2​กจุ้แฆว้ 13 - Northern Pwo Karen Thai Bible

เยโฮอาฮ้ะ โพะคอง ค่าง อีซลาเอง

¹ ลู่ง คี๊ง ชี๊ง ซ๊า เนง ล เนง พ้า, พี่ อาฮ้ะยา อ พูแคว๊ โยอ้ะ เก กจุ้แฆว้ ค่าง ยูดา นอ, เยฮู อ พูแคว๊ เยโฮอาฮ้ะ โพะคอง โพล้ง อีซลาเอง โอ ลู่ง เว่ง ซมาเรีย พ้า, ชิ้ทาง ชี๊ง เนว๊ เนง

² อ เว๊ แม้ ทอ้าทซ๊าง ลู่ง กแช่ยาเว อ เมะแซ พ้า, ดี๊ แม้โพะ เนบ้ะ อ พู เยโรโบอาง อ ทเด้บ้ะ อ ไค๊, พี่ อ ลี้ฌ้า โพล้ง อีซลาเอง แม้ ทเด้บะ ปะ นอ, อ เว๊ ล วีงแซยไฆวะ อ ซ้ะ ดี๊ ทเด้บ้ะ ลแพ นอ แบ

³ กแช่ยาเว อ ทซ้ะทาง ซยุ้ทาง แบ โพล้ง อีซลาเอง, ดี๊ อางกีล้าง อ ซื๊งเว๊ ลู่ง ฮาซาเอง กจุ้แฆว้ ค่าง ซีเรีย อ จูง พ้า, ดี๊ อ พูแคว๊ เบงฮาดะ อ จูง พ้า ไค๊คื๊ง นอ ล้อ

⁴ ฌ้อง เยโฮอาฮ้ะ อวีงซ้ะชู้ กแช่ยาเว, ดี๊ อ เท่อ ช๊องแน-อ้ะ, เมะเว๊ กแช่แยว้ แด ทแคแนแคแก้ โพล้ง อีซลาเอง, พี่ กจุ้แฆว้ ค่าง ซีเรีย แคแนแคแก้ อ ซื๊งเว๊ บี่จะเล้ นอ

⁵ (ทบี่นอ, กแช่ยาเว เกล๊าง โพล้ง แม้ช้า เท่อ ล แฌ้ เอะ โพล้ง อีซลาเอง, อ ซื๊งเว๊ พ้องไฆวะ ดี๊ โพล้ง ซีเรีย อ จูง, ดี๊ โพล้ง อีซลาเอง โอ แบ ลู่ง กแช่ อ เด้า พ้า บี่ อ ล่าง นอ ล้อ

⁶ ทึเมะ บี่นอ ฌี้ นอ, อ เว๊ ล วีงแซยไฆวะ อ ซ้ะ ดี๊ เยโรโบอาง อชื้ออชะ อ ทเด้บ้ะ, พี่ อ แม้ เอะ โพล้ง อีซลาเอง นอ แบ ปะ, แบเด้าะ ลี้ ลู่ง ทเด้บ้ะ นอ อ พ้า, ดี๊ ทกโช้งกแช่ อาเชรา โอ ลู่ง ซมาเรีย พ้า ปะ ได้ะ ล้อ)

⁷ เมะ เว๊ ล นี่ อางกี ล้างลื๊อ ซึ้พู มู๊ง เอะ เยโฮอาฮ้ะ แอเละ ซึ้พู เทา กซี เย่ ชี๊ง แฌ้, ดี๊ เลาะ ดึ้ซึ้ เท่อ อ บ้อง ล ชี๊ง, ดี๊ ซึ้พู ทแด้คู อ แฌ้ ล ไซ, เมะเว๊ กจุ้แฆว้ ซีเรีย แม้ซี๊งไฆวะ อ ซื๊งเว๊, แม้ เว้ ด้องซุ้ ทมูง ลู่ง ทล่าง ไย่ บืง พ้า นอ ล้อ

⁸ เยโฮอาฮ้ะ อ ทแม้ อ แฌ้แพ, ดี๊ ทกุ้เม้ง พี่ อ แม้ เว๊, ดี๊ อดู้งอยาง นอ, แบ ทกวิ้ล้าง-อ้ะ, ลู่ง ไละ กวิ้ไน กจุ้แฆว้ ค่าง อีซลาเอง อ ไฌ่ ล ปะ นอ อ พ้า, ล เมะ แบ-อ้า?

