เอซเทอ 1 - Northern Pwo Karen Thai Bible

กจุ้แฆว้ อาฮ้ะซูเอระ เท้าไฆวะ อ แม๊ น่าง วาที อ เม้ง, ล ม๊า เว๊ ทอดู ล้าแบ

¹ โอก้ะ ลู่ง ไค๊ ลู่ง กจุ้แฆว้ อาฮ้ะซูเอระ อ ชู้ แค๊ เมะเว๊ อาฮ้ะซูเอระ, พี่ อ ยู่แคว่ เว่งดูคล้องโท๊ ล แย้ คี๊งชี๊ง เนว๊ เว่ง, ท๊อง เต้ ลู่ง อีงเดีย ท้อง ลู่ง คุ้

² ล ว๊าง แย๊ นอ, พี่ กจุ้แฆว้ อาฮ้ะซูเอระ ชี๊น้าง ลู่ง อ ล่าง ชี๊น้าง คู, ลู่ง เว่ง ทล่างคุ้แคว่เท่อ ซูซา พ้า

³ ลู่ง ซ๊าเนง ล เนง พ้า, ลู่ง อาฮ้ะซูเอระ อ ชู้ แค๊ นอ, อ เว๊ ลื่งอางลื่งโอ้ อ ทอคูอแน่ ดี๊ อ กดูกแซย่ นอ เลาพะ, ซึ้พูมู๊ง ซึ้พูโป้ง อ คู ลู่ง ค่าง เปอแซย ดี๊ มีเดีย, เพล่ดูแม้เท่อบลางพ้า ดี๊ ทอดู พี่ ยู่แคว่ เว่งดูคล้องโท๊ ล จอง แบ ล จอง นอ, เฌ๊ฆ้าง โอ ลู่ง อ เมะแซ พ้า

⁴ พี่ อ เว๊ เนโพลทาง อคองอแซย้ แอฌี่งแอฌ้อง, เลา ดี๊ อ ทฆี๊งทแล้ พี่ อทางดูโท๊ทาง ตบลึ้ นี้ง, เมะเว๊ ท้อง ล แย้ โฆะชี๊ง นี้ง อ แค๊ นอ

⁵ ท่อง มื่งนี้ง ลแพ อี้ง เลาไฆวะ เย้า นอ, กจุ้แฆว้ เกล๊าง ทลื่งอางลื่งโอ้ เอะ โพล้งเฌงพูฆ๊างพู กุ้ แฌ้, เลา ดี๊ โพล้ง ดู โพล้ง ปี๊ พี่ โอ เว่ง ทล่างคุ้แคว่เท่อ ซูซา พ้า, เก อช๊าอโท่ เนว๊ นี้ง ลู่ง โซ๊ง แกล้ พ้า บลาง อ คว้าง พ้า

⁶ โอ ดี๊ ตไก้ยะ กางเทะ เท่อ, พี่ แม้ เว๊ ดี๊ ลูง เบ้ แอว้, ดี๊ อ เปย้า, จ้าเชิ่ง เว๊ ดี๊ เน่ ลึ้ซ๊า, พี่ บล้ะฆึ เว๊ ดี๊ จี้ ทกโวง ลู่ง เฌเทิง โล่งบาง คู, เลา ดี๊ ล่างมี๊ง นอ แม้ เว๊ ดี๊ ท๊อง ดี๊ จี้, ฌางคูคู นอ โล๊ล้าง บ้า บล้าล้าง โล่งโฌ้, โล่งบาง, ทแมล่ โฌ่งแอว้, ดี๊ โล่ง อ ซี่ง ตบลึ้ เม้ง

⁷ ทโอ้ นอ ควี้งล้าง เว๊ โท๊กีง ท๊อง ตบลึ้ มยู๊ พ้า, เนฆ้าง เกม๊า โพล้ง โอ้, ดี๊ บลาง อ ไซ้ะ ซไบ้ะ แซ ที๊ง นอ, โอ ล้างลื๊อ แอฌ้อง ต๊าง กจุ้แฆว้ อ ทซ้ะโพล๊ นอ ล้อ

