1กจุ้แฆว้ 2 - Northern Pwo Karen Thai Bibleดาเว อางแบเลา เอะ ซาโลโม อ เท่อ 1 พี่ ดาเว เบ้าทาง ม ซี๊ง เย้า นอ, อ เว๊ อางแบเลา เอะ อ พูแคว๊ ซาโลโม อ เท่อ ไจ้ะเว๊ 2 “จ เบ้า ม ล้างแม่ แดไฆวะ ฌางคูโคล๊งคู เย้า, เกม๊า แม้ น ซ้ะ เมะ ชอง เมะ น้า, เนโพลทาง น ซ้ะ เก พูแคว๊ 3 ดี๊ เกม๊า น แฌแซ กแช่ยาเว น กแช่แยว้ อ ท อางแบเลา, เมะเว๊ ลี้ โพะ อ เกล้, ดี๊ แฌแซ ทอเค้อะอต้าง, ทซองทซ๊าง, ทอางกีล้าง, ดี๊ อลู่งอแท๊, ด้องซุ้ แบ ทกวิ้ล้าง-อ้ะ ลู่ง โมเซ อ ไละ ทอางแม้เลา พ้า นอ, บี่ซุ้ น ม ดูทาง โท๊ทาง ลู่ง ทกุ้เม้ง อ พ้า พี่ น แม้-อ้ะ, ดี๊ ทล่าง กุ้ จอง พี่ น ลี้-อ้ะ 4 บี่ซุ้ กแช่ยาเว ม ไต้ทางต๊างทาง อลู่งอแท๊, พี่ อ ไคล้ แบฆ้ะ เว๊ ดี๊ แย้ ไจ้ะเว๊, ‘น พู น ลี้ง เมะ ปโล่ ล้าง อ ซ้ะ, ลี้ โพะ อ กแช่ อ เกล้ ลู่ง จ เมะแซ พ้า, ดี๊ ท อโต้อล้อง เลา อ เซิง อ ซ้ะ นอ, โพล้ง แคว๊ พี่ ม ชี๊น้าง โพะคอง โพล้ง อีซลาเอง อ กจุ้แฆว้ อ ล่าง ชี๊น้าง โพะคอง เท่อ อ คู นอ, ล ล้างเทาไฆวะ แบ’ 5 แอเละ อ นอ ได้ะ, ซาโลโม-เอ้อ, แน้ น ซีงแฌ๊ เย้า, น่าง เซรูยา อ พู เมะเว๊ โยอะ นอ, แม้ แบ ทเม้งเล้ ดี๊ แย้, อ เว๊ แม้ เอะ โพล้ง อีซลาเอง อ ซึ้พูมู๊ง อ คูดู คี๊ง แฌ้, เมะเว๊ แม้ เอะ เนอ อ พู อะเนอ ดี๊ แม้ เอะ เยเทอ อ พู อามาซา พี่ โยอะ แม้ซี๊ง เว๊, อ เว๊ ดึ้ เกม๊า ทดึ้ซึ้ อ ซวีง แยว้ล้าง ลู่ง ทโอซยืงโอบ้ะ อ แค๊, ดี๊ ดึ้ เกม๊า ทดึ้ซึ้ อ ซวีง แบอ้า วะ อ ย่างเด้ง พลี้ง, ดี๊ แบอ้า อ คางไพ้ะ พี่ โอ อ คาง พ๊างละ 6 อ กย้อง บี่นอ, เกม๊า น แม้-อ้ะ บี่ซุ้ดี๊ น ทโกงซีมองแบ นอ, เมะเว๊ เปล้ เกม๊า อ คูซู๊ง แอว้ นอ, ล้าง ลู่ง พลื่งค่าง ดี๊ ทมึทพ้า ล ฌี้ 7 เกม๊า เต้ น เนโพลทาง ทย๊างซ้ะ แบ บาซีงไล, โพล้ง กีเลอา ล แฌ้ นอ อ พู ลแพ นอ ไช้ะ, เกม๊า อ ซื๊งเว๊ โอ ลู่ง โพล้ง พี่ อ อาง เท่อ ลู่ง น คะ คู ลแพ นอ อ โป้ง พ้า, เมะเว๊ พี่ จ ซยู๊ คุ้ซูงไฆวะ น วี่ โจ้ อะซาโลง