1กจุ้แฆว้ 15 - Northern Pwo Karen Thai Bibleอาบียาง โพะคอง ค่าง ยูดา ( 2ทกน.13:1-14:1 ) 1 ชี๊ง โฆะ เนง ล เนง ลู่ง เนบ้ะ อ พู เยโรโบอาง อ ชู้ แค๊ นอ, อาบียาง โพะคอง ค่าง ยูดา 2 อ เว๊ โพะคอง เท่อ เว่ง เยรูซเลง พ้า ซ๊า เนง, อ มู่ อ เม้ง มาอาคา, เก อาบีชาโลง อ พูมืง 3 อ เว๊ ลี้ โพะ ทเด้บ้ะ อ ไค๊ กุ้เม้ง, พี่ อ แพ่ แม้ เว๊ ลู่ง อ เมะแซ พ้า นอ, ดี๊ อ เว๊ ล อางกีล้าง อ ซ้ะ เมาน่าง ดี๊ กแช่ยาเว, เมะเว๊ อ กแช่แยว้ ด้องซุ้ ดาเว อ พี๊ง อ พู๊ง ลู่ง แย๊ อู้ง แบ 4 เม้ง ฌี้ๆ, ลู่ง ดาเว อ กย้อง นอ, กแช่ยาเว อ เว๊ อ กแช่แยว้ เกล๊าง มีโด้ง เอะ อาบียาง ลู่ง เว่ง เยรูซเลง พ้า ล โด้ง, เมะเว๊ ต๊างทาง เว๊ อ พูแคว๊ เท่งก้ะ-อ้ะ, ดี๊ ไต้ทางต๊างทาง เว่ง เยรูซเลง 5 เมะเว๊ ดาเว แม้ เท่อ อ ฌี้ อ แบ ลู่ง กแช่ยาเว อ เมะแซ พ้า, ดี๊ ล วีงแซยไฆวะ อ ซ้ะ ดี๊ เท่อ พี่ กแช่แยว้ อางแบเลา เอะ-อ้ะ นอ น่าง เม้ง แบ เพล้า อ ชู้, โอ ล เม้ง แบฆ้ะ ดี๊ อูรียา โพล้ง ฮีไท อ ไฌ่ นอ ล้อ 6 ท ดึ้ซึ้ โละซ้ะ เรโฮโบอาง ดี๊ เยโรโบอาง เว๊ นอ โอ เพล้า อาบียาง อ ชู้ แค๊ นอ ล้อ 7 อาบียาง อ ทไพ้ะทแม้ อ แฌ้แพ, ดี๊ ทกุ้เม้ง พี่ อ แม้ เว๊ นอ, แบ ทกวิ้ล้าง-อ้ะ, ลู่ง ไละ กวิ้ไน กจุ้แฆว้ ค่าง ยูดา อ ไฌ่ ล ปะ นอ อ พ้า, ล เมะ แบ-อ้า?, โอ ดี๊ ทดึ้ซึ้ โละซ้ะ เมะเว๊ อาบียาง ดี๊ เยโรโบอาง 8 อาบียาง ซี๊ง ไท้ โอ แบ ดี๊ อ พี๊ง อ พู๊ง ลู่ง แย๊, ดี๊ โพล้ง เคิงล้างบ้า เว๊ อ จู ลู่ง เว่ง ดาเว พ้า, ดี๊ อ พูแคว๊ อาซา เก ทาง ก้ะ กจุ้แฆว้ เท่งก้ะ อ ล่าง อาซา โพะคอง ค่าง ยูดา ( 2ทกน.14:1-15:19 ) 9 ลู่ง อ เนง คี๊ง ชี๊ง ค่าง อีซลาเอง อ กจุ้แฆว้, เมะเว๊ เยโรโบอาง อ ชู้ แค๊ นอ, อาซา โพะคอง ทาง เท่อ เกก้ะ กจุ้แฆว้ ลู่ง ค่าง ยูดา พ้า 10 อ เว๊ โพะคอง เท่อ ลู่ง เว่ง เยรูซเลง พ้า ลี่ง ชี๊ง ล เนง, อ พี๊ง นอ อ เม้ง น่าง มาอาคา, เก อาบีชาโลง อ พูมืง 11 อาซา แม้ เท่อ อ ฌี้ อ แบ, ลู่ง กแช่ยาเว