1ซามูเอง 28 - Northern Pwo Karen Thai Bible

¹ โอก้ะ ล พ๊า แย๊ นอ, โพล้ง ฟีลีเตีย กุ้ซยอง อ ซึ้พูมู๊ง, บี่ซุ้ ม ดึ้ซึ้ โละอซ้ะ ดี๊ โพล้ง อีซลาเอง, ดี๊ อาคิ้ โล้ เอะ ดาเว ไจ้ะเว๊, “เกม๊า น ซีงแฌ๊ ล้างที๊ง บี่อี้ง, แน้ ดี๊ น ซกุ้ ม ไจทาง ลี้ ดึ้ซึ้ เท่อ ดี๊ เฆ้อ”

² ดาเว ไคล้ ดี๊ อาคิ้ ไจ้ะเว๊, “ฌี้ เต้ๆ, ล้อ, กแช่-เอ้อ, น ม ซีงแฌ๊-อ้ะ น เพล่ ม แม้ ทเม้งเล้ ซี”, ดี๊ อาคิ้ โล้ เอะ ดาเว ไจ้ะเว๊, “ฌี้ เย้า จ ม ต๊างทาง แน้, เก โพล้ง ยู่แคว่ทะ แย้ ครึๆ, ล้อ”

ซาอู อางจ้ะนี่ เท่อ ดี๊ ตี้งน่าง

³ ท่อง ซามูเอง ซี๊งไฆวะ เย้า นอ, โพล้ง อีซลาเอง กุ้ แฌ้ มองแบ เว๊, ดี๊ เคิงล้างบ้า เว๊ อ จู ลู่ง อ กแช่ อ เว่ง รามา พ้า ดี๊ ซาอู นอ แม้ซี๊งไฆวะ กเย่ ตี้งน่าง, ดี๊ ซระแคว่มื่งแคว่แล้, ลู่ง ที๊งล่างค่างพ้า นอ

⁴ โพล้ง ฟีลีเตีย เฌ๊ โอซยอง โละอซ้ะ, ดี๊ เฌ๊ ช๊างล้าง อ ล่างโอซยอง ลู่ง ชูเนง พ้า, ดี๊ ซาอู นอ อางกีซยองนี่ โพล้ง อีซลาเอง เลาพะ, ดี๊ ช๊างล้างนี่ อ ล่างโอซยอง ลู่ง กีโบอา พ้า

⁵ ท่อง ซาอู แคว่ โพล้ง ฟีลีเตีย อ ซึ้พูมู๊ง นอ ซ้ะเม เว๊, ดี๊ อ ซ้ะ ว้ะโทะ น้ะ มะ

⁶ ดี๊ พี่ ซาอู อางจ้ะ กแช่ยาเว นอ, กแช่ยาเว ล ไคล้ช๊า-อ้ะ น่าง เม้ง แบ, ลู่ง ทอางมี๊งม่าง พ้า ฌี้, ดี๊ อูรี ฌี้ ดี๊ โมไคล้คิ้กแช่แย้ว ฌี้

⁷ ซาอู โล้ เอะ อ เพล่ดู ลแพ นอ ไจ้ะเว๊, “ลี้ อางฆื๊ง แคว่นี่ เอะ แย้ กมืง พี่ อ เก ตี้งน่าง นอ, บี่ซุ้ จ ม ลี้ฌูง-อ้ะ ดี๊ อางจ้ะ เท่อ ดี๊-อ้ะ”, อ เพล่ดู โล้ เอะ-อ้ะ ไจ้ะเว๊, “แคว่เซ้อ, ตี้งน่าง มืง โอ ล แฌ้ ลู่ง เฌง เองโด พ้า”

⁸ ซาอู แม้ ดุ้ อ ซ้ะ ล เกม๊า โพล้ง ซีงแฌ๊-อ้ะ แบ, ดี๊ ซุ้ อ ไช๊ อ ช้าง อ แฌ้แพ, ไจทาง ลี้ ดี๊ กแคว๊ คี๊ง แฌ้, ลี้ฌูง ตี้งน่าง มืง ลู่ง มแน้ แค๊, ดี๊ ไจ้ะเว๊, “เกม๊า น กุ้ทางนี่ โพล้ง ซี๊ง อ วีง อ แล้ พ้ะเว้ เอะ จ เท่อ, ดี๊ กุ้นี่ โพล้ง ล แฌ้ แย๊, พี่ จ ม โล้ เอะ แน้ ม๊า อ เฌ๊ทาง”

⁹ กมืง ล แฌ้ นอ ไคล้ช๊า-อ้ะ ไจ้ะเว๊, “แคว่เซ้อ, น ซีงแฌ๊-อ้ะ เย้า ซาอู แม้ ทเม้งเล้, พี่ อ เว๊ แม้ซี๊งไฆวะ โพล้ง เก ตี้งน่าง, ดี๊ ซระแคว่เท่อ, ลู่ง ที๊งล่างค่างพ้า อี้ง, แม้ทเล้?, น เฌ๊ อางกีล้าง ทดุ้นี่ จ ทโอม๊า เด้าะ?”

