1ซามูเอง 22 - Northern Pwo Karen Thai Bible

ดาเว ดี๊ โพล้ง พี่ โพะ อ ไค๊ ลู่ง อะดูงลาง พ้า

¹ ดาเว ไจแดไฆวะ พี่ นอ, ลี้ โอคุ้ซูง ลู่ง ไล๊ อะดูงลาง พ้า ท่อง อ วี่ โจ้, ดี๊ โพล้ง ลู่ง อ แพ่ อ เด้าคูล่างพ้า เลาพะ, แน่ฌ๊า เว๊ อ ไฌ่ อ กย้อง นอ, อ ซื๊งเว๊ ลี้ล้างฌูง เว๊ พี่ นอ

² ล ก้ะ ได้ะ แบ นอ, โพล้ง กุ้ อ แฌ้ พี่ โอ ดี๊ ทน้ะทโน๊ง, ดี๊ โพล้ง กุ้ อ แฌ้ พี่ โอดีงโอแม่, ดี๊ โพล้ง กุ้ อ แฌ้ พี่ อ ซ้ะ พ้า โอ ดี๊ ทไก้ะทแค นอ, เฌ๊ฌูง ซยอง ดาเว, ดี๊ ดาเว เก เอะ โพล้ง ลแพ นอ อคูอแน่, โพล้ง เฌ๊ โอซยอง ล มู๊ง ฆ่าง ดี๊-อ้ะ, เมาะ เว๊ ลี่ง แย้ แฌ้

³ ดาเว ไจทางไฆวะ พี่ นอ, ลี้ ลู่ง เว่ง มีซปา ค่าง โมอา พ้า, ดี๊ อ เว๊ โล้ เอะ กจุ้แฆว้ ลู่ง เว่ง โมอา พ้า ไจ้ะเว๊, “เกม๊าเต้ จ มู่ จ แพ่ เฌ๊ โอ ดี๊ แน้ ไช้ะ, ท้อง ลู่ง จ ม ซีงแฌ๊-อ้ะ, กแช่แยว้ ม แม้ ทเม้งเล้ ลู่ง จ ฌ่าง พ้า”

⁴ ดี๊ ดาเว เฌ๊ฌ้า อ มู่ อ แพ่, เกม๊า โอ ดี๊ กจุ้แฆว้ ลู่ง โมอา, ดี๊ อ ซื๊งเว๊ โอ ดี๊ กจุ้แฆว้ ครึๆ, พี่ ดาเว โอ ลู่ง ทล่าง ทุ้กดื้ง ซ้ะ, ลู่ง ไล๊ พ้า อ แค๊ นอ

⁵ ฌ้อง โมไคล้คิ้กแช่แย้ว พี่ อ เก โพล้ง กะ นอ, โล้ เอะ ดาเว ไจ้ะเว๊, “ม๊า น โอ ทล่าง ทุ้กดื้ง ซ้ะ ลู่ง ไล๊ พ้า อี้ง ล ฌี้, เกม๊า น ลี้ นึฆ้าง ลู่ง ที๊งล่างค่างพ้า ยูดา นอ แดเทา”, ดาเว ลี้ เว๊ ดี๊ เฌ๊ โอ ลู่ง ทเค แกล้ เฮเร นอ ล้อ

ซาอู แม้ซี๊ง โพล้งลื่งเท่ออคู เว่ง โน้ะ

⁶ ซาอู ซีงแฌ๊ โค เว๊ โพล้ง แด ดาเว, ดี๊ โพล้ง พี่ อ โอ ดี๊-อ้ะ ลแพ นอ, ล โท้ แย๊ นอ ซาอู โอ ลู่ง เว่ง กีเบอา ลู่ง ซย๊องทไค้ะซวี๊ง คางไท้ะ, ลู่ง ทลู่ง พ้ะโท๊ คู, โชะ ดี๊ พ้าง, ดี๊ อ เพล่ดู ซีงลแพ นอ ชี๊เทิง โอ วะ อ ฆ้อง

⁷ ดี๊ ซาอู ไคล้ ดี๊ อ เพล่ดู, พี่ ชี๊เทิง โอ วะ อ ฆ้อง นอ ไจ้ะเว๊, “น ซื๊ง โพล้ง เบงยามีง อ พู อ ลี้ง ลแพ ซีง-เอ้อ, ม๊า น ช๊องแน, เจซี อ พู ม เกล๊าง เอะ น ซื๊ง ไชะ ดี๊ โซ๊ง ซไบ้ะ แซ-อ้า?, ม ต๊างทาง น ซื๊ง เก โพล้ง ยู่แคว่ ซึ้คู อ แฌ้ ล ม๊า อ แฌ้ ล แย้ โบ่?

