ทไจทางไฆวะ 26 - Northern Pwo Karen Thai Bible

เด้กแช่แยว้อล่างโอ

¹ ล ก้ะ ได้ะ แบ นอ, น แบ แม้ เด้กแช่แยว้อล่างโอ ดี๊ ตไก้ยะ อ เบง ล ชี๊ง, พี่ เก ตไก้ยะ ลูง ไว้ะไก้ อ แย ฌี้, ดี๊ ลูง ย้อง เปย้า, ลูง ลึ้, ลูง โฌ้จีลี, ดี๊ ตไก้ยะ ล้อง นอ ช้ะทาง เครุ้ อ ฌ้าง ปะ

² ตไก้ยะ ล เบง เกม๊า อ โท๊ คี๊ง ชี๊ง ลี่ง แพล่, เล่ ลี่ง แพล่, ตไก้ยะ กุ้ เบง นอ เกม๊า อ ท๊องซุ้ โละซ้ะ

³ ตไก้ยะ เย่ เบง นอ เกม๊า อ บล้ะ ไต้ะ โละซ้ะ, ดี๊ เย่ เบง เด้าะ นอ เกม๊า อ บล้ะ ไต้ะ โละซ้ะ ปะ

⁴ แม้ ตไก้ยะ อ แน่ นอ ดี๊ ลูง เปย้า, ไต้ะทาง-อ้ะ ลู่ง ตไก้ยะ อ ไพ้ไท้ะ เลา ดี๊ อ วี่งคู ล โจ้ง ดี๊ คี๊ง โจ้ง ล จ้อง นอ ปะ

⁵ ตไก้ยะ ล เบง นอ, แม้ อ แน่โวง ลู่ง อ ไพ้ไท้ะ เย่ ชี๊ง พ้า, ดี๊ ตไก้ยะ คี๊ง โจ้ง ล โจ้ง อ ไพ้ไท้ะ นอ แม้ อ แน่โวง เย่ ชี๊ง พ้า ปะ, เกม๊า อ แน่โวง นอ โอ กแท้ โละอซ้ะ

⁶ แม้นี่ อ บล้ะ ดี๊ ท๊อง เย่ ชี๊ง บ้อง, ดี๊ เจ่ ทอบล้ะ ล แพ อี้ง นอ, อางกี บล้ะทะ ตไก้ยะ คี๊ง จ้อง เลา, ม๊า อ เก เด้กแช่แยว้อล่างโอ นอ ล โพลง ฆ่าง

⁷ เกม๊า ไต้นี่ ตไก้ยะ ดี๊ แมะ อ ชอง ชี๊ง ล เบง, อางกี คลึไบ้ะล้าง เด้กแช่แยว้อล่างโอ

⁸ เด้ อ ตไก้ยะ นอ แม้-อ้ะ โท๊ แดฆ้าง คี๊ง ชี๊ง ฆู๊ง แพล่, เล่ ลี่ง แพล่, ตไก้ยะ เลาพะ ชี๊ง ล เบง นอ, เกม๊า อ ท๊องซุ้ โละซ้ะ กุ้ เบง ซวะ

⁹ ตไก้ยะ เย่ เบง นอ, เกม๊า อ บล้ะ ไต้ะ โละซ้ะ โอเจ, ดี๊ ตไก้ยะ ฆู๊ง เบง เด้าะ นอ บล้ะ ไต้ะ-อ้ะ โอเจ ปะ, ดี๊ ตไก้ยะ ฆู๊ง เบง ล เบง นอ, แค่ไคล้ะ-อ้ะ คี๊งไคล้ะ, ทูล้างเช้-อ้ะ ลู่ง อ ฌุ้พาง อ โคล๊ง คู, ลู่ง เด้กแช่แยว้อล่างดอ อ เมะแซ พ้า ล โค๊ นอ

¹⁰ แม้ทางนี่ ตไก้ยะ อ แน่โวง พ้า เย่ ชี๊ง, แม้ บึ้เบง-อ้ะ ดี๊ อ วี่งคู ล โจ้ง นอ อ ไพ้ไท้ะ, ดี๊ เย่ ชี๊ง พ้า เด้าะ นอ, แม้ บึ้เบง-อ้ะ ดี๊ อ คี๊ง โจ้ง ล โจ้ง นอ อ ไพ้ไท้ะ

¹¹ “ฌ้อง แม้ อ บล้ะ ดี๊ ท่องบ้าง เย่ ชี๊ง บ้อง, บล้ะ ฆ้าง-อ้ะ ตไก้ยะ อ แน่โวง พ้า, บล้ะ ซยอง-อ้ะ ม๊า อ เก เด้ ล โพลง ฆ่าง

¹² ตไก้ยะ พี่ อ พะไฆวะ, เมะเว๊ ตไก้ยะ ล คึ พี่ อ ล้างลื๊อ ก้ะ นอ, ทูล้างเช้-อ้ะ ลู่ง เด้กแช่แยว้อล่างโอ นอ อ ล่างไค๊ ล โค๊

