาง ลี่ง เทิง เลา

¹⁷ พ้อง อ เทิง วะชวะ นอ, ม๊า โอ ดี๊ อ บ้อง แม้ เฌิ่งทะ เฌเทิง, ม๊า โต โละ อ ซ้ะ, แม้-อ้ะ ดี๊ จี้, ดี๊ อ บล้ะ นอ แม้-อ้ะ ดี๊ จี้, อ เฌเทิง คาง นอ แม้-อ้ะ ดี๊ ท่องบ้าง

¹⁸ พ้อง นอ แบ โท๊ แดฆ้าง อ แพล่ ล แย้, เล่ แพล่ เย่ ชี๊ง, โท๊ ชี๊เทิง เย่ แพล่, กางทะ-อ้ะ ดี๊ ตไก้ยะ ลูง ไว้ะไก้ อ แย ฌี้, ดี๊ อ คาง นอ แม้-อ้ะ ดี๊ ท่องบ้าง

¹⁹ เด้กแช่แยว้อล่างโอ อฆ้าอโฆ่ กุ้เม้ง พี่ น แบ เจ่-อ้ะ, เลา ดี๊ ล้ะ ชิ้ล้าง ทะ เด้กแช่แยว้อล่างโอ, ดี๊ ล้ะ ชิ้ล้าง ทะ พ้อง พี่ อ กางทะ เท่อ เลาพะ นอ แม้-อ้ะ ดี๊ ท่องบ้าง

ทซู ลู่ง มีโด้ง อ ฌ่าง

²⁰ “เกม๊า น อางแบเลา โพล้ง อีซลาเอง นอ, ม๊า อ เฌ๊ โชะ ไพ ซู ลู่ง อ ฌี้ ทึ, พี่ โพล้ง ไวะนี่ เว้ เว๊ นอ, ชวี๊งล้าง แอทาง มีโด้ง พ้า, เกม๊า มีโด้ง นอ พ้าง พี่ อ โท่

²¹ ลู่ง เด้ทโอซยองอล่าง พ้า ลู่ง ไฮะ ทล่าง แม้ไน ทอืงล้าง อ เมะแย๊, พี่ โอ ดี๊ ตไก้ยะ กางทะ เท่อ อ ช๊า ลู่ง ค๊องโค๊ ล แพ้ นอ, เกม๊า อาโรง ดี๊ อ พู ยู่แคว่ มีโด้ง นอ, ลู่ง กแช่ยาเว อ เมะแซ พ้า, ล โค๊ ลู่ง มื่งแฌล้าง ท้อง ลู่ง โฌ้โค๊, อ อี้ง นอ เกม๊า อ เก ท อเค้อะอต้าง ล้างชู้ล้างแกย, พี่ โพล้ง อีซลาเอง แบ แม้ เว๊ กุ้ อ ชู้ นอ ล้อ