2กจุ้แฆว้ 20 - Northern Pwo Karen Thai Bibleเฮเซคียา ช๊องไก้ (2ทกน.32:24-26; อซย.38:1-8) 1 ล ว๊าง แย๊ นอ เฮเซคียา ช๊องไก้ เบ้า ม ซี๊ง เย้า, ดี๊ อามอ อ พู เมะเว๊ โม อีซยา เฌ๊ฆ้าง โอ-อ้ะ, ดี๊ โล้ เอะ เว๊ บี่อี้ง, “กแช่ยาเว ไจ้ะเว๊ บี่อี้ง, ‘เกม๊า น แฌแซกต้าง น เฌง น ฆ๊าง ท่อง อ ฌ้องทางเกทาง เมาน่าง, น ม ซี๊ง, น ล ม๊า ทางไท้ แบ’, ” 2 ฌ้อง เฮเซคียา วีงฆ้าง อ เมะ ดี๊ พี๊แด้ดอง, ดี๊ ชูแพ อางท่าง เท่อ ดี๊ กแช่ยาเว ไจ้ะเว๊ 3 “กแช่ยาเว-เอ้อ, ม๊า เต้ น นางแบไท้-อ้ะ บี่อี้ง, จ โอม๊าโอเฌ้ ลู่ง น เมะแซ พ้า, ดี๊ ทโต้ทล้อง ดี๊ อางกีล้าง ซ้ะ เมาน่าง ดี๊ แม้ ทอฌี้ ลู่ง อ แบ น ซ้ะ”, ฌ้อง เฮเซคียา ฌาง น้ะ มะ 4 พี่ อีซยา ไจทาง ล คลึ้ ท้อง ทปล้าง คี่ง พ้า ได้ะ แบ นอ, กแช่แยว้ อลู่งอแท๊ เฌ๊ ท้อง-อ้ะ ไจ้ะเว๊ 5 “ไท้ โล้ ไท้ เอะ เฮเซคียา พี่ อ เก เอะ จ พู จ ลี้ง อ ท คูดู นอ บี่อี้ง, กแช่ยาเว น พู๊ง ดาเว อ กแช่แยว้ โล้ เว๊ บี่อี้ง, จ แน่ฌ๊า น ทชูแพ อางท่าง เท่อ เย้า, จ แด น เมะ ที๊ง เย้า, แคว่เซ้อ, จ ม แฌแซ แน้ ลู่ง มื่ง ซ๊า นี้ง ล นี้ง พ้า, น ม ลี้ ทาง ลู่ง กแช่ยาเวอล่างโอ พ้า 6 ดี๊ จ ม แม้ แอทาง น โญะ ชี๊ง เย่ เนง เด้าะ, จ ม แม้พ้องพลิ้ แน้ พ้องไฆวะ ดี๊ กจุ้แฆว้ ค่าง อะซีเรีย อ จูง, ดี๊ ปด้างทะ เว่ง อี้ง ลู่ง จ ฌ่าง, ดี๊ ลู่ง จ เพล่ ดาเว อ ฌ่าง” 7 ดี๊ อีซยา โล้ เว๊, “เกม๊า น ซื๊ง แม้นี่ กู กูงเย้ แซ ล ลอง”, ฌ้อง โพล้ง เฌ๊ อางกีล้าง เว๊ ลู่ง ทเว๊ง นอ อ คูทุ้ ล้อง, ฌ้อง เฮเซคียา แบลไท้ บี่ อ ล่าง ล้อ” 8 ดี๊ เฮเซคียา ไคล้ ดี๊ อีซยา ไจ้ะเว๊, “ทเม้งเล้ ม เก ทแม้ไน พี่ กแช่ยาเว ม แม้ แบล แย้, ดี๊ ม เนโพลทาง เว๊, จ ม นี่ ลี้ทาง ลู่ง