1กจุ้แฆว้ 16 - Northern Pwo Karen Thai Bible1 ฌ้อง กแช่ยาเว อลู่งอแท๊ เฌ๊ ท้อง ฮานานี อ พู, เมะเว๊ เยฮู, ไจ้ะ แบ บาอาชา ไจ้ะเว๊ 2 “จ อางกีทางโท๊นี่ แน้ ลู่ง ฌางคู มูง แกล้, ต๊างทาง แน้ เก ทอคูดู, ลู่ง จ พู จ ลี้ง โพล้ง อีซลาเอง อ พ๊างคู, แบเด้าะ แน้ น ลี้ โพะ เยโรโบอาง อ เกล้, ดี๊ ดึ้ เกม๊า จ พู จ ลี้ง โพล้ง อีซลาเอง แม้ ทเด้บ้ะ, ดึ้ เกม๊า จ ซ้ะทาง ดี๊ อ ซื๊งเว๊ซีง อ ทเด้บ้ะ นอ 3 แคว่เซ้อ, บาอาชา, จ ม แม้เฌ๊ฌ้องไฆวะ น ชื้อ น ชะ ท่อง อ เลา, ดี๊ ม ดึ้ เกม๊า น ชื้อ น ชะ แบด้องซุ้ เนบ้ะ อ พู, เมะเว๊ เยโรโบอาง นอ อชื้ออชะ 4 โพล้ง พี่ แฌ้ เล้ ลู่ง บาอาชา อ ชื้อ พ้า, พี่ อ ซี๊ง ลู่ง มื่ง พ้า นอ, ทวีง ม อาง เว๊, ดี๊ โพล้ง พี่ แฌ้ เล้ ซี๊ง ลู่ง ไชะ แกล้ พ้า นอ, ทู ลู่ง ทพุ้พ๊าง ม อาง เว๊” 5 บาอาชา อ ทไพ้ะทแม้ อ แฌ้แพ, ดี๊ เท่อ กุ้อเม้ง พี่ อ แม้ เว๊ ดี๊ อดู้งอยาง นอ, แบ ทกวิ้ล้าง-อ้ะ, ลู่ง ไละ กวิ้ไน กจุ้แฆว้ ค่าง อีซลาเอง อ ไฌ่ ล ปะ นอ อ พ้า, ล เมะ แบ-อ้า? 6 บาอาชา ซี๊ง ดี๊ ไท้ โอ ดี๊ อ พี๊ง อ พู๊ง ลู่ง แย๊, ดี๊ โพล้ง เคิงล้างบ้า เว๊ อ จู ลู่ง เว่ง ทีราซา พ้า, ดี๊ อ พูแคว๊ เอลา โพะคอง เท่อ เท่งก้ะ อ ล่าง 7 แอเละ อ นอ ได้ะ นอ, กแช่ยาเว อลู่งอแท๊ ดี๊ โมไคล้คิ้กแช่แยว้ เยฮู, เมะเว๊ ฮานานี อ พู นอ, ไจ้ะ แบ บาอาชา ดี๊ อชื้อชะ, เลา ดี๊ ทอ้าทซ๊าง กุ้เม้ง, พี่ อ แม้ เว๊ ลู่ง กแช่ยาเว อ เมะแซ พ้า, เมะเว๊ ดึ้ เกม๊า กแช่แยว้ อ ซ้ะทาง ดี๊ ทไพ้ะทแม้, พี่ อ เว๊ อ จูง แม้ เว๊, พี่ อ แบด้อง โละซ้ะ ดี๊ เยโรโบอาง, ดี๊ ทไฌ่ พี่ บาอาชา แม้เฌ๊ฌ้อง อชื้ออชะ นอ ปะ เอลา โพะคอง ค่าง อีซลาเอง 8 ลู่ง คี๊ง ชี๊ง ฆู๊ง เนง ล เนง พ้า, พี่ อาซา กจุ้แฆว้ ค่าง ยูดา อ ชู้ แค๊ นอ, บาอาชา อ พู เมะเว๊ เอลา นอ, โพะคองทาง ซ๊าง โพล้ง อีซลาเอง ลู่ง เว่ง ทีราซา พ้า, ดี๊ โพะคอง เว๊ นี่ คี๊ง เนง 9 แบเด้าะ อ กดูกแซย่ เมะเว๊ ซีงรี, พี่ อ เก ซึ้คู ยู่แคว่ เลาะ ดึ้ซึ้ เท่อ พุ้พ๊าง ล แฌ้ นอ, ช๊องมอง กไบล้ะ เท่อ ดี๊-อ้ะ, พี่ อ เว๊ โอ ลู่ง เว่ง ทีราซา