1ซามูเอง 20 - Northern Pwo Karen Thai Bible

ดาเว ดี๊ โยนาทาง เก ฌุ้พาง โละซ้ะ

¹ ดาเว ไจแดไฆวะ นาโยะ เว่ง รามา พ้า, ดี๊ เฌ๊ โล้ เว๊ ลู่ง โยนาทาง อ เมะแซ พ้า ไจ้ะเว๊, “จ แม้ แบ ทเม้งเล้?, ทเม้งเล้, เก จ ทไพ้ะทแม?, ดี๊ จ แม้ ทเด้บ้ะ แบ น แพ่ บี่จะเล้?, อ เว๊ แบ อ ซ้ะ แม้ซี๊ง มะ แย้?”

² โยนาทาง ไคล้ช๊า-อ้ะ ไจ้ะเว๊, “ล เมะ บี่นอ แบ เต้ๆ, ล้อ, น ล ซี๊ง แบ, แคว่เซ้อ, จ แพ่ ล นี่ แม้ ทอดู อ ปี๊ น่าง เม้ง แบ, พี่ ล เกม๊า จ ซีงแฌ๊ แบ, แม้ทเล้, จ แพ่ ม อางกีไบ้ะ ทลแพ อี้ง เอะ แย้?, ล เกทาง อ ซ้ะ บี่นอ แบ เต้ๆ, ล้อ”

³ แบเด้าะ ดาเว ชูล้าง อ ซ้ะ ไจ้ะเว๊, “น แพ่ ซีงแฌ๊ เว๊ ฌี้ ทึ บี่อี้ง, แย้ จ เก โพล้ง ลู่ง อ แบเมะล้างซ้ะ แน้, ดี๊ ซาอู ช๊องมอง เว๊, ‘เกม๊า โยนาทาง ซีงแฌ๊ ท ล ไฌ่ อี้ง ล ฌี้ เฆาะ, ไค๊ไก้ะ อ ซ้ะ ม เฌ๊ฌ้อง’, แบเด้าะ เต้ๆ, นอ, เมะเว๊ กแช่ยาเว โอม๊า บี่จะเล้, ดี๊ น โอม๊า บี่จะเล้ นอ, แย้ ดี๊ ทซี๊ง นอ โอก้ะ ล แค๊ เฆาะ”

⁴ โยนาทาง ไคล้ ดี๊ ดาเว ไจ้ะเว๊, “มึ น ซ้ะ บี่จะเล้ นอ, จ ม แม้โพะ อ ไค๊ ลู่ง น ฌ่าง ล้อ”

⁵ ดาเว ไคล้ ดี๊ โยนาทาง ไจ้ะเว๊, “แคว่เซ้อ, ลู่ง โฌ้ โฆะ เก มื่ง ทาง ซ๊าง ล นี้ง แย้ จ แบ ชี๊น้าง อางซยอง เท่อ ดี๊ กจุ้แฆว้, แบเด้าะ เปล้ แย้ เกม๊า จ ลี้ โอคุ้ซูง ลู่ง ญ้าง พ้า ทเคแกล้, ท๊อง อ ท้อง ลู่ง กี๊ ตโฌ้ มื่งแฌล้าง โค๊

⁶ น แพ่ เมะ แคว่ที๊ง เว๊ เต้ๆ, แด เว๊ จ ล โอ แบ นอ, เกม๊า น โล้ เอะ-อ้ะ บี่อี้ง, ‘ดาเว อางท่าง แย้ ปชื่ง ไท้ ลู่ง เบเลเฮง อ กแช่ อ เว่ง พ้า, เมะเว๊ โพล้ง กุ้ แฌ้ ลู่ง ล ดอง ฆ่าง ดี๊-อ้ะ นอ, แบ เทว๊ ทพูแฆ่ ลื่งทาง เท่อ ลู่ง ล เนงๆ, อ ฌ่าง กุ้ อ เนง’

⁷ อ เว๊ เมะ ไจ้ะเว๊, ‘ฌี้ เย้า’, นอ น เพล่ ม โอ มึ โอ พ้า เว๊ ล้อ, แบเด้าะ อ เว๊ อ ซ้ะ เมะ ทาง เต้ๆ, นอ, ซีงแฌ๊-อ้ะ ซี บี่อี้ง, อ เว๊ ม แม้ เท่อ อ อ้า นอ ล้อ

