2​กจุ้แฆว้ 5 - Northern Pwo Karen Thai Bible

ทแม้ แบลไท้ นาอามาง อ ทแช๊ แบ คีงเตา

¹ นาอามาง เก กจุ้แฆว้ ค่าง ซีเรีย อ ซึ้พูมู๊งอคูดู, อ เว๊ เก โพล้ง ล้างเปิ่ง ดู ลู่ง กจุ้แฆว้ อ ฌ่าง, เก โพล้ง โอ ดี๊ ทฆี๊งทแล้, เมะเว๊ กแช่ยาเว เกม๊า โพล้ง ซีเรีย น้า เท่อ ดี๊ อ เว๊ อี้ง ล้อ, อ เว๊ เก โพล้งดึ้ซึ้เท่อพู ลู่ง อ ซ้ะ น้า ปะ, แบเด้าะ อ เว๊ แบ ทแช๊ คีงเตา

² โพล้ง ซีเรีย อ โพล้ง ดึ้ซรอง เท่อ โป้ง ไจทางไฆวะ, ดี๊ พองนี่ พืงแซ มืง ล แฌ้ ลู่ง ค่าง อีซลาเอง พ้า, ดี๊ อ เว๊ เฌ๊ เก นาอามาง อ แม๊ อ เพล่

³ อ เว๊ โล้ เอะ อ เซงคู มืง ไจ้ะเว๊, “เซงคู แคว๊ เมะ ลี้ โอ ดี๊ โมไคล้คิ้กแช่แยว้, พี่ อ โอ ลู่ง ซมาเรีย พ้า, ฌ้อง อ เว๊ ม แม้ แบล เซงคู อ ทแช๊ นอ ก้องแย่ ล้อ

⁴ นาอามาง ลี้ โล้ เอะ อ เซงคู กจุ้แฆว้, ไจ้ะเว๊ จ เพล่ มืง ลู่ง ค่าง อีซลาเอง โล้ เท่อ บี่นอ

⁵ กจุ้แฆว้ ค่าง ซีเรีย ไจ้ะเว๊, “ลี้ แดเทา, จ ม โซ๊ง ไละ เอะ กจุ้แฆว้ ค่าง อีซลาเอง เกม๊า อ ซีงแฌ๊” ฌ้อง นาอามาง ลี้ เว๊, ลี้ โชะ จี้ อ ตะลาง ล ชี๊ง ท๊อง ฆู๊ง ม๊า เชเค่ง ดี๊ ไช๊แค่ ล้างช๊าง นอ อ โจ้ง ล ชี๊ง ปะ

⁶ ดี๊ อ เว๊ ลี้ โชะ ไละ เอะ กจุ้แฆว้ ค่าง อีซลาเอง, ไละ นอ กวิ้ เว๊ บี่อี้ง, “พี่ ไละ อี้ง เฌ๊ ท้อง แน้ นอ, เกม๊า น ซีงแฌ๊-อ้ะ, แย้ จ โซ๊ง จ กดูกแซย่ เมะเว๊ นาอามาง เฌ๊ฌูง แน้, บี่ซุ้ เกม๊า น แม้ แบล-อ้ะ, ก้องเเย่ไฆวะ ดี๊ อ ทแช๊ แบ คีงเตา”

⁷ ท่อง กจุ้แฆว้ ค่าง อีซลาเอง พ้ะ ไละ ฌ้อง เย้า นอ, อ เว๊ ซย๊างยะ อ ไช๊แค่ ไจ้ะเว๊, “จ เก กแช่แยว้ พี่ ม เกม๊า ซี๊ง ดี๊ เกม๊า โอม๊า โบ่?, กแคว๊ ล แฌ้ อี้ง โซ๊ง เอะ จ ไละ, เกม๊า จ แม้ แบล โพล้ง แบ ทแช๊ คีงเตา ล แฌ้, ช๊องมองดุ้แฆว่, อ เว๊ อางฆื๊งนี่ ทติ้โละไอโละ ซ้ะ ดี๊ แย้ บี่จะเล้”

⁸ แบเด้าะ ท่อง เอลีชา โพล้ง กแช่แยว้ เว๊, แน่ฌ๊า กจุ้แฆว้ ค่าง อีซลาเอง ซย๊างยะ อ ไช๊แค่ นอ, อ เว๊ เจ่โพล้ง ลี้ โล้ เอะ กจุ้แฆว้ ไจ้ะเว๊, “กแช่-เอ้อ, แม้ ทเล้?, น ซย๊างยะ น ไช๊แค่, เกม๊า อ เว๊ นอ เฌ๊ฌูง แย้ แดเทา, ฌ้อง อ เว๊ ม ซีงแฌ๊ เว๊, โมไคล้คิ้กแช่แยว้ โอ ล แฌ้, ลู่ง ค่าง อีซลาเอง พ้า”

⁹ นาอามาง เฌ๊ ดี๊ กเย่ อ กซี ดี๊ อ เลาะ ดึ้ซึ้ เท่อ, เฌ๊ โอโท๊ ลู่ง เอลีชา อ เด้า อ เกล้ ป้ะตู๊งไท้ะ

¹⁰ เอลีชา เกม๊า อ โพล้งไคล้เดิงเท่อ, เฌ๊ โล้ เอะ-อ้ะ ไจ้ะเว๊, “เกม๊า ลี้ อางซฌ้ะ เช๊งล้าง น ล้อง ลู่ง ที๊ง โจเด้ง กล้อง พ้า นอ เนว๊ พ๊า, ดี๊ น ไพ้ะ น แย ม โอไท้ บี่ อ ล่าง, ดี๊ น ม เช๊ง ม เกล้ง เว๊ ล้อ”

¹¹ แบเด้าะ นาอามาง อ ซ้ะทาง ดี๊ ลี้ไฆวะ ไวะ, เอ้งไฌ้ เท่อ ไจ้ะเว๊, “แคว่เซ้อ, จ ช๊องมอง อ เว๊ ม ไจทางฌูง แย้ เต้ๆ, ดี๊ เฌ๊ ชี๊เทิง, ดี๊ เฆว้งทาง กแช่ยาเว อ กแช่แยว้ นอ อ เม้ง, ฌ้อง เยาทาง แว่ อ จูง พี่ นอ เกม๊า ทแช๊ แบ คีงเตา ล้างแม่ไฆวะ

¹² ที๊ง กล้อง อาบานา ดี๊ ฟาปา ลู่ง เว่ง ดามากา, ล ฌี้เละ กเย่ ที๊ง กล้อง ลู่ง ค่าง อีซลาเอง ลแพ อี้ง แบ-อ้า?, จ ม อางซฌ้ะ ล้าง จ ล้อง ลู่ง ที๊ง กล้อง พ้า ลแพ นอ, ดี๊ ม เช๊ง ม เกล้ง ล ซี แบ-อ้า?”, อ เว๊ วีงไท้ อ ซ้ะ ไท้ ดี๊ ทซ้ะทาง พ้ะดู ไวะ

¹³ แบเด้าะ อ กดูกแซย่ ลแพ นอ, เฌ๊ฆ้าง เบ้า ดี๊-อ้ะ, ดี๊ โล้ เอะ-อ้ะ ไจ้ะเว๊, “จ แพ่-เอ้อ, โมไคล้คิ้กแช่แยว้ เมะ อางแบเลา แน้ เกม๊า น แม้ เท่อ ลู่ง อ ดู ล เม้ง นอ, น ม ล แม้แบ-อ้า?, เมะ บี่นอ, พี่ โมไคล้คิ้กแช่แยว้ โล้ เอะ แน้ ไจ้ะเว๊, ‘ลี้ อางซฌ้ะ-อ้ะ, ดี๊ เช๊ง เกล้ง-อ้ะ แดเทา’, เกิ้ง น ม แม้-อ้ะ ฌี้ เด้าะ”

¹⁴ อ เว๊ ลี้ จูงล้าง อ ซ้ะ ลู่ง ที๊ง โจเด้ง อ กล้อง พ้า เนว๊ พ๊า, บี่ซุ้ ดี๊ โพล้ง กแช่แยว้ เว๊ โล้ เอะ-อ้ะ นอ, ดี๊ อ ไพ้ะ อ แย โอไท้ บี่ซุ้ ดี๊ พืงแซ พูปี๊ อ ไพ้ะ อ แย, ดี๊ อ เว๊ เช๊ง เกล้ง เว๊ แด ล้อ

¹⁵ ฌ้อง อ เว๊ เลา ดี๊ อ ซกุ้ นอ, เฌ๊ฌูงไท้ โพล้ง กแช่แยว้ เว๊, ดี๊ อ เว๊ เฌ๊ ชี๊เทิง ลู่ง เอลีชา อ เมะแซ พ้า, ดี๊ ไจ้ะเว๊, “แคว่เซ้อ, จ ซีงแฌ๊ เย้า กแช่แยว้ ล โอ น่าง แฌ้ แบ, ลู่ง ฌางคูโคล๊งคู จอง ฌี้ๆ, โอ ที่ โพล้ง อีซลาเอง พ้า ล้อ, ทบี่นอ, ค๊องเนงอี้ง, เกม๊า น ฮะนี่ น เพล่ อ ทเกล๊าง อี้ง ไช้ะ”

¹⁶ แบเด้าะ เอลีชา ไคล้ช๊า-อ้ะ ไจ้ะเว๊, “กแช่ยาเว พี่ จ แม้ เอะ อ เท่อ โอม๊า ได้ะ บี่จะเล้ นอ, จ ลฮะนี่ ทน่าง เม้ง แบ เฆาะ บี่นอ ล้อ”, ดี๊ อ เว๊ อางท่างไฌะเฌา เกม๊า เอลีชา ฮะนี่ เว๊, แบเด้าะ เอลีชา ซม๊า เว๊ นอ ล้อ

¹⁷ ฌ้อง นอ นาอามาง ไจ้ะเว๊, “น เมะ ล ฮะนี่ แบ นอ, อวีงซ้ะชู้ เกล๊าง เอะ น เพล่ อ ฌางคู, เมาะ บลิ้ ต้าง แลว้ คี๊ง ดื้ง ไช้ะ, เมะเว๊ ท๊อง อี้ง ชู่งแย๊ นอ, ทลื่งทาง เช้า ทพูแฆ่ น๊างดื้ง ฌี้, ทพูแฆ่ ลื่งทาง เท่อ ฌี้, น เพล่ ล เทว๊ เอะ ทกโช้งกแช่ อ แฌ้แพ ล้าแบ, แบเด้าะ ม เทว๊ เอะ กแช่ยาเว, น กแช่แยว้ นอ ล แฌ้ ล้อ

¹⁸ ท ล ไฌ่ อี้ง นอ, เกม๊าเต้ กแช่ยาเว ทื๊งนี่นะนี่ น เพล่ ล ฌี้ ไช้ะ, เมะเว๊ พี่ จ เซงคู กจุ้แฆว้ ลี้ ลู่ง ทกโช้งกแช่ รีงโมง อ ล่างโอ พ้า, บี่ซุ้ ม โบงทางแบ้ทาง เท่อ พี่ นอ, ดี๊ ดุ้ไน้ อ ซ้ะ จ จูง ล้อง, ดี๊ จ ซย๊องล้าง จ ซ้ะ แบ แบ้ทาง เท่อ, ลู่ง ทกโช้งกแช่ รีงโมง อ ล่างโอ พ้า นอ, เกม๊าเต้ กแช่ยาเว ทื๊งนี่นะนี่ น เพล่ ลู่ง ท ล เม้ง อี้ง อ กย้อง ล ฌี้ ไช้ะ”

¹⁹ เอลีชา ไคล้ช๊า-อ้ะ ไจ้ะเว๊, “ม๊า น ไท้ ดี๊ ทมึทพ้า แดเทา” แบเด้าะ พี่ นาอามาง ไท้ ล เอะ ไย้ ได้ะ แบ นอ

เกฮะซี อ ทซ้ะกวี้งล๊องก้อง

²⁰ เอลีชา โพล้ง กแช่แยว้ เว๊ อ เพล่ เกฮะซีช๊องมอง เว๊, “แคว่เซ้อ, จ เซงคู ล ญ่อง ฮะนี่ นาอามาง โพล้ง ซีเรีย อ ทเกล๊าง, พี่ อ เฌ๊ โชะ เว๊ นอ แบ, กแช่ยาเว โอม๊า ได้ะ บี่จะเล้ นอ, จ ม ลี้ ซยู๊ ช่อง-อ้ะ แม้นี่ อ เท่อ ล น้าง”

²¹ เกฮะซี ลี้ช่อง นาอามาง, ดี๊ ท่อง นาอามาง แด เว๊ โพล้ง เฌ๊ ซยู๊ ช่อง-อ้ะ นอ, อ เว๊ ไจล้างไฆวะ เลาะ ดึ้ซึ้ คู ตองช๊า เว๊, ไคล้ เว๊ ดี๊-อ้ะ ไจ้ะเว๊, “ทแบ ทฌี้ กุ้เม้ง ล้อ, เมะ-อ้า?”