พ้า อ แค๊ นอ, กจุ้แฆว้ นอ โอ้ เท่อ ท่อง อ ม้า เว๊ ลู่ง อาราซา พี่ อ เก ซึ้คู ยู่แคว่ บลาง, ลู่ง เว่ง ทีราซา พ้า ล แฌ้ นอ อ เด้า พ้า 10 ซีงรี เฌ๊ฆ้าง กล้าง-อ้ะ, ล้างเทะเค้า ดี๊ แม้ซี๊ง เว๊ เฆาะ, ลู่ง เนง คี๊ง ชี๊ง เนว๊ เนง ล เนง พ้า, ลู่ง อาซา กจุ้แฆว้ ค่าง ยูดา อ ชู้ แค๊, ฌ้อง เก กจุ้แฆว้ เท่งก้ะ เว๊ อ ล่าง 11 ลู่ง ไค๊ พี่ ซีงรี เก กจุ้แฆว้, ท่อง อ ชี๊น้าง ล่าง ชี๊น้าง คู นอ, อ เว๊ แม้ซี๊ง กจุ้แฆว้ บาอาชา อชื้ออชะ เลาพะ, ล อางกีล้างลื๊อก้ะ โพล้ง แคว๊, พี่ เก เว๊ อ น๊างเบ้าน๊างเท่ง ทึ ดี๊ อ ซกุ้ ฌุ้พาง น่าง แฌ้ ล้าแบ 12 ทบี่นอ, ซีงรี แม้เฌ๊ฌ้อง บาอาชา อชื้ออชะ เลาพะ, บี่ซุ้ดี๊ กแช่ยาเว อลู่งอแท๊, พี่ อ ไจ้ะ แบ บาอาชา พี่ เยฮู โมไคล้คิ้กแช่แยว้ โล้ล้าง เว๊ นอ ล้อ 13 เมะเว๊ บาอาชา อ ทเด้บ้ะ, ดี๊ อ พูแคว๊ เอลา อ ทเด้บ้ะ เลาพะ พี่ อ แม้ เว๊, ดี๊ ดึ้ เกม๊า โพล้ง อีซลาเอง แม้ ทเด้บ้ะ ปะ นอ, ดึ้ เกม๊า กแช่ยาเว โพล้ง อีซลาเอง อ กแช่แยว้, อ ซ้ะ ฆวี่งทาง แบฆ้ะ ดี๊ ทเค่งทฌ้าง นอ 14 เอลา อ ทไพ้ะทแม้ อ แฌ้แพ, ดี๊ ทกุ้เม้ง พี่ อ แม้ เว๊ นอ, แบ ทกวิ้ล้าง-อ้ะ, ลู่ง ไละ กวิ้ไน กจุ้แฆว้ ค่าง อีซลาเอง อ ไฌ่ ล ปะ นอ อ พ้า, ล เมะ แบ-อ้า? ซีงรี โพะคอง โพล้ง อีซลาเอง 15 ลู่ง เนง คี๊ง ชี๊ง เนว๊ เนง ล เนง พ้า, ลู่ง อาซา กจุ้แฆว้ ค่าง ยูดา อ ชู้ แค๊ นอ, ซีงรี โพะคอง ค่าง อีซลาเอง โอ ลู่ง เว่ง ทีราซา พ้า นี่ เนว๊ นี้ง, เมะ ซึ้พู นอ ช๊างล้างนี่ อ ทล่างโอซยอง, ดึ้ซึ้ ดี๊ โพล้ง ฟีลีเตีย อ เว่ง กีเบโทง 16 ท่อง ซึ้พู พี่ ช๊างล้าง อ ทล่างโอซยอง นอ, ซีงแฌ๊ โค เว๊ บี่อี้ง, “ซีงรี แม้ ทกไบล้ะ ดี๊ แม้ซี๊ง กจุ้แฆว้ เย้า”, ฌ้อง โพล้ง อีซลาเอง เลาพะ นอ, ต๊างทาง อะมารี พี่ อ เก ซึ้คู ดู นอ, ม๊า อ เกก้ะ โพล้ง อีซลาเอง อ กจุ้แฆว้ ล นี้ง แย๊ นอ, ลู่ง ทล่างโอซยอง พ้า 17 อะมารี ดี๊ โพล้ง อีซลาเอง เลาพะ นอ, โอ ลู่ง เว่ง กีเบโทง พ้า เฌ๊ทาง, อ ซื๊งเว๊ซีง เฌ๊ พ้องวะ เว่ง ทีราซา 18 ดี๊ ลู่ง ไค๊ ท่อง ซีงรี แด เว๊ เว่ง นอ ที่พ้ะที่ล้าง เย้า, อ เว๊ ลี้ นึฆ้าง โอ ลู่ง บลาง อ ทล่าง ทคุ้แคว่ เท่อ นอ อ พ้า, ดี๊ แม้นี่ มี เช้า บลาง นอ ดี๊ ซี๊ง เว๊ 19 เป๊งนี่ ลู่ง ทเด้บ้ะ พี่ อ แม้ เว๊, เมะเว๊ แม้ ทอ้าทซ๊าง ลู่ง กแช่ยาเว อ เมะแซ พ้า, ลี้ โพะ เยโรโบอาง อ เกล้, ดี๊ ทเด้บ้ะ พี่ อ แม้ เว๊, อ นอ แม้ฌ้า โพล้ง อีซลาเอง แม้ ทเด้บ้ะ ปะ 20 ซีงรี อ ทไพ้ะทแม้ อ แฌ้แพ, เลา ดี๊ อ ทกไบล้ะ พี่ อ แม้ เว๊ นอ, แบ ทกวิ้ล้าง-อ้ะ, ลู่ง ไละ กวิ้ไน กจุ้แฆว้ ค่าง อีซลาเอง อ ไฌ่ ล ปะ นอ อ พ้า, ล เมะ แบ-อ้า? อะมารี โพะคอง โพล้ง อีซลาเอง 21 ฌ้อง โพล้งเฌงพูฆ๊างพู อีซลาเอง, อางน้างพ้ะ ล้าง อ ซ้ะ โอ คี๊ง โป้ง, ลู่ง โพล้งเฌงฆ๊างพู อ แกล้ พุ้พ๊าง นอ, ลี้ โพะ กีนะ อ พู เมะเว๊ ทิ้นี นอ อ ไค๊, ดี๊ โชะทาง เว๊ เก กจุ้แฆว้, ดี๊ พุ้พ๊าง เด้าะ นอ, ลี้ โพะ อะมารี อ ไค๊ 22 แบเด้าะ โพล้งเฌงพูฆ๊างพู, พี่ อ ลี้ โพะ อะมารี อ ไค๊ นอ, ดึ้ซึ้ น้า โพล้งเฌงพูฆ๊างพู, พี่ อ ลี้ โพะ กีนะ อ พู เมะ เว๊ ทิ้นี นอ อ ไค๊, ทิ้นี ซี๊ง เว๊ ล้อ, ดี๊ อะมารี เกก้ะ กจุ้แฆว้ 23 ลู่ง เนง ซ๊า ชี๊ง ล เนง พ้า, ลู่ง อาซา กจุ้แฆว้ ค่าง ยูดา อ ชู้ แค๊ นอ, อะมารี โพะคองทาง ซ๊าง โพล้ง อีซลาเอง, ดี๊ โพะคอง เท่อ นี่ ล ชี๊ง คี๊ง เนง, อ เว๊ โพะคอง เท่อ ลู่ง เว่ง ทีราซา พ้า ฆู๊ง เนง ซมาเรีย เว่ง พ้ะดู อ ซ๊าง 24 อ เว๊ ฆวี้นี่ ทลู่ง ซมาเรีย ดี๊ เชเมอ, ดี๊ จี้ คี๊ง ตะลาง ดี๊ ไต้ทาง เว่ง ทลู่ง คู นอ, ดี๊ เว่ง พี่ อ ไต้ทาง เว๊ นอ, กุ้ เว๊ อ เม้ง ซมาเรีย, บี่ซุ้ดี๊ เชเมอ พี่ อ เก ทลู่ง อ กแช่ ล แฌ้ นอ อ เม้ง 25 อะมารี แม้ ทอ้าทซ๊าง ลู่ง กแช่ยาเว อ เมะแซ พ้า, ดี๊ แม้ ทอ้าทซ๊าง น้ะเละ กเย่ กจุ้แฆว้ พี่ อ โอ วี่ง-อ้ะ ลแพ นอ ได้ะ 26 อ เว๊ ลี้ โพะ เนบ้ะ อ พู เมะเว๊ เยโรโบอาง อ เกล้ นอ เลาพะ, ดี๊ แม้โพะ เว๊ อ ทเด้บ้ะ อ ไค๊, พี่ อ ดึ้ เกม๊า โพล้ง อีซลาเอง แม้ ทเด้บ้ะ นอ ปะ, เป๊งนี่ อ นอ, กแช่ยาเว โพล้ง อีซลาเอง อ กแช่แยว้, อ ซ้ะ ฆวี่งทาง ดี๊ อ ซื๊งเว๊ซีง อ ทเค่งทฌ้าง ลแพ นอ ล้อ 27 อะมารี อ ทไพ้ะทแม้ อ แฌ้แพ พี่ อ แม้ เว๊, ดี๊ อดู้งอยาง