อ แค๊ อู้ง นอ, อ ซื๊งเว๊ซีง แม้ช้า แย้ ดี๊ ทย๊างเซิงย๊างซ้ะ 8 ดี๊ แคว่เซ้อ, โพล้ง เบงยามีง เมะเว๊ เกะรา อ พู ชีเมอี, พี่ อ โอ ลู่ง เฌง บาฮูรีง นอ โอ ดี๊ แน้ ปะ, อ เว๊ เก โพล้ง ชูแบไจ้ะจวี้ แย้, พี่ ล นี้ง แย๊ จ ไจ ลู่ง มาฮานาเอง พ้า อู้ง, แบเด้าะ อ เว๊ เฌ๊ ล้าง ตองช๊าฮะช๊า แย้ ลู่ง ที๊ง โจเด้ง กล้อง, อ กย้อง บี่นอ, จ อืงล้าง เท่อ ดี๊-อ้ะ, ลู่ง กแช่ยาเว อ เม้ง จ ไจ้ะ, ‘จ ม ล แม้ซี๊ง แน้ ดี๊ น้ะ แบ’ 9 ทบี่นอ, ทื๊ง-อ้ะ ลู่ง อ เตา ล โอ แบ ล ฌี้, เมะเว๊ แน้ นอ น เก โพล้ง พี่ โอ ดี๊ ทโกงซีมองแบ, น ม ซีงแฌ๊ เกิ้ง แม้ ดี๊-อ้ะ บี่จะเล้, ดี๊ เกม๊า น แม้นี่ อ คู แอว้ นอ, ล้าง ลู่ง พลื่งค่าง ล พ๊าฆ่าง ดี๊ อ ซวีง” กจุ้แฆว้ ดาเว ซี๊ง เว๊ ล้อ (1ทกน.3:4; 29:26-28) 10 ฌ้อง ดาเว ซี๊ง เว๊, ไท้ โอ ดี๊ อ พี๊ง อ พู๊ง ลู่ง แย๊, ดี๊ โพล้ง เคิงล้างบ้า เว๊ อ จู, ลู่ง เว่ง ดาเว พ้า 11 ดาเว เก โพล้ง อีซลาเอง อ กจุ้แฆว้ ชิ้ทาง ลี่ง ชี๊ง เนง, โพะคอง เท่อ ลู่ง เว่ง เฮโบรง พ้า เนว๊ เนง, ดี๊ โพะคอง เท่อ ลู่ง เว่ง เยรูซเลง พ้า ซ๊า ชี๊ง ซ๊า เนง 12 บี่ซุ้ดี๊ นอ, ซาโลโม ชี๊น้าง แบก้ะ อ แพ่ ดาเว อ ล่าง ชี๊น้าง โพะคอง เท่อ อ คู ดี๊ อมื่งอบ้าง โอเฌิ่งโอค๊า ฌี้ มะ ซาโลโม ไต้ทางต๊างทาง อ มื่ง อ บ้าง 13 ฌ้อง น่าง ฮะกี อ พู เมะเว๊ อาโดนียา, ลี้ฆ้าง โอ ซาโลโม อ มู่ น่าง บะเชบา, อ เท่อ อางจ้ะ-อ้ะ ไจ้ะเว๊, “น เฌ๊ ดี๊ ท อ ฌี้-อ้า?”, อ เท่อ ไคล้ช๊า-อ้ะ ไจ้ะเว๊, “จ เฌ๊ ดี๊ ท อ ฌี้ ล้อ, กแช่-เอ้อ” 14 ฌ้อง อาโดนียา ไคล้ ดี๊-อ้ะ ไจ้ะเว๊, “จ ทไฌ่ทกย้อง โอ พี่ จ แบซ้ะ โล้ แบ แน้, อ เท่อ ไจ้ะเอะ-อ้ะ, “น โล้ทาง แฆว่ เซ้อ” 15 อาโดนียา ไจ้ะเว๊, “น ซีงแฌ๊ เย้า มื่งบ้าง นอ เกิ้ง ม เก ยี๊แด, ดี๊ โพล้ง อีซลาเอง กุ้ แฌ้ ช๊องมอง เว๊, แย้ จ ม เก แบ กจุ้แฆว้, แบเด้าะ เม้ง ฌี้ๆ, นอ, มื่งบ้าง นอ เฌ๊ เกก้ะ จ พื่ง แคว๊ อ เท่อ, เมะเว๊ กแช่ยาเว เกล๊าง