กแช่ยาเวอล่างโอ พ้า, ลู่ง มื่ง ซ๊า นี้ง ล นี้ง พ้า” 9 ดี๊ อีซยา โล้ เว๊, “อ อี้ง ม เก ทแม้ไน, เฌ๊นี่ ดี๊ กแช่ยาเว ลู่ง น ฌ่าง, พี่ กแช่ยาเว ม แม้ เว๊ บี่ซุ้ อ ไคล้ เว้ เว๊, เมะเว๊ ม เกม๊า กดื้งแล้ ลี้ อ แค๊ ล ชี๊ง-อ้า, เมะ ล เมะ แบ โค๊ เฌ๊ไท้ คู ไค๊ ไท้ อ แค๊ ล ชี๊ง-อ้า?” 10 เฮเซคียา ไคล้ช๊า-อ้ะ ไจ้ะเว๊, “เก เท่อ ลู่ง อ โย๊ พี่ กดื้งแล้ ม โท๊ทาง เด้าะ อ แค๊ ล ชี๊ง, แบเด้าะ เกม๊า กดื้งแล้ เฌ๊ไท้ ไท้ อ แค๊ ล ชี๊ง ล โค๊” 11 ดี๊ อีซยา โม ไคล้คิ้กแช่แยว้ อลู่งอแท๊ ชูแพ เท่อ กุ้ทาง กแช่ยาเว, ดี๊ กแช่แยว้ ลี้ฌ้า กดื้งแล้, พี่ อ ลี้ พะไฆวะ ลู่ง อาฮ้ะ อ นาลีกา ท คู่ ล้าง พ้า นอ, เฌ๊ไท้ อ แค๊ ล ชี๊ง โพล้ง พี่ แบ ทโซ๊ง-อ้ะ พี่ อ โอ ลู่ง เว่ง บาบีโลง พ้า ( อซย.39:1-8 ) 12 ล พ๊า แย๊ นอ บาลาดาง กจุ้แฆว้ ค่าง บาบีโลง อ พูแคว๊, เมะ เว๊ เมโรดะบาลาดาง นอ, โซ๊ง ไละ ดี๊ ทแบเกล๊าง เอะ เฮเซคียา, เมะเว๊ อ แน่ฌ๊า เว๊ เฮเซคียา นอ ช๊องไก้ 13 ดี๊ เฮเซคียา ตองช๊า อ ซื๊งเว๊, ดี๊ ไจฌ้า อ ซื๊งเว๊ แคว่ดุ้ ทล่างอางกีซยอง อคองอแซย้ นอ เลาพะ, เกม๊า เว๊ อ แคว่ดุ้ จี้, ท๊อง, ทน๊าม๊า, ดี๊ ทซู ลู่ง อ ฌี้, ดี๊ อ ทล่างอางกีซยอง นางดึ้นางชาง, ดี๊ ทกุ้เม้ง พี่ อ โอ ลู่ง ทล่างอางกีซยอง เท่อ อ พ้า นอ, ทกุ้เม้ง ลู่ง อ บลาง พ้า, ดี๊ ลู่ง อ มื่ง อ บ้าง พ้า เลาพะ นอ, ท ล โอ น่าง เม้ง แบ พี่ เฮเซคียา ล เนโพลทาง เอะ-อ้ะ-แบ 14 ฌ้อง โม อีซยา ลี้ฆ้าง โอ กจุ้แฆว้ เฮเซคียา, ดี๊ อางจ้ะ-อ้ะ ไจ้ะเว๊, “โพล้ง ลแพ อี้ง ไคล้ ทเม้งเล้?, ดี๊ อ ซื๊งเว๊ โอ พี่จองเล้, พี่ อ เฌ๊ฌูง แน้ อี้ง”, เฮเซคียา ไจ้ะเว๊, “อ ซื๊งเว๊ เฌ๊นี่ ลู่ง เว่ง ไย้, เมะเว๊ ลู่ง เว่ง บาบีโลง” 15 อีซยา