⁹ ดี๊ เยโฮอาฮ้ะ ซี๊ง ไท้ โอ ดี๊ อ พี๊ง อ พู๊ง ลู่ง แย๊, ดี๊ โพล้ง เคิงล้างบ้า-อ้ะ ลู่ง ซมาเรีย พ้า, ฌ้อง อ พูแคว๊ เยโฮอะ ทาง โพะคอง เท่อ เท่งก้ะ อ ล่าง

เยโฮอะ โพะคอง ค่าง อีซลาเอง

¹⁰ ลู่ง ซ๊า ชี๊ง เนว๊ เนง ล เนง พ้า, พี่ โยอ้ะ กจุ้แฆว้ ค่าง ยูดา โพะคอง เท่อ อ ชู้ แค๊ นอ, เยโฮอาฮ้ะ อ พูแคว๊ เยโฮอะ โพะคอง ค่าง อีซลาเอง, โอ ลู่ง ซมาเรีย พ้า ชิ้ทาง ชี๊ง ฆู๊ง เนง

¹¹ อ เว๊ แม้ ทอ้าทซ๊าง ลู่ง กแช่ยาเว อ เมะแซ พ้า, อ เว๊ ล วีงแซยไฆวะ อ ซ้ะ ดี๊ เนบ้ะ อ พู เยโรโบอาง อ ทเด้บ้ะ, พี่ อ แม้ เว๊ ดี๊ แม้ฌ้า โพล้ง อีซลาเอง ปะ นอ แบ, แบเด้าะ ลี้ ลู่ง ทเด้บ้ะ นอ อ พ้า

¹² เยโฮอะ อ ทไพ้ะทแม้ อ แฌ้แพ, ดี๊ กเย่ เท่อ พี่ อ แม้ เว๊, ดี๊ อดู้งอยาง พี่ อ ดึ้ซึ้, ดี๊ อามาซียา กจุ้แฆว้ ค่าง ยูดา แบ ทกวิ้ล้าง-อ้ะ, ลู่ง ไละ กวิ้ไน กจุ้แฆว้ ค่าง อีซลาเอง อ ไฌ่ ล ปะ นอ อ พ้า, ล เมะ แบ-อ้า?

¹³ เยโฮอะ ซี๊ง ไท้ โอ ดี๊ อ พี๊ง อ พู๊ง ลู่ง แย๊, ฌ้อง เยโรโบอาง ทาง ชี๊น้าง โอก้ะ เว๊ อ ล่าง ชี๊น้าง คู, ดี๊ เยโฮอะ อ จู นอ, โพล้ง เคิงล้างบ้า เว๊ ลู่ง ซมาเรีย พ้า, ดี๊ กเย่ กจุ้แฆว้ ค่าง อีซลาเอง ซีง นอ ล้อ

เอลีชา ซี๊ง เว๊ ล้อ

¹⁴ พี่ เอลีชา ช๊องไก้ ดี๊ ทแช๊ พี่ อ เว๊ แบ ซี๊ง นอ, เยโฮอะ กจุ้แฆว้ ค่าง อีซลาเอง ลี้ล้างฌูง-อ้ะ, ดี๊ ฌาง ลู่ง อ เว๊ อ เมะแซ พ้า ไจ้ะเว๊, “จ แพ่-เอ้อ, จ แพ่-เอ้อ, เลาะ ดึ้ซึ้ เท่อ ลู่ง ค่าง อีซลาเอง พ้า, ดี๊ ซึ้พู เทา กซี”

¹⁵ เอลีชา โล้ เอะ-อ้ะ ไจ้ะเว๊, “แม้นี่ คลีง ดี๊ อ แช นอ”, อ เว๊ แม้นี่ คลีง ดี๊ อ แช

¹⁶ ฌ้อง เอลีชา โล้ เอะ กจุ้แฆว้ ค่าง อีซลาเอง ไจ้ะเว๊, “ม๊า น ซู๊งทาง น คลีง”, ฌ้อง อ เว๊ ซู๊งทาง อ คลีง ดี๊ อ กแช่ อ จูง, ดี๊ เอลีชา อางกีล้าง อ จูง ลู่ง กจุ้แฆว้ อ จูง ล้อง

¹⁷ เอลีชา ไจ้ะเว๊, “ม๊า น แว่พ้ะทาง ป้อง ลู่ง มื่ง ทาง ล โค๊ ล แพ้ นอ”, อ เว๊ แว่พ้ะทาง เว๊, ดี๊ เอลีชา ไจ้ะเว๊, “ค้ะ คลีง นอ ตะ”, กจุ้แฆว้ ค้ะ เว๊, ดี๊ เอลีชา ไจ้ะเว๊, “คลีง แช กแช่ยาเว อ ทน้า เท่อ, คลีง แช ทแม้น้า โพล้ง ซีเรีย, เมะเว๊ น ม ดึ้ซึ้ ดี๊ โพล้ง ซีเรีย ลู่ง อาเฟะ, ท้อง ลู่ง ม เกม๊า อ ซื๊งเว๊ เลาไฆวะ”

