Biblia Todo Logo
Bìoball air-loidhne

- Sanasan -

2​กจุ้แฆว้ 24 - Northern Pwo Karen Thai Bible


โพล้ง ยูดา อดีงอแด้ ชางล้าง-อ้ะ

1 ลู่ง เยโฮยาคีง อ ชู้ แค๊ อู้ง นอ, เนบูคาเนซา กจุ้แฆว้ ค่าง บาบีโลง เฌ๊ทาง ดึ้ เท่อดี๊ เยโฮยาคีง นอ เก อ เว๊ อ กดูกแซย่ ซ๊า เนง, ฌ้อง นอ กไบล้ะ ไท้ เว๊ ดี๊-อ้ะ

2 ดี๊ กแช่ยาเว เจ่ โพล้ง เคลเดีย, โพล้ง ซีเรีย, โพล้ง โมอา ดี๊ โพล้ง อางโมง เฌ๊ ดึ้ซรอง เยโฮยาคีง, ดี๊ เจ่ อ ซื๊งเว๊ซีง ลี้ ดึ้ซึ้ ยูดา บี่ซุ้ ม แม้เฌ๊ฌ้องไฆวะ เว๊, แบด้องซุ้ กแช่ยาเว อลู่งอแท๊ พี่ อ ไคล้ เว๊, เฌ๊ ดี๊ กเย่ อ เพล่ โม ไคล้คิ้-อ้ะ ลแพ นอ

3 เต้ๆ, นอ, พี่ ทแม้ อ ซ้ะ บี่อี้ง นอ กึทาง ดี๊ ยูดา, แบด้องซุ้ กแช่ยาเว อางแบเลา เว๊ นอ, บี่ซุ้ ม แม้นี่ อ ซื๊งเว๊ ไจทาง ท่อง พ้องไฆวะ ดี๊ อ เมะ, เป๊งนี่ กเย่ มานาเซ อ ทเด้บ้ะ อ กย้อง, บี่ซุ้ดี๊ ทกุ้เม้ง พี่ อ นี่ แม้ เว๊

4 ดี๊ เป๊งนี่ ลู่ง อ เว๊ แม้ล้าง ทซวีง, พี่ อ ทไพ้ะทแม ล โอ แบ นอ อ กย้อง ปะ, เมะเว๊ อ เว๊ ดึ้ เกม๊า เว่ง เยรูซเลง พ้า นอ, โอ ฆวี้ทะ ดี๊ ทซวีง พี่ อ ทไพ้ะทแม ล โอ แบ, ดี๊ กแช่ยาเว ล แพล่ไฆวะ เว๊ แบ

5 เยโฮยาคีง อ ทไพ้ะทแม อ แฌ้แพ, ดี๊ ทกุ้เม้ง พี่ อ แม้ เว๊ นอ, แบ ทกวิ้ล้าง-อ้ะ, ลู่ง ไละ กวิ้ไน กจุ้แฆว้ ยูดา อ ไฌ่ ล ปะ นอ อ พ้า, ล เมะ แบ-อ้า?

6 เยโฮยาคีง ซี๊ง ไท้ โอ ดี๊ อ พี๊ง อ พู๊ง ลู่ง แย๊, ฌ้อง อ พูแคว๊ เยโฮยาคี ทาง โพะคอง เท่อ เท่งก้ะ อ ล่าง

7 ดี๊ กจุ้แฆว้ ลู่ง ค่าง อีไย้ะ พ้า, ล ไจทาง ลู่ง อ ที๊งล่างค่างพ้า เฌ๊ ดึ้-อ้ะ ล้าแบ, เมะเว๊ กจุ้แฆว้ ค่าง บาบีโลง แม้นี่ก้ะ ทล่าง นอ เลาพะ, พี่ อ เก กจุ้แฆว้ ค่าง อีไย้ะ อเท่อ, ล โค๊ ลู่ง โพล้ง อีไย้ะ อ ที๊ง กล้อง ลี้ ท้อง ลู่ง ที๊ง ยูเฟตี กล้อง


เยโฮยาคี ยู่แคว่ เท่อ, ดี๊ แบ ทพองนี่-อ้ะ, ลี้ เก ทอฆ่อง ลู่ง บาบีโลง พ้า
( 2ทกน.36:9-10 )

8 พี่ เยโฮยาคี เก กจุ้แฆว้ นอ, อ โญะ โอ ชี๊ง โฆะ เนง, ดี๊ อ เว๊ โพะคอง เท่อ ลู่ง เว่ง เยรูซเลง พ้า ชิ้ทาง ซ๊า แล้, อ มู่ นอ อ เม้ง เนฮูทา, เก เองนาทาง โพล้ง เยรูซเลง อ พูมืง

9 ดี๊ เยโฮยาคีง แม้ ทอ้าทซ๊าง ลู่ง กแช่ยาเว อ เมะแซ พ้า, บี่ซุ้ ดี๊ อ พี๊ง อ พู๊ง ลู่ง แย๊ แม้ เว๊ นอ ล้อ

10 ล ว๊าง แย๊ นอ, เนบูคาเนซา กจุ้แฆว้ ค่าง บาบีโลง อ กดูกแซย่, เฌ๊ทาง ลู่ง เว่ง เยรูซเลง พ้า ดี๊ พ้องวะทะ เว๊

11 ฌ้อง เนบูคาเนซา กจุ้แฆว้ ค่าง บาบีโลง เฌ๊ ลู่ง เว่ง พ้า นอ, พี่ ล โท้ แย๊ อ กดูกแซย่ พ้องวะทะ เว่ง อ แค๊ นอ