⁸ เกม๊า น เนโพลทาง ทเอ ลู่ง อเฌิ่งอค๊า เอะ น เพล่, บี่ซุ้ ดี๊ น เฌ๊ฌ้า น เพล่, เฌ๊ นึฆ้าง ลู่ง กแช่ยาเว อ ทเอิ้งล้าง พ้า ดี๊ แน้, แบเด้าะ จ ทไพ้ะทแม เมะ โอ นอ, เกม๊า น แม้ซี๊ง แย้, แม้ทเล้?, น ม ลี้ฌ้า แย้ เกม๊า เอะ น แพ่”

⁹ โยนาทาง ไจ้ะเว๊, “เกม๊า แม้ อ ซ้ะ บี่นอ, ลู่ง น ฌ่าง ล ฌี้ เฆาะ, จ เมะ ซีงแฌ๊-อ้ะ เต้ๆ, จ แพ่ ช๊องมอง ทอ้าทซ๊าง ลู่ง น ฌ่าง นอ, จ ม ล ลี้ โล้ เอะ แน้ แบ-อ้า?”

¹⁰ ฌ้อง นอ ดาเว โล้ เอะ โยนาทาง ไจ้ะเว๊, “น แพ่ เมะ ไคล้ช๊า แน้ ชองโฆะ นอ, โพล้ง เล้, ม โล้ เอะ แย้?”

¹¹ ดี๊ โยนาทาง โล้ เอะ ดาเว ไจ้ะเว๊, “เฌ๊ แดเทา ม๊า ก ลี้ ลู่ง ญ้าง พ้า ทเคแกล้”, ฌ้อง คี๊ง แฌ้ นอ ลี้ ลู่ง ญ้าง พ้า ทเคแกล้ ไวะ

¹² โยนาทาง โล้ เอะ ดาเว ไจ้ะเว๊, “เกม๊า กแช่ยาเว, โพล้ง อีซลาเอง อ กแช่แยว้ เก พีงญาง, พี่ จ แคว่ ที๊ง จ แพ่ ลู่ง โฌ้ โฆะ อช๊าอโท่, เมาะ แค๊ ล ว๊าง แย๊ อี้ง ฌี้, ลู่ง กี๊ ตโฌ้ โฆะ ฌี้, แคว่เซ้อ, ทเมะ โอ เม้งๆ, พี่ ฌี้ ลู่ง ดาเว อ ฌ่าง นอ, จ ม เจ่ทาง โพล้ง ลี้ โล้ แบ แน้, เกม๊า น ซีงแฌ๊ ล้างที๊ง-อ้ะ ล้อ?

¹³ แบเด้าะ จ แพ่ เมะ แบ อ ซ้ะ แม้อ้าแม้ซ๊าง แน้, ดี๊ จ เมะ ล โล้ ซีงแฌ๊ เอะ แน้ แบ, ดี๊ ล โซ๊ง แน้ ลี้ ดี๊ ทมึทพ้า แบ นอ, เกม๊า กแช่ยาเว แม้ เอะ โยนาทาง ดี๊ แอทาง ได้ะ, เกม๊า กแช่ยาเว โอ ดี๊ แน้, ด้องซุ้ พี่ โอ ดี๊ จ แพ่ อู้ง นอ ไช้ะ

¹⁴ จ เมะ โอม๊า ได้ะ นอ, เกม๊า น เนโพลทาง กแช่ยาเว อ ทเอทกวี้ง, ลู่ง อเฌิ่งอค๊า เอะ แย้, แบเด้าะ จ เมะ ซี๊ง นอ

¹⁵ เกม๊า น แม้เทะไฆวะ น ทเอทกวี้ง ลู่ง อเฌิ่งอค๊า นอ, ดี๊ จ ชื้อ จ ชะ ล ฌี้ ล้างชู้ ดี๊ โอโท๊ ล ฌี้, ทึเมะ พี่ กแช่ยาเว แม้ไฆวะ ดาเว อดีงอแด้ เลาพะ, ลู่ง ฌางคูโคล๊งคู เย้า โฆะ ฌี้ นอ”