¹⁸ ดี๊ เอลีชา ไจ้ะเว๊, “ม๊า น พองนี่ คลีง แช ลแพ นอ”, ดี๊ อ เว๊ พองนี่ คลีง แช, ฌ้อง โล้ เอะ กจุ้แฆว้ ค่าง อีซลาเอง ไจ้ะเว๊, “แม้นี่ คลีง แช เป้ล้าง ฌางคู คู”, ดี๊ อ เว๊ เป้ ฌางคู คู ซ๊า ทีง, ฌ้อง โอโท๊ เฆาะ

¹⁹ ฌ้อง โพล้ง กแช่แยว้ เว๊ นอ, อ ซ้ะ ทาง ดี๊-อ้ะ ดี๊ ไจ้ะเว๊, “เกิ้ง น ม เป้-อ้ะ เย่ ทีง ฆู๊ง ทีง, ฌ้อง น ม ดึ้ ค่าง ซีเรีย ท้อง ลู่ง น ม แม้ เลาไฆวะ-อ้ะ, แบเด้าะ ค๊องเนงอี้ง นอ, น ม ดึ้-อ้ะ ซี ซ๊า พ๊า เฆาะ ล้อ”

²⁰ เอลีชา ซี๊ง เว๊, โพล้ง เคิงล้างบ้า-อ้ะ, โพล้ง โมอา เฌา เฌ๊ ดึ้ซรอง เท่อ ลู่ง ที๊งล่างค่างพ้า ล จอง นอ, ลู่ง เนง ทาง ซ๊าง แค๊

²¹ โอ ล พ๊า, พี่ โพล้ง ลี้ เคิงล้างบ้า โพล้ง ล แฌ้ อ จู นอ, แคว่เซ้อ, อ ซื๊งเว๊ แด โพล้งดึ้ซรองเท่อโป้ง, ฌ้อง ไควะล้าง โพล้ง แคว๊ ล แฌ้ นอ อ จู, ลู่ง เอลีชา อ ทพ้า, ท่อง โพล้ง แคว๊ ล แฌ้ อ จู แบ ดี๊ เอลีชา อ ฆีง นอ, โพล้ง แคว๊ ล แฌ้ นอ ม๊าทางไท้ เฌ้เทิงทาง ชี๊เทิง

โพล้ง อีซลาเอง ดึ้นี่ไท้ เว่ง ดี๊ โพล้ง ซีเรีย

²² อาซาเอง กจุ้แฆว้ ค่าง ซีเรีย, แม้น้ะแม้โน๊ง โพล้ง อีซลาเอง เพล้า เยโฮอาฮ้ะ อ ชู้

²³ แบเด้าะ กแช่ยาเว ย๊างเซิงย๊างซ้ะ แบ อ ซื๊งเว๊, ดี๊ กแช่แยว้ วีงไท้ อ ซ้ะ เฌ๊ฌูง อ ซื๊งเว๊, เมะเว๊ ทเอิ้งล้าง พี่ อ แม้ เว๊ ดี๊ อาบราฮาง, อีซาฮ้ะ, ดี๊ ยาคุ้, นอ ล แม้เฌ๊ฌ้อง เว๊ แบ, ล โฌ๊ไจไฆวะ อ ซื๊งเว๊, ม๊า พ้องไฆวะ ดี๊ อ เมะ แบ ท้อง ค๊องเนงอี้ง ล้อ

²⁴ ท่อง กจุ้แฆว้ ค่าง ซีเรีย ซี๊งไฆวะ เย้า นอ, อ พูแคว๊ เบงฮาดะ ทาง โพะคอง เท่อ เท่งก้ะ อ ล่าง

²⁵ ฌ้อง เยโฮอาฮ้ะ อ พูแคว๊ โยอ้ะ, ดึ้นี่ไท้ กเย่ เว่ง ดี๊ ฮาซาเอง อ พู เบงฮาดะ นอ, เก เว่ง พี่ อ เว๊ ดึ้นี่ไท้ เว๊, ดี๊ เยโฮอะ อ แพ่ เยโฮอาฮ้ะ พี่ อ ดึ้ โละซ้ะ นอ, โยอ้ะ ดึ้ เท่อ น้า-อ้ะ ซ๊า พ๊า, ดี๊ นี่แบ ไท้ กเย่ เว่ง อีซลาเอง ลแพ นอ ล้อ