¹³ ตไก้ยะ คลึไบ้ะ เด้กแช่แยว้อล่าง พี่ อ โท๊พะไฆวะ โค๊ แพล่ๆ, นอ, ม๊า ทูล้างเช้-อ้ะ ลู่ง เด้กแช่แยว้อล่างโอ อ ฆ้อง อี้ง โค๊ แพ้ ดี๊ อู้ง โค๊ แพ้, กาง กดื้งทะ เท่อ

¹⁴ เด้ อ คู นอ, แม้-อ้ะ ดี๊ แกะ แพ๊ อ ไพ้ะ ย้อง โฌ้, ดี๊ คลึไบ้ะล้าง-อ้ะ ดี๊ ทไพ้ะ ลู่ง อ ฌี้ ล ท๊า เด้าะ

เซง ดอง เท่อ

¹⁵ เกม๊า น ไต้นี่ พี๊แด้ดอง ลู่ง เด้กแช่แยว้อล่างโอ อ ฌ่าง นอ, ดี๊ เซง น๊าเซ๊ง ดอง ชี๊เทิง-อ้ะ ล โค๊

¹⁶ อ ดอง ล เบงๆ, นอ, เกม๊า โท๊ โฆะ แพล่, เล่ ล แพล่ เบล

¹⁷ เซง พี๊แด้ดอง ล เบงๆ นอ, แบ โอ ดี๊ อ ดี้ คี๊ง บ้อง ม๊า พลางเชา โละอซ้ะ, เกม๊า น แม้ เด้กแช่แยว้อล่างโอ อ ดอง นอ บี่อี้ง กุ้ เบง ซว้ะ ล้อ

¹⁸ เด้กแช่แยว้อล่างโอ อ ดอง นอ, แม้-อ้ะ บี่อี้ง, ดุ้ อ ซ้ะ ลู่ง มื่ง เค๊ง ล โค๊ นอ ดอง-อ้ะ อ เบง คี๊ง ชี๊ง

¹⁹ อ คาง นอ แม้-อ้ะ ดี๊ จี้ อ เทิง ลี่ง ชี๊ง, ลู่ง เซง อ เบง คี๊ง ชี๊ง นอ อ ฌ่าง, อ คาง แบ โอ ล เบง คี๊ง เทิง, พลางเชา-อ้ะ ดี๊ อ ดี้ คี๊ง บ้อง

²⁰ เด้กแช่แยว้อล่างโอ ดุ้ อ ซ้ะ ลู่ง มื่ง แพ้ ล โค๊ นอ, ดอง-อ้ะ อ เบง คี๊ง ชี๊ง ปะ

²¹ ดี๊ เกม๊า ไต้นี่ อ คาง ดี๊ จี้ อ เทิง ลี่ง ชี๊ง, อ ดอง เช๊ละ ล เบงๆ นอ, แบ โอ ดี๊ อ ดี้ พลางเชา อ คาง ล เบง คี๊ง เทิง

²² ลู่ง เด้กแช่แยว้อล่างโอ อ โคล๊ง, ดุ้ อ ซ้ะ ลู่ง มื่ง นึ ล โค๊ นอ ดอง-อ้ะ ฆู๊ง เบง

²³ ดี๊ เด้กแช่แยว้อล่างโอ อ โนง ลู่ง อ ล่างไค๊ ล โค๊ นอ, ดอง-อ้ะ คี๊ง เบง เด้าะ

²⁴ อ ดอง ละโค๊ แพ้ นอ เกม๊า บล้ะ โละ อ ซ้ะ เก ล กู่งๆ, แบเด้าะ อ คูจอง ท้ะโค๊ แพ้ นอ, เกม๊า อ บึ้เบง โละซ้ะ ดี๊ อ แน่โวง คี๊ง โท้ เลา, แม้-อ้ะ บี่อี้ง ฌ้อง อ โนง ม โอ เว๊ แด คี๊ง โนง นอ ล้อ

²⁵ เมะเว๊ แด อ ดอง ม โอ โฆะ เบง, ดี๊ อ คาง ดี๊ จี้ ชี๊ง พลางเชา อ ดี้ นอ ฆู๊ง เทิง, อ ดอง เช๊ละ นอ เกม๊า อ คาง โอ ล เบง คี๊ง เทิง

²⁶ เด้กแช่แยว้อล่างโอ อ ดอง ล แพ้ นอ, แม้ อ เจ้ ดี๊ เซง น๊าเซ๊ง เย่ บ้อง

²⁷ ดี๊ อ เจ้ เย่ บ้อง เด้าะ นอ, เจ้ทะ เด้กแช่แยว้อล่างโอ อ ดอง ล แพ้ ได้ะ, อ เจ้ เย่ บ้อง เด้าะ นอ, เจ้ทะ เด้กแช่แยว้อล่างโอ อ ดอง ลู่ง อ ล่างไค๊ ล โค๊, พี่ ดุ้ อ ซ้ะ ลู่ง มื่ง นึ ล โค๊ นอ