¹⁶ โยนาทาง แม้ ทเอิ้งล้าง ดี๊ ดาเว อชื้ออชะ บี่อี้ง, “เกม๊าเต้ กแช่ยาเว แม้แกไท้ ดาเว อดีงอแด้ ซีงลแพ นอ ไช้ะ”

¹⁷ ดี๊ โยนาทาง เกม๊า ดาเว อืงล้าง เท่อ ล พ๊า เด้าะ, ดี๊ อ ทเอทกวี้ง พี่ อ เว๊ เอ เว๊ นอ, เมะเว๊ อ เว๊ เอ ดาเว, ด้องซุ้ อ เอ ล้าง ไท้ อ กแช่ อ ซ้ะ

¹⁸ ฌ้อง โยนาทาง ไคล้ ดี๊ ดาเว ไจ้ะเว๊, “ลู่ง โฌ้ โฆะ นอ, เก มื่ง ทาง ซ๊าง ล นี้ง, ดี๊ โพล้ง ม แด เว๊ น ล โอ แบ, เมะเว๊ น ล่าง ชี๊น้าง ม โอโปล้

¹⁹ พี่ น โอ ท้อง ซ๊า นี้ง เย้า นอ, กี๊ตโฌ้ ล นี้ง นอ เกม๊า น ลี้ล้าง เมะ เพล, ลี้ ลู่ง ทล่าง พี่ น โอคุ้ซูง ลี้ง เท่อ, ลู่ง มื่ง นี้ง พี่ ทกึทาง อ ซ้ะ อี้ง, ดี๊ โอ-อ้ะ ลู่ง ไล๊ เอเซง ฌ๊างไท้ะ นอ

²⁰ จ ม ค้ะ คลีง แช ซ๊า บ้อง ลี้ ลู่ง ทฆ้อง นอ, ด้องซุ้ จ ค้ะ เท่อ ล เม้ง

²¹ ดี๊ แคว่เซ้อ, จ ม เจ่ทาง พืงแซ ลี้, จ ม อางแบเลา-อ้ะ บี่อี้ง, ‘ม๊า ลี้ อางฆื๊ง คลีง แช’, จ เมะ ไคล้ ดี๊ พืงแซ เมาน่าง บี่อี้ง, ‘แคว่เซ้อ, คลีง แช ลแพ อี้ง โอ ลู่ง น ฆ้อง อี้งโค๊แพ้, ลี้ แม้นี่-อ้ะ’, ฌ้อง นอ เกม๊า น เฌ๊ฆ้าง, เมะเว๊ กแช่ยาเว โอม๊า บี่จะเล้ นอ, น โอ ดี๊ ทมึทพ้า เย้า, ทอ้าทซ๊าง ล โอ น่าง เม้ง แบ

²² จ เมะ ไคล้ ดี๊ พืงแซ แคว๊ นอ บี่อี้ง, ‘แคว่เซ้อ, คลีง แช โอ ลู่ง น เมะแซ พ้า อู้ง’, อ นอ เกม๊า น ลี้ไวะ, เมะเว๊ กแช่ยาเว โซ๊ง แน้ เกม๊า น ลี้

²³ ท อ ไฌ่ พี่ แน้ ดี๊ แย้ ก โล้ โละซ้ะ นอ, แคว่เซ้อ, กแช่ยาเว เก พีงญาง เอะ แน้ ดี๊ แย้, ล้างชู้ ล้างแกย นอ ล้อ”

²⁴ ดาเว โอคุ้ซูง ลู่ง ญ้าง พ้า ทเคแกล้, ดี๊ ท่อง อ ท้อง มื่งทาง ซ๊าง ล นี้ง นอ, กจุ้แฆว้ ชี๊น้าง อาง เท่อ โอ้ เท่อ

²⁵ กจุ้แฆว้ ชี๊น้าง โอ ลู่ง อ ล่าง ชี๊น้าง คู, ด้องซุ้ อ แม้ ลี้ง เว๊ นอ, เมะเว๊ ชี๊น้าง ลู่ง อ ล่าง ชี๊น้าง พี๊แด้ดองไท้ะ, โยนาทาง ชี๊เทิง, ดี๊ อะเนอ ชี๊น้าง โอ ซาอู อ ฌ๊างไท้ะ, แบเด้าะ ดาเว อ ล่าง นอ โอ เว๊ โปล้ ล้อ