พี่ อ เนโพลทาง เว๊ นอ, แบ ทกวิ้ล้าง-อ้ะ, ลู่ง ไละ กวิ้ไน กจุ้แฆว้ ค่าง อีซลาเอง อ ไฌ่ ล ปะ นอ อ พ้า, ล เมะ แบ-อ้า? 28 อะมารี ซี๊ง ไท้ โอ แบ ดี๊ อ พี๊ง อ พู๊ง ลู่ง แย๊, ดี๊ แบ ทเคิงล้างบ้าฆึ-อ้ะ ลู่ง เว่ง ซมาเรีย พ้า, อ พูแคว๊ เมะเว๊ อาฮะ ทางโพะคอง เท่อ เท่งก้ะ อ ล่าง อาฮะ โพะคอง โพล้ง อีซลาเอง 29 ลู่ง เนง ซ๊า ชี๊ง โฆะ เนง ล เนง พ้า, ลู่ง อาซา กจุ้แฆว้ ค่าง ยูดา อ ชู้ แค๊ นอ, อะมารี อ พูแคว๊ เมะเว๊ อาฮะ นอ, โพะคองทาง ซ๊าง โพล้ง อีซลาเอง, ดี๊ อะมารี อ พูแคว๊ เมะเว๊ อาฮะ นอ นี่ โพะคอง โพล้ง อีซลาเอง, ลู่ง เว่ง ซมาเรีย พ้า คี๊ง ชี๊ง คี๊ง เนง 30 ดี๊ อะมารี อ พูแคว๊ เมะเว๊ อาฮะ นอ, แม้ ทอ้าทซ๊าง ลู่ง กแช่ยาเว อ เมะแซ พ้า, น้ะเละ กเย่ กจุ้แฆว้ พี่ อ โอ วี่ง-อ้ะ ลแพ นอ ได้ะ อาฮะ ทางแซย่ ดี๊ น่าง เยเซเบง, ดี๊ โบงทางแบ้ทาง ทกโช้งกแช่ บาอาง 31 ล ก้ะ ได้ะ แบ นอ, แคว่ เว๊, เท่อ พี่ อ เว๊ ลี้ โพะ เนบ้ะ อ พู เมะเว๊ เยโรโบอาง อ ทเด้บ้ะ อ ไค๊ นอ, เก เท่อ ลปี๊ลคี่ ล้อ, เมะ บี่ นอ, อ เว๊ ฮะนี่ เอะบาอาง โพล้ง ไซดอง อ กจุ้แฆว้ อ พูมืง, เมะเว๊ น่าง เยเซเบง เก อ แม๊, ดี๊ ลี้ แม้ เอะ ทกโช้งกแช่ บาอาง อ เท่อ, ดี๊ โบงทางแบ้ทาง เว๊ 32 อ เว๊ ไต้ทางนี่ ทลื่งล่าง, เอะ ทกโช้งกแช่ บาอาง, ลู่ง ทกโช้งกแช่ บาอาง อ ล่าง โอ พ้า, พี่ อ ไต้ทางนี่ เว๊ ลู่ง เว่ง ซมาเรีย พ้า 33 ดี๊ อาฮะ ไต้ทางนี่ ทกโช้งกแช่ อาเชรา, อาฮะ แม้ เท่อ พี่ ดึ้ เกม๊า กแช่ยาเว โพล้ง อีซลาเอง อ กแช่แยว้, อ ซ้ะทาง น้ะเละ กจุ้แฆว้ ค่าง อีซลาเอง กุ้ แฌ้, พี่ อ โอ วี่ง-อ้ะ ลแพ นอ ได้ะ 34 ลู่ง อ เว๊ อ ชู้ แค๊ นอ, ฮีเอง โพล้ง ค่าง เบเอง ล แฌ้ นอ, ไต้ทางนี่ เว่ง เยรีโค, พี่ อ เว๊ ช๊างล้าง เว่ง อ เทิง นอ อ พู วี่แซย่, เมะเว๊ อาบีราง นอ แบ ซี๊ง, ดี๊ พี่ อ ช๊างล้าง เว่ง อ ป้ะตู๊ง นอ, อ พู ซแด้ เมะเว๊ เซกู นอ แบ ซี๊ง, บี่ซุ้ดี๊ กแช่ยาเว อลู่งอแท๊, พี่ นูง อ พูแคว๊ โยชูวา โล้ เว๊ นอ ล้อ |
Pwo Karen Bible (Thailand) © Thailand Bible Society, 2016.
Thailand Bible Society