โล้​ล้างที๊ง​ทอางแม้เลา 18 - Northern Pwo Karen Thai Bible

โพล้งลื่งเท่ออคู, ดี๊ โพล้ง เลวี อฌ้องอเก

¹ “โพล้ง เลวี พี่ อ เก โพล้งลื่งเท่ออคู, ดี๊ เลวี อ ชื้อ เลาพะ นอ, ล นี่แบ อ ทอางน้าง แบ, ดี๊ ล นี่แบฆึ คองแซย้ ดี๊ โพล้ง อีซลาเอง แบ, อ ซื๊งเว๊ ม อาง กแช่ยาเว อ ทเทว๊ ดี๊ มี, ดี๊ ท พี่ อ ล้างเทะแบ เก กแช่แยว้ เว๊ นอ ล้อ

² อ ซื๊งเว๊ อคองอแซย้ ล โอ ลู่ง อ พื่ง อ วี่ อ ซุ้ อ แกล้ พ้า แบ, กแช่ยาเว ล้อ เก อ ซื๊งเว๊ อคองอแซย้, บี่ซุ้ดี๊ กแช่แยว้ เอิ้งล้าง เว้ เอะ-อ้ะ เย้า นอ ล้อ

³ ดี๊ อ อี้ง นอ, เมะเว๊ ท ล น้าง พี่ โพล้งลื่งเท่ออคู, นี่แบ เว๊ ดี๊ โพล้งเฌงพูฆ๊างพู, เมะเว๊ โพล้ง พี่ อ เทว๊ ทพูแฆ่ ลื่งทาง เท่อ, เมะ อ เก งู้ แพ๊ ฌี้, แกะ ฌี้ นอ, เกม๊า อ เว๊ แม้นี่ คาง เมะแย๊ ล โค๊ อ เช แย, อ บุ้แพ้ คี๊ง โค๊ อ แย, ดี๊ อ ฌู่โพ๊ง แย, เกล๊าง เอะ โพล้งลื่งเท่ออคู

⁴ น บืง, น ไซ้ะ ซไบ้ะแซ ที๊ง, น ทซู, ดี๊ แกะ ชอง อ ต้องคู, พี่ น นี่แบ -อ้ะ ดี๊ น แกะ นอ, เกม๊า น เกล๊าง เอะ โพล้งลื่งเท่ออคู

⁵ เมะเว๊ กแช่ยาเว น กแช่แยว้, อางลึนี่ อ ซื๊งเว๊ ลู่ง นชื้อนชะ พ้า, เกม๊า อ ชี๊เทิง แม้ เท่อ ลู่ง กแช่ยาเว อเม้งอแซ พ้า, เลา ดี๊ อ กแช่, ดี๊ อ พู อ ลี้ง ล้างชู้ล้างแกย นอ ล้อ

⁶ “โพล้ง เลวี แฌ้ ฌี้ๆ, เมะ เฌ๊นี่ ลู่ง ตางโบง จอง ฌี้ๆ, ลู่ง อีซลาเอง พ้า, พี่ เก อ ท ล่างโอล่างช๊อง นอ, ม แบซ้ะ เฌ๊ ลู่ง ทล่าง พี่ กแช่ยาเว ม อางลึนี่ เว๊ นอ, เลาเซิงเลาซ้ะ ล้อ

⁷ ฌ้อง อ เว๊ ม แม้ เท่อ ลู่ง อ กแช่แยว้ กแช่ยาเว อเม้งอแซ พ้า ซี, บี่ซุ้ดี๊ อ น๊างพื่งวี่ โพล้ง เลวี, พี่ อ ชี๊เทิง ลู่ง กแช่ยาเว อ เมะแซ พ้า, ลู่ง ทล่าง พี่ นอ ล้อ

⁸ เกม๊า อ ซื๊งเว๊ นี่แบ ท อางน้าง ล น้าง, พี่ ม อาง ฆวี๊ซุ้ๆ, ท พี่ อ นี่แบ เว๊ ลู่ง ท อางแช๊ ล้าง อ พี๊ง อ พู๊ง ลู่ง แย๊ อู้ง อคองอแซย้ นอ โอเจ ได้ะ

ท เทว๊ พู ลื่งทาง เท่อ, ท พ้ะเว้ เท่อ, ดี๊ ทเจ่ ทอูงทโป้ นอ, เก ท พี่ ล เกม๊า แม้ แบ

⁹ “พี่ น ซื๊ง ลี้ นึฆ้าง ลู่ง ที๊งล่างค่างพ้า, พี่ กแช่ยาเว น กแช่แยว้ เกล๊าง เอะ แน้ นอ, ไฌ่ ซีงแฌ๊ พี่ ม แม้ ท ล้าง แช๊เมะไฌ๊ซ้ะ, บี่ซุ้ ดี๊ โพล้ง อ ชื้อ ลแพ นอ ล ฌี้

¹⁰ เกม๊า โพล้ง ลู่ง นซุ้นแกล้, ญ่อง เกม๊า อ พูแคว๊ ฌี้, อ พูมืง ฌี้, ไจ มีอ้า พ้า ล ฌี้, เก โพล้ง พ้ะเว้ เท่อ ล ฌี้, เก ซระแคว่ เท่อ ล ฌี้ เก ซระ โล้ เว้ เท่อ ล ฌี้, ดี๊ เก ซระ เจ่ ทอูงทล่อง ล ฌี้

