2​กจุ้แฆว้ 21 - Northern Pwo Karen Thai Bible

มานาเซ โพะคอง ค่าง ยูดา

¹ พี่ มานาเซ เก กจุ้แฆว้ นอ อ โญะ โอ ชี๊ง คี๊ง เนง, ดี๊ โพะคอง เท่อ ลู่ง เว่ง เยรูซเลง พ้า เย่ ชี๊ง เย่ เนง, อ มู่ นอ อ เม้ง เฮซีบา

² อ เว๊ แม้ ทอ้าทซ๊าง ลู่ง กแช่ยาเว อ เมะแซ พ้า เมะเว๊ แม้โพะ โพล้ง กุ้ที๊งกุ้ค่าง ลแพ นอ อ ทแม้ พี่ ล้าง แช๊เมะไฌ๊ซ้ะ อ ไค๊, พี่ กแช่ยาเว โฌ๊ไจไฆวะ เว๊, พ้องไฆวะ ดี๊ โพล้งเฌงพูฆ๊างพู อีซลาเอง ลแพ อ เมะ

³ อ เว๊ ไต้ทางไท้ ทล่างซยื๊งซย้องพ้ะโท๊ อ ซ๊าง, พี่ อ แพ่ เฮเซคียา แม้เฌ๊ฌ้อง เว๊ นอ, ดี๊ อ เว๊ ช๊างล้างนี่ ทลื่งล่าง ล เม้ง แบ ล เม้ง, เอะ ทกโช้งกแช่ บาอาง, ดี๊ ไต้ทางนี่ ทกโช้งกแช่ อาเชรา, บี่ซุ้ดี๊ อาฮะ กจุ้แฆว้ ค่าง อีซลาเอง แม้ เว๊ นอ, ดี๊ โบงทางแบ้ทาง กเย่ เท่อ พี่ อ โอม๊า ลู่ง มุ้คู, ดี๊ แม้ เอะ ทลแพ นอ อ เท่อ

⁴ ดี๊ อ เว๊ ไต้ทางนี่ ทลื่งล่าง ลู่ง กแช่ยาเวอล่างโอ พ้า, พี่ กแช่ยาเว ไจ้ะเว๊, “แย้ จ ม ชวี๊งล้าง จ เม้ง ลู่ง เยรูซเลง พ้า”

⁵ ดี๊ อ เว๊ ไต้ทางนี่ ทลื่งล่าง เอะ กเย่ เท่อ พี่ อ โอม๊า ลู่ง มุ้คู นอ อ ฌ่าง, ลู่ง กแช่ยาเวอล่างโอ อ คว้าง พ้า นอ คี๊ง จอง เลา

⁶ ดี๊ อ เว๊ เกม๊า อ พูแคว๊ พลึ้ล้าง อ ซ้ะ มีอ้า พ้า, แคว่ มื่ง แคว่ แล้, แม้ ทอูงทโป้, อางจ้ะนี่ เท่อ ดี๊ ตี้งน่าง, ดี๊ กมืง กแคว๊ พี่ เก โพล้ง อูง เท่อ ซี ล่อง เท่อ นึ, อ เว๊ แม้ ทอ้าทซ๊าง น้ะ เต้ๆ, ลู่ง กแช่ยาเว อ เมะแซ พ้า, ดึ้ เกม๊า กแช่แยว้ อ ซ้ะทาง พ้ะดู

⁷ ทกโช้งกแช่อาเชรา อเค่งอฌ้าง, พี่ อ ไต้ทางนี่ เว๊ นอ, ช๊างล้าง เว๊ ลู่ง กแช่แยว้อล่างโอ พ้า, พี่ กแช่ยาเว โล้ เอะ ดาเว ดี๊ อ พูแคว๊ ซาโลโม ไจ้ะเว๊, “ลู่ง ล่างโอ พ้า อี้ง, ดี๊ ลู่ง เยรูซเลง พ้า พี่ จ อางลึนี่-อ้ะ, ลู่ง โพล้ง อีซลาเอง เลาพะ อ ชื้อ แกล้ นอ, จ ม ชวี๊งล้าง จ เม้ง ล้างชู้