12 ดี๊ เยโฮยาคี กจุ้แฆว้ ค่าง ยูดา, อางกีล้าง อ ซ้ะ ลู่ง กจุ้แฆว้ ค่าง บาบีโลง อ จูง พ้า, เลา ดี๊ อ กแช่ ดี๊ อ มู่, อ กดูกแซย่, อ ซึ้คู, ดี๊ อ เพล่ดูแม้เท่อลู่งบลางพ้า นอ, ฌ้อง กจุ้แฆว้ ค่าง บาบีโลง, พองนี่-อ้ะ เก ทอฆ่อง ลู่ง โฆะ เนง ล เนง พ้า, ลู่ง อ เว๊ อ ชู้ แค๊ นอ ล้อ


ทแม้นี่ก้ะ เว่ง เยรูซเลง

13 ดี๊ กจุ้แฆว้ ค่าง บาบีโลง โชะนี่ก้ะ คองแซย้ ลู่ง กแช่ยาเวอล่างโอ พ้า, ดี๊ ทฆ้าทโฆ่ ลู่ง บลาง พ้า, ดี๊ แม้เทะนี่ ทซู๊งทเจ่ พี่ อ เก ท๊อง, พี่ ซาโลโม กจุ้แฆว้ ค่าง อีซลาเอง ไต้ทาง เว๊, ลู่ง กแช่ยาเวอเว่งฮ๊าง พ้า นอ, ทแม้ อ ซ้ะ บี่ซุ้ดี๊ กแช่ยาเว ไคล้ เว้ เว๊ เย้า นอ ล้อ

14 ดี๊ อ เว๊ พองนี่ โพล้ง เยรูซเลง เลาพะ, เลา ดี๊ ทอดูอแซย่ กุ้ แฌ้, ดี๊ โพล้งดึ้ซึ้เท่อพู ลู่ง อ ซ้ะน้า กุ้ แฌ้ ลี้ เก ทอฆ่อง อ แฌ้ ล ไซ, อ นอ โอฆึ ดี๊ ซแล้ อ จูงซีเมะโชะ ดี๊ ซแล้ แม้ เท่อ แบฆ้ะ ดี๊ ท้ะ กุ้ แฌ้, โพล้ง ล โอ ล้างลื๊อ น่าง แฌ้ ล้าแบ, โอก้ะ ที่ โพล้งเฌงพูฆ๊างพู ลู่ง ที๊งล่างค่างพ้า, พี่ อ ซยาง อ น้ะ ทึ ลแพ นอ ล้อ

15 ดี๊ อ เว๊ ไท้ฌ้า เยโฮยาคี ลู่ง บาบีโลง เลา ดี๊ อ มู่, อ แม๊ ดี๊ อ เพล่ดูแม้เท่อลู่งบลางพ้า, ดี๊ โพล้ง พี่ เก ทอคูอแน่ ลู่ง ที๊งล่างค่างพ้า, อ เว๊ พองนี่ เว๊ ลู่ง เว่ง เยรูซเลง พ้า, ลี้ เก ทอฆ่อง ท้อง ลู่ง บาบีโลง พ้า

16 ดี๊ กจุ้แฆว้ ลู่ง ค่าง บาบีโลง พ้า นอ, เฌ๊ฌ้า ทอฆ่อง นอ ลู่ง บาบีโลง พ้า, อ นอ เมะเว๊ ซึ้พู เลาพะ นอ เนว๊ ม๊า แฌ้, ซแล้ อ จูงซีเมะโชะ ดี๊ ซแล้ แม้ เท่อ แบฆ้ะ ดี๊ ท้ะ นอ โอ อ แฌ้ ล ม๊า, โพล้ง กุ้ อ แฌ้ นอ อ ไฌ่ชองแบ้ชอง เกิ้ง ดี๊ อ ดึ้ซึ้ เท่อ

17 ดี๊ กจุ้แฆว้ ค่าง บาบีโลง นอ, ต๊างทางนี่ เยโฮยาคี อ ม้าง, เมะเว๊ ม้ะทานียา เก กจุ้แฆว้ เท่งก้ะ-อ้ะ, ดี๊ เปลง เว๊ อ เม้ง อ ซ๊าง เมะเว๊ เซเดคียา


เซเดคียา โพะคอง ค่าง ยูดา
(2ทกน.36:11-14; ยรม.52:1-3)

18 พี่ เซเดคียา เก กจุ้แฆว้ นอ อ โญะ โอ คี๊ง ชี๊ง ล เนง, ดี๊ อ เว๊ โพะคอง เท่อ ลู่ง เยรูซเลง พ้า ชี๊ง ล เนง, อ มู่ นอ อ เม้ง ฮามูทาง, เก เยเรมี โพล้ง ลิ้นา อ พูมืง

19 เซเดคียา แม้ ทอ้าทซ๊าง ลู่ง กแช่ยาเว อ เมะแซ พ้า, บี่ซุ้ ดี๊ เยโฮยาคีง แม้ เว๊ นอ กุ้ อ เม้ง ล้อ

20 เมะเว๊ กแช่ยาเว อ ซ้ะทาง ดี๊ โพล้ง เยรูซเลง ดี๊ โพล้ง ยูดา, อ เว๊ ไควะไฆวะ เว่ง คี๊ง จอง อี้ง, พ้องไฆวะ ดี๊ อ เมะ นอ ล้อ เซเดคียา กไบล้ะ ดี๊ กจุ้แฆว้ ค่าง บาบีโลง

Pwo Karen Bible (Thailand) © Thailand Bible Society, 2016.

Thailand Bible Society
Lean sinn:



Sanasan