ทไจทางไฆวะ 25 - Northern Pwo Karen Thai Bible

ทเทว๊ ลู่ง เด้กแช่แยว้อล่างโอ อ ฌ่าง

¹ กแช่ยาเว ไคล้ ดี๊ โมเซ ไจ้ะเว๊

² “โล้ เอะ โพล้ง อีซลาเอง นอ เกม๊า อ เฌ๊ โชะ ทฆ้าทโฆ่ เทว๊ เอะ แย้, แม้นี่ เท่อ ดี๊ โพล้ง พี่ อ แบซ้ะ เทว๊ เว๊ ลแพ นอ กุ้ แฌ้

³ ทเทว๊ พี่ น ม แม้นี่ ดี๊ อ ซื๊งเว๊ ลแพ นอ เมะเว๊ ท๊อง, จี้, ท่องบ้าง

⁴ ลูง เปย้า, ลูง ลึ้, ลูง โฌ้จีลี, ตไก้ยะ ลูง ไว้ะไก้ อ แย ฌี้, ดี๊ แมะ อ ชอง

⁵ แกะ แพ๊ อ ไพ้ะ ย้อง โฌ้, ดี๊ ทไพ้ะ ลู่ง อ ฌี้ ดี๊ เซง น๊าเซ๊ง

⁶ ทซู อางกี บ้องล้าง มีโด้ง พ้า, ทน๊าม๊า พี่ อางกี แกย้ฆึ ดี๊ ทซูเท้าไนเท่อ, ดี๊ อางกี แกย้ฆึ ท พี่ อ น๊าม๊า ลู่ง อ น๊าม๊า มึ

⁷ โอนิ้ ดี๊ ทแมล่ อ แฌ้แพ พี่ บล้าล้าง ลู่ง ไช๊อเบงคูลท๊า อ ล้อง, ดี๊ ตไก้ยะกล้ะทะซ้ะแน๊ อ ล้อง นอ

⁸ ฌ้อง เกม๊า อ ซื๊งเว๊ ไต้ทางนี่ ทแบ้แยว้ล่างลู่งอฌี้ เทว๊ เอะ แย้, บี่ซุ้ จ ม โอ ลู่ง อ ซื๊งเว๊ อ แกล้

⁹ เกม๊า น ซื๊ง ไต้ทางนี่ เด้กแช่แยว้อล่างโอ, ดี๊ อ ทซู๊งทเจ่ นอ กุ้เม้ง บี่ซุ้ดี๊ จ ดึ้ เน เอะ แน้ นอ กุ้ อ เม้ง

ไฮะ ทล่าง แม้ไน ทอืงล้าง

¹⁰ “เกม๊า อ ซื๊งเว๊ ไต้นี่ ไฮะ ดี๊ เซง น๊าเซ๊ง ล ไฮะ, โท๊ คี๊ง แพล่ ดี๊ ล แท๊, เล่ ล แพล่ ล แท๊, ดี๊ โท๊ ชี๊เทิง ล โค๊ นอ ล แพล่ ล แท๊

¹¹ เกม๊า น กล้ะไบ้ะ ไฮะ นอ ดี๊ ท๊อง ลู่ง อ แย ฌี้ เลา ดี๊ อ โคล๊ง ดี๊ อ พ้า คี๊ง โค๊ เลา, ฌ้อง แม้ อ คูด้า ดี๊ ท๊อง วะชวะ ไฮะ นอ

¹² เกม๊า น โล๊ล้างนี่ ไฮะ อ แน่ ดี๊ ท๊อง, แม้ กโวง นี่-อ้ะ ลี่ง โวง, ท๊างทาง-อ้ะ ลู่ง ไฮะ อ โนง ล้อง นอ ลี่ง โนง เลา, อี้งโค๊แพ้ คี๊ง โวง, อู้งโค๊แพ้ คี๊ง โวง

¹³ เกม๊า ไต้นี่ มี่ก้าง ดี๊ เซง น๊าเซ๊ง, กล้ะไบ้ะ-อ้ะ ดี๊ ท๊อง

¹⁴ ฌ้อง ลองฆ้าง มี่ก้าง นอ ลู่ง ไฮะ อ แน่โวง พ้า, บี่ซุ้ อางกี โชะทาง ไฮะ นอ

¹⁵ มี่ก้าง นอ ลองฆ้าง ท๊าง-อ้ะ ไฮะ อ แน่โวง พ้า นอ คระ, ทึ้ทางไฆวะ-อ้ะ ล ฌี้

¹⁶ จลู่งจแท๊ พี่ ก ม เกม๊า เอะ แน้ นอ, เกม๊า น อางกี-อ้ะ ลู่ง ไฮะ พ้า นอ

¹⁷ ฌ้อง เกม๊า น แม้ทางนี่ แยว้ อ ทย๊างซ้ะ อ ล่าง ดี๊ ท๊อง ลู่ง อ แย ฌี้, แม้-อ้ะ โท๊ คี๊ง แพล่ ดี๊ ล แท๊, เล่ ล แพล่ ล แท๊