⁸ จ ล เกม๊า โพล้ง อีซลาเอง อ คาง ไจทางไฆวะ ที๊งล่างค่างพ้า, พี่ จ เกล๊าง เอะ อ พี๊ง อ พู๊ง ลู่ง แย๊ นอ ล้าแบ, แคว่ ท๊อง อ ซื๊งเว๊ ปโล่ล้าง ซ้ะ แม้โพะ ทกุ้เม้ง อ ไค๊, พี่ จ อางแบเลา-อ้ะ, ดี๊ แม้โพะ ทอางแม้เลา อ ไค๊ เลาพะ, พี่ จ เพล่ โมเซ อางแบเลา-อ้ะ”

⁹ แบเด้าะ อ ซื๊งเว๊ ล ช๊องแน แบ, ดี๊ มานาเซ แม้ฌ้า อ ซื๊งเว๊, เกม๊า อ แม้ ทอ้าทซ๊าง แอเละ กเย่ โพล้ง กุ้ที๊งกุ้ค่าง, พี่ กแช่ยาเว แม้เฌ๊ฌ้องไฆวะ เว๊, ม๊า พ้องไฆวะ ดี๊ โพล้งเฌงพูฆ๊างพู อีซลาเอง อ เมะแซ พ้า แม้ แบ เว๊ นอ ได้ะ

¹⁰ กแช่ยาเว ไคล้ ดี๊ อ เพล่, เมะเว๊ โมไคล้คิ้ กแช่แยว้ อลู่งอแท๊ นอ ไจ้ะเว๊

¹¹ “เป๊งนี่ มานาเซ กจุ้แฆว้ ค่าง ยูดา แม้ เท่อ, พี่ อ ล้างแช๊เมะไฌ๊ซ้ะ ลแพ อี้ง, ดี๊ แม้ ทอ้าทซ๊าง น้ะเละ โพล้ง อาโมไร, พี่ อ โอ วี่ง-อ้ะ ลแพ นอ แม้ เว๊ กุ้เม้ง, ล ก้ะ ได้ะ แบ นอ, เกม๊า โพล้ง ยูดา แม้ ทเด้บ้ะ, แบฆ้ะ ดี๊ กเย่ อ ทเค่งทฌ้าง นอ

¹² ทบี่นอ, กแช่ยาเว โพล้ง อีซลาเอง อ กแช่แยว้ ไจ้ะเว๊, แคว่เซ้อ, จ เกม๊า ทแม้อ้าแม้ซ๊าง อ ซ้ะ เฌ๊ แบ เยรูซเลง ดี๊ ยูดา, บี่ซุ้ดี๊ โพล้ง กุ้ แฌ้ แน่ฌ๊า แบ เว๊ เย้า นอ, อ ซื๊งเว๊ อ แน่ คี๊ง แพ้ นอ ม อ้าไทะ

¹³ จ ม ทูดุ้ เว่ง เยรูซเลง ดี๊ พลี้ง ล บ้อง ฆ่าง, พี่ จ ทูดุ้ เว่ง ซมาเรีย, ดี๊ จ ม เจ่ นางทูแซ พลี้ง ล บ้อง ฆ่าง, พี่ จ ทูดุ้ อาฮะ อชื้ออชะ, ดี๊ จ ม อางซฌ้ะไฆวะ เยรูซเลง, แบด้องซุ้ โพล้ง อางซฌ้ะ เจเล, เมะเว๊ ซฌ้ะ ฌ้อง คลึล้าง เว๊

¹⁴ ดี๊ จ คอง จ แซย้ พี่ โอ ล้างลื๊อก้ะ นอ, จ ม ญ๊องไฆวะ-อ้ะ, ดี๊ อางกีล้าง อ ซื๊งเว๊ ลู่ง อดีงอแด้ อ จูง พ้า, อ ซื๊งเว๊ ม เก ท อ แช, ดี๊ เก อดีงอแด้ อ ทลู่นี่ก้ะ เลาพะ

¹⁵ เป๊งนี่ อ ซื๊งเว๊ แม้ ทอ้าทซ๊าง ลู่ง จ เมะแซ พ้า, ดี๊ แม้ เท่อ เกม๊า จ ซ้ะทาง, ล โค๊ ลู่ง มื่ง นี้ง พี่ อ พี๊ง อ พู๊ง ลู่ง แย๊ ไจทางไฆวะ ค่าง อีไย้ะ พ้า, ท๊อง อ ท้อง ล นี้ง แย๊ อี้ง”

¹⁶ แอเละ อ นอ ได้ะ, มานาเซ แม้ล้าง ทซวีง พี่ อ ทไพ้ะทแม ล โอ แบ นอ แอฌ้อง, ฆวี้ทะ เว่ง เยรูซเลง อี้งโค๊แพ้ ท้องอู้งโค๊ แพ้, ทเด้บ้ะ พี่ ดึ้ เกม๊า ยูดา แม้ เว๊ ปะ นอ โอเจ ได้ะ, เมะเว๊ แม้ ทอ้าทซ๊าง ลู่ง กแช่ยาเว อ เมะแซ พ้า

¹⁷ มานาเซ อ ทไพ้ะทแม้ อ แฌ้แพ, ดี๊ ทกุ้เม้ง พี่ อ แม้ เว๊, ดี๊ ทเด้บ้ะ พี่ อ แม้ เว๊ นอ, แบ ทกวิ้ล้าง-อ้ะ, ลู่ง ไละ กวิ้ไน กจุ้แฆว้ ค่าง ยูดา อ ไฌ่ ล ปะ นอ อ พ้า, ล เมะ แบ-อ้า?

¹⁸ มานาเซ ซี๊ง ไท้ โอ ดี๊ อ พี๊ง อ พู๊ง ลู่ง แย๊, แบ ทเคิงล้างบ้า-อ้ะ ลู่ง อ บลาง โซ๊ง เซง พ้า, ลู่ง อุ้ซา อ โซ๊ง พ้า, ฌ้อง อ พูแคว๊ อาโมง, ทาง โพะคอง เท่อ เท่งก้ะ อ ล่าง

อาโมง โพะคอง ค่าง ยูดา

¹⁹ พี่ อาโมง เก กจุ้แฆว้ นอ อ โญะ โอ คี๊ง ชี๊ง คี๊ง เนง, อ เว๊ โพะคอง เท่อ ลู่ง เยรูซเลง พ้า ชิ้ทาง คี๊ง เนง, อ มู่ นอ อ เม้ง เมชูเลเม, เก ฮารู โพล้ง โยะบา อ พูมืง

²⁰ อาโมง แม้ ทอ้าทซ๊าง ลู่ง กแช่แยว้ อ เมะแซ พ้า, ด้องซุ้ อ แพ่ มานาเซ แม้ เว๊ นอ ล้อ

²¹ อ เว๊ โพะ เกล้ กุ้ บ้อง พี่ อ แพ่ โพะ เว๊, ดี๊ แม้ เอะ ทเค่งทฌ้าง พี่ อ แพ่ แม้ เว๊ นอ อ เท่อ, ดี๊ โบงทางแบ้ทาง ทเค่งทฌ้าง ลแพ นอ ล้อ

²² อาโมง ญ๊องไฆวะ กแช่ยาเว, เมะเว๊ อ พี๊ง อ พู๊ง ลู่ง แย๊ อ กแช่แยว้, ดี๊ ล ลี้ โพะ กแช่ยาเว อ เกล้ แบ

²³ อาโมง อ กดูกแซย่ นอ ฆู๊ง โละซ้ะ กไบล้ะ ดี๊-อ้ะ, ดี๊ แม้ซี๊งไฆวะ เว๊ ลู่ง อ บลาง พ้า

²⁴ แบเด้าะ โพล้งเฌงพูฆ๊างพู ลู่ง ที๊งล่างค่างพ้า นอ, แม้ซี๊ง โพล้ง กุ้ แฌ้, พี่ อ ฆู๊ง โละซ้ะ กไบล้ะ ดี๊ กจุ้แฆว้ อาโมง, โพล้งเฌงพูฆ๊างพู ลู่ง ที๊งล่างค่างพ้า นอ, ต๊างทาง อาโมง อ พูแคว๊ เมะเว๊, โยซียา เก กจุ้แฆว้ เท่งก้ะ อ ล่าง

²⁵ อาโมง อ ทไพ้ะทแม้ อ แฌ้แพ พี่ อ แม้ เว๊ นอ, แบ ทกวิ้ ล้าง-อ้ะ, ลู่ง ไละ กวิ้ไน กจุ้แฆว้ ค่าง ยูดา อ ไฌ่ ล ปะ นอ อ พ้า, ล เมะแบ-อ้า?

²⁶ ดี๊ แบ เคิงล้างบ้า-อ้ะ, ลู่ง ท แซวคู พ้า ลู่ง อุ้ซา อ โซ๊ง พ้า, ดี๊ อ พูแคว๊ โยซียา, นี่ ทาง โพะคอง เท่อ เท่งก้ะ อ ล่าง