⁸ น ซื๊ง เลาพะ นอ ช๊องมอง กไบล้ะ เท่อ ดี๊ แย้, โพล้ง ล โอ โล้ เอะ แย้ น่าง แฌ้ แบ, พี่ จ พู แม้ ทเอิ้งล้าง โละซ้ะ ดี๊ เจซี อ พู นอ, โพล้ง ลู่ง น ซื๊ง แกล้, ล โท่งฆึ ทน้ะทโน๊ง ดี๊ แย้ น่าง แฌ้ แบ, ดี๊ ล โล้ เอะ แย้ แบ, พี่ จ พู ดึ้ชู้งดึ้ไอ จ เพล่, เกม๊า เว๊ อ ดึ้ ไท้ แย้, โอ คุ้ล้างคุ้ซูง แย้ ด้องซุ้ กุ้ มื่ง นี้ง อี้ง”

⁹ โดเอะ โพล้ง เอโดง, พี่ โอ ดี๊ ซาอู อ เพล่ดู ซีงลแพ นอ, ไคล้ช๊า-อ้ะ ไจ้ะเว๊, “จ แด เจซี อ พู เฌ๊ ลู่ง เว่ง โน้ะ พ้า, เฌ๊ฌูง อาฮีทู อ พู เมะเว๊ อาฮีเมเละ

¹⁰ ฌ้อง อาฮีเมเละ ชูแพ เท่อ อางจ้ะ กแช่ยาเว เอะ เว๊, ดี๊ เกล๊าง เอะ เว๊ ทอาง, ดี๊ เกม๊า เอะ เว๊ โกลีอ้ะ โพล้ง ฟีลีเตีย อ น้ะ นอ เอะ-อ้ะ

¹¹ ฌ้อง กจุ้แฆว้ เจ่ทาง โพล้ง, ลี้ กุ้นี่ อาฮีทู อ พูแคว๊ อาฮีเมเละ โพล้งลื่งเท่ออคู นอ, ดี๊ อ แพ่ อชื้ออชะ กุ้ แฌ้, พี่ อ เก โพล้งลื่งเท่ออคู ลู่ง เว่ง โน้ะ พ้า, กุ้ อ แฌ้ นอ เฌ๊ฌูง กจุ้แฆว้

¹² ดี๊ ซาอู ไจ้ะเว๊, “อาฮีทู อ พู-เอ้อ, คุ้ช๊องแน แดเทา”, อ เว๊ ไคล้ช๊า-อ้ะ ไจ้ะเว๊, “จ เซงคู-เอ้อ, จ โอ พี่ อี้ง”

¹³ ซาอู อางจ้ะ-อ้ะ ไจ้ะเว๊, “แบทเล้, น ซื๊งซีง ฆู๊ง โละซ้ะ กไบล้ะ ดี๊ แย้, เลา ดี๊ แน้ ดี๊ เจซี อ พู พี่ น เกล๊าง เอะ-อ้ะ กู ดี๊ น้ะ, ดี๊ น อางจ้ะ กแช่แยว้ เอะ-อ้ะ?, อ เว๊ เฌ้เทิงทาง ดึ้ ไท้ แย้, ดี๊ โอคุ้ล้างคุ้ซูง จ เกล้ ด้องซุ้ กุ้ มื่ง นี้ง อี้ง”

¹⁴ อาฮีเมเละ ไคล้ช๊า กจุ้แฆว้ ไจ้ะเว๊, “กเย่ น กดูกแซย่ ลแพ นอ, โอ ล แฌ้ๆ, ชี่-อ้า, พี่ อโต้อล้อง บี่ซุ้ ดี๊ ดาเว กจุ้แฆว้ อ มะ, พี่ อ เก ซึ้พูมู๊งอคูดู, ดี๊ เก โพล้ง พี่ โอ ดี๊ อ ฆี๊ง อ แล้ ลู่ง น บลาง พ้า?