¹⁰ แบเด้าะ ซาอู อืงล้าง อ ซ้ะ ดี๊ กมืง ล แฌ้ นอ, ลู่ง กแช่ยาเว อ เม้ง ไจ้ะเว๊, “กแช่ยาเว โอม๊า ได้ะ บี่จะเล้ นอ, ลู่ง ท ลแพ อี้ง อ กย้อง นอ, ทไพ้ะทแม ล โอ ลู่ง น ฌ่าง แบ ล้อ”

¹¹ กมืง นอ อางจ้ะ-อ้ะ ไจ้ะเว๊, “น ม เกม๊า จ กุ้ทางนี่ เอะ แน้ โพล้ง เล้?”, ซาอู ไจ้ เว๊, “กุ้ทางนี่ เอะ แย้ ซามูเอง”

¹² ดี๊ ท่อง กมืง ล แฌ้ นอ แด ซามูเอง นอ, อ เว๊ กุ้ซย้ะ พ้ะดู เท่อ, กมืง นอ โล้ เอะ ซาอู ไจ้ะเว๊, “แบทเล้, แน้ น โกง ดุ้ แย้?, แน้ น เก ซาอู ล้อ”

¹³ กจุ้แฆว้ โล้ เอะ กมืง นอ ไจ้ะเว๊, “ซ้ะเม เท่อ ล ฌี้, น แด แบ ทเม้งเล้?”, ดี๊ กมืง นอ โล้ เอะ ซาอู ไจ้ะเว๊, “จ แด ทกโช้งกแช่ ล แฌ้ โอ ลู่ง ฌางคู พ้า เฌ๊ทาง”

¹⁴ ซาอู อางจ้ะ กมืง นอ ไจ้ะเว๊, “อ เค่ง อ ฌ้าง แม้ อ ซ้ะ บี่จะเล้?”, ดี๊ กมืง โล้ เอะ-อ้ะ ไจ้ะเว๊, “เก กแคว๊ ซ้ะแซย่ เฌ๊ทาง, โอ ดี๊ ไช๊แค่ พ้ะโท๊”, ซาอู ซีงแฌ๊ เว๊ อ นอ เก ซามูเอง, อ เว๊ ซย๊องล้าง อ ซ้ะ อ เมะ ท้องล้าง ฌางคู คู

¹⁵ ฌ้อง ซามูเอง ไคล้ ดี๊ ซาอู ไจ้ะเว๊, “น เฌ๊ เจ่ปได้ แย้ ลู่ง ทกุ้ทาง แย้ แม้ ทเม้งเล้?”, ซาอู ไคล้ช๊า-อ้ะ ไจ้ะเว๊, “จ โอ ดี๊ ท อึ้เซิง ก้ะซ้ะ น้ะ มะ, เมะเว๊ โพล้ง ฟีลีเตีย ซีงลแพ นอ, เฌ๊ ดึ้ซึ้โละซ้ะ ดี๊ แย้, ดี๊ กแช่แยว้ วีงไฆวะ อ ซ้ะ ดี๊ แย้ เย้า, ล โล้ช๊า แย้ ล้าแบ เฆาะ, ลู่ง โม ไคล้คิ้ กแช่แยว้ ฌี้, ลู่ง ทอางมี๊งม่าง พ้า ฌี้, จ กุ้ทาง แน้, บี่ซุ้ น ม โล้ แบ แย้ จ ม แม้ บี่จะเล้ ม ฌี้

¹⁶ ดี๊ ซามูเอง ไคล้ช๊า-อ้ะ ไจ้ะเว๊, “กแช่ยาเว เมะ วีงแซยไฆวะ อ ซ้ะ ดี๊ แน้ เย้า, ดี๊ เก น ดีง น แด้ นอ น อางจ้ะ แย้ แม้ ทเม้งเล้?