²⁶ ล นี้ง แย๊ นอ, ซาอู ล ไจ้ะ ล ไคล้ เท่อ น่าง เม้ง แบ, เมะเว๊ ช๊องมอง เว๊, “ท ม กึทาง อ ซ้ะ ดี๊ ดาเว ล เม้งๆ-อ้า?, แบซีงลู่ง อ เว๊ แบอ้า, อ เว๊ แบอ้า เต้ๆ, ล้อ”

²⁷ แบเด้าะ ลู่ง ทพ้างทาง โฌ้โค๊ ล นี้ง เด้าะ, เมะเว๊ คี๊ง นี้ง ล นี้ง นอ, ดาเว อ ล่าง ชี๊น้าง โอโปล้ ได้ะ, ซาอู ไคล้ ดี๊ อ พูแคว๊ โยนาทาง ไจ้ะเว๊, “แบทเล้?, เจซี อ พู ล เฌ๊ อาง เท่อ โอ้ เท่อ แบ, ล โค๊ ลู่ง มแฌ ดี๊ ล นี้ง แย๊ อี้ง”

²⁸ โยนาทาง ไคล้ช๊า ซาอู ไจ้ะเว๊, “ดาเว อางท่าง ดี๊ แย้, อ เว๊ ม ไท้ ลู่ง เฌง เบเลเฮง

²⁹ อ เว๊ ไจ้ะเว๊ บี่อี้ง, ‘เปล้ แย้ เกม๊า จ ลี้ ไช้ะ, เมะเว๊ โพล้ง ล ชื้อ ฆ่าง ดี๊ แย้ นอ, แบ เทว๊ ทพูแฆ่ ลื่งทาง เท่อ ลู่ง เว่ง พ้า, ดี๊ จ วี่ โจ้ อางแบเลา แย้ เกม๊า จ ลี้, ทบี่นอ, จ เมะ นี่แบ ทแบเมะล้างซ้ะ ดี๊ แน้ นอ, เกม๊า จ ลี้ โอ จ วี่ โจ้ ซีงลแพ นอ ไช้ะ’, อ กย้อง บี่นอ, อ เว๊ ล นี่ เฌ๊ ลู่ง กจุ้แฆว้ อ คะ ไท้ะ แบ”

³⁰ ฌ้อง ซาอู อ ซ้ะทาง ดี๊ โยนาทาง ไจ้ะเว๊, “แน้, ก มืง กไบล้ะ ดี๊ ล กลุ้ ลจ้ะ แบ อ พู-เอ้อ, จ ล ซีงแฌ๊ แบ โบ่, น อางลึนี่ เจซี อ พู เฌ๊ แม้แช้แม้เด น กแช่, ดี๊ แม้แช้แม้เด น มู่ พี่ อ ดึ้ กึทางนี่ แน้?

³¹ พี่ เจซี อ พู โอม๊า ลู่ง ฌางคูโคล๊งคู อี้ง ได้ะ อ แค๊ อี้ง นอ, น กแช่ ฌี้, น มื่ง น บ้าง ฌี้, ม โอเฌิ่งโอค๊า ล ซี แบ, ทบี่นอ, เกม๊า น เจ่ทาง โพล้ง ลี้ พองนี่-อ้ะ เฌ๊ โชะ เอะ แย้, อ ไฌ่ บี่อี้ง, เมะเว๊ อ เว๊ ม แบ ซี๊ง เต้ๆ, ล้อ”

³² โยนาทาง ไคล้ช๊า อ แพ่ ซาอู ไจ้ะเว๊, “แบทเล้, อ เว๊ ม แบ ทแม้ซี๊ง?, อ เว๊ แม้ แบ ทเม้งเล้?”