อางจ้ะ-อ้ะ ไจ้ะเว๊, “อ ซื๊งเว๊ แด ทเม้งเล้?, ลู่ง น บลาง พ้า”, เฮเซคียา ไคล้ช๊า-อ้ะ ไจ้ะเว๊, “อ ซื๊ง แด ทกุ้ อ เม้ง ลู่ง จ บลาง พ้า, ท ล โอ น่างเม้ง แบ ลู่ง จ ทล่างอางกีซยองเท่อ อ พ้า พี่ จ ล เนโพล เอะ-อ้ะ แบ นอ” 16 ฌ้อง อีซยา โล้ เอะ เฮเซคียา ไจ้ะเว๊, “ม๊า น ช๊องแน กแช่ยาเว อลู่งอแท๊ อี้ง 17 แคว่เซ้อ, มื่ง นี้ง มื่ง ซ๊าง เฌ๊ เบ้าทาง เย้า, พี่ ทกุ้ อ เม้ง ลู่ง น บลาง พ้า, ดี๊ เท่อ พี่ น พี๊ง น พู๊ง ลู่ง แย๊ อางกีซยองนี่ เว๊ ท้อง กุ้ มื่ง นี้ง อี้ง นอ, ม แบ ทแม้นี่ ลี้ โชะไฆวะ ลู่ง บาบีโลง พ้า, ดี๊ ท ล โอ ล้างลื๊อ น่าง เม้ง ล้าแบ เฆาะ, กแช่ยาเว โล้ เว๊ บี่อี้ง ล้อ 18 ดี๊ พู แบ ล แฌ้ๆ, พี่ อ กึทางนี่ ดี๊ แน้, โพล้ง พี่ อ กึทางนี่ เอะ แน้ นอ, ม แบ ทแม้นี่-อ้ะ, ดี๊ อ ซื๊งเว๊ ม ลี้ เก กแคว๊ได้ะดีง, ลู่ง กจุ้แฆว้ ค่าง บาบีโลง อ บลาง พ้า” 19 ฌ้อง เฮเซคียา ไคล้ ดี๊ อีซยา ไจ้ะเว๊, “กแช่ยาเว อลู่งอแท๊ พี่ น โล้ นอ อ ฌี้ เย้า”, พี่ อ ไคล้ เว๊ บี่อี้ง นอ ช๊องมอง เว๊, “ฌี้ เย้า ล เมะ แบ-อ้า?, เมะเว๊ โอ ดี๊ ทโอซยืงโอบ้ะ, ดี๊ ทพ้องอ้าพ้องซ๊าง ลู่ง ก ชู้ แค๊ อี้ง” เฮเซคียา ซี๊ง เว๊ ล้อ ( 2ทกน.32:32-33 ) 20 เฮเซคียา อ ทไพ้ะทแม้ อ แฌ้แพ, ดี๊ อดู้งอยาง เลาพะ, ดี๊ พี่ อ ไต้ทางนี่ กวี้ง ดี๊ ที๊งโท้ง, เกม๊า ที๊ง เฌ๊ นึฆ้าง เว่ง พ้า บี่จะเล้ นอ, แบ ทกวิ้ล้าง-อ้ะ, ลู่ง ไละ กวิ้ไน กจุ้แฆว้ ค่าง ยูดา อ ไฌ่ ล ปะ นอ อ พ้า, ล เมะ แบ-อ้า? 21 ดี๊ เฮเซคียา ซี๊ง ไท้ โอ ดี๊ อ พี๊ง อ พู๊ง ลู่ง แย๊, ดี๊ อ พูแคว๊ มานาเซ, ทาง โพะคอง เท่อ เท่งก้ะ อ ล่าง นอ ล้อ |
Pwo Karen Bible (Thailand) © Thailand Bible Society, 2016.
Thailand Bible Society