⁸ ทโอ้ นอ แม้ เว๊ บี่ซุ้ดี๊ ทอางแบเลา, ล โอ ดี๊ ทแม้โอที่งโอโท๊ แบ, เมะเว๊ กจุ้แฆว้ โอ ดี๊ ทอางแบเลา, ลี้ ท้อง เพล่ดูแม้เท่อลู่ง บลางพ้า นอ กุ้ แฌ้ ไจ้ะเว๊, เกม๊า แม้ ท๊อง แบ ล แฌ้ๆ, อ ซ้ะ

⁹ เมะ กจุ้แฆว้ อ แม๊ น่าง วาที นอ, เกล๊าง ทลื่งอางลื่งโอ้ เอะ กมืง ลู่ง กจุ้แฆว้ อาฮ้ะซูเอระ อ บลาง พ้า ปะ

¹⁰ ลู่ง มื่ง เนว๊ นี้ง ล นี้ง พ้า, ท่อง กจุ้แฆว้ อ ซ้ะฆวี๊ง ดี๊ ไซ้ะ ซไบ้ะ แซ ที๊ง นอ, อ เว๊ อางแบเลา เมฮูมาง, บีซาทา, ฮางโบนา, บิ้ทา, อาบะทา, เซทา, ดี๊ คาระค้ะ, พี่ เก กแคว๊ได้ะดีง เนว๊ แฌ้, พี่ แม้ เอะ กจุ้แฆว้ อาฮ้ะซูเอระ อ เท่อ

¹¹ เกม๊า เว๊ อ ลี้ กุ้นี่ อ แม๊ น่าง วาที, คลึทาง คูคล้าง เฌ๊ฆ้าง โอ กจุ้แฆว้, บี่ซุ้ ม เกม๊า โพล้งเฌงพูฆ๊างพู ดี๊ ทอดูอแซย่ แด แบ เว๊ อเค่งอฌ้าง อเมะอแน๊, เมะเว๊ แด อ ฌี้ ดู มะ ล้อ

¹² แบเด้าะ น่าง วาที ซม๊า เว๊, ล เฌ๊ เว๊ บี่ซุ้ดี๊ กจุ้แฆว้ อ ทอางแบเลา, พี่ อ อางแบเลา กแคว๊ได้ะดีง นอ แบ, ท่อง ทแม้ อ ซ้ะ บี่อี้ง นอ, กจุ้แฆว้ ซ้ะทาง พ้ะดู, ดี๊ อ ทซ้ะทาง โอ อ ซ้ะพ้า คระ

¹³ ฌ้อง นอ กจุ้แฆว้ อางโล๊ไท้ กางแก้ โละซ้ะ, ดี๊ โพล้ง ซีงแฌ๊แน่ฌ๊า เท่อ ลแพ นอ พี่ ซีงแฌ๊ ทอางกีล้าง อเค้อะอต้าง (เมะเว๊ อ อี้ง เก กจุ้แฆว้ อ ทแม้ ลี้ง, ดี๊ กเย่ โพล้ง ซีงแฌ๊ ล้างที๊ง ทอางกีล้าง ดี๊ ทต้ะเซ๊ง อ ไฌ่

¹⁴ อ นอ, เมะเว๊ โพล้ง พี่ โอเบ้าโอเท่ง ดี๊-อ้ะ เมะเว๊ แด, คางเชนา, เชทา, อะมาทา, ทาราชิ้, เมเร้ะ, มางเซนา ดี๊ เมมูคาง, ทอดูอแซย่ เนว๊ แฌ้ ลู่ง เปอแซย ดี๊ มีเดีย, พี่ ลี้ฌูง กจุ้แฆว้ ซี ดี๊ อ เม้งดูแซดู ลู่ง บ้างมื่ง พ้า)

¹⁵ ไจ้ะเว๊, “ม แบ แม้ เอะ น่าง วาที บี่ซุ้ดี๊ ทอางกีล้าง นอ บี่จะเล้?, เมะเว๊ แด อ เว๊ ลือ กจุ้แฆว้ อาฮ้ะซูเอระ อ ทอางแบเลา, พี่ อางแบเลา โค เว๊ ดี๊ กแคว๊ได้ะดีง”