¹⁷ กแช่ยาเว แม้ เอะ แน้, ด้องซุ้ พี่ อ โล้ เว๊ ดี๊ แย้ เย้า นอ ล้อ, เมะเว๊ กแช่ยาเว ซย๊างยะไฆวะ บ้าง มื่ง นอ ลู่ง น จูง พ้า, ดี๊ เกล๊างก้ะ โพล้ง อ แฌ้แพ เมะเว๊ ดาเว

¹⁸ เป๊งนี่ น ล ชู่ง กแช่ยาเว อ ลู่ง แบ, น ล แม้โพะ อ ทซ้ะทาง อ ไค๊, พี่ อ โอ ดี๊ โพล้ง อามาเละ นอ แบ, เมะ บี่ นอ กแช่ยาเว แม้ เอะ แน้ เท่อ บี่อี้ง ล นี้ง แย้ อี้ง

¹⁹ ล ก้ะ ได้ะ แบ นอ, กแช่ยาเว ม อางกีล้าง โพล้ง อีซลาเอง เลา ดี๊ แน้ นอ, ลู่ง โพล้ง ฟีลีเตีย อ จูง พ้า, ลู่ง โฌ้ โฆะ แน้ ดี๊ น พูแคว๊ กุ้ แฌ้ นอ ม โอ ดี๊ แย้, ดี๊ กแช่ยาเว ม อางกีล้าง ซึ้พู อีซลาเอง น๊างมู๊ง, ลู่ง โพล้ง ฟีลีเตีย อ จูง พ้า ปะ”

²⁰ ฌ้อง นอ ซาอู ล้างเทะเค้า, จองตเละ พ้ะโท๊ อ คาง ฌางคู คู ล ทีง ฆ่าง, อ เว๊ ซ้ะเม เท่อ ลู่ง ซามูเอง อ ทไคล้ อ กย้อง นอ เต้ๆ, ดี๊ อ ไฌ่ อ แบ้ ล โอ น่าง ปี๊ ล้าแบ, เป๊งนี่ ล อาง ล โอ้ เท่อ น่างปี๊ แบ ล นี้ง ดี๊ ล แน้ เย้า

²¹ กมืง นอ เฌ๊ฆ้าง ฌูง ซาอู, ท่อง อ แด เว๊ ซาอู อ เซิง ล้างแช่ อ ซ้ะ ล้างแช่ น้ะ นอ อ ไจ้ะเว๊, “แคว่เซ้อ, น เพล่ มืง คุ้ช๊องแน แน้, ญ่อง ซี๊งล้าง ซ้ะ, ดี๊ ญ่อง คุ้ช๊องแน น ทไคล้, พี่ น โล้ เอะ แย้ นอ กุ้ อ เม้ง

²² ทบี่นอ, เกม๊า น คุ้ช๊องแน น เพล่ มืง อ ลู่ง ล น้าง ไช้ะ, เกม๊า แย้ จ เทว๊ แบ เอะ แน้, ทอางทโอ้ ล ปี๊ ม๊า น อาง-อ้ะ, บี่ซุ้ น ไฌ่ น แบ้ ม โอทาง, พี่ น ไท้ ลู่ง น เกล้ น พ้า นอ”

²³ อ เว๊ ซม๊า เว๊, ไจ้ะเว๊, “จ ล อาง แบ”, แบเด้าะ อ เพล่ดู ซีง ดี๊ กมืง นอ, อวีงซ้ะชู้-อ้ะ อ เว๊ ช๊องแน อ ซื๊งเว๊ อ ลู่ง ล้อ, ซาอู เฌ้เทิงทาง ฌางคู คู, ฌ้อง ชี๊น้าง ลู่ง ล่างมี๊ง คู

²⁴ กมืง นอ อ งู้ พู บองอืง ลู่ง อ เด้า นอ โอ ล ดื้ง, อ เว๊ ปชื่ง แม้ซี๊ง เว๊, ดี๊ แม้นี่ ฌื๊งไน้ะ ชี่งไพะ เว๊, ดี๊ อางแก เว๊ แม้ กู ล แบ ดี๊ อ ซีง แบ

²⁵ กมืง นอ เฌ๊ โชะ อางกีล้าง เอะ ซาอู, ดี๊ อ เพล่ดู ลแพ นอ, ดี๊ อ เท่อ อาง เว๊, ฌ้อง อ ซื๊งเว๊ เฌ้เทิงทาง ไท้ ล แน้ แย๊ นอ ไวะ