²⁸ อ เจ้ พี่ โอ อ ดอง อ คี่ง พ้า เจ้ทะ อ ดอง นอ, ลองฆ้าง ซยอง-อ้ะ ลู่ง อ คูทุ้ อี้ง โค๊ แพ้ ม๊า ท้อง อ คูทุ้ อู้ง โค๊ แพ้

²⁹ อ ดอง ลแพ นอ, กล้ะไบ้ะ-อ้ะ ดี๊ ท๊อง, ดี๊ แม้ อ แน่โวง ดี๊ ท๊อง อางกี ลองฆ้าง อ เจ้ พี่ นอ, ดี๊ อ เจ้ นอ กล้ะไบ้ะ-อ้ะ ดี๊ ท๊อง

³⁰ เด้กแช่แยว้อล่างโอ นอ, น แบ ช๊างล้าง-อ้ะ บี่ซุ้ดี๊ ทอางกีล้าง พี่ จ ดึ้ เน เอะ แน้ ลู่ง ทลู่ง คู อู้ง นอ ล้อ

ตไก้ยะ กางทะ เท่อ

³¹ “แม้ ตไก้ยะ กางทะ เท่อ ล เบง ท้ะ-อ้ะ ดี๊ ลูง เปย้า, ลูง ลึ้, ลูง โฌ้จีลี, ดี๊ ตไก้ยะ ลูง ไว้ะไก้ อ แย ฌี้, ช้ะทาง เครุ้ อ ฌ้าง ลู่ง ตไก้ยะ นอ อ ล้อง

³² ตไก้ยะ กางทะ เท่อ นอ บล้ะ ทาง-อ้ะ ลู่ง อ แน่บล้ะ ท๊อง, ลู่ง เฌเทิง ดี๊ เซง น๊าเซ๊ง ลี่ง เทิง, พี่ อ กล้ะไบ้ะ เว๊ ดี๊ ท๊อง โอ ลู่ง อ คาง จี้ อ คู ลี่ง เทิง นอ

³³ ตไก้ยะ กางทะ เท่อ นอ บล้ะ ทาง-อ้ะ ลู่ง อ แน่บล้ะ ล้อง, ฌ้อง แม้นี่ ไฮะ ทล่าง แม้ไน ทอืงล้าง นอ, เฌ๊ไท้ อางกี-อ้ะ ลู่ง อ พ้า แย๊ โค๊, ตไก้ยะ นอ ม อางน้างพ้ะ อ ซ้ะ คี๊ง แพ้ เมะเว๊, ทล่างฌี้ล่างแอว้, ดี๊ ทล่าง ฌี้ทึแอว้ทึ

³⁴ ไฮะ ทล่าง แม้ไน ทอืงล้าง อ คูกล้ะ แยว้ อ ทย๊างซ้ะ อ ล่าง นอ, เกม๊า น อางกีล้าง-อ้ะ ลู่ง ไฮะ อ คู, ลู่ง ทล่าง ฌี้ทึแอว้ทึ ล เช้า นอ

³⁵ กู ลู่ง กแช่แยว้ อ เมะแซพ้า อ คะ นอ เกม๊า น ช๊างล้าง-อ้ะ ลู่ง ตไก้ยะ กางทะ เท่อ นอ อ ล่างไค๊ ล โค๊, ดี๊ ช๊างล้าง มีโด้ง อ เทิง นอ ลู่ง เด้กแช่แยว้อล่างโอ อ ฆ้อง ละโค๊ แพ้, พี่ กแท้ โละอซ้ะ ดี๊ คะ ลู่ง ท้ะโค๊ แพ้ นอ

³⁶ “ดี๊ แม้ กดื้งทะ เท่อ ลู่ง เด้ อ เกล้ ป้ะตู๊ง นอ ดี๊ ตไก้ยะ ลูง เปย้า, ลูง ลึ้, ลูง โฌ้จีลี, ดี๊ ตไก้ยะ ลูง ไว้ะไก้ อ แย ฌี้ พี่ โพล้ง อ จูงซี ช้ะกีงนี่ เว๊ นอ

³⁷ ตไก้ยะ แม้ กดื้งทะ เท่อ ลู่ง เกล้ ป้ะตู๊ง ล้อง อ เฌเทิง, พี่ ม บล้ะ ทาง ตไก้ยะ นอ, แม้-อ้ะ ดี๊ เซง น๊าเซ๊ง เย่ เทิง, กล้ะไบ้ะ-อ้ะ ดี๊ ท๊อง, อ บล้ะ ลู่ง อ เทิง ล้อง นอ แม้-อ้ะ ดี๊ ท๊อง, ฌ้อง โล๊ล้าง อ เทิง อ คาง ดี๊ ท่องบ้าง เย่ เทิง