¹⁶ เมมูคาง โล้ เว๊ ลู่ง กจุ้แฆว้ อ เมะแซ พ้า, ดี๊ ทอดูอแซย่ ลแพ นอ อ เมะแซ พ้า ไจ้ะเว๊, “น่าง วาที แม้ไพ้ะ แบ เท่อ, ล เมะ ที่ แม้ ไพ้ะ แบ กจุ้แฆว้ ล แฌ้ เฆาะ แบ, แบเด้าะ แม้ไพ้ะ แบ ทอดูอแซย่ เลาพะ, ดี๊ แม้ไพ้ะ แบ โพล้งเฌงพูฆ๊างพู กุ้ แฌ้, พี่ โอ กจุ้แฆว้ อาฮ้ะซูเอระ อ เว่งดูคล้องโท๊ พ้า นอ เลาพะ ปะ

¹⁷ เมะเว๊ น่าง วาที อ ทแม้ นอ, กมืง กุ้ แฌ้ ม ซีงแฌ๊ เว๊, ม เกทาง ทดึ้เดว อ ซื๊งเว๊ อ แว้, ม ไคล้ เว๊ บี่อี้ง, ‘กจุ้แฆว้ อาฮ้ะซูเอระ อางแบเลา เกม๊า เฌ๊ฌ้า น่าง วาที, เฌ๊ฆ้าง โอ-อ้ะ ลู่ง อ เมะแซ พ้า, แบเด้าะ อ เว๊ ล เฌ๊ แบ’

¹⁸ ล นี้ง แย๊ อี้ง, กมืง พี่ เก ทอดูอแซย่ ลู่ง เปอแซย ดี๊ มีเดีย, พี่ แน่ฌ๊า น่าง วาที อ ทแม้ อ ไฌ่ นอ, ม อางโล๊ไท้ เอะ กจุ้แฆว้ อ ทอดูอแซย่ กุ้ แฌ้ คุ้ช๊องแน, ดี๊ ม เกทาง ทดึ้เดว ดี๊ ทซ้ะทาง แอฌ้อง

¹⁹ ทบี่นอ, เมะ เก ท พี่ แบ กจุ้แฆว้ อ ซ้ะ นอ, เกม๊า โอ ดี๊ ทอางแม้เลา เฌ๊นี่ ดี๊ กจุ้แฆว้, ดี๊ เกม๊า กวิ้ล้างไน ลู่ง โพล้ง เปอแซย, ดี๊ โพล้ง มีเดีย อ ทอางกีล้าง พ้า, ด้องซุ้ พี่ ม เท้าไฆวะไท้ ลซีแบ บี่อี้ง, น่าง วาที ม ลี้ฆ้าง โอ กจุ้แฆว้ ได้ะ ล ซี ล้า แบ, ดี๊ เกม๊า กจุ้แฆว้ เกล๊าง โพล้ง อ แฌ้แพ, พี่ ฌี้เละ น่าง วาที นอ, เกก้ะ ทอดู ล โค๊

²⁰ ทบี่นอ, ท่อง กจุ้แฆว้ โล้ล้าง ทอางแม้เลา เฆ้ง อมื่งอบ้าง, พี่ อ เล่ อ โท๊ พ้า นอ, กเย่ กมืง กุ้ แฌ้ นอ, แบ แม้ฆี๊งแม้แล้ อ แว้, ทึเมะ อ เว๊ อ ม ดู ฌี้ ซยาง ฌี้”

²¹ ทโล้ อี้ง นอ, เก เท่อ พี่ แบ กจุ้แฆว้ อ ซ้ะ, ดี๊ แบ ทอดูอแซย่ อ ซ้ะ, กจุ้แฆว้ แม้โพะ เมมูคาง อ ทโล้ อี้ง อ ไค๊ ล้อ

²² กจุ้แฆว้ โซ๊งทาง ไละ ลี้เฆ้ง อ เว่งดูคล้องโท๊ พ้า กุ้ จอง, ท้อง เว่งดูคล้องโท๊ ล จอง แบ ล จอง, ด้องซุ้ดี๊ เว่งดูคล้องโท๊ อ ไละเมะ นอ, ดี๊ ท้อง โพล้งเฌงพูฆ๊างพู กุ้ชื้อกุ้ชะ, บี่ซุ้ดี๊ อ กแช่ อ คว่าง แดเว๊, เกม๊า กแคว๊ กุ้ แฌ้ เก ทอดูอแซย่ ลู่ง อ เด้าคูล่างพ้า, ดี๊ ไคล้ ต๊าง อ กแช่ อชื้ออชะ อ คว่าง แดเว๊ นอ ล้อ