มื่งบ้าง นอ เอะ-อ้ะ 16 ค๊องเนงอี้ง, จ ม อางท่าง เท่อ ล เม้ง ล้อ, เกม๊าเต้ น ซม๊า ล ฌี้ ไช้ะ”, อ เท่อ ไจ้ะ เอะ-อ้ะ, “น โล้ทาง แดเทา” 17 อาโดนียา ไจ้ะเว๊, “เกม๊า น ไคล้ ดี๊ กจุ้แฆว้ ซาโลโม, เมะเว๊ อ เว๊ ม ล ซม๊า แน้ แบ, เกม๊า อ เกล๊าง เอะ แย้ น่าง อาบีชา, โพล้ง ชูเนง มืง ล แฌ้ นอ เก จ แม๊ ไช้ะ” 18 น่าง บะเชบา ไจ้ะ เอะ-อ้ะ, “ฌี้ เย้า, จ ม โล้ คิ้ เอะ แน้ กจุ้แฆว้” 19 น่าง บะเชบา ลี้ฆ้าง โอ กจุ้แฆว้ ซาโลโม, บี่ซุ้ ม โล้ คิ้ เท่อ เอะ อาโดนียา, กจุ้แฆว้ เฌ้เทิงทาง ตองช๊าฮะช๊า-อ้ะ, ดี๊ คะด้ะ ล้าง อ ซ้ะ, ฌ้อง ไท้ ชี๊น้าง ไท้ ลู่ง อ ล่างชี๊น้างโพะคองเท่อ คู, ดี๊ โล้ โพล้ง ม๊า เฌ๊ โชะ เอะ กจุ้แฆว้ อ มู่ อ คะ, ฌ้อง อ มู่ นอ ชี๊น้าง เว๊ ลู่ง อ จูง ฆุ้ ล โค๊ 20 น่าง บะเชบา โล้ เอะ-อ้ะ ไจ้ะเว๊, “จ ม อางท่าง นี่ เท่อ ดี๊ แน้ ปี๊ โฆะ ล เม้ง, ม๊า น ซม๊า แย้ ล ฌี้ ไช้ะ”, กจุ้แฆว้ โล้ เอะ อ มู่ ไจ้ะเว๊, “อางท่าง เซ้อ มู่-เอ้อ, จ ล ซม๊า แน้ แบ” 21 น่าง บะเชบา ไจ้ะเว๊, “น่าง อาบีชา โพล้ง ชูเนง มืง นอ, เกม๊า อ เกก้ะ น โจ้ อาโดนียา อ แม๊ แดเทา” 22 กจุ้แฆว้ ซาโลโม ไคล้ช๊า อ มู่ ไจ้ะเว๊, “มู่-เอ้อ, แม้ ทเล้?, น อางท่างนี่ น่าง อาบีชา, โพล้ง ชูเนง มืง นอ เอะ อาโดนียา กเด้าะ, เกิ้ง ม อางท่างนี่ โย๊ เอะ-อ้ะ มื่งบ้าง ปะ, เมะเว๊ อ เว๊ เก จ วี่ โจ้, เลา ดี๊ อางท่างนี่ เอะ-อ้ะ โพล้งลื่งเท่ออคู อาบียาทา, ดี๊ อางท่างนี่ เอะ-อ้ะ น่าง เซรูยา อ พู, เมะเว๊ โยอะ นอ ปะ เซ้อ 23 ฌ้อง กจุ้แฆว้ ซาโลโม, อืงล้าง อ ซ้ะ ลู่ง กแช่ยาเว อ เม้ง ไจ้ะเว๊, “ลู่ง ทไคล้ อี้ง อ กย้อง, เมะ ล ดึ้ เกม๊า อาโดนียา อ กแช่ ซี๊งทางนี่ แบ นอ, เกม๊าเต้ กแช่แยว้ แม้เตาแม้แต๊ เฆ้อ ดี๊ น้ะ ทาง ได้ะ 24 ทบี่นอ, กแช่ยาเว โอม๊า ได้ะ บี่จะเล้, เมะเว๊ กแช่แยว้ พี่ อ ไต้ทางต๊างทาง แย้, ลู่ง จ แพ่ ดาเว อ ล่าง ชี๊น้าง คู, ดี๊ เกม๊า จ โอ ดี๊ จ ชื้อ จ ชะ, บี่ซุ้ดี๊ อ เอิ้งล้าง เว้ เว๊ บี่จะเล้ นอ, อาโดนียา ม แบ ทแม้ซี๊ง-อ้ะ ล นี้ง แย๊ อี้ง บี่นอ ล้อ” 25 อ กย้อง บี่นอ, กจุ้แฆว้ ซาโลโม อางแบเลา เยโฮยาดา อ พู, เบไนยา นอ, เกม๊า ลี้ แม้ซี๊ง อาโดนียา, ดี๊ อ เท่อ ซี๊ง เว๊ ล้อ 26 เมะ โพล้งลื่งเท่ออคู อาบียาทา นอ, กจุ้แฆว้ อางแบเลา-อ้ะ ไจ้ะเว๊, “เกม๊า ลี้ โอ ลู่ง อานาโทะ พ้า, ไท้ โอ ไท้ ลู่ง น กแช่ อ ฆึ้ พ้า ไชะ พ้า อู้ง, เมะเว๊ แน้ นอ เกิ้ง น แบ ซี๊ง, แบเด้าะ ค๊องเนงอี้ง นอ, จ ล แม้ซี๊ง แน้ แบ, เมะเว๊ ลู่ง อ อู้ง แน้ นอ, น ยุ้ ทอดูทึโท๊ทึ กแช่ยาเว อ ไฮะ, ลี้ ลู่ง จ แพ่ ดาเว อ เมะแซ พ้า ดี๊ พี่ น แบน้ะแบโน๊ง ซกุ้ ฆึ เท่อ ดี๊ จ แพ่” 27 กจุ้แฆว้ ซาโลโม โฌ๊ไจไฆวะ อาบียาทา, ล เกม๊า เว๊ อ แม้ เท่อ เก กแช่ยาเว อ โพล้งลื่งเท่ออคู ล้าแบ, ทแม้ อ ซ้ะ บี่อี้ง นอ, เกทาง บี่ซุ้ดี๊ กแช่ยาเว อลู่งอแท๊, พี่ อ โล้ เว๊ แบฆ้ะ ดี๊ เอลี อชื้ออชะ, ลู่ง เว่ง ชีโล พ้า 28 ท่อง ทโล้โค อี้ง ลี้ ท้อง โยอะ นอ, (เมะเว๊ ทึเมะ โยอะ ล โอ ล แพ้ ฆ่าง ดี๊ อะซาโลง แบ ฌี้ นอ, แบเด้าะ, อ เว๊ โอ ล แพ้ ฆ่าง ดี๊ อาโดนียา), โยอะ ไจซยู๊ไฆวะ ลี้ ลู่ง เด้กแช่ยาเวอล่างโอ พ้า, ดี๊ พองทะ ทลื่งล่าง อ โน้ง คระ 29 ท่อง โพล้ง ลี้ โล้ แบ กจุ้แฆว้ ซาโลโม ไจ้ะเว๊, “โยอะ ไจซยู๊ไฆวะ ลี้ ลู่ง เด้กแช่ยาเวอล่างโอ พ้า, แคว่เซ้อ, อ เว๊ โอ ลู่ง ทลื่งล่าง นอ อ ฆ้อง”, ซาโลโม อางแบเลา เยโฮยาดา อ พู, เบไนยา นอ ไจ้ะเว๊, “ม๊า น ลี้ แม้ซี๊ง-อ้ะ เฆาะ” 30 เบไนยา เฌ๊ ลู่ง เด้กแช่ยาเวอล่างโอ พ้า, ไคล้ ดี๊ โยอะ ไจ้ะเว๊, “กจุ้แฆว้ โล้ เว๊ เกม๊า น ไจทาง แดเทา”, อ เท่อ ไคล้ช๊า-อ้ะ ไจ้ะเว๊, “จ ล ไจทาง แบ, จ ม ซี๊ง พี่ อี้ง ล้อ”, ฌ้อง เบไนยา ไท้ โล้ แบ กจุ้แฆว้ เด้าะ ไจ้ะเว๊, “โยอ้ะ ไคล้ บี่อี้ง, ดี๊ อ เว๊ ไคล้ช๊า แย้ บี่อี้ง” 31 กจุ้แฆว้ โล้ เอะ-อ้ะ ไจ้ะเว๊, “แม้ บี่ อ กแช่ โล้ เว๊ นอ แดเทา, แม้ซี๊ง-อ้ะ ฌ้อง เคิงล้างบ้า-อ้ะ เฆาะ, อ อี้ง นอ, เก ทแม้นี่ไท้ ทไพ้ะทแม ดี๊ โยอะ, พี่ อ แม้ซี๊ง โพล้ง ลู่ง อ ทไพ้ะทแม ล โอ แบ นอ อกย้อง, บี่ซุ้ แย้ ดี๊ จ แพ่ อชื้ออชะ นอ, ม พ้องไฆวะ ดี๊ ทไพ้ะทแม อี้ง 32 กแช่ยาเว แม้นี่ เว๊ อ ซวีง, เฌ๊ไท้ ล้างเทะแบไท้ อ กแช่ อ คู แด เว๊ ล้อ, เมะเว๊ อ เว๊ แม้น้า ดี๊ แม้ซี๊ง โพล้ง แคว๊ คี๊ง แฌ้ ดี๊ น้ะ, พี่ อ เก โพล้ง ลู่ง ทแบแยว้อซ้ะ ฌี้เละ-อ้ะ ได้ะ, ดี๊ ฌี้เละ อ กแช่ ได้ะ, จ แพ่ ดาเว ล ซีงแฌ๊ เว๊ น่าง เม้ง แบ, อ นอ เมะเว๊ เนอ อ พู อะเนอ, พี่ อ เก โพล้ง อีซลาเอง อ ซึ้พูมู๊งอคูดู, ดี๊ เยเทอ อ พู เมะเว๊ อามาซา, พี่ อ เก โพล้ง ยูดา อ ซึ้พูมู๊งอคูดู 33 ทแม้ อ ซ้ะ บี่นอ, พี่ อ ซื๊งเว๊ คี๊ง แฌ้ แบ ซี๊ง นอ, โยอะ ดี๊ อคลี๊งอแซ แบ ระ เว๊ แด ล้างชู้ นอ ล้อ, แบเด้าะ เมะ ดาเว ดี๊ อคลี๊งอแซ, อชื้ออชะ, ดี๊ อ ล่างชี๊น้างโพะคองเท่อ นอ, ม นี่แบ ทมึทพ้า ดี๊ กแช่ยาเว ล้างชู้ ล้อ” 34 ฌ้อง เยโฮยาดา อ พู เมะเว๊ เบไนยา นอ, ลี้ทาง แม้ซี๊ง เว๊ เฆาะ, ดี๊ เคิงล้างบ้า เว๊ ลู่ง อ เฌง พี่ อ โอ ลู่ง แพะคูทเคแกล้ 35 กจุ้แฆว้ ต๊างทางก้ะ เยโฮยาดา อ พู เบไนยา นอ, เก ซึ้พูมู๊ง อ คู เท่งก้ะ โยอะ อ ล่าง, ดี๊ กจุ้แฆว้ ต๊างทางก้ะ ซาโด, เก โพล้งลื่งเท่ออคู เท่งก้ะ อาบียาทา อ ล่าง นอ ล้อ 36 ฌ้อง กจุ้แฆว้ เจ่ทาง โพล้ง, ลี้ กุ้นี่ ชีเมอี เกม๊า เฌ๊ โอ-อ้ะ, ดี๊ ไคล้ เว๊ ดี๊-อ้ะ บี่อี้ง, “ม๊า น ไต้ทาง น เด้า ลู่ง เว่ง เยรูซเลง พ้า, ดี๊ โอ-อ้ะ พี่ นอ, ไจทางไฆวะ พี่ นอ ล ฌี้, ลี้ เท่อ น่าง จอง ล ฌี้ 37 เมะเว๊ พี่ นี้ง เล้ พี่ น ไจทาง, ดี๊ ลี้ ค๊างฆ้าง ที๊งพูกล้อง คีโรง นอ, เกม๊า น ซีงแฌ๊-อ้ะ ล้างที๊ง บี่อี้ง, น ม แบ ซี๊ง เต้ๆ, ล้อ, เมะเว๊ น ซวีง ม ล้างแบไท้ น กแช่ อ คู แด เว๊ ล้อ 38 ชีเมอี โล้ เอะ กจุ้แฆว้ ไจ้ะเว๊, “พี่ น โล้ เท่อ นอ ฌี้ เย้า, น เพล่ ม แม้ เว๊ บี่ซุ้ดี๊ จ เซงคู กจุ้แฆว้ ไจ้ะเว๊ นอ ล้อ”, ชีเมอี โอ ลู่ง เว่ง