¹⁸ เกม๊า น ไต้ทางนี่ เครุ้ ท๊อง คี๊ง เบง, ไน๊-อ้ะ ดี๊ คีคู, ช๊างล้าง-อ้ะ ลู่ง ไฮะ อ คูกล้ะ แยว้ อ ทย๊างซ้ะ อ ล่าง ล้อง อ ฆ้อง นอ แพ้ เบงๆ

¹⁹ ไต้ทางนี่ เครุ้ อางกี-อ้ะ ลู่ง ไฮะ อ คูกล้ะ แยว้ อ ทย๊างซ้ะ อ ล่าง อ คูทุ้ ล้อง นอ แพ้ เบงๆ, ดี๊ เครุ้ นอ เกม๊า อ บึ้เบง โละอซ้ะ เก ล เบง ฆ่าง ดี๊ ไฮะ อ คูกล้ะ แยว้ อ ทย๊างซ้ะ อ ล่าง อ คูทุ้ นอ

²⁰ เกม๊า เครุ้ นอ ย้างแย่ ทาง อ ได้ะ, คลึไบ้ะล้าง ไฮะ อ คูกล้ะ แยว้ อ ทย๊างซ้ะ อ ล่าง, ดี๊ เกม๊า แคว่ ฆ้าง โละ อ เมะ, เครุ้ อ เมะ นอ ม๊า แคว่ ฆ้าง ลู่ง ไฮะ อ คูกล้ะ แยว้ อ ทย๊างซ้ะ อ ล่าง ล โค๊ นอ

²¹ ฌ้อง เกม๊า ช๊างล้าง ไฮะ อ คูกล้ะ แยว้ อ ทย๊างซ้ะ อ ล่าง นอ, ลู่ง ไฮะ อ คู, เกม๊า น อางกี จลู่งจแท๊ พี่ จ เกม๊า เอะ แน้ นอ, ลู่ง ไฮะ พ้า นอ

²² จ ม แด แน้ พี่ นอ, เมะเว๊ ลู่ง ไฮะ อ คูกล้ะ แยว้ อ ทย๊างซ้ะ อ ล่าง อ คูด้าง, ลู่ง เครุ้ อ เบ้าช้า พ้า, พี่ อ โอ ลู่ง ไฮะ ทล่าง แม้ไน ทอืงล้าง อ คู นอ, ดี๊ แย้ นอ จ ม โล้ เอะ แน้ กุ้ อ เม้ง, พี่ จ อางแบเลา แน้ เกม๊า น โล้ล้าง เอะ โพล้ง อีซลาเอง

คะ อางกีล้าง กู ลู่ง กแช่แยว้ อ เมะแซ พ้า

²³ “ฌ้อง เกม๊า น แม้นี่ เซง น๊าเซ๊ง, ไต้ทางนี่ คะ ล ช๊อง, โท๊ คี๊ง แพล่, เล่ ล แพล่, ดี๊ โท๊ ชี๊เทิง ล โค๊ นอ คี๊ง แท๊

²⁴ เกม๊า น กล้ะไบ้ะ คะ นอ ดี๊ ท๊อง ลู่ง อ แย ฌี้, ดี๊ แม้กีงแม้ไว้-อ้ะ วะชวะ คะ นอ ปะ

²⁵ คะ นอ แม้-อ้ะ โอ ดี๊ อ คูด้า วะชวะ, เล่ น๊าง จูง ย๊างซ้ะ ล โค๊, ฌ้อง แม้กีงแม้ไว้-อ้ะ ดี๊ ท๊อง, วะ อ คูด้า นอ

²⁶ ไต้ทางนี่ ทกโวง ดี๊ ท๊อง ลี่ง บ้อง, ท๊างทาง-อ้ะ ลู่ง คะ อ คาง อ โนง ท้ะโค๊ แพ้ นอ อ ล้อง ลี่ง โนง เลา

²⁷ ทกโวง นอ เกม๊า น แม้ บึ้เบง-อ้ะ เบ้า ดี๊ อ คูด้า, พี่ ม อางกี ลองฆ้าง มี่ก้าง นอ