อ เมะแซ พ้า, แบด้องซุ้ ดาเว อ พี๊ง อ พู๊ง ลู่ง แย๊ อู้ง 12 อ เว๊ แม้ ล้างแม่ไฆวะ เค๊เซ๊แคว๊ ซีงลแพ, ลู่ง ท ทื๊งทนะ ทกโช้งกแช่ อ ฌ่าง นอ, ลู่ง ที๊งล่างค่างพ้า, ดี๊ กูงไฆวะ เท้าไฆวะ ทเค่งทฌ้าง, พี่ อ พี๊ง อ พู๊ง ลู่ง แย๊ แม้ทางนี่ เว๊ นอ เลาพะ 13 ดี๊ อ เว๊ ล เกม๊า อ พี๊ง มาอาคา นอ เก ทอดู ล้าแบ, เมะเว๊ อ เท่อ แม้ทางนี่ ทเค่งทฌ้าง, ล้าง แช๊เมะไฌ๊ซ้ะ ลู่ง ทกโช้งกแช่ อาเชรา อ ฌ่าง, ดี๊ อาซา แม้เฌ๊ฌ้องไฆวะ เว๊ อ ทเค่งทฌ้าง นอ, ดี๊ เช้าไฆวะ เว๊ ลู่ง ที๊งพูกล้อง คีโรง 14 แบเด้าะ ทล่างซยื๊งซย้องพ้ะโท๊ ซีงลแพ นอ, ล นี่ แม้ไฆวะ เว๊ ได้ะ แบ, ทึเมะ บี่นอ ฌี้ นอ, อาซา อางกีล้าง อ ซ้ะ เมาน่าง ดี๊ กแช่ยาเว เพล้า อ ชู้ แค๊ นอ ล้อ 15 อ เว๊ แม้นี่ เท่อ พี่ อ แพ่ ดี๊ อ กแช่ เทว๊ เว๊ นอ, ลี้ฆ้าง โชะ เว๊ ลู่ง กแช่แยว้อล่างโอ พ้า, อ นอ, เมะเว๊, จี้, ท๊อง, ดี๊ ทซู๊งทเจ่, ล เม้ง แบ ล เม้ง อาซา แม้ ทฆู๊งทพุ้ โละซ้ะ ดี๊ โพล้ง ซีเรีย, บี่ซุ้ ม ดึ้ซึ้ โพล้ง อีซลาเอง ( 2ทกน.16:1-17:1 ) 16 อาซา ดี๊ บาอาชา โพล้ง อีซลาเอง อกจุ้แฆว้, โอ ดี๊ ทดึ้ซึ้ โละซ้ะ เพล้า อ เว๊ คี๊ง แฌ้ อ ทโพะคอง เท่อ อ แค๊ นอ ล้อ 17 บาอาชา กจุ้แฆว้ ค่าง อีซลาเอง, เฌ๊ทาง ดึ้ซึ้ โละอซ้ะ ดี๊ โพล้ง ยูดา, ดี๊ ไต้ทางนี่ เว่ง รามา, บี่ซุ้ ล เกม๊า โพล้ง ลี้ฆ้าง โอ, ดี๊ ไจทางไฆวะ ลู่ง อาซา กจุ้แฆว้ ค่าง ยูดา นอ อ โอ น่าง แฌ้ แบ 18 อาซา แม้นี่ จี้ ดี๊ ท๊อง เลาพะ, พี่ อ ล้างลื๊อก้ะ ลู่ง กแช่ยาเวอล่างโอ, อ ทล่างอางกีซยองเท่อ นอ อ พ้า, ดี๊ ลู่ง กจุ้แฆว้ อ บลาง อ ทล่างอางกีซยองเท่อ นอ อ พ้า, คลุ้ล้างก้ะ เว๊ อ กดูกแซย่ อ จูง พ้า, ดี๊ กจุ้แฆว้ อาซา เจ่ทาง โพล้ง ลี้ฌูง ทารีงโมง อ พู, เมะเว๊ เบงฮาดะ, ทารีงโมง นอ, เก เฮซีโอง กจุ้แฆว้ ค่าง ซีเรีย นอ อ พู, เฮซีโอง นอ โอ ลู่ง เว่ง ดามากา พ้า, เกม๊า โล้ เอะ เว๊ บี่อี้ง 19 “เกม๊า แน้ ดี๊ แย้ นอ ก โอ ดี๊ ทเอิ้งล้าง โละซ้ะ, บี่ซุ้ จ แพ่ ดี๊ น แพ่ แม้ เว๊ นอ, แคว่เซ้อ, จ โซ๊ง ทแบเกล๊าง เอะ แน้ เก จี้ ดี๊ ท๊อง, เกม๊า น ลี้ แม้ ล้างกวางไฆวะ น ทเอิ้งล้าง โละซ้ะ, พี่ น แม้-อ้ะ ดี๊ บาอาชา กจุ้แฆว้ ค่าง อีซลาเอง นอ, บี่ซุ้ อ เว๊ นอ ม ฌ้าไฆวะ อ ซึ้พู ไจแดไฆวะ แย้” 20 ฌ้อง เบงฮาดะ นอ ช๊องแน กจุ้แฆว้ อาซา, ดี๊ โซ๊ง กเย่ อ ซึ้พูมู๊ง อ คู ซีงลแพ นอ, ลี้ ดึ้ซึ้ โพล้ง อีซลาเอง อ เว่ง ล จอง แบ ล จอง, ดี๊ อ ซื๊งเว๊ ดึ้ซึ้ น้า เว่ง อีโยง, เว่ง ดาง, เว่ง อาเบงเบมาอาคา, ดี๊ ลู่ง คีงเนโร พ้า นอ เลาพะ, เลา ดี๊ ค่าง นาทาลี พ้า 21 ท่อง บาอาชา ซีงแฌ๊ ทไฌ่ อี้ง นอ, ล ไต้ทาง เว่ง รามา ล้าแบ, ดี๊ อ เว๊ นอ โอ ลู่ง เว่ง ทีราซา พ้า 22 ฌ้อง กจุ้แฆว้ อาซา โล้ล้าง เท่อ เฆ้ง ค่าง ยูดา พ้า, ล อางกี เมะ โพล้ง น่าง แฌ้ แบ, ฌ้อง อ ซื๊งเว๊ซีงลแพ นอ โชะไฆวะ เว่ง รามา อ โล่ง, ดี๊ เซง ลู่ง เว่ง พ้า พี่ บาอาชา เจ่ เว๊ ไต้ทาง เท่อ นอ, ฌ้อง กจุ้แฆว้ อาซา แม้นี่ เว๊, เฌ๊ไท้ ไต้ ฌี้ ทาง ก้ะ เว่ง เกบา ลู่ง เบงยามีง พ้า, ดี๊ เว่ง มีซปา 23 อาซา อ ทไพ้ะทแม้ อ แฌ้แพ เลาพะ, เลา ดี๊ กเย่ อ ท แม้ พี่ แม้ เว๊ ดี๊ อดู้งอยาง, ดี๊ ทกุ้เม้ง พี่ อ แม้ เว๊ ดี๊ เว่ง พี่ อ ไต้ ฌี้ ทาง ไท้ เว๊ ล แพ นอ, แบ ทกวิ้ล้าง-อ้ะ, ลู่ง ไละ กวิ้ไน กจุ้แฆว้ ค่าง ยูดา ล ปะ นอ อ พ้า, ล เมะ แบ-อ้า?, แบเด้าะ ท่อง อ ซ้ะแซย่ เย้า นอ, อ เว๊ แบทแช๊ ลู่ง อ คาง 24 ดี๊ อาซา นอ ซี๊ง ไท้ โอ แบ ดี๊ อ พี๊ง อ พู๊ง ลู่ง แย๊ ลู่ง อ พู๊ง ดาเว อ เว่ง พ้า, ดี๊ อ พูแคว๊ เยโฮชาฟา ทาง โพะคอง เท่อ เท่งก้ะ อ ล่าง นาด้ะ โพะคอง โพล้ง อีซลาเอง 25 เยโรโบอาง อ พูแคว๊ นาด้ะ, โพะคอง โพล้ง อีซลาเอง ลู่ง คี๊ง เนง ล เนง, พี่ กจุ้แฆว้ ค่าง ยูดา เมะเว๊ อาซา อ ชู้ แค๊, อ เว๊ โพะคอง อีซลาเอง คี๊ง เนง 26 อ เว๊ แม้ ทอ้าทซ๊าง ลู่ง กแช่ยาเว อ เมะแซ พ้า, ลี้ โพะ เกล้ ล บ้อง แย๊, พี่ อ แพ่ ลี้ง เว๊ ดี๊ ทเด้บ้ะ, พี่ อ เว๊ แม้ เว๊ นอ, ดึ้ เกม๊า เว๊ อีซลาเอง แม้ ทเด้บ้ะ ปะ 27 อาฮียา อ พู เมะเว๊ บาอาชา, โพล้ง ยีซาคา อ ชื้อ นอ ช๊องมอง กไบล้ะ เท่อ ดี๊-อ้ะ, ดี๊ แม้ซี๊ง เว๊ ลู่ง เว่ง กีเบโทง พ้า, พี่ เก โพล้ง ฟีลีเตีย อ เท่อ นอ, เมะเว๊ นาด้ะ ดี๊ โพล้ง อีซลาเอง เลาพะ นอ, เฌ๊ พ้องวะ เว่ง กีเบโทง 28 ทบี่นอ, บาอาชา แม้ซี๊ง-อ้ะ ลู่ง ซ๊า เนง ล เนง, พี่ อาซา เก ค่าง ยูดา อ กจุ้แฆว้ อ แค๊, ดี๊ ทาง โพะคอง เท่อ เท่งก้ะ เว๊ อ ล่าง 29 ท่อง อ เว๊ เก กจุ้แฆว้ นอ, อ เว๊ แม้ซี๊ง เยโรโบอาง อชื้ออชะ เลาพะ, โพล้ง ล พ้องพลิ้ไฆวะ น่าง แฌ้ แบ, อ เว๊ แม้เฌ๊ฌ้อง เว๊ เลาพะ บี่ซุ้ดี๊ กแช่ยาเว อลู่งอแท๊, พี่ กแช่แยว้ อ โม อาฮียา โพล้ง ชีโล โล้ เว้ เว๊ นอ ล้อ 30 เป๊งนี่ ลู่ง ทเด้บ้ะ ล เม้ง แบ ล เม้ง, พี่ เยโรโบอาง แม้ เว๊, ดี๊ อ เว๊ ดึ้ เกม๊า โพล้ง อีซลาเอง แม้ ทเด้บ้ะ ปะ, ดี๊ เป๊งนี่ อ เว๊ ดึ้ เกม๊า กแช่ยาเว โพล้ง อีซลาเอง อ กแช่แยว้ อ ซ้ะทาง 31 นาด้ะ อ ทไพ้ะทแม้ อ แฌ้แพ, ดี๊ ทกุ้เม้ง พี่ อ แม้ เว๊ นอ แบ ทกวิ้ล้าง-อ้ะ, ลู่ง ไละ กวิ้ไน กจุ้แฆว้ ค่าง อีซลาเอง อ ไฌ่ ล ปะ นอ อ พ้า, ล เมะ แบ-อ้า? 32 อาซา ดี๊ บาอาชา โพล้ง อีซลาเอง อ กจุ้แฆว้ นอ, โอ ดี๊ ทดึ้ซึ้ โละซ้ะ, เพล้า อ ซื๊งเว๊ คี๊ง แฌ้ อี้ง อ ทโพะคอง เท่อ อ แค๊ นอ ล้อ บาอาชา โพะคอง โพล้ง อีซลาเอง 33 ลู่ง ซ๊า เนง ล เนง พ้า, พี่ อาซา กจุ้แฆว้ ค่าง ยูดา อ ชู้ แค๊ นอ, อาฮียา อ พู เมะเว๊ บาอาชา, โพะคอง โพล้ง อีซลาเอง เลาพะ, พี่ อ โอ ลู่ง เว่ง ทีราซา พ้า คี๊ง ชี๊ง ลี่ง เนง 34 อ เว๊ แม้ ทอ้าทซ๊าง ลู่ง กแช่ยาเว อ เมะแซ พ้า, ดี๊ ลี้ โพะ เยโรโบอาง อ เกล้, ดี๊ ทเด้บ้ะ อ เกล้, พี่ อ ดึ้ เกม๊า โพล้ง อีซลาเอง แม้ ทเด้บ้ะ ปะ, อ เว๊ นอ แม้ อ ซ้ะ บี่ซุ้ ดี๊ กจุ้แฆว้ เยโรโบอาง, พี่ อ แม้ ทเด้บ้ะ, ดี๊ แม้ฌ้า โพล้ง อีซลาเอง แม้ ทเด้บ้ะ นอ ล้อ |
Pwo Karen Bible (Thailand) © Thailand Bible Society, 2016.
Thailand Bible Society