¹¹ เก ซระ โฌ๊ ไจ ทมื้งแฆ่ ล ฌี้, เก ตี้งน่าง ล ฌี้, เก ทมื้งแฆ่ อ คู ล ฌี้ ดี๊ เก ซระ อูงไต้ะ แม้ไต้ะ เท่อ ล ฌี้

¹² โพล้ง กุ้ อ แฌ้ พี่ อ แม้ เท่อ บี่อี้ง นอ, เก ท ล้าง ซ้ะลูซ้ะไล้ะ ลู่ง กแช่ยาเว อ ฌ่าง, ดี๊ ลู่ง ท ล้าง ซ้ะลูซ้ะไล้ะ ลแพ อี้ง อกย้องนอ, กแช่ยาเว น กแช่แยว้, โฌ๊ไจ อซื๊งเว๊ พ้องไฆวะ ดี๊ นเมะนแน๊ ล้อ

¹³ เกม๊า น เก โพล้ง ล โอ ดี๊ ท อางโกอางควิ้ แบ, ลู่ง กแช่ยาเว น กแช่แยว้ อ เมะแซ พ้า

¹⁴ เมะเว๊ โพล้ง อ ชื้อ ลแพ อี้ง, พี่ น ม ลี้ แม้นี่ก้ะ-อ้ะ นอ, ชู่ง ซระ แคว่มื่งแคว่แล้, ดี๊ โพล้ง พ้ะเว้ เท่อ, แบเด้าะ นี๊แด นอ, กแช่ยาเว น กแช่แยว้, ล ญ่อง เกม๊า น แม้ บี่นอ แบ

โมไคล้คิ้กแช่แยว้ อ ซ๊าง ล แฌ้, บี่ซุ้ดี๊ โมเซ

¹⁵ “กแช่ยาเว น กแช่แยว้, ม เกม๊า โมไคล้คิ้กแช่แยว้ ด้องซุ้ แย้ อี้ง, กึทางนี่ ดี๊ นพื่งนวี่, ลู่ง นซุ้นแกล้ พ้า, เกม๊า น ซื๊ง ชู่งลู่งเน้แท๊-อ้ะ

¹⁶ แม้โพะ ทกุ้เม้ง อ ไค๊, พี่ อ อางท่างนี่ เว๊ ดี๊ กแช่ยาเว น กแช่แยว้ ลู่ง โฮเร, ลู่ง มื่ง แพโซง พ้า ล นี้ง นอ, พี่ อ เว๊ ไจ้ะเว๊, ‘เกม๊า จ แน่ฌ๊า กแช่ยาเว จ กแช่แยว้ อ ลู่ง ล้า ล ฌี้, ดี๊ เกม๊า จ แด มี เค้ ทาง พ้ะดู อี้ง ล้า ล ฌี้ เฆาะ, ไค๊ไก้ะ จ ม ซี๊งไฆวะ ล้อ’

¹⁷ ดี๊ กแช่ยาเว ไคล้ ดี๊ แย้ ไจ้ะเว๊, ‘พี่ อ ซื๊งเว๊ ไคล้ บี่นอ ฌี้ ปะ ล้อ

¹⁸ จ ม เกม๊า โมไคล้คิ้กแช่แยว้ ด้องซุ้ แน้, กึทาง ลู่ง อ ซื๊งเว๊ อพื่งอวี่ อซุ้อแกล้ พ้า, ดี๊ จ ม ชวี๊งล้าง จ ทไคล้ ลู่ง อ นุ้ พ้า, ดี๊ อ เว๊ ม โล้ล้าง เอะ อซื๊งเว๊ ทกุ้เม้ง, พี่ จ อางแบเลา เว้-อ้ะ นอ

¹⁹ โพล้ง พี่ ล ชู่ง ล นะ จ ทไคล้, พี่ อ เว๊ โล้ล้าง เว๊ ลู่ง จเม้งจแซ พ้า แบ นอ, จ ม อางกีล้าง โพล้ง ล แฌ้ นอ อเตาอแต๊ ล้อ

²⁰ แบเด้าะ โมไคล้คิ้ เท่อ, พี่ อ โล้ ลู่แน่ ทไคล้ ดี๊ จเม้งจแซ, พี่ จ ล นี่ อางแบเลา-อ้ะ, เกม๊า อ โล้ล้าง-อ้า, โล้ล้าง เท่อ ลู่ง ท กโช้งกแช่ อ แฌ้แพ อเม้งอแซ พ้า-อ้า นอ, โมไคล้คิ้ เท่อ ล แฌ้ นอ, ม แบ โอ ดี๊ อเตาอแต๊ ท้อง อ ซี๊ง ล้อ’

²¹ ดี๊ น เมะ ช๊องมอง เท่อ ลู่ง ซ้ะ พ้า บี่อี้ง, ‘จ ม ซีงแฌ๊ ซี บี่จะเล้, เก ทไคล้ พี่ กแช่ยาเว ล นี่ ไคล้ เว๊ แบ?’

²² พี่ โมไคล้คิ้ เท่อ, โล้ล้าง ทไคล้ ลู่ง กแช่ยาเว อเม้งอแซ พ้า, เมะ ล เกทาง อ ซ้ะ บี่ซุ้ดี๊ ทไคล้ นอ แบ, ดี๊ ท ล เม้ง นอ, ล กึทาง แบ, ทไคล้ นอ, ล เก ท อลู่งอแท๊ พี่ กแช่ยาเว ไคล้ เว๊ แบ, โมไคล้คิ้ เท่อ ล แฌ้ นอ, โล้ ลู่แน่ เท่อ แด กแช่ เว๊ ล้อ, ยางแบ ซ้ะเม-อ้ะ ล ฌี้ เฆาะ