³³ แบเด้าะ ซาอู ซยุ้ ฆ้าง-อ้ะ ดี๊ พ้าง, บี่ซุ้ ม แม้ซี๊ง เว๊, ทบี่นอ, โยนาทาง ซีงแฌ๊ เว๊ อ แพ่ แบซ้ะ แม้ซี๊ง ดาเว

³⁴ โยนาทาง เฌ้เทิงทาง ไจแดไฆวะ คะ, ดี๊ ทซ้ะทาง พ้ะดู, ล นี่ อาง มี้ โอ้ ที๊ง ลู่ง มื่ง คี๊ง นี้ง พ้า ล แล้ แย๊ นอ แบ, เป๊งนี่ อ ซ้ะ เฌ๊ฌ้อง แบฆ้ะ ดี๊ ดาเว อ ไฌ่, เมะเว๊ อ แพ่ นอ, ไจ้ะอ้าไจ้ะซ๊าง ดึ้เดวทื่งแช้ ดาเว

³⁵ ทพ้างทาง โฌ้โค๊, โยนาทาง ลี้ ลู่ง ญ้าง พ้า ทเคแกล้, บี่ซุ้ ดี๊ อ พ้ะ เว้ โละซ้ะ ดี๊ ดาเว นอ, พืงแซ โอ ล แฌ้ ลี้ ดี๊-อ้ะ

³⁶ ดี๊ โล้ เอะ พืงแซ นอ ไจ้ะเว๊, “ลี้ ซยู๊ อางฆื๊ง คลีง แช พี่ จ ม ค้ะ-อ้ะ นอ”, ท่อง พืงแซ นอ ลี้ ซยู๊, โยนาทาง ค้ะทาง คลีง แช ล บ้อง ลู่ง พืงแซ อ เมะแซ พ้า

³⁷ ดี๊ ท่อง พืงแซ นอ เฌ๊ ท้อง คลีง แช อ ล่าง, พี่ โยนาทาง ค้ะ เว๊ นอ, โยนาทาง โล้ จู้ เอะ พืงแซ นอ ไจ้ะเว๊, “คลีง แช โอ ลู่ง ท เมะ แย๊ อู้ง ได้ะ ล เมะ แบ-อ้า?”

³⁸ ดี๊ โยนาทาง โล้ จู้ พืงแซ นอ ไจ้ะเว๊, “ปชื่ง ลี้-อ้ะ เมะ เพล, โอโท๊ ล ฌี้”, ฌ้อง พืงแซ พี่ โอ ดี๊ โยนาทาง นอ, ลี้ แม้นี่ คลีง แช ดี๊ เฌ๊ไท้ฌูงไท้ อ เซงคู

³⁹ แบเด้าะ พืงแซ นอ, ล ซีงแฌ๊ ทอไฌ่อกย้อง แบ, โยนาทาง ดี๊ ดาเว คี๊ง แฌ้ นอ ล้อ ซีงแฌ๊ เว๊

⁴⁰ ดี๊ โยนาทาง อางกีล้าง อ นางดึ้นางชาง เอะ พืงแซ, พี่ โอ ดี๊-อ้ะ นอ, ดี๊ โล้ เอะ เว๊ บี่อี้ง, “ม๊า น ลี้, ลี้ นึฆ้าง ลู่ง เว่ง พ้า อู้ง”

⁴¹ ท่อง พืงแซ ลี้ เย้า นอ, ดาเว โอ ลู่ง โล่ง น๊าง โป้ง อ ฆ้อง, เฌ้เทิงทาง ซย๊องล้าง อ เมะ ท้องล้าง ฌางคู คู, ฌ้อง บุ้ล้าง อ ซ้ะ ซ๊า ทีง, ดี๊ คี๊ง แฌ้ นอ น๊าม๊า โละซ้ะ อ บุ้แพ้ ดี๊ ฌาง เว๊, แบเด้าะ ดาเว นอ ฌาง ทึ ลู่ง ไค๊

⁴² โยนาทาง ไคล้ ดี๊ ดาเว ไจ้ะเว๊, “เกม๊า น ลี้ ดี๊ ทมึทพ้า, เมะเว๊ เฆ้อ คี๊ง แฌ้ อี้ง, ก นี่ อืงล้าง เท่อ ลู่ง กแช่ยาเว อ เม้ง เย้า บี่อี้ง, ‘กแช่ยาเว ม เก พีงญาง เอะ แย้ ดี๊ แน้, ดี๊ เก พีงญาง เอะ จ คลี๊ง จ แซ, ดี๊ น คลี๊ง น แซ ล้างชู้ ล้างแกย’, ”, ดาเว เฌ้เทิงทาง ลี้ ไฆวะ ไวะ, ดี๊ โยนาทาง นอ ลี้ฆ้าง ลู่ง เว่ง พ้า ไวะ นอ ล้อ