2กจุ้แฆว้ 22 - Northern Pwo Karen Thai Bibleโยซียา โพะคอง ค่าง ยูดา ( 2ทกน.34:1-2 ) 1 พี่ โยซียา เก กจุ้แฆว้ นอ อ โญะ โอ โฆะ เนง, ดี๊ อ เว๊ โพะคอง เท่อ ลู่ง เว่ง เยรูซเลง พ้า ซ๊า ชี๊ง ล เนง, อ มู่ นอ อ เม้ง เยดีดา, เก อาดายา โพล้ง โบซาคา อ พูมืง 2 อ เว๊ แม้ ทอฌี้ อ แบ ลู่ง กแช่ยาเว อ เมะแซ พ้า, ดี๊ ลี้ โพะ อ พู๊ง ดาเว อ เกล้, อ เว๊ ล วีงแซยไฆวะ อ ซ้ะ ลู่ง อ ฆุ้ ล โค๊-อ้า, อ จี ล โค๊-อ้า?, แบ เฮงคียา แด ไละ ทอางแม้เลา 3 โอก้ะ ลู่ง ไค๊, ลู่ง ชี๊ง โฆะ เนง ล เนง พ้า, ลู่ง กจุ้แฆว้ โยซียา อ ชู้ แค๊ นอ, กจุ้แฆว้ เจ่ทาง ชาฟาง อาซาลียา อ พู, พี่ เก เมชูลาง อ พู, ทอดูกวิ้ไนเท่อ นอ, เกม๊า เว๊ อ ลี้ ลู่ง กแช่ยาเวอล่างโอ พ้า, ไจ้ะเว๊ บี่อี้ง 4 “เกม๊า น ลี้ทาง ฌูง โพล้งลื่งเท่ออคูดูทึ เฮงคียา, บี่ซุ้ เกม๊า อ เว๊ ดว้ะ จี้, พี่ อ เฌ๊ฆ้าง โชะ เว๊ ลู่ง กแช่ยาเวอล่างโอ พ้า, พี่ โพล้งแคว่ทะป้ะตู๊งอเคิง กิ้นี่ เว๊ ดี๊ โพล้งเฌงพูฆ๊างพู นอ 5 ดี๊ เกม๊า อ อางกีล้าง เว๊ ลู่ง โพล้ง แม้ เท่อ, พี่ อ ยู่แคว่ กแช่ยาเวอล่างโอ พ้า นอ อ จูง พ้า, ดี๊ เกม๊า อ เจ่ เอะ โพล้ง แม้ เท่อ, พี่ อ โอ ลู่ง กแช่ยาเวอล่างโอ พ้า, บี่ซุ้ แม้ฌี้ไท้ กแช่แยว้อล่างโอ พ้า นอ 6 เมะเว๊ เกล๊าง เอะ ซแล้ แม้ เซง, ซแล้ ไต้ ทาง เท่อ, ดี๊ ซแล้ โก๊ทาง เท่อ, เลา ดี๊ ฆวี้ เซง ดี๊ โล่ง แพล้นี่ นอ อ ฌ่าง, บี่ซุ้ ม แม้ฌี้ไท้ กแช่แยว้อล่างโอ นอ 7 แบเด้าะ ล แบ อางท่างนี่ ไละ กวิ้ไน เท่อ ดี๊-อ้ะ, แบฆ้ะ ดี๊ จี้ พี่ เกม๊า อ โชะ นอ แบ, เมะเว๊ อ เว๊ แม้ เท่อ ดี๊ ทโต้ทล้อง ล้อ” 8 ดี๊ เฮงคียา โพล้งลื่งเท่ออคูดูทึ ไคล้ ดี๊ ชาฟาง ทอดูกวิ้ไนเท่อ นอ ไจ้ะเว๊, “จ แด ไละ ทอางแม้เลา ลู่ง กแช่ยาเวอล่างโอ พ้า”, ฌ้อง เฮงคียา แม้นี่ไละ นอ เกล๊าง เอะ ชาฟาง, ดี๊ อ เว๊ พ้ะ เว๊ แด ล้อ 9 ชาฟาง ทอดูกวิ้ไนเท่อ ไละ นอ ลี้ฆ้าง โอ กจุ้แฆว้, ดี๊ อางโล๊ไท้ เอะ เว๊ ไจ้ะเว๊, “น กดูกแซย่ ซีงลแพ นอ ลู๊งล้าง จี้, พี่ แด เว๊ ลู่ง กแช่แยว้อล่างโอ พ้า, ดี๊ อางกีล้าง เว๊ ลู่ง โพล้ง พี่ อ ยู่แคว่ กแช่ยาเวอล่างโอ ลแพ นอ อ จูง พ้า” 10 ฌ้อง ชาฟาง ทอดูกวิ้ไนเท่อ โล้ เอะ กจุ้แฆว้ ไจ้ะเว๊, “เฮงคียา โพล้งลื่งเท่ออคู เกล๊าง แย้ ไละ ล ทื๊ง”, ดี๊ ชาฟาง พ้ะ เอะ กจุ้แฆว้ นอ ล้อ 11 ท่อง กจุ้แฆว้ ช๊องแน ทไคล้, ลู่ง ไละ ทอางแม้เลา พ้า นอ, อ เว๊ ซย๊างยะล้าง อ ไช๊ อ ช้าง 12 ฌ้อง กจุ้แฆว้ อางแบเลา เฮงคียา โพล้งลื่งเท่ออคู, ดี๊ ชาฟาง อ พู เมะเว๊ อาฮีคาง, ดี๊ มีคายา อ พู อาโบ, ดี๊ ชาฟาง ทอดู กวิ้ไน