¹⁵ ล นี้ง แย๊ อี้ง จ นี่ อางท่าง เท่อ ดี๊ กแช่แยว้, ลู่ง อ เว๊ อ ฌ่าง อ วี่งคู พ๊า เมะ เต้ๆ, โบ่?, ล เมะ บี่นอ แบ เฆาะ, ม๊า กจุ้แฆว้ ไคล้ ชางแบ น เพล่, ดี๊ กเย่ โพล้ง ลู่ง จ แพ่ อ เด้าคูล่างพ้า น่าง เม้ง ล ฌี้, เมะเว๊ ทไฌ่ เลาพะ อี้ง นอ, น เพล่ ล ซีงแฌ๊ เว๊ แบ เฆาะ, ทึเมะ แอ ฌี้ แซย้ ฌี้”

¹⁶ กจุ้แฆว้ ไจ้ะเว๊, “อาฮีเมเละ น แบ ซี๊ง เต้ๆ, ล้อ, เลา ดี๊ แน้ ดี๊ น แพ่ อชื้ออชะ ปะ”

¹⁷ ดี๊ กจุ้แฆว้ อางแบเลา อ เพล่ พี่ โอ แคว่ทะ-อ้ะ, พี่ ชี๊เทิง โอคุ้ทะ-อ้ะ นอ ไจ้ะเว๊, “วีงไท้ น ซ้ะ แม้ซี๊ง ไฆวะ กแช่ยาเว อ โพล้งลื่งเท่ออคู ลแพ อี้ง, เมะเว๊ อ ซื๊งเว๊ อ จูง โอ ล แพ้ ฆ่าง ดี๊ ดาเว, ดี๊ อ ซื๊งเว๊ ซีงแฌ๊ เว๊ เย้า อ เท่อ ไจคุ้ซูงไฆวะ, แบเด้าะ ล โล้ เอะ แย้ ม๊า จ ซีงแฌ๊ แบ”, แบเด้าะ กจุ้แฆว้ อ กดูกแซย่ ลแพ นอ, ล ญ่อง แม้ซี๊ง กแช่ยาเว อ โพล้งลื่งเท่ออคู นอ แบ

¹⁸ ฌ้อง กจุ้แฆว้ ไคล้ ดี๊ โดเอะ ไจ้ะเว๊, “เกม๊า น วีงไท้ซ้ะ แม้ซี๊ง โพล้งลื่งเท่ออคู ลแพ นอ”, โดเอะ โพล้ง เอโดง, วีงไท้ อ ซ้ะ กล้าง ซี๊ง โพล้งลื่งเท่ออคู ลแพ นอ, ล นี้ง แย๊ นอ, อ เว๊ แม้ซี๊ง โพล้ง แคว๊, พี่ อ ซุ้ ไช๊อเบงคูลท๊า พี่ ไต้ เว๊ ดี๊ ตไก้ยะ ลูง ไว้ะไก้ นอ, โฆะ ชี๊ง เย่ แฌ้

¹⁹ ดี๊ อ เว๊ แม้ซี๊ง โพล้ง เว่ง โน้ะ, พี่ อ เก โพล้งลื่งเท่ออคู อ เว่ง นอ ดี๊ น้ะ, แม้ซี๊ง เว๊ เลา ดี๊ โพล้ง มืง โพล้ง แคว๊, พืงแซ, ดี๊ พืงแซ พี่ อ อางนู่ง ได้ะ, งู้, แลว้, ดี๊ แกะ นอ ดี๊ น้ะ

²⁰ แบเด้าะ อาฮีทู อ พู เมะเว๊ อาฮีเมเละ นอ, อ พูแคว๊ โอ ล แฌ้ อ เม้ง อาบียาทา, พ้องพลิ้ไฆวะ ดี๊ ทแม้ซี๊ง, ดี๊ ไจคุ้ซูง โพะ ดาเว อ ไค๊

²¹ อาบียาทา โล้ เอะ ดาเว ไจ้ะเว๊, ซาอู แม้ซี๊ง กแช่ยาเว อ โพล้งลื่งเท่ออคู

²² ดาเว ไคล้ ดี๊ อาบียาทา ไจ้ะเว๊, “ล นี้ง แย๊ พี่ โดเอะ โพล้ง เอโดง โอ พี่ นอๆ, ก ซีงแฌ๊ เย้า อ เว๊ ม โล้ เอะ ซาอู เต้ๆ, ล้อ, กเย่ โพล้ง ลู่ง น แพ่ อชื้ออชะ ซี๊ง ทาง นอ, เป๊งนี่ แย้ อี้ง ล้อ

²³ โอก้ะ ดี๊ แย้ อี้ง แดเทา, ซ้ะเม เท่อ ล ฌี้, เมะเว๊ โพล้ง พี่ อ อางฆื๊ง แม้ซี๊ง แย้ นอ, อางฆื๊ง แม้ซี๊ง แน้ ปะ ล้อ, แบเด้าะ น ม โอซยืงโอบ้ะ พี่ น โอ ดี๊ แย้ นอ ล้อ”