เยรูซเลง พ้า พ้ะ ไยะ 39 โอ ท่อง พ้องไฆวะ ซ๊า เนง นอ, ทกึทาง อ ซ้ะ ดี๊-อ้ะ โอ ล เม้ง, เมะเว๊ ชีเมอี อ ฆ่อง คี๊ง แฌ้, ลี้ โอก้ะ ดี๊ อาคิ้, พี่ เก กจุ้แฆว้ เว่ง กะทา เมะเว๊ มาอาคา นอ อ พูแคว๊, ดี๊ ท่อง โพล้ง เฌ๊ โล้ แบ ชีเมอี ไจ้ะเว๊, “แคว่เซ้อ, น ฆ่อง นอ โอ ลู่ง เว่ง กะทา พ้า” 40 ชีเมอี เฌ้เทิงทาง จ้าทาง แลว้ อ ตาง, เทา ทาง เว๊ อ คู ลี้ โอ อาคิ้ ลู่ง เว่ง กะทา พ้า, ลี้ อางฆื๊ง ไท้ อ ฆ่อง, ชีเมอี ลี้ แม้นี่ไท้ อ ฆ่อง ลู่ง เว่ง กะทา พ้า 41 ดี๊ ท่อง โพล้ง โล้ เอะ ซาโลโม, ไจ้ะเว๊ ชีเมอี ไจทาง เว่ง เยรูซเลง พ้า, ลี้ ท้อง ลู่ง เว่ง กะทา, ฌ้อง เฌ๊ไท้ เย้า 42 กจุ้แฆว้ เจ่ทาง โพล้ง ลี้ กุ้นี่ ชีเมอี, เกม๊า เฌ๊ โอ-อ้ะ, ดี๊ ไคล้ เว๊ ดี๊-อ้ะ ไจ้ะเว๊, “จ เกม๊า น ชูล้าง น ซ้ะ ลู่ง กแช่ยาเว อ เม้ง เย้า ล เมะ แบ-อ้า?, ดี๊ จ โล้ แบ แน้ เย้า บี่อี้ง, ‘ม๊า น ซีงแฌ๊ ล้างที๊ง บี่อี้ง, พี่ นี้ง เล้ น เมะ ไจทาง ลี้ เท่อ จอง ฌี้ๆ, นอ, น ม แบ ซี๊ง เต้ๆ, ล้อ’, ดี๊ แน้ น ไคล้ช๊า แย้ น ไจ้ะ, ‘พี่ น ไคล้ เท่อ นอ ฌี้ เย้า, จ ม ชู่ง ม นะ-อ้ะ’ 43 แบทเล้?, น ล แม้โพะ น ทอืงล้าง ดี๊ กแช่ยาเว นอ แบ, ดี๊ น ล แฌแซกต้าง ทอางแบเลา พี่ จ โล้ เอะ แน้ นอ แบ” 44 กจุ้แฆว้ ไคล้ ดี๊ ชีเมอี ไจ้ะเว๊, “ลู่ง น ซ้ะ พ้า น ซีงแฌ๊ ทอ้าทซ๊าง อ ไฌ่ เลาพะ, พี่ น แม้ แบ เอะ จ แพ่ ดาเว, อ กย้อง บี่นอ, กแช่ยาเว ม ดึ้ เกม๊า ทอ้าทซ๊าง, เฌ๊ ล้าง แบ น คู แด เว๊ ล้อ 45 แบเด้าะ กจุ้แฆว้ ซาโลโม ม นี่แบ ทชูฌี้, ดี๊ ดาเว อ ล่าง ชี๊น้าง โพะคอง เท่อ นอ, ม ช๊างล้าง อ ซ้ะ เฌิ่งๆ, ค๊าๆ, ลู่ง กแช่ยาเว อ เมะแซ พ้า ล้างชู้ ล้อ” 46 ฌ้อง กจุ้แฆว้ อางแบเลา เยโฮยาดา อ พู, เมะเว๊ เบไนยา, ดี๊ อ เว๊ นอ ไจทาง แม้ซี๊ง ชีเมอี เฆาะ ทบี่นอ, มื่งบ้าง โอเฌิ่งโอค๊า ลู่ง ซาโลโม อ จูง พ้า นอ ล้อ |
Pwo Karen Bible (Thailand) © Thailand Bible Society, 2016.
Thailand Bible Society