เท่อ, ดี๊ อาซายา กจุ้แฆว้ อ เพล่ นอ ไจ้ะเว๊ 13 “เกม๊า ลี้ อางจ้ะ เท่อ ดี๊ กแช่ยาเว เอะ แย้, ดี๊ โพล้งเฌงพูฆ๊างพู อ ฌ่าง, ดี๊ โพล้ง ยูดา เลาพะ นอ อ ฌ่าง, แบฆ้ะ ดี๊ ทไคล้ ลู่ง ไละ พ้า พี่ ก แด-อ้ะ อี้ง, เมะเว๊ กแช่ยาเว อ ทซ้ะทาง ซยุ้ทาง แบ เฆ้อ นอ พ้ะดู เต้ๆ, ล้อ, เป๊งนี่ กพี๊งกพู๊งลู่งแย๊ ล ชู่ง ล นะ ทไคล้ ลู่ง ไละ พ้า อี้ง แบ, พี่ ม แม้โพะ ทกุ้เม้ง อ ไค๊ พี่ อ กวิ้ เว๊ แบฆ้ะ ดี๊ เฆ้อ” 14 เฮงคียา โพล้งลื่งเท่ออคู, อาฮีคาง, อาโบ, ชาฟาง, ดี๊ อาซายา ลี้ฌูง ชางลู อ แม๊ น่าง ฮูงดา, กมืง พี่ เก โมไคล้คิ้กแช่แยว้ นอ, ชางลู เก ทิ้วา อ พู, ทิ้วา เก ฮาราฮะ พี่ อ เก โพล้ง ยู่แคว่ ไช๊ ช้าง ล แฌ้ นอ อ พู, (น่าง ฮูงดา โอ ลู่ง เยรูซเลง พ้า ลู่ง ค่างช๊า คี๊ง จอง), ดี๊ อ ซื๊ง อางก้างแก้ เท่อ เว๊ ดี๊-อ้ะ 15 น่าง ฮูงดา โล้ เอะ อ ซื๊ง ไจ้ะเว๊, “กแช่ยาเว กแช่แยว้ ลู่ง อีซลาเอง ไจ้ะเว๊ บี่อี้ง, ‘เกม๊า น โล้ เอะ โพล้ง พี่ อ เจ่ทาง น ซื๊ง เฌ๊ฌูง แย้ นอ บี่อี้ง 16 กแช่ยาเว โล้ เว๊ บี่อี้ง, แคว่เซ้อ, จ ม เกม๊า ทอ้าทซ๊าง เฌ๊ ลู่ง ทล่าง พ้า อี้ง, ดี๊ เฌ๊ แบ โพล้ง เว่ง พ้า อี้ง, บี่ซุ้ ดี๊ ทไคล้ ลู่ง ไละ พ้า, พี่ กจุ้แฆว้ ค่าง ยูดา พ้ะ แบ เว๊ อี้ง นอ 17 เป๊งนี่ อ ซื๊งซีง ญ๊องไฆวะ แย้, ดี๊ เช้า ทน๊าม๊า เทว๊ เอะ ทกโช้งกแช่ อ แฌ้แพ, อ นอ ดึ้ เกม๊า จ ซ้ะทาง ดี๊ ทแม้ เลาพะ, พี่ อ ซื๊ง จูง แม้-อ้ะ นอ, อ กย้อง บี่นอ, จ ทซ้ะทาง ม เช้า ทาง อ ซ้ะ ลู่ง ทล่าง พ้า อี้ง, ดี๊ ม แม้ ล้างไพะ-อ้ะ ล ซี แบ 18 เมะ กจุ้แฆว้ ค่าง ยูดา, พี่ อ เจ่ทาง น ซื๊ง เฌ๊ อางจ้ะ เท่อ ดี๊ กแช่ยาเว นอ, เกม๊า น ไท้ โล้ เอะ-อ้ะ บี่อี้ง, กเย่ ทไคล้ อ ไฌ่ พี่ น แน่ฌ๊า แบ-อ้ะ 19 เมะเว๊ น เซิงเพาซ้ะเบ้, ดี๊ น ชางล้าง ซ้ะ ลู่ง กแช่ยาเว อ เมะแซ พ้า, พี่ น แน่ฌ๊า ทไคล้ พี่ จ ไจ้ะ แบ ทล่าง พ้า อี้ง, ดี๊ โพล้ง เว่ง พ้า อี้ง, พี่ ม เกทางก้ะ ทล่าง โอ โปล้, ดี๊ ทชูอ้า อ ล่าง, ฌ้อง น ซย๊างยะ ล้าง น ไช๊ น ช้าง, ดี๊ น ฌาง ลู่ง จ เมะแซ พ้า, แย้ นอ จ แน่ฌ๊า แน้ ปะ, กแช่ยาเว โล้ เว๊ บี่อี้ง ล้อ 20 ทบี่นอ, แคว่เซ้อ, จ ม ลี้ฌ้า แน้ ไท้ โอ ดี๊ น พี๊ง น พู๊ง ลู่ง แย๊, ดี๊ น ม แบ ทแม้นี่ ลี้ ลู่ง แซวคู พ้า ดี๊ ทซยืงทบ้ะ, ดี๊ น เมะคลี๊ง ล แด แบ ทอ้าทซ๊าง เลาพะ, พี่ จ ม เกม๊า ล้างแบ ทล่าง พ้า อี้ง แบ’, ”, ดี๊ อ ซื๊งเว๊ซีง, เฌ๊ ไท้ โล้ กแช่แยว้ อลู่งอแท๊ อี้ง เอะ กจุ้แฆว้ นอ ล้อ |
Pwo Karen Bible (Thailand) © Thailand Bible Society, 2016.
Thailand Bible Society