²⁸ เกม๊า น ไต้ทางนี่ มี่ก้าง ดี๊ เซง น๊าเซ๊ง, กล้ะไบ้ะ-อ้ะ ดี๊ ท๊อง, เกม๊า ยุ้ คะ นอ ดี๊ เซง อ อี้ง ล้อ

²⁹ เกม๊า น ไต้ทางนี่ เจเล, โท๊กีง พู, เลา ดี๊ ที๊งลื้งเบ้า, ดี๊ อ้าง พี่ อางกี เจ่ ควี้งล้าง ทโอ้ ลื่งทาง เท่อ นอ, ทลแพ อี้ง นอ เกม๊า น แม้-อ้ะ ดี๊ ท๊อง ลู่ง อ แย ฌี้

³⁰ ดี๊ เกม๊า น อางกีล้าง กู กแช่แยว้ อ เมะแซ พ้า นอ ลู่ง คะ คู, ลู่ง จ เมะแย๊ ล้างชู้

มีโด้ง อ เทิง ท๊อง

³¹ “เกม๊า น ไน๊นี่ มีโด้ง อ เทิง ดี๊ ท๊อง ลู่ง อ แย ฌี้ ล ช๊อง, เจ่ คีคู ไน๊ มีโด้ง อ คางไท้ะ ดี๊ อ เทิง นอ ม๊า โอ ดี๊ อ โพ๊ เมะเว๊ แด อ โพ๊ คางไท้ะ ดี๊ อ โพ๊ อ อิ้ นอ ม๊า อ บึ้เบง โละซ้ะ ดี๊ อ เทิง

³² ม๊า มีโด้ง อ ได้ โอ ฆู๊ง ได้, ได้พ้ะทาง ดี๊ อ เทิง ล แพ้ ซ๊า ได้

³³ มี โด้ง ล ได้ๆ, พี่ อ ได้แท่ทาง อ เทิง ล้อง นอ, ม๊า โอ ดี๊ อ โพ๊ แบด้อง อางมอง โพ๊ ซ๊า พู๊ง, อ โพ๊ กุ้ อ พู๊ง นอ ม๊า โอ ดี๊ อ คางไท้ะ ดี๊ อ อิ้

³⁴ มีโด้ง อ มื่งเทิง คางไท้ะ นอ ม๊า อ โพ๊ โอ ลี่ง พู๊ง, แบด้อง อางมอง โพ๊, เลา ดี๊ อ คางไท้ะ ดี๊ อ อิ้ นอ ปะ

³⁵ ลู่ง อ ได้ เช๊ละ กุ้ อ กู่ง, พี่ แท่ทาง อ ซ้ะ ลู่ง อ เทิง ล้อง นอ, แบ โอ ดี๊ อ โพ๊ คางไท้ะ ล พู๊ง

³⁶ อ โพ๊ คางไท้ะ ดี๊ อ ได้ นอ ม๊า อ บึ้เบง โละซ้ะ ดี๊ อ มื่งเทิง เลาพะ, ม๊า กุ้ อ เม้ง นอ เก ล กึ้ ฆ่าง, แบ แม้-อ้ะ ดี๊ ท๊อง ลู่ง อ แย ฌี้ พี่ ไน๊-อ้ะ ดี๊ คีคู

³⁷ ดี๊ เกม๊า ไต้ทางนี่ มีโด้ง เนว๊ โพลง, ลู่ง มีโด้ง เทิง นอ อ ฌ่าง, ฌ้อง ช๊างล้าง-อ้ะ ลู่ง อ ได้ คี๊ง ทุ้ ล ได้ๆ, นอ อ ล้อง, เกม๊า อ พ้างล้าง ลู่ง อ เทิง นอ อ เมะแซ พ้า

³⁸ เกม๊า ไต้ทางนี่ ท้ะไร้ะ ไร้ะไฆวะ มีโด้ง อ ไฆวะ, ดี๊ ทล่าง อางกี ท้ะไร้ะ นอ, ไต้-อ้ะ ดี๊ ท๊อง ลู่ง อ แย ฌี้

³⁹ มีโด้ง อ เทิง ดี๊ อฆ้าอโฆ่ กุ้เม้ง นอ, แม้-อ้ะ ดี๊ ท๊อง ลู่ง อ แย ฌี้, ฆ๊า เมาะเว๊ ซ๊า ชี๊ง เย่ กีโล

⁴⁰ ปโล่ ล้าง ซ้ะ ไช้ะ, ทลแพ อี้ง นอ, น แบ แม้-อ้ะ บี่ซุ้ดี๊ จ ดึ้ เน เอะ แน้ ลู่ง ทลู่ง คู อู้ง กุ้ อ เม้ง ล้อ