²² อ เท่อ ไคล้ช๊า-อ้ะ ไจ้ะเว๊, “ทแบ ทฌี้ กุ้เม้ง ล้อ, ลู่ง จ เซงคู เจ่ทาง แย้ เกม๊า จ เฌ๊ โล้ เว๊, ‘กแคว๊ น่างบางซ้ะบาง คี๊ง แฌ้ ลู่ง โมไคล้คิ้กแช่แยว้ อ แกล้, โอนี่ ลู่ง ทลู่ง เอฟาอีง เฌ๊ฌูง เฆ้อ, อวีงซ้ะชู้ เกล๊าง เอะ อ ซื๊งเว๊ อ จี้ เมาะ ล ตะลาง ไช้ะ, ดี๊ ไช๊แค่ ล้างช๊าง เมาะ เว๊ คี๊ง โจ้ง’, ”

²³ ดี๊ นาอามาง ไจ้ะเว๊, “ฮะนี่-อ้ะ คี๊ง ตะลาง ไช้ะ”, อ เว๊ อางโก้ไละ เกฮะซี, ดี๊ แม้นี่ จี้ คี๊ง ตะลาง ชวี๊งล้าง เว๊ เต่ กเซ้าะ คี๊ง บ้อง อ พ้า ก้ะทะ เว๊, ดี๊ เกม๊า ไช๊แค่ ล้างช๊าง คี๊ง เบง, เกม๊า อ เพล่ คี๊ง แฌ้ ลี้ ยุ้ เว๊, อ เท่อ ยุ้ทาง เว๊ เฌ๊ วี่ง เกฮะซี

²⁴ ท่อง อ ซื๊ง เฌ๊ ท้อง ทลู่ง นอ, เกฮะซี ฮะนี่ เท่อ ลู่ง อ ซื๊ง เว๊ นอ อ จูง พ้า, ไท้ อางกี เว๊ ลู่ง เด้า พ้า, ดี๊ เกม๊า โพล้ง คี๊ง แฌ้ นอ ไท้, อ เว๊ คี๊ง แฌ้ นอ ไท้ ไวะ

²⁵ เกฮะซี ลี้ฆ้าง ชี๊เทิง ลู่ง อ เซงคู อ เมะแซ พ้า, ดี๊ เอลีชา อางจ้ะ-อ้ะ ไจ้ะเว๊, “เกฮะซี, น ลี้ โค๊ เล้?, เฌ๊ไท้”, อ เท่อ ไคล้ช๊า-อ้ะ ไจ้ะเว๊, “น เพล่ ล ลี้ น่าง จอง แบ”

²⁶ แบเด้าะ เอลีชา โล้ เอะ-อ้ะ ไจ้ะเว๊, “พี่ กแคว๊ ล แฌ้ นอ, วีง ไท้ อ ซ้ะ อ เลาะ ดึ้ซึ้ คู ตองช๊า แน้ นอ, จ เซิง จ ซ้ะ ล ลี้ ดี๊ แน้ แบ โบ่?, อ อี้ง นอ, เก ทอช๊าอโท่ พี่ อ เกิ้ง น ม ฮะนี่ จี้, ไช๊แค่, ไพ โซ๊ง, ซไบ้ะ โซ๊ง, แกะ, ดี๊ งู้, ดี๊ เพล่ มืง เพล่ แคว๊ โบ่?

²⁷ เป๊งนี่ อ นอ, นาอามาง อ ทแช๊ แบ คีงเตา นอ ม ไต้ะ ก้ะ แน้, ดี๊ น ชื้อ น ชะ ล้างชู้ ล้างแกย”, อ เว๊ ไจทางไฆวะ เอลีชา อ เมะแซ พ้า, ดี๊ แบ ทแช๊ คีงเตา แอว้ ด้องซุ้ แน๊วะ นอ ล้อ